ຂປລ
ຂປລ. ກະຊວງສາທາລະນະສຸກ ຈະວາງມາດຕະການ ໃນການສຶກສາອົບຮົບ ຈັນຍາບັນ, ຈັນຍາທໍາ ໃຫ້ແດ່ພະນັກງານແພດ-ໝໍ ແລະ ພະຍາບານ ໃນກໍລະນີ ທີ່ມີການກະທໍາຜິດ ເຊັ່ນ: ການເວົ້າຈາບໍ່ສຸພາບຕໍ່ ຄົນເຈັບ ແລະ ຍາດຕິພີ່ນ້ອງຄົນເຈັບ, ຖາມເອົາເງິນນໍາຄົນເຈັບ ຫລື ຍາດຕິພີ່ນ້ອງຄົນເຈັບ ຫລື ສະແດງພຶດຕິກຳ ຂອງຕົນບໍ່ເໝາະສົມ ຕ້ອງໄດ້ປະຕິບັດວິໄນ ຢ່າງເຄັ່ງຄັດ.
ຂປລ. ກະຊວງສາທາລະນະສຸກ ຈະວາງມາດຕະການ ໃນການສຶກສາອົບຮົບ ຈັນຍາບັນ, ຈັນຍາທໍາ ໃຫ້ແດ່ພະນັກງານແພດ-ໝໍ ແລະ ພະຍາບານ ໃນກໍລະນີ ທີ່ມີການກະທໍາຜິດ ເຊັ່ນ: ການເວົ້າຈາບໍ່ສຸພາບຕໍ່ ຄົນເຈັບ ແລະ ຍາດຕິພີ່ນ້ອງຄົນເຈັບ, ຖາມເອົາເງິນນໍາຄົນເຈັບ ຫລື ຍາດຕິພີ່ນ້ອງຄົນເຈັບ ຫລື ສະແດງພຶດຕິກຳ ຂອງຕົນບໍ່ເໝາະສົມ ຕ້ອງໄດ້ປະຕິບັດວິໄນ ຢ່າງເຄັ່ງຄັດ.
ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ໄດ້ຂຶ້ນຊີ້ແຈງຕໍ່ຄຳຊັກຖາມ ຂອງ ສະມາຊິກສະພາແຫ່ງຊາດ ໃນໃນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 26 ພະຈິກ 2024 ໃນຫລາຍບັນຫາ ໂດຍສະເພາະ ມາດຕະການ ໃນການສຶກສາອົບຮົມ ຈັນຍາບັນ, ຈັນຍາທໍາ ໃຫ້ແດ່ພະນັກງານແພດ-ໝໍ ແລະ ພະຍາບານ ໃນກໍລະນີ ທີ່ມີການກະທໍາຜິດ. ໃນນັ້ນ, ຖ້າກະທໍາຜິດຄັ້ງທີ 1 ຈະຖືກ ຕັກເຕືອນ, ຊ່ອງໜ້າຄະນະພະແນກ, ຄະນະໜ່ວຍ, ເຮັດບົດບັນທຶກ ອ່ານຄໍາຕັກເຕືອນໃຫ້ຜູ້ກ່ຽວຮັບຮູ້, ພ້ອມທັງເຊັນຮັບຮູ້; ຖ້າກະທໍາຜິດຄັ້ງທີ 2 ໃຫ້ຜູ້ກ່ຽວເຮັດໃບສຳຫລວດຂອງຕົນເອງ ພ້ອມທັງປະຕິຍານ ຕົນເອງຕໍ່ຫົວໜ້າ ແລະ ຄະນະພະແນກ, ຫົວໜ້າໜ່ວຍ ພ້ອມທັງໃຫ້ຜູ້ກ່ຽວເຊັນຮັບຮູ້; ຖາກະທໍາຜິດເທື່ອທີ 3 ທາງພະແນກ ຈະສົ່ງຜູ້ກ່ຽວຕໍ່ພະແນກຈັດຕັ້ງພະນັກງານ ເຊີນອົງການຈັດຕັ້ງມະຫາຊົນມາຮ່ວມ, ມີຄະນະພັກ, ຜູ້ອໍານວຍການໂຮງໝໍ, ຮອງອໍານວຍການໂຮງໝໍ ຕັດສິນກັນເທື່ອສຸດທ້າຍ ແລະ ບາງການຈັດຕັ້ງຂອງ ໂຮງໝໍ ກໍໄດ້ໂອ້ລົມເບິ່ງເງື່ອນໄຂ ບາງຄັ້ງໃຫ້ຜູ້ກ່ຽວຍ້າຍໄປປະຈຳການບ່ອນບໍ່ມີຄົນເຈັບ, ຖ້າຫາກກະທໍາຜິດຮ້າຍແຮງ ແມ່ນໃຫ້ຢຸດຕິການປະຕິບັດໜ້າທີ່ທັນທີ ແລະ ປະຕິບັດຕາມກົດໝາຍ, ລະບຽບການຂອງພະນັກງານ-ລັດຖະກອນ.
ຢ່າງໃດກໍຕາມ, ແຕ່ລະໂຮງໝໍ ໄດ້ມີແຜນຝຶກອົບຮົມ ໃຫ້ພະນັກງານແພດ-ໝໍ ທຸກຄົນຕ້ອງໄດ້ຮຽນຮູ້ ກ່ຽວກັບຈັນຍາບັນ, ຈັນຍາທໍາ, ມາລະຍາດທາງສັງຄົມ ທີ່ທາງໂຮງໝໍໄດ້ສອນໃຫ້ພະນັກງານ ປີລະ 1 ຄັ້ງ, ສໍາລັບ ພະຍາ ບານ ແມ່ນ 2 ຄັ້ງ, ສໍາລັບ ກໍລະນີມີພະນັກງານ ມາເຂົ້າເຮັດວຽກໃໝ່ ຫລື ອາສາສະໝັກໃໝ່ ແມ່ນຄະນະພະຍາບານ ຈະໄດ້ຝຶກອົບອົບຮົມ ດ້ານຈັນຍາບັນ, ຈັນຍາທໍາ ໃຫ້ກ່ອນການເຮັດວຽກ ໂດຍໃຊ້ແບບຟອມທົດສອບຄວາມຮັບຮູ້ກ່ອນ ແລະ ຫລັງຝຶກອົບອົບຮົມ.
ຂ່າວ: ທະນູທອງ
ພາບ: ຂັນໄຊ
KPL
