ຂປລ. ກອງປະຊຸມລັດຖະມົນຕີ ປ້ອງກັນປະເທດອາຊຽນບວກ ຄັ້ງທີ 11 (ຈີນ, ຣັດເຊຍ, ເກົາ ຫລີໃຕ້, ອິນເດຍ, ສະຫະລັດອາເມລິກາ, ຍີ່ປຸ່ນ, ນິວຊີແລນ, ອົດສະຕຣາລີ) ໄດ້ຈັດຂຶ້ນໃນວັນທີ 21 ພະຈິກ 2024 ພາຍໃຕ້ຫົວຂໍ້ ຮ່ວມມືກັນເພື່ອສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງຂອງອາຊຽນ ພາຍໃຕ້ການເປັນ ປະທານຂອງ ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະ ມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ, ມີບັນດາລັດຖະມົນຕີປ້ອງກັນປະເທດອາຊຽນ, ຕີມໍແລັດສະເຕ, ເລຂາທິການໃຫຍ່ອາຊຽນ ເຂົ້າຮ່ວມ.

ໂອກາດນີ້, ທ່ານ ພົນເອກ ຈັນສະໝອນ ຈັນຍາລາດ ໄດ້ມີ​ຄໍາ​ເຫັນວ່າ: ກອງປະຊຸມໃນຄັ້ງນີ້, ຈັດຂຶ້ນທ່າມກາງສະພາການຂອງໂລກ ແລະ ພາກພື້ນ ມີຄວາມຫຍຸ້ງຍາກສັບສົນ, ສະລັບສັບຊ້ອນ ແລະ ຍາກທີ່ຈະຄາດຄະເນໄດ້ ມີຫລາຍພາກພື້ນໃນໂລກ ກຳລັງຜະເຊີນໜ້າກັບຄວາມໝັ້ນຄົງ ທາງການທະຫານ ແລະ ບໍ່ແມ່ນທາງ ການທະຫານ ທີ່ສົ່ງຜົນກະທົບຕໍ່ຊີວິດ ແລະ ຊັບສີນຂອງປະຊາຊົນ ກໍຄື ການພັດທະນາ ເສດຖະກິດ-ສັງຄົມໂດຍລ້ວມ. ສະນັ້ນ, ກອງປະຊຸມຄັ້ງນີ້, ຈັດຂຶ້ນແນໃສ່ເພື່ອປຶກສາຫາ ລື ແລະ ແລກປ່ຽນທັດສະນະກ່ຽວກັບ ສະພາບຄວາມໝັ້ນຄົງ ຂອງພາກພື້ນສາກົນທີ່ພົ້ນເດັ່ນ ເປັນຕົ້ນ ໄພຂົ່ມຂູ່ ແລະ ສິ່ງທ້າທາຍທາງ ດ້ານຄວາມໝັ້ນຄົງ ພາຍໃນພາກພື້ນ ກໍຄື ສາກົນ ເພື່ອເສີມຂະຫຍາຍການຮ່ວມມື ດ້ານວຽກງານປ້ອງກັນຊາດ ແລະ ຄວາມໝັ້ນຄົງ, ສົ່ງເສີມຄວາມເຂົ້າອົກເຂົ້າໃຈ ໃນການປົກປັກຮັກສາ ແລະ ສ້າງສາສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງຂອງພາກພື້ນ ແລະ ສາ ກົນ. ສະພາບຄວາມໜັ້ນຄົງຂອງພາກພື້ນ ແລະ ສາກົນ ກໍໄດ້ຢໍ້າເຕືອນໃຫ້ອາຊຽນຕ້ອງໄດ້ ສົ່ງເສີມການສ້າງຄວາມເຊື່ອໝັ້ນ, ຄວາມໄວ້ເນື້ອເຊື່ອໃຈ ແລະ ການຮ່ວມມືທີ່ເປັນຮູບປະທຳ ເພື່ອສ້າງຄວາມພ້ອມ ໃນການຮັບມືກັບບັນຫາດັ່ງກ່າວ.

ໃນໂອກາດດຽວກັນ, ທ່ານ ພົນເອກ ຈັນສະໝອນ ຈັນຍາລາດ ຍັງໄດ້ສະແດງຄວາມຍິນດີ ທີ່ແຜນການສາມປີຂອງໜ່ວຍງານຜູ້ຊ່ຽວຊານ ຂອງກອງປະຊຸມລັດຖະມົນຕີ ປ້ອງກັນປະເທດອາຊຽນບວກ ໄດ້ຖືກຮັບຮອງ ເຊິ່ງແຜນການດັ່ງກ່າວ, ຈະເປັນບາດກ້າວສຳຄັນໜຶ່ງ ສົ່ງເສີມການຮ່ວມມືທີ່ເປັນຮູບປະທໍາ ແລະ ການສ້າງຂີດ ຄວາມສາມາດຂອງບັນດາປະເທດສະມາຊິກ. ພ້ອມທັງຫວັງວ່າທຸກປະ ເທດ ສະມາຊິກອາຊຽນ-ບວກ ຈະໃຫ້ການສະໜັບສະໜູນ ແລະ ປະກອບສ່ວນເຂົ້າໃນແຜນວຽກ ຂອງບັນດາໜ່ວຍງານດັ່ງກ່າວຢ່າງຕັ້ງໜ້າ.

ຂ່າວ: ກິດຕາ

ພາບ: ອ່າຍຄຳ

KPL