ຂປລ. ​ຄະ​ນະ​ກຳ​ມາ​ທິ​ການ​ແຫ່ງ​ຊາດ ເພື່ອ​ຄວາມ​ກ້າວ​ໜ້າ ຂອງ​ແມ່​ຍິງ, ແມ່ ແລະ ເດັກ ໃນ​ນາມ​ລັດຖະ ບານ ແຫ່ງ ສປປ ​ລາວ ​ ​ສົມທົບ​ກັບ​ອົງການ​ສະຫະ​ປະຊາ​ຊາດ ​ແລະ ບັນດາ​ຄູ່​ຮ່ວມ​ງານ ​​ ຈັດ​ພິທີເປີດໄຟສີສົ້ມປະຕູໄຊ  ໃນ​ວັນ​ທີ 25 ພະຈິກ 2024​ ພາຍ​ໃຕ້ ​ຫົວ​ຂໍ້​ “ກ້າວເຂົ້າ​​ສູ່ 30 ປີ ​ແຫ່ງ​​ຖະ​ແຫລ​ງການ​​ ແລະ ​ແຜນປະຕິບັດງານປັກ​ກິ່ງ: ຮ່ວມກັນ ເພື່ອຢຸດຕິ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່ຍິງ​ ແລະ ​ເດັກ​ຍິງ”, ພ້ອມທັງເປີດບັ້ນຂະບວນການ 16 ວັນແຫ່ງການເຄື່ອນໄຫວ ເພື່ອຢຸດຕິການໃຊ້ຄວາມຮຸນແຮງ ຕໍ່ຄວາມຮຸນແຮງຕໍ່ແມ່ຍິງ ແລະ ເດັກຍິງ ໂດຍມີ ຄະນະກໍາມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ (ຄຊກມດ), ມີຜູ້ຕາງໜ້າຈາກອົງການຈັດຕັ້ງສາກົນ, ບັນດາຄູ່ຮ່ວມພັດທະນາ, ມີມວນຊົນໃນນະຄອນຫລວງວຽງຈັນ ແລະ ພາກສ່ວນກ່ຽວຂ້ອງ ເຂົ້າຮ່ວມ

​


ໃນ​ພິທີ​, ​ໄດ້​ມີ​ການສາຍວີດີໂອ ການ​ກ່າວ​ຄຳ​ປາ​ໄສ ​ຂອງ​ທ່ານ ສອນໄຊ ສີພັນດອນນາຍົກລັດຖະມົນຕີແຫ່ງ ສປປ ລາວ ເຊິ່ງເປັນການຢືນຢັນຄືນເຖິງຄວາມມຸ່ງໝັ້ນ ຂອງລັດຖະບານລາວ ໃນການປ້ອງກັນ ແລະ ລຶບລ້າງຄວາມຮຸນແຮງທຸກຮູບແບບ ບໍ່ວ່າຈະເປັນເພດໃດກໍຕາມ. ໃນບົດຄໍາປາໄສ, ທ່ານນາຍົກລັດຖະມົນຕີ ໄດ້ກ່າວວ່າ “ທຸກໆ​ປີ, ໃນ​ໄລ​ຍະ 16 ວັນ​ແຫ່ງ​ການ​ເຄື່ອນ​ໄຫວ, ພວກ​ເຮົາ​ມາຮ່ວມກັນ​ຢືນ​ຢັນ​ຄືນ ​​ຄວາມ​ເປັນ​ເຈົ້າ​ການ, ການຊີ້ນໍາ-​ນຳພາ, ການ​ຮ່ວມ​ມື ແລະ ການມີສ່ວນຮ່ວມ ໃນການ​ຢຸດ​ຕິ​ການ​ໃຊ້​ ຄວາມ​ຮຸນ​ແຮງ​ຕໍ່​ແມ່​ຍິງ ແລະ ເດັກ​ຍິງ. ລັດຖະບານຂອງພວກເຮົາຍຶດໝັ້ນ ໃນຄຳໝັ້ນສັນຍາ ໃນການປະຕິບັດກົດໝາຍ ແລະ ນະໂຍບາຍ ທີ່ສົ່ງເສີມຄວາມສະເໝີພາບລະຫວ່າງຍິງ-ຊາຍ ແລະ ປົກປ້ອງສິດຂອງແມ່ຍິງ. ພວກ​ເຮົາ​ອຸທິດຕົນ ເພື່ອ​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ ກົນ​ໄກ​ປ້ອງ​ກັນ ​ແລະ ແກ້​ໄຂ​ຄວາມ​ຮຸນ​ແຮງ, ການ​ຫັນປ່ຽນ​ທັດສະນະຄະຕິ​ ທີ່​ເປັນ​ອັນຕະລາຍ​ ແລະ ຮັບປະກັນ​ວ່າ​ຜູ້​ກະທຳ​ຜິດ ຕ້ອງຮັບຜິດຊອບ ຕໍ່ການກະທໍາຂອງຕົນ ​ຕາມ​ກົດໝາຍ ໂດຍການຈັດສັນຊັບພະຍາກອນ ແລະ ການລົງທຶນ ໃນການລິເລີ່ມທີ່ສະໜັບສະໜູນ ຄວາມສະເໝີພາບ ລະຫວ່າງ ຍິງ-ຊາຍ, ພວກເຮົາກຳລັງປູທາງໄປສູ່ອະນາຄົດ ເພື່ອໃຫ້ແມ່ຍິງ ແລະ ເດັກຍິງທຸກຄົນ ສາມາດດຳລົງຊີວິດໄດ້ໂດຍ ບໍ່ມີຄວາມຢ້ານກົວ ແລະ ປາສະຈາກຄວາມຮຸນແຮງ.”     

ທ່ານ​ ນາງ ອາລີ ວົງ​ໜໍ່ບຸນ​ທຳ ໄດ້ມີຄຳ​ເຫັນ​ໃນ​ພິທີ​​ວ່າ: “ສີສົ້ມ ຫລື ສີນໍ້າໝາກກ້ຽງ” ເປັນສີທີ່ສົດໃສ ແລະ ເບິ່ງໂລກໃນມຸມມອງທີ່ດີ, ເປັນສີທີ່ສະແດງເຖິງອະນາຄົດທີ່ສົດໃສ ປາສະຈາກຄວາມຮຸນແຮງຕໍ່ແມ່ຍິງ ແລະ ເດັກຍິງ ໃຫ້ທຸກຄົນ ຢືນຢັນຕໍ່ຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ, ໃຫ້ການຊ່ວຍເຫລືອ ຜູ້ລອດຊີວິດ ແລະ ໃຫ້ຄວາມຮູ້ຂໍ້ມູນຂ່າວສານທີ່ສຳຄັນ ໃນການເຂົ້າເຖິງຂະບວນການຍຸຕິທຳ. ຂໍໃຫ້ໃຊ້ໜຶ່ງສຽງຂອງທ່ານ ເພື່ອປັບປ່ຽນບັນທັດຖານ ຂອງສັງຄົມທີ່ເປັນອັນຕະລາຍ, ເຂົ້າຮ່ວມໃນການໂຄສະນາ ແລະ ຊຸກຍູ້ໃຫ້ມີການຈັດຕັ້ງປະຕິບັດກົດໝາຍທີ່ເຂັ້ມງວດ, ການບັງຄັບໃຊ້ທີ່ດີກວ່າ ແລະ ເພີ່ມຊັບພະຍາກອນ ເພື່ອຢຸດຕິ ຄວາມຮຸນແຮງຕໍ່ແມ່ຍິງ ແລະ ເດັກຍິງ.

ທ່ານ ແກມບິສ ກາບິຣີຜູ້ປະຈຳການ ອົງການ ສປຊ ກອງທືນເພື່ອປະຊາກອນກ່າວວ່າ: ໃນ​ໄລ​ຍະ 10 ກວ່າປີ​ທີ່​ຜ່ານ​ມາ​, ສ​ປ​ປ ລາວ ໄດ້ມີການ​ຫັນ​ປ່ຽນ​​ບັນ​ດາບັນທັດ​ຖານ ດ້ານ​ວັດ​ທະ​ນະ​ທຳ​ທີ່ສໍາຄັນ ​ເນື່ອງ​ຈາກ​ການ​ໂຄສະນາ​ເຜີຍ​ແຜ່ ເພື່ອປູກຈິດສໍານຶກ, ການ​ຊີ້ນໍາ​ຂອງ​ລັດຖະບານ​ທີ່​ເຂັ້ມ​ແຂງ​ ແລະ ການ​ລົງທຶນ​ທີ່ສຳຄັນ​ ໃນ​ການ​ປ້ອງ​ກັນ​ການໃຊ້ຄວາມຮຸນແຮງຕໍ່ແມ່ຍິງ​​, ​ພ້ອມທັງ ການ​ນຳພາຈາກບັນດາກະຊວງ ແລະ ຄູ່ຮ່ວມພັດທະນາທີ່ກ່ຽວຂ້ອງ, ຈຶ່ງເຮັດໃຫ້ ຄວາມອົດທົນຕໍ່ຄວາມຮຸນແຮງ ພາຍໃນຄອບຄົວ ມີອັດຕາຫລຸດລົງຢ່າງຫລວງຫລາຍ. ແຕ່ວ່າວຽກງານນີ້ແມ່ນຍັງອີກຍາວໄກ ແລະ ບໍ່ທັນສິ້ນສຸດ. ອົງການ UNFPA ຈະ​ສືບ​ຕໍ່​ຮຽກ​ຮ້ອງ​ໃຫ້​ມີ ​ການ​ປະຕິບັດທີ່ເດັດດ່ຽວ ເພື່ອ​ປູກຈິດສໍານຶກ, ຊຸກຍູ້ການໂຄສະນາເຜີຍແຜ່ ແລະ ​ຊອກວິທີແກ້​ໄຂ ດ້ວຍ​ນະ​ວັດ​ຕະ​ກຳໃໝ່ ​ເພື່ອ​ຢຸດ​ຕິ​ການ​ແຜ່​ລາມ​ ຂອງ​ຄວາມ​ຮຸນ​ແຮງ​ຕໍ່​ແມ່​ຍິງ ແລະ ​ເດັກ​ຍິງ.

ທ່ານ ຈຸງ ຢຸງ ຊູ (Jung Yung SOO) ເອກອັກຄະລັດຖະທູດ ສ ເກົາຫລີ ປະຈໍາລາວ ໄດ້ກ່າວວ່າ:ສາທາລະນະລັດ​ເກົາຫລີ ຕີລາຄາ ຄວາມຮຸນແຮງຕໍ່ແມ່ຍິງ ແລະ ເດັກຍິງ ວ່າເປັນສິ່ງທີ່ຕ້ອງຖືກກໍາຈັດ ແລະ ລຶບລ້າງໃຫ້ໝົດສິ້ນ. ພວກເຮົາ ພະຍາຍາມແກ້ໄຂບັນຫາດັ່ງກ່າວ ໂດຍການສະໜັບສະໜູນໂຄງການຄັນຮົ່ມ ແລະ ການສ້າງຕັ້ງ ສູນສົ່ງເສີມຄວາມສະເໝີພາບ ລະຫວ່າງຍິງ-ຊາຍ ແລະ ຕ້ານການໃຊ້ຄວາມຮຸນແຮງຕໍ່ແມ່ຍິງ (ສູນ GEVAW) ເຊິ່ງແມ່ນຂີດໝາຍອັນສຳຄັນ ໃນການຕອບໂຕ້ ແລະ ລົບລ້າງຄວາມຮຸນແຮງຕໍ່ແມ່ຍິງໃນ ສປປ ລາວ.ສ ເກົາຫລີ ແລະ ອົງກອນຮ່ວມມືສາກົນ ສເກົາຫລີ (KOICA) ຈະສືບຕໍ່ໃຫ້ການສະໜັບສະໜູນ ແລະ ຢືນຄຽງຂ້າງ ສປປ ລາວ ເພື່ອຕໍ່ສູ້ຕ້ານຄວາມຮຸນແຮງຕໍ່ແມ່ຍິງ ແລະ ເດັກຍິງ ແລະ ບັນລຸຄວາມສະເໝີພາບ ລະຫວ່າງຍິງ-ຊາຍ ໂດຍອີງໃສ່ ຜົນໄດ້ຮັບຂອງໂຄງການຄັນຮົ່ມ.

ທ່ານ ບັກໂຮເດຍ ເບີຄະນອ໋ຟ (Bakhodir Burkhanov) ຜູ້ປະສານງານອົງການສະຫະປະຊາຊາດ ປະຈຳ ສປປ ລາວ ກ່າວວ່າ: ອົງການສະຫະປະຊາຊາດ ໃຫ້ຄຳໝັ້ນສັນຍາວ່າຈະສືບຕໍ່ ຮ່ວມມືຢ່າງແໜ້ນແຟ້ນກັບລັດຖະບານແຫ່ງ ສປປ ລາວ ແລະ ທຸກພາກສ່ວນກ່ຽວຂ້ອງ ເພື່ອສ້າງອະນາຄົດໃຫ້ ແມ່ຍິງ ແລະ ເດັກຍິງ ສາມາດດຳລົງຊີວິດໄດ້ໂດຍປາສະຈາກ ຄວາມຢ້ານກົວຕໍ່ຄວາມຮຸນແຮງ. ຂໍ້ສັນ​ຍາ ວ່າດ້ວຍອະນາຄົດ ແມ່ນໄດ້ຖືກຮັບຮອງເອົາໃນວ່າງບໍ່ດົນມານີ້ ໂດຍບັນດາຜູ້ນຳລະດັບໂລກ ລວມທັງ ສປປ ລາວ, ເຊິ່ງໄດ້ຢັ້ງຢືນຄືນ ເຖິງຄວາມສໍາຄັນໃນການລົບລ້າງການຈຳແນກ ແລະ ຄວາມຮຸນແຮງທຸກຮູບແບບ ຕໍ່ແມ່ຍິງ ແລະ ເດັກຍິງ, ຂໍ້ຕົກລົງບໍ່ພຽງແຕ່ເປັນການປົກປ້ອງສິດພື້ນຖານຂອງພວກເຂົາ, ແຕ່​ຍັງ​ເປັນການສ້າງ​ ໃຫ້​ມີຄວາມ​ຢືດ​ຢຸ່ນ, ​ບັນ​ດາ​ຊຸມ​ຊົນ​ມີ​ຄວາມສະ​ເໝີ​ພາບ ເພື່ອໃຫ້​ທຸກຄົນສາມາດ​ພັດທະນາຕົນເອງ​ໄດ້.

ທ່ານ ມາກ ແກລາເຈີ (Mark Gallagher) ເອກອັກຄະລັດຖະທູດ ແລະ ຫົວໜ້າຄະນະຜູ້ແທນສະຫະພາບເອຣົບ ປະຈໍາ ສປປ ລາວ ກ່າວວ່າ: ຄວາມສະເໝີພາບ ລະຫວ່າງຍິງ-ຊາຍ ບໍ່ແມ່ນພຽງເປົ້າໝາຍເທົ່ານັ້ນ,ແຕ່ມັນແມ່ນສິດທິພື້ນຖານ ແລະ ຄວາມຮັບຜິດຊອບຮ່ວມກັນ, ເປັນໃຈກາງໃນການບັນລຸເປົ້າໝາຍ ການພັດທະນາແບບຍືນຍົງໃນປີ 2030. ພິທີໃນມື້ນີ້ ເປັນທັງການສະເຫລີມສະຫລອງຄວາມຄືບໜ້າ ແລະ ເປັນທັງການຮຽກຮ້ອງໃຫ້ມີການປະຕິບັດ. ພວກ​ເຮົາ​ຕ້ອງ​ເພີ່ມ​ທະວີ ຄວາມ​ພະ​ຍາ​ຍາມ​ຂຶ້ນຕື່ມອີກ ​ເພື່ອ​ລົບລ້າງຄວາມ​ຮຸນ​ແຮງ​ ບົນພື້ນຖານທາງ​ເພດ (GBV), ຂະ​ຫຍາຍ​ແຜນງານ​ສຸ​ຂະ​ພາບ​​ຈະເລີນ​ພັນ ແລະ​ ເສີມ​ຂະ​ຫຍາຍ​​ໂອ​ກາດ​ ດ້ານ​ການ​ສຶກ​ສາ ແລະ​ ດ້ານເສດ​ຖະ​ກິດ​ ໃຫ້ແກ່​ແມ່​ຍິງ ແລະ ​ເດັກ​ຍິງ ເພື່ອ​ຮັບ​ປະ​ກັນ​ວ່າ​ພວກເຂົາ​ ສາ​ມາດ​ດຳ​ລົງ​ຊີ​ວິດ​ຕາມ​ເສັ້ນທາງທີ່ເຂົາເຈົ້າ​ເລືອກເອງ”.

ຂະບວນການ 16 ວັນ​ແຫ່ງ​ການ​ເຄື່ອນ​ໄຫວ ​ແມ່ນ​ເວທີທີ່ເຂັ້ມແຂງ​ ໃນ​ການປູກຈິດສໍານຶກ, ຊຸກຍູ້​ການ​ສົນທະນາ ​ແລະ ຊຸກຍູ້​ການ​ເຄື່ອນ​ໄຫວ ​ທີ່ມີ​ໝາກຜົນ​ເປັນ​ຮູບ​ຮ່າງ ເພື່ອ​ລົບ​ລ້າງ​ຄວາມ​ຮຸນ​ແຮງ​ຕໍ່​ແມ່ຍິງ ​ແລະ ​ເດັກ​ຍິງ. ຂະບວນການດັ່ງກ່າວ ຍັງເປັນການຮຽກຮ້ອງ​ໃຫ້​ມີ​ຄວາມ​ສາມັກຄີ ​ແລະ ຮ່ວມແຮງຮ່ວມໃຈ ​ເຄື່ອນ​ໄຫວນໍາກັນ, ​ໂດຍການເຮັດວຽກຮ່ວມກັນ ຢ່າງເອກະພາບປອງດອງ ​ເພື່ອ​ສ້າງ​ອະນາຄົດທີ່ມີ​ຄວາມ​ປອດ​ໄພ, ຄວາມ​ສະ​ເໝີ​ພາບ, ​ແລະ ກຽດ​ສັກ​ສີໃຫ້ແກ່​ແມ່ຍິງ ​ແລະ ​ເດັກ​ຍິງ​ທຸກ​ຄົນ​ໃນ ສປປ ລາວ.

ພາບ: ເກດສະໜາ

KPL