*ອາທິດ​ຜ່ານ​ມາ​ແຂວງ​ສາລະ​ວັນ ​ໄດ້​ຈັດ​ບຸນ​ປະເພນີແຫ່ພະໄຕປີດົກ​ເພື່ອສືບສານວັດທະນະທໍາ ລໍາວົງສາລະວັນ ຕິດພັນກັບການສະເຫລີມສະຫລອງປີທ່ອງທ່ຽວລາວ ປີ 2024 ​ໂດຍ​ໃນ​ງານ​ຄັ້ງ​ນີ້ ກໍ​ມີ​ຫລາຍ​ກິດຈະ​ກໍາ​ທີ່ໜ້າສົນ​​ເປັນ​ຕົ້ນ​ແມ່ນການປະກວດນາງງາມ ວັດທະນະທຳບັນດາເຜົ່າ ​ເພື່ອ​ຄົ້າຫາ​ສາວ​ງາມ ທີ່​ງາມ​ພ້ອມທັງບຸກຄະ​ລິກ, ໜ້າຕາ, ຄວາມ​ຮູ້ຄວາມ​ສາມາດ ທີ່​ຈະ​ໄດ້​ເປັນ​ໂຕ​ແທນ​​ແຂວງ ​ໃນ​ການ​ເຜີ​ຍ​ແຜ່ສິລະ​ປະວັດ​ທະນະ​ທໍາ ​​ໃຫ້​ສັງຄົມໄດ້​ຮັບ​ຮູ້​ຫລາຍ​ຂຶ້ນ.

   ງານປະກວດຄັ້ງນີ້ ມີຜູ້ເຂົ້າຮ່ວມປະກວດທັງໜົດ 18 ສາວງາມ ທີ່ເປັນ​ໂຕແທນ ຈາກ10 ເຜົ່າພາຍໃນແຂວງສາລະວັນ ທີ່ມາຈາກ 8 ຕົວເມືອງ ມາ​ປະຊັນ​ຄວາມ​ສາມາດ​ໃນ​ດ້ານ​ຕ່າງໆ ບໍ່​ວ່າ​ຈະ​ເປັນ​ການຍ່າງ​ແບບ, ການສະ​ແດງ​ຄວາມ​ສາມາດ​ພິ​ເສດ ​ແລະ ການ​ຕອບ​ຄໍາ​ຖາມ  ​ເພື່ອ​ເອົາ​ຊະນະ​ໃຈ​ຄະນະ​ກໍ​າມະ​ການ ​ເຊິ່ງຜ່ານການປະກວດ ສາມາດຄັດເລືອກໄດ້ນາງງາມທີ່ມີຄວາມຮູ້, ຄວາມສາມາດທີ່ມີພອນສະຫວັນ ຄົບຕາມມາດຖານເງື່ອນໄຂຂອງຄະນະກຳມະການວາງອອກ ນັ້ນ​ຄື ໝາຍເລກ 12 ນາງ ນຸດວິໄລ ຂຸນສະນິດ ໄດ້ຮັບສາຍສະພາຍ, ໃບຢັ້ງຢືນ ແລະ ເງິນສົດ ຈຳນວນ 3 ລ້ານກີບ; ອັນດັບທີ 2 ໄດ້ແກ່ໝາຍເລກ 13 ນາງ ພອນທິບ ໄຊມົນຕີ ໄດ້ສາຍສະພາຍ, ໃບຢັ້ງຢືນ ແລະ ເງີນສົດ ຈຳນວນ 2 ລ້ານກີບ; ອັນດັບທີ 3 ໄດ້ແກ່ ໝາຍເລກ 4 ນາງ ຈຳປາ ເທບທອງໃສ ໄດ້ສາຍສະພາຍ, ໃບຢັ້ງຢືນ ແລະ ເງີນສົດ ຈຳນວນ 1 ລ້ານກີບ.

    ການຈັດງານແຂ່ງຂັນ-ປະກວດ ໃນງານບຸນປະເພນີ ແຫ່ພະໄຕປິດົກ, ສືບສານວັດທະນະທໍາ, ລໍາວົງສາລະວັນ ຕິດພັນກັບການສະ​ເຫລີມສະຫລອງປີທ່ອງທ່ຽວລາວ 2024 ທີ່ແຂວງສາລະວັນ ປະຈໍາປີ 2024  ຄັ້ງນີ້ ຈຸດປະສົງ ແມ່ນການສົ່ງເສີມວັດທະນະທໍາ ທີ່ເປັນມໍລະດົກຂອງຊາດ ແລະ ຂອງທ້ອງຖີ່ນ ທັງເປັນການຈັດຕັ້ງຜັນຂະຫຍາຍແນວທາງນະໂຍບາຍ ຂອງພັກ-ແຜນພັດທະນາ ເສດຖະກິດສັງຄົມຂອງພັກ-ລັດ, ກໍ່ຄືມະຕິ 25 ຂອງກົມການເມືອງສູນກາງພັກ ແລະ ສ້າງຂະບວນການຂໍ່ານັບຊົມເຊີຍກອງປະຊຸມໃຫ່ຍ 03 ຂັ້ນຂອງພັກ, 03 ວັນບຸນປະຫວັດສາດ ຄື: ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ ( 22 ມີນາ 1955-22 ມີນາ 2025); ວັນສະຖາປະນາ ສປປ ລາວ ຄົບຮອບ 50 ປີ ( 2 ທັນວາ 1975 ຫາ 2 ທັນວາ 2025) ແລະ ວັນເກີດປະທານ ໄກສອນ ພົມວິຫານ ທີ່ເຄົາລົບຮັກ ຄົບຮອບ 105 ປີ ( 13 ທັນວາ 1920 ຫາ 13 ທັນວາ 2025) ແລະ ການສ້າງຄວາມກຽມພ້ອມ ເປັນເຈົ້າພາບທີ່ດີ ໃນງານມະຫາກໍາກິລານັກຮຽນມັດທະຍົມ ທົ່ວປະເທດ ຄັ້ງທີ VII ທີ່ສາລະວັນ ພວກເຮົາໄດ້ຮັບກຽດເປັນເຈົ້າພາບ ໃນທ້າຍປີນີ້.

ໂດຍ: ມາລີດາ