ຂປລ. ການຟື້ນຟູສະພາບຊຸດໂຊມ ຂອງບັນດາເສັ້ນທາງໃນທົ່ວປະເທດ ໂດຍສະເພາະລະບົບ ເສັ້ນທາງເພື່ອ ອໍານວຍຄວາມສະດວກ ໃຫ້ແກ່ການຂົນສົ່ງ, ການຜະລິດ ແລະ ການທ່ອງທ່ຽວ ແມ່ນບຸລິມະສິດທີ່ບັນຈຸ ໃນແຜນພັດທະນາ 5 ປີ 2021-2025 ຂອງຂະແໜງການ ໂຍທາທິການ ແລະ ຂົນສົ່ງ (ຍທຂ). ໃນນີ້, ໄດ້ສຸມໃສ່ປັບປຸງ ແລະ ຍົກລະດັບທາງຫລວງແຫ່ງຊາດ ທີ່ເປັນທາງຫລວງອາຊຽນ ຈໍານວນ 8 ເສັ້ນ ໃນ ສປປ ລາວ ໃຫ້ໄດ້ມາດຕະ ຖານທາງຫລວງອາຊຽນ ແລະ ສຸມໃສ່ປັບປຸງເສັ້ນທາງໃນທົ່ວປະເທດ ໃຫ້ມີຄວາມສະດວກສະບາຍ ເທື່ອລະກ້າວ.

ທ່ານ ງາມປະສົງ ເມືອງມະນີ ລັດຖະມົນຕີກະຊວງໂຍທາທິການ ແລະ ຂົນສົ່ງ ໄດ້ຂຶ້ນຊີ້ແຈງ ຕໍ່ຄຳຊັກຖາມຂອງ ສະມາຊິກສະພາແຫ່ງຊາດ ໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ IX ວັນທີ 26 ພະຈິກ 2024 ນີ້ວ່າ: ກະຊວງໂຍທາທິການ ແລະ ຂົນສົ່ງ ໄດ້ວາງມາດຕະການໃນການຟື້ນຟູ ສະພາບຊຸດໂຊມຂອງບັນດາເສັ້ນທາງໃນທົ່ວປະເທດ ໂດຍສະເພາະ ລະບົບເສັ້ນທາງ ເພື່ອອໍານວຍຄວາມສະດວກ ໃຫ້ແກ່ການຂົນສົ່ງ, ການຜະລິດ ແລະ ການທ່ອງທ່ຽວ ເປັນຕົ້ນ ທາງຫລວງແຫ່ງຊາດ ທີ່ໄດ້ຮັບການປັບປຸງ ແລະ ຟື້ນຟູ ສໍາເລັດ ມີ 3 ຕອນທາງ ຄື: ທາງເລກ 13 ເໜືອ ແຕ່ ສີເກີດ-ໂພນໂຮງ; ທາງເລກ 13 ໃຕ້ ແຕ່ຊາຍແດນ ນະຄອນຫລວງວຽງຈັນ, ກມ 71 ຫາ ທ່າແຂກ ແລະ ທາງເລກ 11 ແຕ່ ຂົວນໍ້າສັງ ຫາ ຄົກເຂົ້າດໍ. ສຳລັບ ທາງຫລວງແຫ່ງຊາດ ທີ່ກຳລັງດໍາເນີນການປັບປຸງ ແລະ ຟື້ນຟູ ມີຈໍານວນ 5 ເສັ້ນ ຄື: ທາງເລກ 2E ແຕ່ ເມືອງໄຊ ຫາ ເມືອງຂວາ; ທາງເລກ 2W ແຕ່ ເມືອງໄຊ ຫາ ເມືອງ ປາກແບ່ງ; ທາງເລກ 13 ເໜືອ ແຕ່ ສີໄຄ-ສີເກີດ; ທາງເລກ 13 ໃຕ້ ແຕ່ ໄຟແດງ ຫລັກ 21 ຫາ ຊາຍແດນແຂວງບໍລິຄໍາໄຊ ແລະ ທາງເລກ 12 ແຕ່ທ່າແຂກ ຫາ ນາເພົ້າ ຊາຍແດນ ລາວ-ຫວຽດນາມ.

ພ້ອມນີ້, ຍັງໄດ້ສືບຕໍ່ການກໍ່ສ້າງຂົວ ຕາມທາງຫລວງແຫ່ງຊາດ ແລະ ຂົວຂ້າມນໍ້າຂອງ ໃນນັ້ນ, ມີຂົວມິດຕະ ພາບ ລາວ-ໄທ ແຫ່ງທີ 5 (ບໍລິຄໍາໄຊ-ບຶງການ); ຂົວຂ້າມນໍ້າຂອງ ກ້ອນຕື່ນ-ຫ້ວຍແກ້ວ ແຂວງບໍ່ແກ້ວ ແລະ ກໍ່ສ້າງຂົວ 12 ແຫ່ງ ຕາມທາງເລກ 20 ແຕ່ ແຂວງ ຈໍາປາສັກ ຫາ ສາລະວັນ ແລະ ກໍ່ສ້າງຂົວ 6 ແຫ່ງ ຕາມທາງເລກ 8 ແຂວງບໍລິຄໍາໄຊ; ໄດ້ສືບຕໍ່ໂຄງການທີ່ຢູ່ໃນຂັ້ນຕອນ ກະກຽມເຈລະຈາເງິນກູ້ ເພື່ອດໍາເນີນການກໍ່ສ້າງຂົວຂ້າມນໍ້າຂອງ ຫລວງພະບາງ ຫາ ເມືອງຈອມເພັດ; ສືບຕໍ່ຈັດຕັ້ງປະຕິບັດ ວຽກຟື້ນຟູທາງເລກ 8 (ກມ 42+800 ຫາ ກມ 52+325) ທີ່ໄດ້ຮັບ ຄວາມເສຍຫາຍຈາກໄພພິບັດ ໃນປີ 2023; ສືບຕໍ່ຂຶ້ນແຜນງົບປະມານ ບ້ວງກອງທຶນທາງ ເຂົ້າໃນວຽກບູລະນະຮັກສາ ແລະ ສ້ອມແປງທາງຫລວງແຫ່ງຊາດ ແລະ ທາງຫລວງທ້ອງຖິ່ນ ປະຈໍາປີ 2025; ສືບຕໍ່ວຽກປັບປຸງ ແລະ ສ້ອມແປງທາງຫລວງທ້ອງຖິ່ນ ພາຍໃຕ້ໂຄງການ ພັດທະນາ ແລວທາງເສດຖະກິດ ພາກພື້ນອາຊີຕາເວັນອອກສຽງໃຕ້ ເພື່ອການເຊື່ອມໂຍງ ແລະ ເຊື່ອມຈອດ (SEARECC) ຢູ່ 5 ແຂວງ (ຜົ້ງສາລີ, ຫລວງນໍ້າທາ, ອຸດົມໄຊ, ຫລວງພະບາງ ແລະ ໄຊຍະບູລີ) ນອນຢູ່ໃນ 12 ເມືອງ, ກວມເອົາ ຈໍານວນ 13 ເສັ້ນທາງ ລວມຄວາມຍາວທັງ ໝົດ 300 ກິໂລແມັດ; ສືບຕໍ່ວຽກບູລະນະຮັກສາ ແລະ ສ້ອມແປງ ທາງຫລວງທ້ອງຖິ່ນ ພາຍໃຕ້ໂຄງການ LRSP2 ທີ່ນໍາໃຊ້ເງິນ ກູ້ດອກເບ້ຍຜ່ອນຜັນ ຈາກທະນາຄານໂລກ, ອົງການນໍດິກ ເພື່ອການພັດທະນາ, ທະນາຄານລົງທຶນເອີຣົບ ແລະ ງົບປະມານສົມທົບ ຈາກກອງທຶນທາງ ແລະ ແຂວງ. ຈັດຕັ້ງປະຕິບັດຢູ່ 6 ແຂວງ (ຜົ້ງສາລີ, ອຸດົມໄຊ, ໄຊຍະບູລີ, ຫົວພັນ, ຊຽງຂວາງ ແລະ ບໍລິຄໍາໄຊ) ກວມເອົາ ຈໍານວນ 61 ເສັ້ນທາງ ລວມຄວາມຍາວທັງໝົດ 1.968 ກມ; ສືບຕໍ່ໂຄງການພັດທະນາທາງຊົນນະບົດ ທີ່ໄດ້ຮັບທຶນຊ່ວຍເຫລືອລ້າ ຈາກລັດຖະບານ ເຢຍລະມັນ (KFW) ມີ 2 ໂຄງການ ຄື: ໂຄງການພັດທະນາ ທາງຊົນນະບົດ ໄລຍະ 3 (RDP3) ແລະ ໄລຍະ 4 (RDP4) ໄດ້ຈັດຕັ້ງປະຕິບັດຢູ່ 2 ແຂວງ ຄື: ແຂວງຫົວພັນ, ກວມເອົາ 5 ເສັ້ນທາງ ລວງຍາວທັງໝົດ 74,8 ກມ, ກໍ່ສ້າງຂົວ 9 ແຫ່ງ ລວງຍາວ 270 ແມັດ ແລະ ແຂວງຜົ້ງສາລີ ກວມເອົາ 4 ເສັ້ນທາງ ລວງຍາວທັງໝົດ 150 ກມ ແລະ ກໍ່ສ້າງຂົວ 5 ແຫ່ງ ລວງຍາວ 60 ແມັດ.

ສ່ວນໂຄງການປັບປຸງທາງຫລວງທ້ອງຖິ່ນ ເພື່ອການເຊື່ອມໂຍງ-ເຊື່ອມຈອດ ໃຫ້ມີຄວາມທົນທານຕໍ່ກັບການປ່ຽນແປງ ຂອງສະພາບດິນຟ້າອາກາດ CRRCIP ຢູ່ 3 ແຂວງພາກໃຕ້ (ແຂວງຄໍາມ່ວນ, ສະຫວັນນະເຂດ ແລະ ສາລະວັນ) ລວມລວງຍາວປະມານ 300 ກິໂລແມັດ.

ຂ່າວ: ທະນູທອງ

ພາບ: ຂັນໄຊ

KPL