*** ຕໍ່ຈາກສະບັບກ່ອນ ***  

ການຕິດເຊື້ອ RSV ເເມ່ນຈະມີ ອາການຄ້າຍຄືກັນກັບການເປັນ ຫວັດທົ່ວໄປ, ແຕ່ໃນບາງກໍລະນີ ໂດຍພິເສດສະເພາະໃນເດັກນ້ອຍ ເເລ້ວ ອາດຈະມີອາການຮຸນແຮງ ຫລາຍຂຶ້ນ ເເລະ ນີ້ກໍຄືຂໍ້ຄວນສັງເກດອາການຕິດເຊື້ອ RSV ເຊິ່ງ ຈະມີອາການເຫລົ່ານີ້ຄື:

1. ອາການຄືຫວັດ: ນ້ຳມູກໄຫລ , ໄອ, ເຈັບຄໍ, ຈາມ ແລະ ມີໄຂ້ຕໍ່າ 2. ຫາຍໃຈລຳບາກ: ຫາຍໃຈສຽງ ດັງ, ຫາຍໃຈໄວ ຫລື ຫາຍໃຈແຮງຈົນໜ້າອົກຍຸບລົງເມື່ອຫາຍໃຈເຂົ້າ 3. ໄອໜັກ: ໄອຕໍ່ເນື່ອງ ຫລື ຮຸນແຮງອາດມີຂີ້ກະເທີປະສົມນຳ 4. ບັນຫາການກິນ ແລະ ດື່ມ: ເບື່ອອາຫານ, ບໍ່ຍອມກິນ ຫລື ດື່ມນົມ ແລະ ນ້ຳໜັກຫລຸດລົງ 5. ຄວາມອິດເມື່ອຍ ແລະ ເສົ້າຊືມ: ເດັກອາດມີອາການເສົ້າຊືມ ຫລື ຢາກນອນຜິດປົກກະຕິ 6. ຜິວຈືດ ຫລື ຂຽວ: ໂດຍສະເພາະເເມ່ນຮິມປາກ ແລະ ເລັບມື ຖ້າຫາກອອກຊິເຈນບໍ່ພຽງພໍສ່ວນໃນຜູ້ໃຫຍ່ ຫລື ເດັກນ້ອຍ ທີ່ໃຫຍ່ພໍປະມານເເລ້ວ ອາການມັກຈະບໍ່ຮຸນແຮງຫລາຍ, ແຕ່ສຳລັບເດັກເກີດໃໝ່ ໂດຍສະເພາະເດັກທີ່ເກີດກ່ອນກຳນົດ ຫລື ມີພະຍາດປະຈຳຕົວ ເເມ່ນຄວນເຂົ້າພົບແພດທັນທີຖ້າມີອາການເຫລົ່ານີ້.

ໃນປັດຈຸບັນນີ້, RSV ເເມ່ນຈະບໍ່ມີຢາປິ່ນປົວໂດຍສະເພາະເເຕ່ຈະປິ່ນປົວຕາມອາການ ແລະ ເພື່ອປ້ອງ ກັນການຕິດເຊື້ອ RSV ຄວນປະຕິ ບັດດັ່ງນີ້:

1. ລ້າງມືເລື້ອຍໆ: ລ້າງມືໃຫ້ສະອາດດ້ວຍສະບູ ແລະ ເຈວລ້າງ (RSV) ມືທີ່ມີສານເຫລົ້າ. 2. ຫລີກເວັ້ນການສໍາຜັດໃບໜ້າ: RSV ສາມາດເຂົ້າໄປໃນຮ່າງກາຍຜ່ານຕາ, ດັງ, ແລະ ປາກ. ດັ່ງນັ້ນ, ພະຍາຍາມຫລີກເວັ້ນການ ສໍາຜັດໃບໜ້າ. 3. ອັດປາກໃນເວລາໄອ ແລະ ຈາມ: ໃຊ້ຜ້າອັດດັງ ຫລື ປິດປາກໃນເວລາໄອ-ຈາມ. 4. ຫລີກລ່ຽງການສຳພັດກັບຄົນເຈັບ: ຫລີກລ່ຽງການສຳຜັດໃກ້ຄົນທີ່ມີອາການເປັນຫວັດ ຫລື ໄຂ້ຫວັດ, ໂດຍສະເພາະເດັກ ອ່ອນ, ຜູ້ອາຍຸສູງ ແລະ ຜູ້ທີ່ມີພູມຕ້ານທານຕ່ຳ.

ທ່ານ ດຣ ວິລະພອນ ໄຜ່ມະນີ ເເພດຜູ້ຊ່ຽວຊານເດັກ, ຫົວໜ້າພະເເນກຟື້ນຟູຊີບໂຮງໝໍເດັກໄດ້ກ່າວວ່າ: RSV ເປັນພະຍາດທີ່ມີມາ ເເຕ່ດົນເເລ້ວ ເເລະ ເປັນພະຍາດທີ່ປິ່ນປົວໃຫ້ເຊົາຂາດໄດ້ ເຊິ່ງອັດຕາສ່ວນການເສຍຊີວິດນັ້ນເເມ່ນມີໜ້ອຍຫລາຍ, ໃນປັດຈຸບັນນີ້ ກໍຍັງບໍ່ທັນມີວັກຊິນປ້ອງກັນ RSV ເທື່ອ ເເລະ ເພື່ອເປັນການປ້ອງກັນການຕິດເຊື້ອ RSV ນັ້ນ ວິທີປ້ອງກັນ ທີ່ດີທີ່ສຸດກໍຈະເເມ່ນການລ້າງມືຢູ່ເລື້ອຍໆ, ຫລີກລ່ຽງການຢູ່ໃກ້ຄົນ ທີ່ຢູ່ບໍ່ສະບາຍ ຫລື ບໍ່ໄປສະຖານທີ່ເເອອັດ ເເລະ ຝາກເຖິງພໍ່ເເມ່ຜູ້ປົກຄອງຜູ້ທີ່ເບິ່ງເເຍງດູເເລລູກຜູ້ຕິດເຊື້ອ RSV ຕ້ອງໄດ້ລ້າງມືໃສ່ສະບູທຸກໆຄັ້ງຫລັງຈາກທີ່ມີການສຳຜັດ ເເລະ ຖ້າຫາກວ່າລູກຫລານຂອງທ່ານມີອາການດັ່ງກ່າວນີ້ ເເມ່ນຄວນເຂົ້າ ພົບເເພດຢູ່ໂຮງໝໍໂດຍດ່ວນ ເພື່ອຮັບການປິ່ນປົວ.

ນອກຈາກນັ້ນ, ເມື່ອບໍ່ດົນມານີ້ກໍເຫັນໄດ້ຈາກຜູ້ນຳໃຊ້ Face-book ຄົນໜຶ່ງທີ່ໄດ້ມາບອກເລົ່າ ປະສົບການທີ່ລູກຂອງຕົນໄດ້ຕິດເຊື້ອພະຍາດ RSV ແລະ ເພິ່ນກໍຍັງໄດ້ບອກເຕືອນຜູ້ທີ່ມີລູກນ້ອຍເອົາໄວ້ວ່າ: ເວລາອອກໄປນອກບ້ານມາ ຄວນທຳຄວາມສະອາດຮ່າງກາຍຂອງຕົວເອງໃຫ້ສະອາດກ່ອນໄປສຳຜັດເດັກນ້ອຍ, ບໍ່ຄວນກອດ ຫລື ຫອມເເກ້ມ, ບໍ່ຄວນດົມລູກຖ້າຫາກ ຄົນຢູ່ເຮືອນມີຜູ້ໃດທີ່ເປັນຫວັດເປັນໄອ ແມ່ນບໍ່ໃຫ້ເຂົ້າໃກ້ລູກ ເເລະ ຄວນລ້າງມືໃສ່ເຈວຕະຫລອດຍາມສຳພັດລູກ ເພາະເຊື້ອພະຍາດດັ່ງກ່າວ ນີ້ອັນຕະລາຍຫລາຍ.

ສະນັ້ນ, ຈຶ່ງເຫັນໄດ້ວ່າເຊື້ອພະຍາດ RSV ນີ້ ຢູ່ໃກ້ຕົວເຮົາຫລາຍກວ່າທີ່ຄິດ ເເລະ ຢາກຝາກເຖິງພໍ່ເເມ່ ຜູ້ປົກຄອງຂອງເດັກນ້ອຍ ໃຫ້ເອົາໃຈໃສ່ເບິ່ງເເຍງໃນເລື່ອງສຸຂະພາບຮ່າງກາຍ ພ້ອມທັງຈິດໃຈຂອງເຂົາເຈົ້າຕື່ມ ເພື່ອເປັນການປ້ອງກັນລູກຫລານຂອງທ່ານໃຫ້ຫ່າງໄກ ເເລະ ປອດໄພຈາກພະຍາດດັ່ງກ່າວນີ້.

KPL