ຂປລ. ກອງປະຊຸມໝ່ວຍງານຜູ້ຊ່ຽວຊານ ດ້ານການກວດກູ້ລະເບີດເພື່ອມະນຸດສະທຳ ໃນຂອບກອງປະຊຸມລັດຖະມົນຕີປ້ອງກັນ ປະເທດອາຊຽນ-ອາຊຽນບວກ ຄັ້ງທີ 14 ຈັດຂຶ້ນໃນລະຫວ່າງວັນທີ 10-11 ທັນວາ 2024 ທີ່ເມືອງວັງວຽງ ແຂວງວຽງຈັນ ສປປ ລາວ ໂດຍການເປັນປະທານຮ່ວມຂອງທ່ານ ພັນເອກ ເຟືອງໄຊ ມີລາກົງ ຮອງຫົວໜ້າກົມພົວພັນຕ່າງປະເທດ, ຫົວໜ້າໜ່ວຍງານວິຊາການ ເຈົ້າໜ້າທີ່ອາວຸໂສປ້ອງກັນປະເທດອາຊຽນ ແຫ່ງ ສປປ ລາວ ແລະ ທ່ານ ພັນເອກ ເຊີເກ ອາບຣາມັອບ ຫົວໜ້າຜູ້ຊ່ຽວຊານທະຫານຊ່າງແສງ ກອງທັບແຫ່ງ ສະຫະພັນຣັດເຊຍ ​ໂດຍມີຜູ້ແທນຈາກບັນດາປະເທດສະມາຊິກອາຊຽນ-ບວກ, ຫ້ອງການຄຸ້ມຄອງລະເບີດບໍ່ທັນແຕກ ແຫ່ງ ສປປ ລາວ, ສູນກວດກູ້ລະເບີດເພື່ອມະນຸດສະທໍາພາກພື້ນອາຊຽນ ແລະ ກອງເລຂາອາຊຽນ ເຂົ້າຮ່ວມ.

ທ່ານ ພັນເອກ ເຟືອງໄຊ ມີລາກົງ ໄດ້ກ່າວວ່າ: ບັນຫາລະເບີດທີ່ບໍ່ທັນແຕກ (UXO) ໄດ້ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ, ສິ່ງແວດລ້ອມ ແລະ ການພັດທະນາເສດຖະກິດ-ສັງຄົມຂອງ ສປປ ລາວ ໂດຍລວມ. ສະນັ້ນ, ການແກ້ໄຂບັນຫາລະເບີດທີ່ບໍ່ທັນແຕກ ຖືເປັນໜຶ່ງໃນວຽກງານບຸລິ ມະສິດຂອງ ສປປ ລາວ ແລະ ຂອບການຮ່ວມມືຂອງ ກອງປະຊຸມລັດຖະມົນຕີປ້ອງກັນປະເທດອາຊຽນ-ບວກ.

ກອງປະຊຸມຄັ້ງນີ້, ໄດ້ປຶກສາຫາລືຫລາຍບັນຫາທີ່ສໍາຄັນ ໂດຍສະເພາະ ໄດ້ຮັບຟັງການສະຫລຸບ-ລາຍງານຫຍໍ້ ກ່ຽວກັບ ຜົນງານການເຄື່ອນໄຫວ ໃນການຈັດຕັ້ງປະຕິບັດແຜນງານ ຂອງໜ່ວຍງານຜູ້ຊ່ຽວ ຊານດ້ານກວດກູ້ລະເບີດເພື່ອມະນຸດສະທໍາ ໂດຍການເປັນປະທານຮ່ວມຂອງກອງທັບ ຣາຊະອານາຈັກ ກໍາປູເຈຍ ແລະ ກອງທັບປົດປ່ອຍປະຊາຊົນຈີນ ໃນຮອບວຽນປີ 2021-2023; ແລກປ່ຽນບົດຮຽນ ແລະ ປະສົບການທີ່ດີ ໃນການກວດກູ້ລະເບີດທີ່ບໍ່ທັນແຕກຂອງອາຊຽນ, ແຜນງານ 3 ປີຂອງໜ່ວຍງານຜູ້ຊ່ຽວຊານ ດ້ານການກວດກູ້ລະເບີດ ເພື່ອມະນຸດສະທໍາ ໂດຍການເປັນປະທານຮ່ວມ ຂອງກອງທັບປະຊາຊົນລາວ ແລະ ກອງທັບສະຫະພັນຣັດເຊຍ ໃນຮອບວຽນປີ 2024-2027 ແລະ ວຽກງານອື່ນໆທີ່ກ່ຽວຂ້ອງ.

ສຳລັບແຜນການວຽກງານ ແລະ ບັນຫາຕ່າງໆ ທີ່ນຳມາປຶກສາຫາລືໃນກອງປະຊຸມຄັ້ງນີ້, ຈະເປັນພື້ນຖານທີ່ສໍາຄັນ ໃຫ້ແກ່ການສືບຕໍ່ຈັດຕັ້ງປະຕິບັດ ບັນດາແຜນງານການຮ່ວມມື ຂອງໜ່ວຍງານດັ່ງກ່າວ. ການເປັນປະທານຮ່ວມຂອງກອງທັບປະຊາຊົນລາວ ແລະ ກອງທັບສະຫະພັນຣັດເຊຍ ໃນຄັ້ງນີ້ ເປັນຄັ້ງທີ 2, ໃນຮອບວຽນປີ 2024-2027, ການເປັນເຈົ້າພາບກອງປະຊຸມ ແລະ ກິດຈະກໍາປີ່ນອ້ອມຂອງໜ່ວຍງານດັ່ງກ່າວ ຈະໄດ້ຈັດຂຶ້ນທີ່ສະຫະພັນ ຣັດເຊຍ ໃນປີ 2025.

KPL