ຂປລ. ຣັດເຊຍ ປະກາດຢ່າງເປັນທາງການວ່າກໍາລັງພິຈາລະນາ ຈະເຊື່ອມຕໍ່ເສັ້ນທາງລົດໄຟຂົນສົ່ງສິນຄ້າ ແລະ ຜູ້ໂດຍສານຄັ້ງປະຫວັດສາດ ລະຫວ່າງ ລາວ-ຣັດເຊຍ ຜ່ານປະເທດຈີນສູ່ອາຊຽນ ໃນໂອກາດ ທີ່ ສປປ ລາວ ພວມເບີກບານມ່ວນຊື່ນ ສະຫລອງ 3 ວັນສໍາຄັນຂອງຊາດຢ່າງຟົດຟື້ນ ຄື: ການສ້າງຕັ້ງສາຍພົວພັນການທູດ ລາວ-ຣັດເຊຍ ຄົບຮອບ 65 ປີ, ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ, ວັນສະຖາປະນາ ສປປ ລາວ ຄົບຮອບ 50 ປີ. ຂະນະທີ່ຕະຫລອດໄລຍະ 5 ທົດສະຕະວັດຜ່ານມາ, ລາວຢືນຢັນຄວາມສໍາເລັດຢ່າງເອກອ້າງທະນົງໃຈ ທີ່ຍາດມາໄດ້ດ້ວຍເສດຖະກິດ ຂະຫຍາຍຕົວສະເລ່ຍບໍ່ຫລຸດ 4% ຕໍ່ປີ, ໄດ້ກາຍເປັນໝໍ້ໄຟແຫ່ງອາຊີ, ໄດ້ສ້າງຄູ່ຮ່ວມມື ແລະ ເປັນພາຄີສໍາຄັນກັບພາກພື້ນ-ສາກົນ, ໄດ້ປ່ຽນສະຖານະຕົນເອງ ຈາກປະເທດບໍ່ມີທາງອອກສູ່ທະເລ ກາຍເປັນປະເທດເຊື່ອມໂຍງ-ເຊື່ອມຈອດ ຄັ້ງປະຫວັດສາດ ຜ່ານເສັ້ນທາງລົດໄຟ ລາວ-ຈີນ ພາຍໃຕ້ຄູ່ຮ່ວມຊາຕາກໍາ ລາວ-ຈີນ ໝັ້ນຄົງຂະໜົງແກ່ນ.

ພາຍຫລັງສິ້ນສຸດສົງຄາມຈາກການຮຸກຮານ ຂອງພວກຈັກກະພັດລ່າເມືອງຂຶ້ນ ແລະ ສ້າງຕັ້ງ ສປປ ລາວ ໃນວັນທີ 2 ທັນວາ 1975 ເຊິ່ງປີນີ້ພໍດີຄົບຮອບ 50 ປີ ທີ່ມີຄວາມໝາຍສໍາຄັນເປັນພິເສດ ເພາະການປ່ຽນແປງແຕ່ລະໄລຍະ ມີລັກສະນະແຕກຕ່າງກັນ ແລະ ມີຄວາມທ້າທາຍເພີ່ມຂຶ້ນເລື້ອຍໆ ຢ່າງບໍ່ເຄີຍເຫັນມາກ່ອນ. ຕໍ່ການປ່ຽນແປງທີ່ວ່ານັ້ນອາດ ເຮັດໃຫ້ຫລາຍທ່ານຕັ້ງຄໍາຖາມວ່າມີຫຍັງແດ່ ທີ່ພວກເຮົາເຮັດໄດ້ ແລະ ຍາດມາໄດ້ທີ່ເປັນຜົນງານຢ່າງປະຈັກຕາ? . ສະນັ້ນ, ມື້ນີ້ພວກເຮົາໄດ້ເລັ່ງລັດຕັດຕອນ ແລະ ຊອກຄົ້ນຂໍ້ມູນສໍາຄັນແບບ ລວມໆມາແລກປ່ຽນ ເພື່ອສະເໜີທ່ານຜູ້ອ່ານ ໄດ້ຮຽນຮູ້ໄປພ້ອມກັນ,  ດັ່ງທີ່ຮູ້ນໍາກັນວ່າ ເມື່ອສິ້ນສຸດສຽງລະເບີດແຕກ ຄື: ລາວໄດ້ຮັບເອກະລາດ ແລະ ສະຖາປະນາຕົນເອງໃນປີ 1975 ເຫັນວ່າເວລານັ້ນປະເທດລາວເຮົາ ບໍ່ຫລົງເຫລືອຫຍັງເລີຍເປັນພື້ນຖານ ໃຫ້ແກ່ການພັດທະນາ ເສດຖະກິດ-ສັງຄົມ, ​ນັບແຕ່ໂຄງລ່າງຖະໜົນຫົນທາງ, ໂຮງຈັກໂຮງງານ ແລະ ເສດຖະກິດຖືກທໍາລາຍຈົນກ້ຽງ, ຍິ່ງໄປກວ່ານັ້ນ “ມໍລະດົກບາບ” ທີ່ເປັນລູກລະເບີດອັນຕະລາຍ ຂອງພວກຈັກກະພັດເອົາມາຖິ້ມໃສ່ ແຜ່ນດິນລາວ ໂດຍສະເລ່ຍເກືອບ 3 ລ້ານໂຕນ ໃນອະດີດກໍຫລົງເຫລືອ ຝັງໃຕ້ດິນເຖິງທຸກວັນນີ້ ເປັນຈໍານວນບໍ່ໜ້ອຍ ອັນໄດ້ສົ່ງຜົນກະທົບຮ້າຍແຮງຕໍ່ຊີວິດ ແລະ ຊັບສິນຂອງປະຊາຊົນ ນັ້ນຄືໂຈດສໍາຄັນທີ່ລາວ ແລະ ເພື່ອນມິດສາກົນຮ່ວມກັນສຸມໃສ່ ທຸກຄວາມພະຍາຍາມ ແກ້ໄຂບັນຫາດັ່ງກ່າວຕະຫລອດມາ ເພື່ອເປີດເສັ້ນທາງ ໃຫ້ແກ່ການພັດທະນາ ແລະ ແກ້ ໄຂຄວາມທຸກຍາກ. ແຕ່ຍ້ອນການດໍາເນີນນະໂຍບາຍ ຂອງພັກ-ລັດຖະບານ ອັນຖືກຕ້ອງຜ່ານແຕ່ລະໄລຍະ ດ້ວຍໄຫວພິບຄ່ອງແຄ້ວ, ສະຫລາດສ່ອງໃສ ແລະ ປີຊາສາມາດ ຈຶ່ງຄ່ອຍໆກ້າວຂ້າມຜ່ານອຸປະສັກ ແລະ ສາມາດຍາດໄດ້ຜົນສໍາເລັດໃຫຍ່ຫລວງ ເປັນທີ່ໜ້າພາກພູມໃຈ ສໍາລັບປວງຊົນລາວທັງຊາດເລື້ອຍໆມາ ເຊິ່ງສະແດງໃຫ້ເຫັນຕົວຢ່າງ ທີ່ເປັນຮູບປະທໍາຈັບຕ້ອງໄດ້ ດັ່ງກ່າວລຸ່ມນີ້: ປີ 1955 ລາວເຂົ້າເປັນພາຄີ ຂອງອົງການສະຫະປະຊາຊາດ, ປີ 1975 ລາວມີເຂື່ອນໄຟຟ້າພຽງ 2 ແຫ່ງ (ເຂື່ອນໄຟຟ້າເຊລໍາບໍາ ຢູ່ແຂວງຈໍາປາສັກ ແລະ ເຂື່ອນນໍ້າໄຟຟ້ານໍ້າງື່ມ ແຂວງວຽງຈັນ) ປັດຈຸບັນມີແຫລ່ງພະລັງງານໄຟຟ້າ ຈາກພະລັງງານນໍ້າ, ພະລັງງານລົມ ແລະ ແສງຕາເວັນທີ່ເປັນມິດ ກັບສິ່ງແວດລ້ອມລວມປະມານ 80 ແຫ່ງ ແລະ ປະຊາຊົນເຂົ້າເຖິງ ໄຟຟ້າໃຊ້ປະມານກວ່າ 90% ທົ່ວປະເທດ; ມີເສັ້ນທາງຫລວງແຫ່ງຊາດພຽງ 2 ເສັ້ນ ຄື: ທາງຫລວງເລກທີ 13 ໃຕ້ ແລະ ເລກທີ 13 ເໜືອ  ປັດຈຸບັນມີເສັ້ນທາງຫລວງແຫ່ງຊາດ ຫລາຍກວ່າ 10 ເສັ້ນເຊື່ອມໂຍງ-ເຊື່ອມຈອດກັບ ຈີນ, ຫວຽດນາມ, ໄທ, ກໍາປູເຈຍ, ມຽນມາ ລວມທັງມີຂົວຂ້າມແມ່ນໍ້າຂອງຫລາຍແຫ່ງເຊື່ອມຈອດກັບໄທ, ມຽນມາ; ປີ 1997 ເຂົ້າເປັນສະມາຊິກອາຊຽນ, ປີ 2013 ເຂົ້າເປັນສະມາຊິກຂອງອົງການ​ການຄ້າໂລກ; ປັດຈຸບັນລາວ ມີສາຍພົວພັນການທູດກັບ 151 ປະເທດ ເມື່ອທຽບໃສ່ນະໂຍບາຍ ຈິນຕະນາການໃໝ່ ໃນປີ 1986 ໄດ້ຂະຫຍາຍເຂົ້າສູ່ລວງ​ເລິກ. ນອກຈາກນັ້ນແລ້ວ, ລາວ ຍັງໄດ້ປະກາດສະຖານະຕົນເອງ ຄັ້ງປະ ຫວັດສາດ ຈາກປະເທດບໍ່ມີຊາຍແດນ ອອກສູ່ທະເລກາຍເປັນປະເທດ ເຊື່ອມໂຍງ-ເຊື່ອມຈອດກັບ​ພາກພື້ນ ແລະ ສາກົນ ໃນປີ 2021 ຜ່ານໂຄງການກໍ່ສ້າງເສັ້ນທາງ ລົດໄຟລາວ-ຈີນ ພາຍໃຕ້ຄູ່ຮ່ວມມືຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ທີ່ມີເຄືອຂ່າຍຄວບຄຸມ 150 ກວ່າປະເທດທົ່ວໂລກ ແລະ ຫລ້າສຸດ ກອງປະຊຸມ ຄັ້ງທີ 25 ຂອງສະພາມົນຕີປະມຸກລັດ ປະເທດສະມາຊິກອົງການຮ່ວມມືຊຽງໄຮ້ ທີ່ຈັດຂຶ້ນຢູ່ນະຄອນທຽນສິນ ສປ ຈີນ ໃນວັນທີ 1 ກັນຍາ 2025 ຜ່ານມາ ໄດ້ເຫັນດີ ເປັນເອກະພາບກັນຮັບເອົາ ສປປ ລາວ ເຂົ້າເປັນປະເທດຄູ່ເຈລະຈາ ປະເທດທີ 15 ຢ່າງເປັນທາງການ ເຮັດໃຫ້ມາຮອດປັດຈຸບັນ ອົງການຮ່ວມມືຊຽງໄຮ້ (SCO) ມີສະມາຊິກທັງໝົດ 10 ປະເທດ, ມີ 2 ປະເທດສັງເກດການ ແລະ 15 ປະເທດຄູ່ເຈລະຈາ (ລວມທັງ ສປປ ລາວ).

ເຖິງໃນແນວໃດກໍດີ,​ ໃນລະຫວ່າງວັນທີ 7 ຕຸລາ  2025 ຜ່ານມາ, ທ່ານ ເຊຣເກ ລາວະຣົບ ລັດຖະມົນຕີກະຊວງການຕ່າງປະເທດ ແຫ່ງ ສ ຣັດເຊຍ ຍັງຂຽນບົດຄວາມສໍາຄັນສະບັບໜຶ່ງ ຜ່ານສື່ຕ່າງໆທີ່ມີຄວາມໝາຍ ທາງປະ ຫວັດສາດເຊັ່ນກັນ ເພື່ອຊົມເຊີຍວັນສ້າງຕັ້ງສາຍພົວພັນການທູດ ລາວ-ຣັດເຊຍ ຄົບຮອບ 65 ປີ ໂດຍມີເນື້ອໃນລະບຸວ່າ: ຣັດເຊຍ ແລະ ລາວ ຮ່ວມກັນສະເຫລີມສະຫລອງ ການສ້າງຕັ້ງສາຍພົວພັນການທູດ. ຕະຫລອດໄລຍະຜ່ານມາ, ສອງປະເທດເຮົາ ກໍຄືທົ່ວໂລກ ໄດ້ມີການປ່ຽນແປງອັນໃຫຍ່ຫລວງ, ແຕ່ຍັງຄົງມີມິດຕະພາບ ທີ່ເປັນມູນເຊື້ອອັນດີງາມ, ການຊ່ວຍເຫລືອເຊິ່ງກັນ ແລະ ກັນ ແລະ ອ້າຍນ້ອງຮ່ວມຮົບ ທີ່ມີມາແຕ່ໄລຍະການຕໍ່ສູ້ ປົດປ່ອຍປະເທດຊາດ ຂອງປະຊາຊົນລາວ ໃນການຕໍ່ຕ້ານພວກລ່າເມືອງຂຶ້ນໃນອະດີດ. ປີນີ້ປະເທດເຮົາສະເຫລີມສະຫລອງ ວັນມະຫາໄຊຊະນະສົງຄາມປົກປ້ອງປິຕຸພູມ ແລະ ສົງຄາມໂລກຄັ້ງທີສອງ ຄົບຮອບ 80 ປີ. ຄະນະຜູ້ແທນຂອງ ສປປ ລາວ ໄດ້ເຂົ້າຮ່ວມພິທີສະເຫລີມງານສະຫລອງດັ່ງກ່າວ ໃນວັນທີ 9 ພຶດສະພາ ທີ່ນະຄອນຫລວງມົດສະກູ. ກ້ອນກໍາລັງທະຫານລາວ ກໍໄດ້ເຂົ້າຮ່ວມເດີນສວນສະໜາມ ຢູ່ສະໜາມແດງ. ໃນປີ 2025, ປະເທດລາວ ສະເຫລີມສະຫລອງ ວັນສຳຄັນແຫ່ງຊາດເຊັ່ນດຽວກັນ ຄື: ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ (ວັນທີ 22 ມີນາ 1955) ແລະ ວັນສະຖາປະນາ ສປປ ລາວ ຄົບຮອບ 50 ​ປີ(ວັນທີ 2 ທັນວາ 1975).

ຣັດເຊຍ ຕີລາຄາສູງຕໍ່ຄວາມເຄົາລົບຂອງເພື່ອນລາວ ຕໍ່ປະຫວັດສາດ, ການຮັກສາຄວາມຈິງ ຂອງປະຫວັດສາດ ແລະ ການສະກັດກັ້ນຄວາມພະຍາຍາມ ທີ່ຈະບິດເບືອນຄວາມຈິງນັ້ນ. ຣັດເຊຍ ຮູ້ວ່າ ປະຊາຊົນລາວຍັງຈົດຈຳ ຕໍ່ການສະໜັບສະໜູນ ທີ່ປະເທດເຮົາ ໃຫ້ຕໍ່ການສ້າງລັດລາວເອກະລາດ. ສະຫະພາບໂຊວຽດ ໄດ້ເຂົ້າຮ່ວມຢ່າງຕັ້ງໜ້າ ໃນກອງປະຊຸມເຊີແນວ ໃນປີ 1954 ທີ່ນໍາໄປສູ່ການສິ້ນສຸດ ການປົກຄອງຂອງພວກລ່າເມືອງຂຶ້ນຝຣັ່ງ ໃນອິນດູຈີນ ແລະ ຍັງຮັບປະກັນຄວາມເປັນກາງຂອງປະເທດລາວ. ໃນໄລຍະສົງຄາມລັບ, ການຊ່ວຍເຫລືອອັນກວ້າງຂວາງ ຂອງສະຫະພາບໂຊວຽດ ໄດ້ປະກອບສ່ວນອັນສໍາຄັນ ເຂົ້າໃນໄຊຊະນະຂອງກອງກຳລັງ ປົດປ່ອຍປະເທດລາວ. ສະນັ້ນ, ເພື່ອຈົດຈຳວິລະກຳຂອງນັກບິນໂຊວຽດ, ໃນປີ 2022 ຈຶ່ງໄດ້ສ້າງອານຸສອນສະຖານຂຶ້ນ ຢູ່ນະຄອນຫລວງວຽງຈັນ ແລະ ເມືອງແປກ (ແຂວງຊຽງຂວາງ) .

ພາຍຫລັງການສະຖາປະນາ ສປປ ລາວ, ປະເທດເຮົາໄດ້ໃຫ້ຄວາມຊ່ວຍເຫລືອ ໃນການສ້າງຂີດຄວາມສາມາດ ທາງດ້ານການປ້ອງກັນປະເທດ ແລະ ການພັດທະນາເສດຖະກິດແຫ່ງຊາດ. ດ້ວຍການຊ່ວຍເຫລືອຂອງຊ່ຽວຊານໂຊວຽດ ເຮັດໃຫ້ວິສາຫະກິດ ທາງດ້ານອຸດສາຫະກໍາ, ພື້ນຖານໂຄງລ່າງ ທາງດ້ານການຂົນສົ່ງທີ່ສຳຄັນ, ການສ້າງສະຖາບັນທາງການແພດ ແລະ ສະຖາບັນການສຶກສາ ໄດ້ມີຂຶ້ນຢູ່ປະເທດລາວ ຊຶ່ງໃນນັ້ນລວມມີ ໂຮງໝໍມິດຕະພາບ ຣັດເຊຍ-ລາວ ທີ່ຍັງສືບຕໍ່ສ້າງຜົນປະໂຫຍດຕໍ່ພົນລະເຮືອນລາວ ໃນປັດຈຸບັນ. ມາເຖິງປັດຈຸບັນ, ການຮ່ວມມື ຣັດເຊຍ-ລາວ ໄດ້ຮັບການພັດທະນາຢ່າງກ້າວກະໂດດ ບົນເນື້ອໃນຈິດໃຈ ແລະ ຂໍ້ກຳນົດຂອງສົນທິສັນຍາວ່າດ້ວຍ ຫລັກການແຫ່ງການພົວພັນມິດຕະພາບ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສະຫະພັນ ຣັດເຊຍ ໃນວັນທີ 9 ມີນາ ປີ 1994 ແລະ ຖະແຫລງການຄູ່ຮ່ວມມືຍຸດທະສາດ ດ້ານຄວາມໝັ້ນຄົງໃນຂົງເຂດ ອາຊີ-ປາຊີຟິກ ໃນວັນທີ 13 ຕຸລາ ປີ 2011. ສອງປະເທດເຮົາມີທັດສະນະອັນດຽວກັນ ຫລື ໃກ້ຄຽງກັນຕໍ່ຫລາຍບັນຫາສາກົນ. ພວກເຮົາສະໜັບສະໜູນການປະຕິບັດຕາມຫລັກການຂອງ ກົດບັດສະຫະປະຊາຊາດ ຢ່າງເຂັ້ມງວດ ແລະ ຢ່າງຄົບຖ້ວນ. ພວກເຮົາຍຶດໝັ້ນ ກັບການສ້າງລະບົບໂລກຫລາຍຂົ້ວ ທີ່ເປັນທຳ ແລະ ທີ່ສະແດງຄວາມຫລາກຫລາຍ ທາງວັດທະນະທຳ-ສິວິໄລ, ສິດຂອງບັນດາປະຊາຄົມໃນໂລກ ໃນການເລືອກຊາຕາກຳຂອງຕົນ. ພວກເຮົາຕໍ່ຕ້ານຢ່າງຕັ້ງໜ້າ ລັດທິລ່າເມືອງຂຶ້ນແບບໃໝ່, ມາດຕະການບີບບັງຄັບຝ່າຍດຽວ, ການນາບຂູ່ນຳໃຊ້ກຳລັງ ແລະ ການແຊກແຊງເຂົ້າວຽກງານພາຍໃນ ຂອງລັດອະທິປະໄຕ. ພວກເຮົາຕີລາຄາສູງ ຕໍ່ຄວາມພະຍາຍາມຂອງເພື່ອນມິດລາວ ທີ່ຈະສ້າງສາຍພົວພັນກັບບັນ ດາອົງການທີ່ສໍາຄັນ ຂອງໂລກ ລວມທັງກຸ່ມ BRICS ແລະ ອົງການຮ່ວມມືຊຽງໄຮ້, ສະຫະພັນເສດຖະກິດຢູເຣເຊຍ, ທີ່ຈະເຂົ້າຮ່ວມການສ້າງຄູ່ຮ່ວມມື ຢູເຣເຊຍໃຫຍ່ ແລະ ຂອບເຂດຄວາມໝັ້ນຄົງຢູເຣເຊຍ. ປີນີ້, ທີ່ກອງປະຊຸມສຸດຍອດອົງການຮ່ວມມືຊຽງໄຮ້ ທີ່ນະຄອນທຽນ​ສິນ ແຕ່ວັນທີ 31 ສິງຫາ ຫາ ວັນທີ 1 ກັນຍາ, ສະພາຜູ້ນຳລັດຂອງອົງການດັ່ງກ່າວ ໄດ້ຕົກລົງເປັນເອກະພາບກັນ ໃຫ້ປະເທດລາວເປັນຄູ່ຮ່ວມມື ຊຶ່ງຈະຊ່ວຍໃຫ້ປະເທດລາວ ສາມາດເປັນສ່ວນໜຶ່ງຂອງການຮ່ວມມື ທີ່ມີຄວາມຫລາກຫລາຍ ແລະ ມີປະສິດທິຜົນຫລາຍ ໃນຂອບດັ່ງກ່າວ.

ທ່ານ ເຊຣເກ ລາວະຣົບ ຍັງຍົກເນື້ອໃນບາງຕອນສໍາຄັນ ໂດຍຝ່າຍຣັດເຊຍເຫັນວ່າ ສປປ ລາວ ມີທ່າແຮງໃນການສ້າງໂຮງງານ ພະລັງງານໄຟຟ້ານິວເຄລຍ ຂະໜາດຕໍ່າ ດ້ວຍການເຂົ້າຮ່ວມ ຂອງລັດວິສາຫະກິດ Rosatom. ບັນດາບໍລິສັດອື່ນ ເຊັ່ນ: Rusal, RusHydro, GAZ ກໍສົນໃຈຈະຮ່ວມມືກັບຝ່າຍລາວ. ບໍລິສັດການຂົນສົ່ງ Fesco ໄດ້ຈັດການຂົນສົ່ງຂະໜາດໃຫຍ່ ລະຫວ່າງສອງປະເທດ ຜ່ານທ່າເຮືອ ຂອງປະເທດຫວຽດນາມ. ສອງຝ່າຍກຳລັງພິຈາລະນາ ການຈັດບໍລິການ ທາງລົດໄຟໂດຍສານ ແລະ ຂົນສົ່ງສິນຄ້າ ລະຫວ່າງເມືອງ ວະລາດິໂວສໂຕກ ແລະ ນະຄອນຫລວງວຽງຈັນ ຜ່ານປະເທດຈີນ ແລະ ອື່ນໆ.

ພ້ອມດຽວກັນນີ້,  ໜັງສືພິມວຽງຈັນທາມ ຍັງລາຍງານການໃຫ້ຄໍາເຫັນຂອງ ທ່ານ ນາງ ພອນວັນ ອຸທະວົງ ຮອງລັດຖະມົນຕີກະຊວງການເງິນ ຫວ່າງບໍ່ດົນມານີ້ວ່າ: ລັດຖະບານ ກໍາລັງຕັ້ງເປົ້າໝາຍ ອັດຕາການເຕີບໂຕເສດຖະກິດສະເລ່ຍຕໍ່ປີ ໃຫ້ໄດ້ 5, 5% ຕາມທີ່ໄດ້ກຳນົດໄວ້ ໃນຮ່າງແຜນພັດທະນາ ປີ 2026-2030 ເຊິ່ງເພີ່ມຂຶ້ນຈາກ 5 ປີຜ່ານມາ ທີ່ສະເລ່ຍຢູ່ທີ່  4,24% ເຊິ່ງແຜນດັ່ງກ່າວແມ່ນສອດຄ່ອງ ກັບວິໄສທັດການພັດທະນາ ຮອດປີ 2030, ເພື່ອວາງຮາກຖານອັນເຂັ້ມແຂງ ໃຫ້ແກ່ ສປປ ລາວ ໃນການຫລຸດພົ້ນອອກຈາກສະຖານະພາບ ປະເທດດ້ອຍພັດທະນາ (LDC), ທີ່ກໍານົດໄວ້ໃນປີ 2026.

ທ່ານ ນາງ ພອນວັນ ໄດ້ຍົກໃຫ້ເຫັນບັນດາຂະແໜງການທີ່ມີທ່າແຮງສໍາຄັນ ເພື່ອຂັບເຄື່ອນ ແລະ ຮັກສາການເຕີບໂຕທີ່ໝັ້ນທ່ຽງ ແລະ ສ້າງສະຖຽນລະພາບທາງເສດຖະກິດ ເຊິ່ງກວມເອົາຂະແໜງການ ດ້ານພະລັງງານໄຟຟ້າສະອາດ, ກະສິກໍາ ແລະ ການປຸງແຕ່ງກະສິກໍາ, ການຂຸດຄົ້ນບໍ່ແຮ່ ແລະ ການປຸງແຕ່ງແຮ່ທາດ, ພ້ອມທັງການຜະລິດອຸດສາຫະກໍາ ທີ່ເຊື່ອມໂຍງກັບລະບົບຕ່ອງໂສ້ ການສະໜອງໃນພາກພື້ນ. ອັນສໍາຄັນທີ່ສຸດ ການທ່ອງທ່ຽວ ແລະ ການຂົນ ສົ່ງ (ໂລຈິສຕິກ) ຍັງຈະສືບຕໍ່ມີບົດບາດສໍາຄັນທີ່ສຸດ ໂດຍສະເພາະເສັ້ນທາງລົດໄຟ ລາວ-ຈີນ, ໂດຍການໃຊ້ປະໂຫຍດ ຈາກທີ່ຕັ້ງຍຸດທະສາດຂອງລາວ ໃນຖານະທີ່ເປັນສູນກາງ ການຂົນສົ່ງຜ່ານແດນຂອງພາກພື້ນ ເພື່ອເຊື່ອມໂຍງກັບຕະຫລາດພາກພື້ນ ແລະ ທົ່ວໂລກ.

ຄືດັ່ງທີ່ຮູ້ນໍາກັນຕະຫລອດມາ, ເສັ້ນທາງລົດໄຟ ລາວ-ຈີນ ຍັງຄົງເປັນ ເສັ້ນທາງສາຍທອງຄຳ ແຫ່ງການເຊື່ອມໂຍງ ດ້ານເສດຖະກິດພາກພື້ນຢ່າງບໍ່ຢຸດຢັ້ງ. ໃນໄລຍະ 10 ເດືອນຕົ້ນປີ 2025 ນີ້ (ມັງກອນ-ຕຸລາ), ປະລິມານການນຳເຂົ້າ-ສົ່ງອອກສິນຄ້າ ຜ່ານເສັ້ນທາງສາຍນີ້ ໄດ້ສ້າງສະຖິຕິສູງສຸດຄັ້ງໃໝ່ຢ່າງໜ້າປະທັບໃຈ ເຊິ່ງໄດ້ຢືນຢັນເຖິງບົດບາດສຳຄັນ ຂອງທາງລົດໄຟດັ່ງກ່າວ ໃນການຊຸກຍູ້ການຄ້າລະຫວ່າງ ສອງປະເທດ ແລະ ພາກພື້ນອາຊຽນ. ອີງຕາມການເປີດເຜີຍຂອງດ່ານພາສີ ນະຄອນຄຸນໝິງ ແຂວງຢຸນນານ ສປ ຈີນ, ຕົວເລກການຂົນສົ່ງສິນຄ້າ ຜ່ານທາງລົດໄຟ ລາວ-ຈີນ ມີການຂະຫຍາຍຕົວແບບກ້າວກະໂດດ ປະລິມານການຂົນສົ່ງສິນຄ້າ ລວມທັງໝົດ 4.506.000 ໂຕນ, ເພີ່ມຂຶ້ນ 12,8% ເມື່ອທຽບໃສ່ໄລຍະດຽວກັນຂອງປີຜ່ານມາ. ມູນຄ່າການຄ້າລວມ ສູງເຖິງ 22 ຕື້ກວ່າຢວນ (ປະມານ 3 ຕື້ໂດລາສະຫະລັດ) ເຊິ່ງເພີ່ມຂຶ້ນຢ່າງມະຫາສານເຖິງ 45,1%. ການເພີ່ມຂຶ້ນຂອງມູນຄ່າ ທີ່ສູງກວ່າປະລິມານການຂົນສົ່ງຫລາຍເທົ່າຕົວ (45,1% ທຽບກັບ 12,8%) ສະແດງໃຫ້ເຫັນວ່າສິນຄ້າ ທີ່ຂົນສົ່ງມີມູນຄ່າສູງຂຶ້ນ ເຊິ່ງເປັນສັນຍານທີ່ດີຕໍ່ການປ່ຽນແປງ ໂຄງສ້າງການຄ້າ ໃຫ້ມີຄຸນນະພາບຫລາຍຂຶ້ນ. ນັບຕັ້ງແຕ່ເປີດໃຫ້ບໍລິການ ມາເປັນເວລາເກືອບ 4 ປີ, ທາງລົດໄຟ ລາວ-ຈີນ ໄດ້ສ້າງຜົນງານອັນໂດດເດັ່ນ ຄື ປະລິມານສິນຄ້າສະສົມເກືອບ 16 ລ້ານໂຕນ ແລະ ມູນຄ່າສະສົມ ເກືອບ 7 ຕື້ຢວນ.

ຄວາມສຳເລັດເຫລົ່ານັ້ນໄດ້ຊຸກຍູ້ໃຫ້ຕ່ອງໂສ້ອຸດສາຫະກຳ ແລະ ຕ່ອງໂສ້ການສະໜອງໃນພາກພື້ນ ມີປະສິດທິພາບສູງຂຶ້ນ, ພ້ອມທັງສົ່ງເສີມທ່າແຮງເຊິ່ງກັນ ແລະ ກັນລະຫວ່າງ ລາວ, ຈີນ, ອາຊຽນ ແລະ ພາກພື້ນສາກົນ. ທາງລົດໄຟບໍ່ພຽງແຕ່ ເປັນສາຍທາງຂົນສົ່ງສິນຄ້າເທົ່ານັ້ນ, ແຕ່ຍັງປຽບເໝືອນເສັ້ນເລືອດໃຫຍ່ ຂັບເຄື່ອນເສດຖະກິດໂລກ ແລະ ເຕົ້າໂຮມຄວາມຈະເລີນຮຸ່ງເຮືອງ ໃຫ້ໄປຄຽງຄູ່ກັນ ເພື່ອຮັບປະກັນໃຫ້ມວນມະນຸດ ມີຊີວິດເປັນການຢູ່ດີຂຶ້ນ, ຄ່ອຍໆຫລຸດພົ້ນອອກຈາກຄວາມທຸກຍາກ ແລະ ກ້າວໄປຫາການພັດທະນາຢ່າງຍືນຍົງ.

ໂດຍ: ເກີດຂວັນໃຈ ມາລີຈັນສີ

KPL