ຂປລ
ຂປລ. ກອງປະຊຸມຄະນະກໍາມະການ ສະຖິຕິຂອງປະຊາຄົມອາຊຽນ ຄັ້ງທີ 14 ພາຍໃຕ້ຫົວຂໍ້ “ເພີ່ມທະວີການເຊື່ອມໂຍງຂໍ້ມູນ ເພື່ອກ້າວໄປສູ່ການເຊື່ອມຕໍ່ກັບພາກພື້ນ ແລະ ຄວາມຍືນຍົງ”ຈັດຂຶ້ນວັນທີ 26 ພະຈິກ 2024 ແນໃສ່ການຊຸກຍູ້ໃຫ້ ບັນດາປະເທດສະມາຊິກອາຊຽນ ໃຫ້ມີຄວາມຍືນຍົງ ແລະ ເຊື່ອມໂຍງກັນຫລາຍຂຶ້ນ ໂດຍການເປັນປະທານຂອງ ທ່ານ ນາງ ພອນສະຫລີ ສຸກສະຫວັດ ຫົວໜ້າສູນສະຖິຕິແຫ່ງຊາດ ແຫ່ງ ສປປ ລາວ, ມີບັນດາຫົວໜ້າ ແລະ ຮອງຫົວໜ້າຫ້ອງການສະຖິຕິ ຈາກປະເທດສະມາຊິກອາຊຽນ ແລະ ຕີມໍແລັດສະເຕ ທີ່ເປັນປະເທດສັງເກດການ ເຂົ້າຮ່ວມ.
ຂປລ. ກອງປະຊຸມຄະນະກໍາມະການ ສະຖິຕິຂອງປະຊາຄົມອາຊຽນ ຄັ້ງທີ 14 ພາຍໃຕ້ຫົວຂໍ້ “ເພີ່ມທະວີການເຊື່ອມໂຍງຂໍ້ມູນ ເພື່ອກ້າວໄປສູ່ການເຊື່ອມຕໍ່ກັບພາກພື້ນ ແລະ ຄວາມຍືນຍົງ”ຈັດຂຶ້ນວັນທີ 26 ພະຈິກ 2024 ແນໃສ່ການຊຸກຍູ້ໃຫ້ ບັນດາປະເທດສະມາຊິກອາຊຽນ ໃຫ້ມີຄວາມຍືນຍົງ ແລະ ເຊື່ອມໂຍງກັນຫລາຍຂຶ້ນ ໂດຍການເປັນປະທານຂອງ ທ່ານ ນາງ ພອນສະຫລີ ສຸກສະຫວັດ ຫົວໜ້າສູນສະຖິຕິແຫ່ງຊາດ ແຫ່ງ ສປປ ລາວ, ມີບັນດາຫົວໜ້າ ແລະ ຮອງຫົວໜ້າຫ້ອງການສະຖິຕິ ຈາກປະເທດສະມາຊິກອາຊຽນ ແລະ ຕີມໍແລັດສະເຕ ທີ່ເປັນປະເທດສັງເກດການ ເຂົ້າຮ່ວມ.
ທ່ານ ນາງ ພອນສະຫລີ ສຸກສະຫວັດ ໄດ້ກ່າວວ່າ: ໃນທ່າມກາງທີ່ທົ່ວໂລກ ມີການພັດທະນາຢ່າງບໍ່ຢຸດຢັ້ງ ຄວາມຮຽກຮ້ອງຕ້ອງການຂໍ້ມູນຂ່າວສານ ເພື່ອສ່ອງແສງໃຫ້ເຫັນເຖິງ ກາລະໂອກາດ ແລະ ສິ່ງທ້າທາຍຕ່າງໆ ໃນການພັດທະນາ ແມ່ນນັບມື້ນັບເພີ່ມຂຶ້ນ. ສະນັ້ນ, ອາຊຽນ ຈໍາເປັນຕ້ອງມີການປະດິດຄິດສ້າງ ນະວັດຕະກໍາ ພ້ອມທັງຊອກຫາວິທີການໃໝ່ໆ ໃນການສັງລວມເອົາຂໍ້ມູນ ທີ່ມີຄວາມຫລາກຫລາຍ, ເລິກເຊິ່ງ, ສ່ອງແສງໄດ້ເຖິງຄວາມເປັນຈິງ ຂອງບັນດາປະເທດ ໃນທົ່ວປະຊາຄົມອາຊຽນ ໄດ້ຢ່າງມີປະສິດທິພາບ ແລະ ປະສິດທິຜົນ.
ທ່ານ ນາງ ພອນສະຫລີ ສຸກສະຫວັດ ຍັງໃຫ້ຮູ້ອີກວ່າ: ໃນຖານະບົດບາດຂອງນັກສະຖິຕິ ມັກຈະຜະເຊີນໜ້າກັບ ຄວາມຕ້ອງການຂໍ້ມູນລະດັບລາຍລະອຽດ ແລະ ຂໍ້ມູນແຍກຍ່ອຍ ເພື່ອເປັນແນວທາງຮັບໃຊ້ໃຫ້ ແກ່ຂະບວນການຕັດສິນໃຈ ແລະ ການວາງແຜນ ໂດຍນໍາໃຊ້ປະໂຫຍດ ຈາກຂໍ້ມູນທີ່ມີຢູ່ ໂດຍສະເພາະ ແຫລ່ງຂໍ້ມູນຈາກ ລະບົບລາຍງານບໍລິຫານ, ພວກເຮົາສາມາດຕອບສະໜອງ ຄວາມຕ້ອງການ ການສະໜອງຂໍ້ມູນໄດ້ຢ່າງມີປະສິດທິພາບ ແລະ ຍັງສາມາດຫລຸດຜ່ອນຄວາມຈໍາເປັນ ໃນການເກັບຂໍ້ມູນດິບທີ່ມີຕົ້ນທຶນສູງໄດ້.
ນອກຈາກນີ້, ທ່ານ ນາງ ພອນສະຫລີ ສຸກສະຫວັດ ຍັງໄດ້ຍົກໃຫ້ເຫັນບາງຜົນສຳເລັດທີ່ ຍາດມາໄດ້ເປັນຕົ້ນ ການພັດທະນາແຜນດໍາເນີນງານ ຂອງລະບົບສະຖິຕິປະຊາຄົມອາຊຽນ (ACSS) ໃນໄລຍະປີ 2026-2030; ການຮັບຮອງຄູ່ມືວິເຄາະວິໄຈ ຂໍ້ມູນສະຖິຕິການຄ້າ ຕ່າງປະເທດນອກລະບົບ; ການຂະຫຍາຍການນໍາໃຊ້ ໂປຣແກຣມຖ່າຍໂອນຂໍ້ມູນ ລະຫວ່າງ ປະເທດອາຊຽນ ແລະ ສະຖິຕິອາຊຽນ (APIs); ການສ້າງຄວາມເຂັ້ມແຂງໃນຂອບການຄຸ້ມຄອງຂໍ້ມູນ ແລະ ນະໂຍບາຍຂອງລັດຖະບານ ແລະ ການເພີ່ມທະວີຂີດຄວາມສາມາດ ວຽກງານສະຖິຕິຜ່ານການສຶກສາທາງໄກ.
ກອງປະຊຸມຄັ້ງນີ້, ຄະນະຜູ້ແທນຈະໄດ້ການແລກປ່ຽນ ຄວາມຮູ້ ແລະ ຄວາມຊໍານານເພື່ອແກ້ໄຂ ບັນດາຂໍ້ຫຍຸ້ງຍາກ ແລະ ສິ່ງທ້າທາຍຮ່ວມກັນ; ເພີ່ມທະວີການຮ່ວມມືໃນພາກພື້ນ ໃຫ້ມີລະບົບຂໍ້ມູນທີ່ສາມາດ ເຊື່ອມໂຍງກັນໄດ້ຢ່າງມີປະສິດທິພາບ, ພ້ອມກັນເປີດຮັບເອົາ ນະວັດຕະກໍາອັນໃໝ່ ທີ່ຫັນໄປສູ່ຄວາມຍືນຍົງ ແລະ ຄວາມຍາວນານ.
ຂ່າວ: ກິດຕາ
ພາບ: ອ່າຍຄຳ
KPL
