ຂປລ. ໃນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ທີ່ໄດ້ອັດລົງດ້ວຍຜົນສຳເລັດອັນຈົບງາມ ໃນວັນທີ 12 ທັນວາ 2024, ຊຶ່ງໄດ້ພິຈາລະນາ, ຕົກລົງ, ຮັບຮອງ ເອົາຫລາຍບັນຫາສຳຄັນຂອງຊາດ ໂດຍສະເພາະ ໄດ້ພິຈາລະນາ ແລະ ຮັບຮອງເອົາກົດໝາຍ ຈຳນວນ 10 ສະບັບ ຂອງລັດຖະບານ ກໍຄື ກະຊວງ, ຂະແໜງການທີ່ກ່ຽວຂ້ອງ ໃນນັ້ນ, ກົດໝາຍສ້າງໃໝ່ 2 ສະບັບ ຄື: ກົດໝາຍ ວ່າດ້ວຍການພັດທະນາສີມືແຮງງານ, ກົດໝາຍ ວ່າດ້ວຍທີ່ຢູ່ອາໄສ ແລະ ກົດໝາຍປັບປຸງ 8 ສະບັບ ຄື: ກົດໝາຍ ວ່າດ້ວຍທະນາຄານແຫ່ງ ສປປ ລາວ, ກົດໝາຍ ວ່າດ້ວຍສະຫະພັນແມ່ຍິງລາວ, ກົດໝາຍ ວ່າດ້ວຍການດໍາເນີນຄະດີແພ່ງ, ກົດໝາຍ ວ່າດ້ວຍອົງການໄອຍະການປະຊາຊົນ, ກົດໝາຍ ວ່າດ້ວຍການສຶກສາ, ກົດໝາຍ ວ່າດ້ວຍການພັດທະນາ ແລະ ປົກປ້ອງແມ່ຍິງ, ກົດໝາຍ ວ່າດ້ວຍການກວດສອບອິດສະລະ, ກົດໝາຍ ວ່າດ້ວຍການດໍາເນີນຄະດີແພ່ງ ພ້ອມທັງຮັບຮອງເອົາ ການປັບປຸງມາດຕາ 18 ຂອງກົດໝາຍ ວ່າດ້ວຍການລົງທຶນຂອງລັດ ສະບັບປັບປຸງປີ 2015.

          ທ່ານ ຄຳແພງ ວິລະພັນ ກຳມະການຄະນະປະຈຳ, ປະທານກຳມາທິການກົດໝາຍ ສະພາແຫ່ງຊາດ ຊຸດທີ IX ໄດ້ຖະແຫລງຜົນສຳເລັດ ການພິຈາລະນາ ຮັບຮອງເອົາກົດໝາຍ 10 ສະບັບ ດັ່ງກ່າວ, ໃນວັນທີ 12 ທັນວາ 2024 ນີ້ວ່າ: ການພິຈາລະນາ ແລະ ຮັບຮອງເອົາກົດໝາຍ ຈໍານວນ 10 ສະບັບນີ້ ແມ່ນຜົນສໍາເລັດທີ່ສໍາຄັນ ໃນການຈັດຕັ້ງປະຕິບັດແຜນການສ້າງ ແລະ ປັບປຸງກົດໝາຍ ແຕ່ປີ 2023-2025, ແຜນການສ້າງ ແລະ ປັບປຸງກົດໝາຍ    ປະຈໍາປີ 2024 ທັງເປັນການປະກອບສ່ວນສໍາຄັນໃນການປັບປຸງ ແລະ ເພີ່ມທະວີພາຫະນະໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມຂອງປະເທດ ໃຫ້ເປັນລະບົບ ຄົບຊຸດຂຶ້ນຕື່ມ ເພື່ອຮັບປະກັນປົກປ້ອງສິດ ແລະ ຜົນປະໂຫຍດຂອງລັດ, ລວມໝູ່, ບຸກຄົນ, ນິຕິບຸກຄົນ ແລະ ປະຊາຊົນລາວບັນດາເຜົ່າ, ສ້າງຄວາມເຊື່ອໝັ້ນແກ່ນັກລົງທຶນ, ສະກັດກັ້ນ ແລະ ຕ້ານບັນດາປະກົດການຫຍໍ້ທໍ້ ທີ່ເປັນພຶດຕິກໍາລະເມີດກົດໝາຍ ຢູ່ໃນສັງຄົມ, ປະກອບສ່ວນໃນການສ້າງລັດ ໃຫ້ເປັນລັດປະຊາທິປະໄຕ ທີ່ປົກຄອງດ້ວຍກົດໝາຍໃຫ້ເຂັ້ມງວດຂຶ້ນ. ບັນດາກົດໝາຍເຫລົ່ານັ້ນ ເຖິງວ່າໄດ້ຮັບຮອງເອົາແລ້ວກໍຕາມ ກໍາມາທິການກົດໝາຍ ຍັງຈະໄດ້ສືບຕໍ່ສົມທົບກັບ ບັນດາກໍາມາທິການທີ່ກ່ຽວຂ້ອງ ຂອງສະພາແຫ່ງຊາດ, ຄະນະຮັບຜິດຊອບແຕ່ລະກົດໝາຍ ແລະ ພາກສ່ວນທີ່ກ່ຽວຂ້ອງ ປັບປຸງ, ຮຽບຮຽງເນື້ອໃນ ໃຫ້ສໍາເລັດສົມບູນ ເພື່ອລາຍງານຄະນະປະຈໍາສະພາແຫ່ງຊາດ ກ່ອນສະເໜີປະທານປະເທດ ພິຈາລະນາ ອອກລັດຖະດໍາລັດ ປະກາດໃຊ້ຢ່າງເປັນທາງການ ຕາມລະບຽບການທີ່ກໍານົດໄວ້.

          ທ່ານ ຄຳແພງ ວິລະພັນ ຍັງໄດ້ຕາງໜ້າ​ໃຫ້ຄະນະປະຈໍາສະພາແຫ່ງຊາດ ສະແດງຄວາມຍ້ອງຍໍ ຊົມເຊີຍ ຢ່າງ​ສຸດອົກສຸດ​ໃຈ ຕໍ່ບັນດາສະມາຊິກສະພາແຫ່ງຊາດ ທີ່ໄດ້ເອົາໃຈໃສ່ປະກອບຄໍາຄິດຄໍາເຫັນ ຢ່າງຕັ້ງໜ້າ ແລະ ບັນດາກະຊວງ, ອົງການ ທີ່ໄດ້ສຸມໃສ່ສ້າງ ແລະ ປັບປຸງກົດໝາຍ ເຖິງຈະມີສະພາບຄວາມຫຍຸ້ງຍາກ ທາງດ້ານເສດຖະກິດພາຍໃນ ສະພາບການຜັນແປຂອງໂລກ ແລະ ພາກພື້ນ ແຕ່ກໍບໍ່ເປັນອຸປະສັກ, ທຸກພາກສ່ວນ ລ້ວນແຕ່ມີຄວາມຮັບຜິດຊອບການເມືອງສູງຂອງພາກສ່ວນຕ່າງໆ ໄດ້ເຮັດໃຫ້ວຽກງານໃນການປະຕິບັດໜ້າທີ່ ສ້າງ ແລະ ປັບປຸງກົດໝາຍ ສຳເລັດຕາມການຄາດໝາຍ.

 ຂ່າວ: ທະນູທອງ, ພາບ: ຂັນໄຊ

KPL