ຂປລ
ຂປລ. ພິທີປະກາດການປ່ຽນແປງຜູ້ຖືຫຸ້ນ ແລະ ປ່ຽນຊື່ຈາກ ບໍລິສັດ ອາລີອັນສ໌ ປະກັນໄພລາວ ຈໍາກັດ ມາເປັນ ບໍລິສັດ ປະກັນໄພ ແຫ່ງປະເທດລາວ ຈໍາກັດ (ບປລ) ຫລື Assurances General Laos (AGL) ຈັດຂຶ້ນໃນວັນທີ 11 ທັນວາ 2024 ພາຍໃຕ້ການເປັນເຈົ້າຂອງກໍາມະສິດ 100% ໂດຍກະຊວງການເງິນ ແຫ່ງ ສປປ ລາວ, ແຕ່ຍັງຄົງຮັກສາມາດຕະຖານ ແລະ ນະໂຍບາຍຕໍ່ລູກຄ້າຄືເກົ່າ, ພ້ອມທັງກຽມຂະຫຍາຍຜະລິດຕະພັນ ການບໍລິການໃນຕໍ່ໜ້າ ເພື່ອຕອບສະໜອງຄວາມຕ້ອງການແທດເໝາະ ກັບຍຸກປັດຈຸບັນ ແລະ ອະນາຄົດ.
ຂປລ. ພິທີປະກາດການປ່ຽນແປງຜູ້ຖືຫຸ້ນ ແລະ ປ່ຽນຊື່ຈາກ ບໍລິສັດ ອາລີອັນສ໌ ປະກັນໄພລາວ ຈໍາກັດ ມາເປັນ ບໍລິສັດ ປະກັນໄພ ແຫ່ງປະເທດລາວ ຈໍາກັດ (ບປລ) ຫລື Assurances General Laos (AGL) ຈັດຂຶ້ນໃນວັນທີ 11 ທັນວາ 2024 ພາຍໃຕ້ການເປັນເຈົ້າຂອງກໍາມະສິດ 100% ໂດຍກະຊວງການເງິນ ແຫ່ງ ສປປ ລາວ, ແຕ່ຍັງຄົງຮັກສາມາດຕະຖານ ແລະ ນະໂຍບາຍຕໍ່ລູກຄ້າຄືເກົ່າ, ພ້ອມທັງກຽມຂະຫຍາຍຜະລິດຕະພັນ ການບໍລິການໃນຕໍ່ໜ້າ ເພື່ອຕອບສະໜອງຄວາມຕ້ອງການແທດເໝາະ ກັບຍຸກປັດຈຸບັນ ແລະ ອະນາຄົດ.
ໃນໂອກາດນີ້, ທ່ານ ໄພທູນ ທ່ຽງລະໄມ ຫົວໜ້າກົມຄຸ້ມຄອງວິສາຫະກິດລັດລົງທຶນ ແລະ ການປະກັນໄພ, ກະຊວງການເງິນ ໄດ້ກ່າວວ່າ: ການປ່ຽນຊື່ໃໝ່ ຂອງບໍລິສັດປະກັນໄພ ແຫ່ງປະເທດລາວ ແມ່ນມີຜົນບັງຄັບໃຊ້ ນັບແຕ່ວັນທີ 21 ພະຈິກ 2024 ເຊິ່ງສະແດງໃຫ້ເຫັນເຖິງຄວາມມຸ່ງໝັ້ນ ເພື່ອສືບຕໍ່ໃຫ້ ບໍລິການປະກັນໄພ ຢ່າງມີຄຸນນະພາບ ແລະ ຄົບວົງຈອນ ແກ່ລູກຄ້າ ທັງປະເພດບຸກຄົນທົ່ວໄປ, ປະເພດທຸລະກິດ, ອົງກອນ ຫລື ຊຸມຊົນ ໃນຂອບເຂດທົ່ວປະເທດ. ເຖິງວ່າຈະມີການປ່ຽນຊື່ໃໝ່ກໍຕາມ, ແຕ່ຍັງສືບຕໍ່ໃຫ້ບໍລິການເປັນປົກກະຕິ, ຮັກສາມາດຕະຖານ ແລະ ນະໂຍບາຍຕໍ່ລູກຄ້າຄືເກົ່າ ທັງນີ້ກໍເພື່ອຮັບປະກັນ ຜົນປະໂຫຍດສູງສຸດຂອງລູກຄ້າ ເຊິ່ງການປ່ຽນແປງຄັ້ງນີ້ ເປັນການສ້າງເງື່ອນໄຂ ແລະ ກາລະໂອກາດໃນການຂະຫຍາຍຕົວ ທາງທຸລະກິດຂອງຂະແໜງປະກັນໄພ ທັງພາຍໃນ ແລະ ຕ່າງປະເທດ.
ການປ່ຽນຊື່ໃໝ່ຄັ້ງນີ້, ສະແດງໃຫ້ເຫັນເຖິງການສືບຕໍ່ທຸ່ມເທປັບປຸງ ໃຫ້ສອດຄ່ອງກັບຄວາມຕ້ອງການຂອງຕະຫລາດປະກັນໄພໃນລາວ, ຍົກສູງຄຸນນະພາບການບໍລິການ, ປະກອບສ່ວນເຂົ້າໃນພາລະກິດສ້າງສາ ແລະ ພັດທະນາເທດຊາດ. ນອກຈາກນີ້, ຍັງເປັນການເອື້ອອຳນວຍ ໃຫ້ບໍລິສັດມີການສ້າງແຜນ ຍຸດທະສາດ ໃນການດຳເນີນທຸລະກິດ ໃຫ້ສອດຄ່ອງ ກັບແຜນຍຸດທະສາດ ການພັດທະນາເສດຖະກິດ-ສັງຄົມ ແລະ ເກາະຫ້ອຍກັບການປະຕິບັດ ວາລະແຫ່ງຊາດ.
ທ່ານ ກີ້ ອາໂປວີ ຜູ້ອໍານວຍການໃຫຍ່ ບໍລິສັດ ປະກັນໄພແຫ່ງປະເທດລາວ ໄດ້ຍົກໃຫ້ເຫັນເຖິງແຜນຍຸດທະສາດ ແລະ ວຽກງານຈຸດສຸມ ທິດທາງແຜນການໃນປີ 2025 ແນໃສ່ເພື່ອຮັບປະກັນການສືບຕໍ່ຂອງທຸລະກິດ ໂດຍສະເພາະ ການສ້າງຄວາມເຊື່ອໝັ້ນຕໍ່ລູກຄ້າເກົ່າ ແລະ ລູກຄ້າໃໝ່, ຄູ່ຮ່ວມທຸລະກິດ, ຕົວແທນປະກັນໄພ ລວມໄປເຖິງພະນັກງານທຸກພາກສ່ວນ.
ຂ່າວ: ກິດຕາ, ພາບ: ຂັນໄຊ
KPL
