ຂປລ. ໃນເວລາກອງປະຊຸຸມ ສະໄໝສາມັນເທື່ອທີ່ 8 ຂອງສະພາແຫ່ງຊາດ ຊຸດທີ IXວັນທີ 25 ພະຈິກ 2024, ທ່ານ ນາງ ວັດທະນາ ດາລາລອຍ ຮັກສາການຜູ້ວ່າທະນາຄານແຫ່ງ  ສປປ ລາວ ໄດ້ຊີ້ແຈງຕໍ່ຄຳຊັກຖາມ ຂອງສະພາແຫ່ງຊາດ ແລະ ບັນດາສະມາຊິກສະພາແຫ່ງຊາດ ຫລາຍບັນຫາສຳຄັນ ເຊັ່ນ: ການຈັດຕັ້ງປະຕິບັດໃນປີ 2024 ໃນການແກ້ໄຂບັນຫາເງິນເຟີ້, ລາຄາສິນຄ້າ ມີຕົວຊີ້ວັດຈະແຈ້ງແລ້ວ ຫລື ບໍ່? ອັດຕາເງິນເຟີ້ຍັງຢູ່ໃນລະດັບສູງ, ອັດຕາແລກປ່ຽນເງິນກີບທຽບໂດລາຍັງອ່ອນຄ່າ, ລາຄາສິນຄ້າ ແລະ ຄັງແຮສຳຮອງຍັງບໍ່ບັນລຸ, ການປ່ອຍສິນເຊື່ອຂອງທະນາຄານ ໃຫ້ຜູ້ທີ່ມີຄວາມຈຳເປັນ ໃນການທຳການຜະລິດ ຍັງປະຕິບັດໄດ້ໜ້ອຍ.

ຕໍ່ກັບບັນຫາດັ່ງກ່າວ, ທ່ານ ນາງ ວັດທະນາ ດາລາລອຍ ໄດ້ໃຫ້ຮູ້ວ່າ: ໃນປີ 2024 ທຫລ ໄດ້ສືບຕໍ່ດຳເນີນນະໂຍບາຍເງິນຕາແບບຮັດກຸມ ດ້ວຍການນຳໃຊ້ເຄື່ອງມື ນະໂຍບາຍເງິນຕາທັງທາງກົງ ແລະ ທາງອ້ອມ ເພື່ອຄວບຄຸມປະລິມານເງິນ ເຊັ່ນ: ອອກ ແລະ ຈຳໜ່າຍພັນທະບັດ ທຫລ; ຈັດຕັ້ງປະຕິບັດການນຳເງິນຝາກ ຂອງລັດຖະບານ ເຂົ້າມາລວມສູນຢູ່ ທຫລ; ຄຸ້ມຄອງອັດຕາແລກປ່ຽນໃຫ້ມີສະຖຽນລະພາບ ຕາມກົນໄກຕະຫລາດ ທີ່ມີການຄຸ້ມຄອງຂອງລັດ ໃຫ້ມີຄວາມຍືດຍຸ່ນຫລາຍຂຶ້ນ; ຊຸກຍູ້ທະນາຄານທຸລະກິດ (ທທກ) ຂະຫຍາຍໜ່ວຍແລກປ່ຽນເງິນຕາຕາມດ່ານສາກົນ; ພັດທະນາລະບົບຊຳລະ ແລະ ພັດທະນາເຄື່ອງມື ແອັບພລິເຄຊັນ App Ezy Kip ເພື່ອອໍານວຍຄວາມສະດວກໃຫ້ແກ່ປະຊາຊົນ ແລະ ນັກທ່ອງທ່ຽວໃນການແລກປ່ຽນເງິນຕາ; ເປີດຕະຫລາດແລກປ່ຽນເງິນຕາຕ່າງປະເທດ ທີ່ລວມສູນ (LFX) ເພື່ອໃຫ້ສັງຄົມສາມາດແລກປ່ຽນ ເງິນຕາຕ່າງປະເທດ ດ້ວຍຫລາຍຮູບແບບ ທັງເປັນການຫລຸດຕົ້ນທຶນ ດ້ານມະຫາພາກ ໃນການນໍາໃຊ້ເງິນຕາ ຕ່າງປະເທດ ເພື່ອເຂົ້າໄປແຊກແຊງເງິນຕາ ໃຫ້ມີຄວາມສະຫງົບ ເວລາອັດຕາແລກປ່ຽນມີຄວາມຜັນຜວນແຮງ, ເປັນເຄື່ອງມືສໍາຄັນໃຫ້ແກ່ລັດຖະບານ ໃນການຄຸ້ມຄອງ ແລະ ຕິດຕາມຕະຫລາດເງິນຕາຕ່າງປະເທດ ທີ່ຢູ່ນອກລະບົບ ໂດຍສະເພາະ ຂໍ້ມູນດ້ານຄວາມຕ້ອງການ ແລະ ການສະໜອງເງິນຕາຕ່າງປະເທດ ທີ່ເປັນສິ່ງກົດດັນຕໍ່ອັດຕາ ແລກປ່ຽນໃຫ້ມີການຜັນຜວນ, ຫັນການແລກປ່ຽນເງິນຕາຕ່າງປະເທດ ເຂົ້າສູ່ລະບົບທັນສະໄໝ, ລວມສູນ ແລະ ສາມາດກວດສອບໄດ້ ແນໃສ່ລຶບລ້າງການແລກປ່ຽນເງິນຕານອກລະບົບ; ສຸມໃສ່ສ້າງ ແລະ ປັບປຸງນິຕິກຳ ເພື່ອຄຸ້ມຄອງເງິນຕາຕ່າງປະເທດ ແລະ ນຳລາຍຮັບທີ່ເປັນເງິນຕາຕ່າງປະເທດ ໃຫ້ເຂົ້າສູ່ລະບົບຫລາຍຂຶ້ນ. ນອກນີ້, ລັດຖະບານໄດ້ຮ່ວມທຶນກັບບໍລິສັດ ພີທີເອວ ໂຮນດິງ ສ້າງຕັ້ງທະນາຄານຄຳ ເພື່ອປະກອບສ່ວນພັດທະນາ ລະບົບສະຖາບັນການເງິນໃຫ້ມີຄວາມເຂັ້ມແຂງ, ຊຸກຍູ້ກິດຈະກຳທາງເສດຖະກິດ ໃຫ້ຂະຫຍາຍຕົວຢ່າງຕໍ່ເນື່ອງ, ສະໜອງການບໍລິການ ທີ່ມີຄວາມຫລາກຫລາຍ ແລະ ທັນສະໄໝໃຫ້ແກ່ສັງຄົມ ເຊັ່ນ: ຜະລິດຕະພັນຝາກປະຢັດຄ່ຳ, ການກູ້ຢືມຄໍາ ແລະ ອື່ນໆ ຊຶ່ງເປັນການເພີ່ມທາງເລືອກໃໝ່ໃຫ້ແກ່ລູກຄ້າ ໃນການໃຊ້ບໍລິການທາງດ້ານການເງິນ ທັງເປັນການຊ່ວຍ ບໍລິຫານຄວາມສ່ຽງຈາກການຜັນຜວນຂອງຄຳ, ສົ່ງ ເສີມການເຂົ້າເຖິງແຫລ່ງທຶນ ຂອງທຸກພາກສ່ວນເສດຖະກິດ ທີ່ມີຄວາມຕ້ອງ ການແຫລ່ງທຶນ ໃຫ້ສາມາດກູ້ຢືມໂດຍການຄໍ້າປະກັນດ້ວຍຄໍາ ເຊິ່ງເປັນການອຳນວຍຄວາມສະດວກ ໃຫ້ແກ່ການເຂົ້າເຖິງແຫລ່ງທຶນ ສໍາລັບຜູ້ທີ່ບໍ່ມີອະສັງ ຫາລິມະຊັບ ເປັນຫລັກຊັບຄໍ້າປະກັນ, ສ້າງຄວາມໜ້າເຊື່ອຖື ໃນລະບົບການເງິນ ເຮັດໃຫ້ສັງຄົມຫັນມາໃຊ້ບໍລິການ ຝາກຊັບສິນໃນຮູບແບບຄຳ. ນອກນີ້, ກໍປະກອບສ່ວນ ເປັນແຫລ່ງລາຍຮັບ ໃຫ້ແກ່ລັດຖະບານ ບົນພື້ນຖານການເກັບພັນທະຕ່າງໆ ຈາກທຸລະກຳກ່ຽວກັບຄຳ.

ໃນໄລຍະຜ່ານມາ, ລັດຖະບານ ໄດ້ມີນະໂຍບາຍສົ່ງເສີມການຜະລິດເປັນສິນຄ້າ ເພື່ອທົດແທນການນຳເຂົ້າ ສ້າງຄວາມເຂັ້ມແຂງ ໃຫ້ແກ່ພື້ນຖານການຜະລິດພາຍໃນ, ສ້າງຄວາມເຂັ້ມແຂງໃຫ້ແກ່ຫົວໜ່ວຍວິສາຫະກິດ, ການຜະລິດສະບຽງອາຫານ ແລະ ການຜະລິດເປັນສິນຄ້າ ໃຫ້ມີຄວາມຫລາກຫລາຍເພື່ອຊົມໃຊ້ພາຍໃນ, ທຫລ ໄດ້ເປັນເຈົ້າການຊຸກຍູ້ການຈັດຕັ້ງປະຕິບັດນະໂຍບາຍສິນເຊື່ອ ເພື່ອກະຕຸ້ນເສດຖະກິດ (766/ທຫລ) ເລີ່ມຈັດຕັ້ງປະຕິບັດໃນເດືອນພະຈິກ 2023 ຮອດເດືອນຕຸລາ 2024 ໄດ້ອະນຸມັດ 44 ຫົວໜ່ວຍ ໃຫ້ເຂົ້າຮັບນະໂຍບາຍ, ລວມວົງເງິນກູ້ຢືມທັງໝົດ ຈາກແຫລ່ງທຶນຂອງ ທທກ  4.532,50 ຕື້ກີບ ແລະ ນະໂຍບາຍສິນເຊື່ອ ເພື່ອກະຈາຍແຫລ່ງທຶນສູ່ທ້ອງຖິ່ນ (765/ທຫລ) ໄດ້ອະນຸມັດໃຫ້ 419 ຫົວໜ່ວຍ ຢູ່ 18 ແຂວງທົ່ວປະເທດ ລວມວົງເງິນກູ້ຢືມທັງໝົດ 756,73 ຕື້ກີບ.

ຕໍ່ກັບການເຂົ້າເຖິງສິນເຊື່ອໃນແຕ່ລະຂະແໜງການ ທຫລ ກໍເປັນເຈົ້າການຊຸກຍູ້ໃຫ້ ທທກ ປ່ອຍສິນເຊື່ອ ຊຶ່ງຮອດເດືອນຕຸລາ 2024 ຍອດເຫລືອສິນເຊື່ອຂອງລະບົບທະນາຄານ ຢູ່ໃນລະດັບ 203.029,80 ຕື້ກີບ, ຂະ ຫຍາຍຕົວ 18.81% ທຽບໃສ່ໄລຍະດຽວກັນຂອງປີຜ່ານມາ, ກວມເອົາ 64,18% ຂອງ GDP. ໃນນັ້ນ, ສິນເຊື່ອຂອງທະນາຄານທຸລະກິດ ໃນຂະແໜງອຸດສາຫະກຳ ກວມເອົາ 33,29% (ເພີ່ມຂຶ້ນ 34,34% ທຽບໃສ່ໄລຍະດຽວກັນຂອງປີຜ່ານມາ), ຂະແໜງການຄ້າ ກວມເອົາ 19,48% (ເພີ່ມຂຶ້ນ 20,57%), ຂະແໜງການບໍລິການ ກວມເອົາ 14,21% (ໃນນີ້, ລວມທັງຫົວໜ່ວຍທຸລະກິດທ່ອງທ່ຽວເພີ່ມຂຶ້ນ 25,59%), ຂະແໜງກໍ່ສ້າງກວມເອົາ 10,77% (ຫລຸດລົງ 10,10%), ຂະແໜງກະສິກຳ-ປ່າໄມ້ ກວມເອົາ 5,82% (ເພີ່ມຂຶ້ນ 42,49%) ແລະ ຂະແໜງການອື່ນໆ ກວມເອົາ 16,43% ຂອງຍອດສິນເຊື່ອທັງໝົດ.

ຂ່າວ: ກິດຕາ.

ພາບ: ຂັນໄຊ

KPL