ຂປລ
ຂປລ. ໃນພາກບ່າຍຂອງການດຳເນີນ ກອງປະຊຸມສະໄໝສາມັນ ເທື່ອທີ 8 ຂອງກອງປະຊຸມສະພາແຫ່ງຊາດຊຸດທີ IX ພາຍໃຕ້ການເປັນປະທານຂອງ ທ່ານ ຄຳໃບ ດຳລັດ ຮອງປະທານ ສະພາແຫ່ງຊາດ, ບັນດາສະມາຊິກສະພາແຫ່ງຊາດ ໄດ້ສຸມໃສ່ປະກອບຄຳຄິດຄຳເຫັນໃສ່ ຮ່າງກົດໝາຍວ່າດ້ວຍການສຶກສາ ສະບັບປັບປຸງ
ຂປລ. ໃນພາກບ່າຍຂອງການດຳເນີນ ກອງປະຊຸມສະໄໝສາມັນ ເທື່ອທີ 8 ຂອງກອງປະຊຸມສະພາແຫ່ງຊາດຊຸດທີ IX ພາຍໃຕ້ການເປັນປະທານຂອງ ທ່ານ ຄຳໃບ ດຳລັດ ຮອງປະທານ ສະພາແຫ່ງຊາດ, ບັນດາສະມາຊິກສະພາແຫ່ງຊາດ ໄດ້ສຸມໃສ່ປະກອບຄຳຄິດຄຳເຫັນໃສ່ ຮ່າງກົດໝາຍວ່າດ້ວຍການສຶກສາ ສະບັບປັບປຸງ ໃນນັ້ນ ທ່ານ ມາຍຟອງ ມາຍຊາຍ ສະມາຊິກ ສະພາແຫ່ງຊາດ ປະຈຳເຂດເລືອກຕັ້ງເຂດ 12 ແຂວງຄຳມ່ວນ ສະເໜີໃຫ້ກະຊວງສຶກສາທິການ ແລະ ກິລາ ເພີ່ມທັກສະພາສາອັງກິດຂັ້ນພື້ນຖານ ເຂົ້າໃນຊັ້ນປະຖົມປີທີ 1 ເນື່ອງຈາກວ່າປັດຈຸບັນ ມີໂຮງຮຽນຊັ້ນປະຖົມປີທີ 1 ແລະ ອະນຸບານ ບາງເມືອງ ແມ່ນໄດ້ເອົາທັກສາດັ່ງກ່າວ ເຂົ້າມາສິດສອນແລ້ວ.
ພ້ອມນີ້, ທ່ານ ມາຍຟອງ ມາຍຊາຍ ຍັງໄດ້ສະເໜີໃຫ້ ກະຊວງສຶກສາທິການ ແລະ ກິລາ ເນັ້ນໃສ່ການພັດທະນາທັກສະການສຶກສາ ສຳລັບຊັ້ມປະຖົມສຶກສາ ແມ່ນເນັ້ນໃສ່ພັດທະນາ ທັກສະໃນການອ່ານ, ທັກສະໃນການຂຽນ, ການຄຳນວນ, ການຄົ້ນຄິດ ຫລື ການແກ້ໄຂບັນຫາອື່ນໆ. ທັງນີ້, ກໍເພື່ອແນໃສ່ໃຫ້ໄດ້ການຮຽນ-ການສອນທີ່ມີມາດຕະຖານ, ມີຄຸນນະພາບ, ມີຄວາມຍືນຍົງ ແນໃສ່ພັດທະນາ ຊັບພະຍາກອນມະນຸດ ໃຫ້ກາຍເປັນພົນລະເມືອງດີ, ມີຄຸນສົມບັດສິນທຳປະຕິວັດ, ມີຄວາມຮູ້ຄວາມສາມາດ, ມີວິຊາຊີບ, ມີຄວາມຊຳນານງານ, ປະກອບສ່ວນເຂົ້າໃນ ການປົກປັກຮັກສາ ແລະ ພັດທະນາປະເທດຊາດ, ສະເໜີໃຫ້ກະຊວງສຶກສາ ເພີ່ມນະວັດຕະກຳປັນຍາປະດິດ ຫລື ເອໄອ ເຂົ້າໃນການສຶກສາ ເພາະເປັນສິ່ງທີ່ ສຳຄັນຫລາຍ ໃນລະບົບການສຶກສາ ໃນປັດຈຸບັນ ກໍຄື ໃນອະນາຄົດ; ສະເໜີໃຫ້ກະຊວງສຶກສາ ເນັ້ນໃສ່ການຮຽນຮູ້ຕະຫລອດຊີວິດ ຢ່າງຕໍ່ເນື່ອງ ເພື່ອຮັບປະກັນໃຫ້ສາມາດດຳເນີນ ການສິດສອນຕໍ່ໄດ້ ເຖິງວ່າຈະຢູ່ໃນສະພາບ ທີ່ມີການລະບາດຂອງພະຍາດ ເຊິ່ງໄລຍະຜ່ານມາ ທົ່ວໂລກ ກໍຄື ສປປ ລາວ ໄດ້ເກີດການແພ່ລະບາດ ຂອງພະຍາດໂຄວິດ-19 ສົ່ງຜົນກະທັບໃຫ້ ຫລາຍສະຖານການສຶກສາ ໄດ້ໂຈະການຮຽນ-ການສອນ ແລະ ໃນອະນາຄົດ ສປປ ລາວ ອາດຜະເຊີນກັບ ການລະບາດຂອງພະຍາດ. ສະນັ້ນ, ກະຊວງສຶກສາ ຕ້ອງກະພ້ອມຮັບມື ໂດຍການ ພັດທະນາ ລະບົບການຮຽນ-ການສອນ ແບບລະບົບທາງໄກ, ພັດທະນາຫລັກສູດການຮຽນ-ການສອນ, ເຄື່ອງມືໃນການສິດສອນ ແລະ ຍົກລະດັບຄວາມຮູ້ໃຫ້ຄູ-ອາຈານ.
ຂ່າວ-ພາບ: ກິດຕາ
KPL
