ຂປລ. ພິທີສະເຫລີມສະຫລອງ ສາຍພົວພັນຄູ່ຮ່ວມເຈລະຈາ ອາຊຽນ-ອົດສະຕຣາລີ ຄົບຮອບ 50 ປີ ຈັດຂຶ້ນວັນທີ 20 ພະຈິກ 2024 ຢູ່ຫໍປະຊຸມແຫ່ງຊາດ ໂດຍການເປັນປະທານຂອງ ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ, ທ່ານ ແພັດ ຄອນຣອຍ ລັດຖະມົນຕີກະຊວງອຸດສະຫະກຳປ້ອງກັນຊາດ ແລະ ການຈັດສົ່ງ, ລັດຖະມົນຕີກະຊວງພັດທະນາສາກົນ ແລະ ປາຊີຟິກ ແຫ່ງ ອົດສະຕຣາລີ, ມີບັນດາລັດຖະມົນຕີກະຊວງປ້ອງກັນປະເທດ ຂອງປະເທດສະມາຊິກອາຊຽນ, ຕີມໍແລັດສະເຕ ແລະ ເລຂາທິການໃຫຍ່ອາຊຽນ ເຂົ້າຮ່ວມ.

ໂອກາດນີ້,  ທ່ານ ພົນເອກ ຈັນສະໝອນ ຈັນຍາລາດ ໄດ້ມີຄໍາເຫັນວ່າ: ການສະເຫລີມສະຫລອງ ສາຍພົວພັນຄູ່ຮ່ວມເຈລະຈາ ອາຊຽນ-ອົດສະຕຣາລີ ຄົບຮອບ 50 ປີ ແມ່ນເຫດການສໍາຄັນ ທີ່ສະແດງໃຫ້ເຫັນເຖິງຜົນສໍາເລັດ ຂອງການພົວພັນຮ່ວມມື ແລະ ມິດຕະພາບທີ່ດີ ແລະ ການຮ່ວມມືທີ່ຍາວນານ ລະຫວ່າງ ອາຊຽນ ແລະ ອົດສະຕຣາລີ ໃນໄລຍະ 5 ທົດສະວັດ ນັບຕັ້ງແຕ່ການສ້າງຕັ້ງສາຍພົວພັນ ຄູ່ຮ່ວມເຈລະຈາ ໃນປີ 1974 ເປັນຕົ້ນມາ, ການພົວພັນຮ່ວມມື ອາຊຽນ-ອົດສະຕຣາລີ ໄດ້ມີການຂະຫຍາຍຕົວຢ່າງຕໍ່ເນື່ອງ ໃນຫລາຍຂົງເຂດວຽກງານ ລວມມີ ການຮ່ວມມືທາງດ້ານການເມືອງ-ຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ ເຊິ່ງການຮ່ວມມືດັ່ງກ່າວ ໄດ້ເປັນພື້ນຖານ ແລະ ການປະກອບສ່ວນອັນສຳຄັນ ໃຫ້ແກ່ການສ້າງຄວາມເຂັ້ມແຂງ ແລະ ພັດທະນາຂອງ ອາຊຽນ ແລະ ອົດສະຕຣາລີ.

ການພົວພັນຮ່ວມມືຕະຫລອດໄລຍະ 50 ປີ ຜ່ານມາ ໄດ້ສະແດງໃຫ້ເຫັນເຖິງມິດຕະພາບ, ສາຍພົວພັນອັນດີງາມ ແລະ ຄວາມມຸ່ງໝັ້ນທີ່ສອງຝ່າຍອາຊຽນ ແລະ ອົດສະຕຣາລີ ທີ່ຍາດມາໄດ້ ເຊິ່ງຜົນສຳເລັດດັ່ງກ່າວ, ໄດ້ນຳໄປສູ່ການສ້າງຕັ້ງການເປັນຄູ່ຮ່ວມມື ຍຸດທະສາດຮອບດ້ານ ອາຊຽນ-ອົດສະຕຣາລີ ໃນປີ 2021. ການສະເຫລີມສະ ຫລອງສາຍພົວພັນຄູ່ຮ່ວມເຈລະຈາ ຄົບຮອບ 50 ປີ ໃນເດືອນ ມີນາ 2024 ທີ່ເມືອງ ເມວເບິນ, ອົດສະຕຣາລີ ແລະ ການຮັບຮອງຖະແຫລງການວິໄສທັດ ວ່າດ້ວຍຄູ່ຮ່ວມເພື່ອສັນຕິພາບ ແລະ ຄວາມຈະເລີນຮຸ່ງເຮືອງ ແລະ ຖະແຫລງການເມວເບິນ ວ່າດ້ວຍຄູ່ຮ່ວມມືເພື່ອອະນາຄົດ ລວມທັງການຮັບຮອງ ແຜນປະຕິບັດງານ ເພື່ອຈັດຕັ້ງປະຕິບັດຄູ່ຮ່ວມຍຸດທະສາດຮອບດ້ານ ອາຊຽນ-ອົດສະຕາລີ 2025-2029 ຈະເປັນເອກະສານທີ່ສໍາຄັນໃນການຢືນຢັນ ແລະ ກຳນົດການສົ່ງເສີມການພົວພັນຮ່ວມມື ເພື່ອນຳເອົາຜົນປະໂຫຍດມາສູ່ ອາຊຽນ-ອົດສະຕຣາລີ ໃນອະນາຄົດ. ນອກຈາກການຮ່ວມມືຫລາຍຝ່າຍກັບອາຊຽນແລ້ວ, ອົດສະຕຣາລີ ຍັງມີການຮ່ວມມືສອງຝ່າຍກັບບັນດາປະເທດສະມາຊິກອາຊຽນ ໂດຍມີການຊ່ວຍເຫລືອເຊິ່ງກັນ ແລະ ກັນໃນຫລາຍດ້ານ ເປັນຕົ້ນ ການສ້າງຊັບພະຍາກອນມະນຸດ, ການຊ່ວຍເຫລືອມະນຸດສະທຳ ແລະ ບັນເທົາທຸກໄພພິບັດ ແລະ ອື່ນໆ.

ທ່ານ ພົນເອກ ຈັນສະໝອນ ຈັນຍາລາດ ໄດ້ສະແດງຄວາມຂອບໃຈ ທີ່ອົດສະຕຣາລີ ໄດ້ໃຫ້ການຊ່ວຍ ເຫລືອ ແລະ ສະໜັບສະໜູນ ການເປັນປະທານອາຊຽນຂອງ ສປປ ລາວ ແລະ ໃຫ້ການຊ່ວຍເຫລືອບັນເທົາທຸກ ໃນເວລາທີ່ ສປປ ລາວ  ຜະເຊີນກັບໄພນໍ້າຖ້ວມຄັ້ງໃຫຍ່ໃນປີນີ້. ສປປ ລາວ ເຊື່ອໝັ້ນວ່າ ອົດສະຕຣາລີ ຈະສືບຕໍ່ເສີມຂະຫາຍ ການພົວພັນຮ່ວມມື ແລະ ປະກອບສ່ວນຢ່າງຕັ້ງໜ້າ ເຂົ້າໃນກົນໄກການຮ່ວມມືແບບຫລາຍຝ່າຍ ແລະ ສອງຝ່າຍໃນຂອບການຮ່ວມມືຂອງອາຊຽນ ເພື່ອສົ່ງເສີມສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງຂອງພາກພື້ນ ແລະ ນຳເອົາຜົນປະໂຫຍດມາສູ່ ອາຊຽນ ແລະ ອົດສະຕຣາລີ.

ຂ່າວ: ກິດຕາ

ພາບ: ອ່າຍຄຳ

KPL