ຂປລ. ໃນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 26 ພະຈິກ 2024 ນີ້, ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຂຶ້ນຊີ້ແຈງຕໍ່ຄຳຊັກຖາມຂອງ ສະມາຊິກສະພາແຫ່ງຊາດ ໃນຫລາຍບັນຫາສຳຄັນ ເປັນຕົ້ນ ລັດຖະບານຈະມີມາດຕະການ ແລະ ວິທີການໃນການສົ່ງເສີມການຜະລິດ ເພື່ອທົດແທນການນຳເຂົ້າ ແລະ ການສົ່ງເສີມການປຸງແຕ່ງ ເພື່ອຊົມໃຊ້ຢູ່ພາຍໃນ ແລະ ສົ່ງອອກ, ຫລຸດຜ່ອນການສົ່ງອອກວັດທຸດິບ ແລະ ກ້າວໄປເຖິງການຢຸດຕິ ການສົ່ງອອກເປັນວັດຖຸດິບ. ຕໍ່ກັບບັນຫານີ້, ລັດຖະບານ ກໍຄື ກະຊວງອຸດສາຫະກຳ ແລະ ການຄ້າ ຈະສຸມໃສ່ແກ້ໄຂ ວາງມາດຕະການຕ່າງໆ ໂດຍຈະ ຊຸກຍູ້ສົ່ງເສີມ ຜູ້ປະກອບການດ້ານຕ່າງໆ, ກຳນົດຈຸດສຸມເພື່ອພະລິດທົດແທນການນຳເຂົ້າ, ປັບປຸງແກ້ໄຂຂໍ້ຄົງຄ້າງທີ່ຍັງຊຳເຮື້ອ, ເປັນຂອດອຸດຕັນ, ປັບປຸງນະໂຍບາຍ, ກົດໝາຍ, ລະບຽບການຕ່າງໆ ເພື່ອດຶງດູດ ແລະ ສົ່ງເສີມການຜະລິດເພື່ອທົດແທນການນຳເຂົ້າ ແລະ ອື່ນໆ.

ທ່ານ ມະໄລທອງ ກົມມະສິດ ໄດ້ໃຫ້ຮູ້ວ່າ: ເພື່ອຊຸກຍູ້ສົ່ງເສີມການຜະລິດ ເພື່ອທົດແທນການນຳເຂົ້າ ລັດຖະບານ ກໍຄື ກະຊວງອຸດສາຫະກຳ ແລະ ການຄ້າ ຈະສືບຕໍ່ຊຸກຍູ້, ສົ່ງເສີມ ການລົງທຶນໃສ່ ການປັບປຸງຖານຂໍ້ມູນ ແລະ ສະຖິຕິ ການຜະລິດ ແລະ ສິນຄ້າ ໃຫ້ມີຄວາມຄົບຖ້ວນ, ຊັດເຈນ ເພາະຈະເປັນພື້ນຖານ ໃຫ້ແກ່ການວິ ເຄາະວິໄຈ ແລະ ວາງແຜນຈຸດສຸມ ທີ່ຖືກຕ້ອງ ແລະ ສອດຄອງກັບສະພາບຄວາມເປັນຈິງ, ກໍານົດຈຸດສຸມ ເພື່ອຜະລິດທົດແທນການນໍາເຂົ້າ ໂດຍກໍານົດເປັນແຕ່ລະລາຍການສິນຄ້າ ອີງໃສ່ຕົວເລກ ການນໍາເຂົ້າທີ່ຜ່ານການວິເຄາະວິໄຈຂໍ້ມູນ ແລະ ສຶກສາຄວາມເປັນໄປໄດ້ ແບບມີວິທະຍາສາດ (ບໍ່ແມ່ນສັງເກດ, ປຶກສາຫາລື ແລະ ສະຫລຸບເອົາ) ເພື່ອສົ່ງເສີມການຜະລິດ. ພ້ອມທັງ ປັບປຸງແກ້ໄຂ ບັນດາຂໍ້ຄົງຄ້າງທີ່ຊຳເຮື້ອ ແລະ ເປັນຂອດອຸດຕັນ ໃຫ້ແກ່ການສົ່ງເສີມການຜະລິດ ທີ່ສະຖາບັນຄົ້ນຄວ້າ ເສດຖະກິດ-ແຫ່ງຊາດ, ຊ່ຽວຊານພາຍໃນ ແລະ ຕ່າງປະເທດ ໄດ້ຄົ້ນຄວ້າ ແລະ ແນະນໍາ ເຊັ່ນ: ການປັບປຸງສະພາບແວດລ້ອມ ໃນການດໍານີນທຸລະກິດ, ການຄ້າ ແລະ ການລົງທຶນ; ແກ້ໄຂບັນຫາຕົ້ນທຶນການຜະລິດ ແລະ ຕົ້ນທຶນການຂົນສົ່ງສູງ; ແກ້ໄຂບັນສະຖຽນລະພາບທາງດ້ານເສດຖະກິດ, ການເງິນ-ເງິນຕາ, ປັບປຸງນະໂຍບາຍ, ກົດໝາຍ, ລະບຽບການ ເພື່ອດຶງດູດ ແລະ ສົ່ງເສີມການຜະລິດ ເພື່ອທົດແທນການນໍາເຂົ້າ ຕາມລາຍການສິນຄ້າ ບູລິມະສິດ ທີ່ລັດຖະບານກໍານົດ. ພ້ອມທັງ, ເອົາໃຈໃສ່ການປຶກສາຫາລື ແລະ ທາບທາມ ຜູ້ເຮັດການຜະລິດຕົວຈິງ ຫລື ຜູ້ລົງທຶນພາຍໃນ ແລະ ຕ່າງປະເທດ ທີ່ມີຄວາມສົນໃຈ, ມີຄວາມໜ້າເຊື່ອຖື, ມີຄວາມສາມາດທາງດ້ານທຶນຮອນ ແລະ ປະສົບການ ເພື່ອປັບປຸງນະໂຍບາຍສົ່ງເສີມ ໃຫ້ສາມາດຊຸກຍູ້ ແລະ ສົ່ງເສີມການຜະລິດແທ້; ປະຕິບັດມາດຕະການປົກປ້ອງ ການຜະລິດພາຍໃນ ຢ່າງລະມັດລະວັງ, ບໍ່ໃຫ້ຂັດກັບພັນທະ ທີ່ເຮົາມີຕໍ່ສາກົນ ໂດຍໃຊ້ມາດຕະການຫ້າມ ຫລື ຈຳກັດຊົ່ວຄາວ ໃນບາງກໍລະນີ, ມາດຕະການກວດ ແລະ ຢັ້ງຢືນມາດຕະຖານ,  ຄຸນນະພາບຂອງສິນຄ້າກ່ອນນໍາເຂົ້າ, ມາດຕະການສົ່ງເສີມ ການຊົມໃຊ້ສິນຄ້າ ທີ່ຜະລິດໄດ້ພາຍໃນ, ຕ້ອງມີກົນໄກຊີ້ນໍາ, ຊຸກຍູ້, ຕິດຕາມກວດກາ, ປະເມີນຜົນການຈັດຕັ້ງປະຕິບັດ ແລະ ປັບປຸງຢ່າງຕໍ່ເນື່ອງ, ເປັນລະບົບ ແລະ ເປັນປົກະຕິ ແຕ່ລະເດືອນ, ແຕ່ລະໄຕມາດ ແລະ ແຕ່ລະປີ.

ສໍາລັບ ລາຍການສິນຄ້າ ອຸປະໂພກ-ບໍລິໂພກ ທີ່ມີຄວາມອ່ອນໄຫວ ແລະ ກະທົບຕໍ່ຊີວິດການເປັນຢູ່ ຂອງ ປະຊາຊົນ ເຊັ່ນ: ສິນຄ້າກະສິກຳ ແລະ ອຸດສາຫະກຳ ປຸງແຕ່ງ ທີ່ຜະລິດໄດ້ພາຍໃນ, ເຖິງຈະບໍ່ນອນໃນ 25 ລາຍການ ສິນຄ້າທີ່ນໍາເຂົ້າຫລາຍ, ກະຊວງອຸດສາຫະກຳ ແລະ ການຄ້າ ກໍໄດ້ປຶກສາຫາລື ກັບກະຊວງກະສິກຳ ແລະ ປ່າໄມ້ ແລະ ແຂວງສະຫວັນນະເຂດ ແລະ ຈະຂະຫຍາຍໄປແຂວງອື່ນ ເພື່ອສ້າງເປັນ “ໂຄງການທົດລອງຕົວແບບ 1+3 (1 ແມ່ນ ຄຸ້ມຄອງລາຄາສິນຄ້າ ແລະ 3 ແມ່ນສົ່ງເສີມການຜະລິດ, ຈຳກັດ ແກ້ໄຂການນໍາເຂົ້າ ແລະ ການຄ້າສິນຄ້ານອກລະບົບ) ໂດຍຈະສຸມໃສ່ ສິນຄ້າບຸລິມະສິດຈໍານວນໜຶ່ງ ເປັນຕົ້ນ ເຂົ້າ, ຊີ້ນໝູ, ໄຂ່, ປາ ເພື່ອສຸມທຶນສົ່ງເສີມວິສາຫະກິດ ຫລື ທຶນຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (ຈນກ), ພ້ອມທັງຈະສືບຕໍ່ ຄົ້ນຄວ້າ ແລະ ກຳນົດເປັນລາຍການເພີ່ມຕື່ມອີກ ແລະ ນະໂຍບາຍ-ມາດຕະການ ສົ່ງເສີມສະເພາະແບບມີຈຸດສຸມ. ພ້ອມກັນນີ້, ກະຊວງອຸດສາຫະກຳ ແລະ ການຄ້າ ກໍໄດ້ລິເລີ່ມໂຄງການທົດລອງ “ສົ່ງເສີມການຜະລິດ ແລະ ຊົມໃຊ້ສິນຄ້າພາຍໃນ” ໂດຍຮ່ວມມືກັບສະມາຄົມຜະລິດ ແລະ ປຸງແຕ່ງ ສິນຄ້າພາຍໃນ ໂດຍທົດລອງເຮັດ ແລະ ຂາຍ ຢູ່ກະຊວງອຸດສາຫະກຳ ແລະ ການຄ້າ ໃນລາຄານະໂຍບາຍ ຖ້າມີຜົນສໍາເລັດ ກໍຈະຂະຫຍາຍໄປການຈັດຕັ້ງອື່ນໆ.

ສ່ວນການສົ່ງເສີມການປຸງແຕ່ງ ເພື່ອຊົມໃຊ້ຢູ່ພາຍໃນ ແລະ ສົ່ງອອກ, ຫລຸດຜ່ອນການສົ່ງອອກ ວັດຖຸດິບ ແລະ ກ້າວໄປເຖິງການຢຸດຕິ ການສົ່ງອອກເປັນວັດຖຸດິບ ກະຊວງອຸດສາຫະກຳ ແລະ ການຄ້າ ຈະປະສານສົມທົບກັບພາກສ່ວນກ່ຽວຂ້ອງ ເພື່ອຊຸກຍູ້ສົ່ງເສີມການພັດທະນາ ຊັບພະຍາກອນມະນຸດ ໃນຂົງເຂດການຜະລິດ ທີ່ປະເທດເຮົາມີທ່າແຮງ ໃຫ້ເປັນ ນັກວິຊາການ, ເປັນຊ່ຽວຊານ, ເປັນຜູ້ຮູ້ຄິດ, ຮູ້ເຮັດ ແລະ ສາມາດເຮັດຢ່າງມີໝາກມີຜົນ ໃຫ້ຫລາຍຂຶ້ນ; ຊຸກຍູ້ ແລະ ສົ່ງເສີມການເຊື່ອມຈອດ ພື້ນຖານໂຄງລ່າງ ເພື່ອຊຸກຍູ້ການຜະລິດ, ຫລຸດຕົ້ນທຶນ ຂອງຕ້ອງໂສການສະໜອງ, ສົ່ງເສີມການເຂົ້າເຖິງຕະຫລາດພາຍໃນ ແລະ ຕ່າງປະເທດ; ສົ່ງເສີມການເຊື້ອໂຍງ ທາງດ້ານເສດຖະກິດ ກັບເພື່ອນບ້ານ, ກັບພາກພື້ນ ແລະ ສາກົນ ໂດຍການປັບປຸງ ສະພາບແວດລ້ອມ ໃນການດໍາເນີນທຸລະກິດ, ການຄ້າ ແລະ ການລົງທຶນ ໃຫ້ຫລາຍຂຶ້ນ, ແກ້ໄຂຕົ້ນທຶນການຜະລິດ ໃຫ້ມີມູນຄ່າຕໍ່າລົງ; ປັບປຸງມາດຕະຖານ ແລະ ຄຸນນະພາບຂອງສິນຄ້າ ທີ່ຜະລິດໄດ້ພາຍໃນເພື່ອໃຫ້ສາມາດ ແຂ່ງຂັນກັບສິນຄ້າ ນໍາເຂົ້າ, ທຽບເທົ່າມາດ ຕະຖານຂອງຕະຫລາດສາກົນ ແລະ ສາມາດສົ່ງອອກໄປຕ່າງປະເທດ; ລະດົມແຫລ່ງທຶນ ແລະ ສະໜອງທຶນ ເພື່ອຊ່ວຍຜູ້ປະກອບການຜະລິດ ແລະ ສົ່ງເສີມການຜະລິດພາຍໃນ, ຄຽງຄູ່ກັບການປັບປຸງກົນໄກ ແລະ ເງື່ອນໄຂທີ່ເອື້ອອໍານວຍ ໃຫ້ຜູ້ເຮັດການຜະລິດ ສາມາດເຂົ້າເຖິງແຫລ່ງທຶນ ໄດ້ສະດວກຂຶ້ນ ແລະ ມີຕົ້ນທຶນຕໍ່າລົງ; ປັບປຸງ ແລະ ຍົກລະດັບຄວາມຊັດເຈນ ແລະ ທັນກັບສະພາບການ ຂອງຂໍ້ມູນ ແລະ ສະຖິຕິສິນຄ້າ ທີ່ຜະລິດໄດ້ພາຍໃນ, ສິນຄ້ານໍາເຂົ້າ, ສິນຄ້າສົ່ງອອກ, ລາຄາ ແລະ ຄຸນນະພາບສິນຄ້າ ເພື່ອເປັນພື້ນຖານໃຫ້ແກ່ ການວາງແຜນ ທີ່ ວາງມາດຕະການ ເພື່ອຄຸ້ມຄອງການນໍາເຂົ້າ ແລະ ສົ່ງເສີມການຜະລິດພາຍໃນ.

ຂ່າວ: ທະນູທອງ

ພາບ: ຂັນໄຊ

KPL