ຂປລ
ຍາມໃດ ພັກ-ລັດ ກໍ່ຖືສໍາຄັນຕໍ່ການສ້າງ ແລະ ພັດທະນາຊັບພະຍາກອນມະນຸດ ເປັນໜ້າທີ່ສໍາຄັນຕົ້ນຕໍ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືການບູລະນະລະບອບ ປະຊາທິປະໄຕ ປະຊາຊົນ ກ້າວຂຶ້ນສູ່ຈຸດໝາຍສັງຄົມນິຍົມ.
*ຍາມໃດ ພັກ-ລັດ ກໍ່ຖືສໍາຄັນຕໍ່ການສ້າງ ແລະ ພັດທະນາຊັບພະຍາກອນມະນຸດ ເປັນໜ້າທີ່ສໍາຄັນຕົ້ນຕໍ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືການບູລະນະລະບອບ ປະຊາທິປະໄຕ ປະຊາຊົນ ກ້າວຂຶ້ນສູ່ຈຸດໝາຍສັງຄົມນິຍົມ. ພາຍໃຕ້ການນໍາພາຂອງພັກ ແລະ ລັດຖະບານ ຕະຫລອດ 49 ປີ ແຫ່ງການສ້າງຕັ້ງ ສປປ ລາວ ໂດຍສະເພາະໃນໄລຍະແຫ່ງການປະຕິບັດແນວທາງປ່ຽນແປງໃໝ່ປະເທດຊາດພວກເຮົາໄດ້ຮັບການປົກປັກຮັກສາ ແລະ ສ້າງສາພັດທະນາໃນຫລາຍດ້ານ, ອັນສໍາຄັນພວກເຮົາສາມາດປົກປັກຮັກສາໄດ້ຄວາມເປັນເອກະລາດ, ອະທິປະໄຕ ແລະ ຜືນແຜ່ດິນອັນຄົບຖ້ວນຂອງຊາດໄວ້ໄດ້ຢ່າງໝັ້ນຄົງ, ລະບອບການເມືອງ ມີສະຖຽນລະພາບໜັກແໜ້ນ, ສັງຄົມມີຄວາມສະຫງົບປອດໄພ ແລະ ມີຄວາມເປັນລະບຽບຮຽບຮ້ອຍ ໂດຍພື້ນຖານ, ປະຊາຊົນມີຄວາມສາມັກຄີປອງດອງ ແລະ ທໍາມາຫາກິນດ້ວຍຄວາມເບີກບານມ່ວນຊື່ນທັງໝົດນີ້ຈະເປັນພື້ນຖານອັນໜັກແໜ້ນເຮັດໃຫ້ປະເທດຊາດພວກເຮົາຫລຸດພົ້ນອອກຈາກສະຖານະພາບຄວາມດ້ອຍພັດທະນາ ແລະ ກ້າວໄປສູ່ປະເທດກໍາລັງພັດທະນາທີ່ມີລາຍຮັບປານກາງ ແລະ ກ້າວສູ່ທິດທາງການພັດທະນາສີຂຽວຍືນຍົງ. ຕະຫລອດໄລຍະຜ່ານມາ, ພັກເຮົາໄດ້ວາງແນວທາງ, ແຜນນະໂຍບາຍກ່ຽວກັບການພັດທະນາວຽກງານການສຶກສາ. ພ້ອມທັງເປີດກວ້າງໃຫ້ທຸກພາກສ່ວນໃນທົ່ວສັງຄົມ ໂດຍສະເພາະແມ່ນພາກເອກະຊົນໃຫ້ມີສ່ວນຮ່ວມໃນການພັດທະນາດ້ານການສຶກສາ ແລະ ຂະ ຫຍາຍຕາໜ່າງການສຶກສາອອກສູ່ຊົນນະບົດເຂດຫ່າງໄກສອກຫລີກໃຫ້ທົ່ວເຖິງ.
ທ່ານ ໄກ່ອໍາພອນ ພົມມະຈັນ ອາຊີບພະນັກງານລັດຢູ່ແຂວງເຊກອງ ແມ່ນຄອບຄົວໜຶ່ງທີ່ມັກ-ຮັກ ໃນດ້ານການພັດທະນາຊັບພະຍາກອນມະນຸດ ແລະ ສຶກສາຮຽນຮູ້ໃນດ້ານບໍລິຫານການສຶກສາຈຶ່ງໄດ້ ຂໍອະນຸຍາດຈາກຂະແໜງການທີ່ ກ່ຽວຂ້ອງເພື່ອດໍາເນີນກິດຈະການ ບໍລິການດ້ານການສຶກສາ ແລະ ໄດ້ສ້າງຕ້ັງໂຮງຮຽນຂ້ຶນໃນສົກປີ 2017-2018 ໂດຍໃສ່ຊື່: ໂຮງຮຽນອະນຸບານ-ປະຖົມສຶກສາສົມບູນເດັກດີ ຕັ້ງຢູ່ບ້ານໂນນມີໄຊ ເມືອງ ລະມາມ ແຂວງເຊກອງ (ໃຈກາງເທສະບານແຂວງ) ມີເນື້ອທີ່ທັງ ໝົດ 1.271,55 ຕາແມັດ, ມີອາຄານຮຽນ 2 ຫລັງ, ມີຊັ້ນອະນຸບານ- ລ້ຽງເດັກ 4 ຫ້ອງ, ຊັ້ນປະຖົມ 8 ຫ້ອງ. ນອກນັ້ນ, ຍັງມີຫ້ອງຈັດກິດຈະກຳ, ຫ້ອງຫລິ້ນສໍາລັບເດັກ, ຫ້ອງສະໝຸດ, ຫ້ອງອາຫານທ່ຽງ ແລະ ສິ່ງອໍານວຍຄວາມສະດວກອື່ນໆ. ນັບແຕ່ມື້ສ້າງຕັ້ງທາງໂຮງຮຽນໄດ້ເອົາໃຈໃສ່ປັບປຸງ-ພັດທະນາພື້ນຖານໂຄງລ່າງຕິດພັນກັບການພັດທະນາຮູບແບບການຮຽນ-ການສອນ ໂດຍຖືເອົາຄຸນນະພາບເປັນຫລັກດ້ວຍການຊຸກຍູ້ໃຫ້ຄູ-ອາຈານພັດທະນາຕົນເອງ, ຫັນເອົາການຮຽນ-ການສອນເປັນທັນສະໄໝ ເພື່ອຖ່າຍທອດຄວາມຮູ້ໃຫ້ນັກຮຽນໄດ້ຢ່າງມີປະສິດທິພາບ; ມຸ່ງໝັ້ນໃນການລ້ຽງເບິ່ງເດັກແຍງໃຫ້ມີຄວາມປອດໄພ ຄວບຄູ່ກັບການຈັດກິດຈະກຳໃຫ້ຫລາກຫລາຍ, ນໍາໃຊ້ຫລັກສູດການຮຽນ-ການສອນ, ປະຕິບັດ 3 ຂໍ້ແຂ່ງຂັນ 3 ລັກສະນະ ແລະ 5 ຫລັກມູນຂອງກະຊວງສຶກສາທິການ ແລະ ກິລາ ວາງອອກຢ່າງເຂັ້ມງວດເພື່ອພັດທະນາເດັກໃຫ້ເໝາະສົມຕາມໄວອາຍຸ ກຽມພ້ອມກ້າວສູ່ຄວາມເປັນຜູ້ໃຫຍ່ ທີ່ມີຄວາມຮູ້ຄວາມສາມາດໃນອະນາຄົດ ແລະ ເປັນລູກທີ່ດີຂອງພໍ່- ແມ່.
ດ້ວຍຄວາມມຸ່ງໝັ້ນໃນການພັດທະນາ ເຮັດໃຫ້ສັງຄົມ ກໍຄື ພໍ່- ແມ່ຜູ້ປົກຄອງເດັກມີຄວາມເຊື່ອໝັ້ນ ແລະ ໄວ້ວາງໃຈຈິ່ງໄດ້ນໍາເອົາລູກ- ຫລານຂອງຕົນມາເຂົ້າຮຽນພາຍ ໃນໂຮງຮຽນເດັກດີເພີ່ມຂຶ້ນໃນແຕ່ລະປີ.ໃນນີ້, ສົກຮຽນ 2017- 2018 ປີທຳອິດ ທີ່ເປີດການຮຽນ- ການສອນມີພຽງແຕ່ 3 ຫ້ອງຮຽນ ຄື: ຫ້ອງອະນຸບານ 1, ອະນຸບານ 2 ແລະ ຫ້ອງອະນຸບານ 3 ມີນັກຮຽນ ທັງໝົດ 76 ນ້ອງ, ຍິງ 36 ນ້ອງ, ມີຄູສອນ 7 ຄົນ; ຕໍ່ມາໃນສົກຮຽນ 2023 - 2024 ມີນັກຮຽນທັງໝົດ 375 ນ້ອງ, ຍິງ 199 ນ້ອງ, ມີຄູ ສອນທັງໝົດ 18 ຄົນ. ດ້ວຍຄວາມເອົາໃຈໃສ່ປັບປຸງ-ພັດທະນາພ້ືນຖານໂຄງລ່າງ, ພັດທະນາຮູບແບບການຮຽນ-ການສອນ ແລະ ຈາກການປະເມີນຂອງຂະແໜງການກ່ຽວຂ້ອງ.
ໃນສົກຮຽນ 2018-2019 ໂຮງຮຽນພວກເຮົາໄດ້ຮັບນາມມະຍົດ ເປັນໂຮງຮຽນຕົວແບບ. ນອກນີ້, ຍັງໄດ້ຮັບການຍ້ອງຍໍຈາກຂະແໜງການຕ່າງໆຂັ້ນແຂວງ ແລະ ເມືອງ ຈົນເຮັດໃຫ້ມີບັນດາໂຮງຮຽນຈາກ 4 ຕົວເມືອງໃນທົ່ວແຂວງມາຖອດຖອນບົດຮຽນນໍາ ເພື່ອສືບຕໍ່ພັດທະນາໂຮງຮຽນເດັກດີໃຫ້ກາຍເປັນໂຮງຮຽນຕົວແບບທີ່ມີຄຸນນະພາບ ອີກແຫ່ງໜຶ່ງຂອງເມືອງລະມາມ ກໍຄືແຂວງເຊກອງ ພວກເຮົາຈະຍຶດໝັ້ນຖືເອົາຫລັກການບໍລິຫານການສຶກສາ ໂດຍເນັ້ນຄຸນນະພາບການຮຽນ-ການສອນເປັນຫລັກ, ປັບປຸງຮູບແບບການຮຽນ-ການສອນດ້ວຍການເພີ່ມກິດຈະກຳ, ໃຫ້ຫລາກຫລາຍຮູບແບບ ແລະ ຫັນໄປສູ່ການຮຽນ-ການສອນທີ່ທັນ ສະໄໝຂຶ້ນເທື່ອລະກ້າວ; ເອົາໃຈໃສ່ສົ່ງເສີມຝຶກຄູ-ອາຈານໃນໂຮງຮຽນໄປຍົກລະດັບ, ເຂົ້າຮ່ວມຝຶກອົບຮົມ ແລະ ແລກປ່ຽນຖອດຖອນບົດຮຽນກັບບັນດາໂຮງຮຽນແຫ່ງຕ່າງໆພາຍໃນແຂວງ, ຕ່າງແຂວງ ກໍຄືຕ່າງປະເທດ.
ທັງນີ້ ກໍເພື່ອເຮັດໃຫ້ຄູ-ອາຈານໄດ້ມີປະສົບການ, ມີທັກສະການສອນອັນໃໝ່ໃນການສົ່ງຄວາມຮູ້ໃຫ້ນັກຮຽນ ແລະ ສ້າງ ໃຫ້ໄດ້ນັກຮຽນດີ-ຮຽນເກັ່ງ ເພື່ອເຂົ້າຮ່ວມສອບເສັງນັກຮຽນເກັ່ງໃນຂັ້ນຕ່າງໆ. ພ້ອມທັງປະກອບສ່ວນເຂົ້າໃນການປະຕິບັດແນວທາງຂອງພັກ, ແຜນນະໂຍບາຍຂອງລັດ ໃນດ້ານການພັດທະນາການສຶກສາ-ການພັດທະນາຊັບພະຍາກອນມະນຸດຕອບສະໜອງໃຫ້ແກ່ການພັດທະນາເສດຖະກິດ-ສັງຄົມ ໃນເງື່ອນໄຂໃໝ່ ກໍຄືການສ້າງວຽກເຮັດງານທໍາໃຫ້ນັກສຶກສາ ຜູ້ທີ່ຮຽນຈົບວິຊາຊີບຄູ ແລະ ຜູ້ທ່ີມັກຮັກໃນອາຊີບຄູຕື່ມອີກ.
KPL
