ຂປລ
ຂປລ. ໃນວັນທີ 10 ພະຈິກ 2024, ສະຫາຍ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະ ໄດ້ຢ້ຽມຢາມ-ເຮັດວຽກ ຢູ່ນະຄອນຊຽງໄຮ້, ສປ ຈີນ, ໃຫ້ການຕ້ອນຮັບໂດຍ ສະຫາຍ ກົງ ເຈີ້ງ ເລຂາພັກ, ເຈົ້າຄອງນະຄອນຊຽງໄຮ້.
ຂປລ. ໃນວັນທີ 10 ພະຈິກ 2024, ສະຫາຍ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະ ໄດ້ຢ້ຽມຢາມ-ເຮັດວຽກ ຢູ່ນະຄອນຊຽງໄຮ້, ສປ ຈີນ, ໃຫ້ການຕ້ອນຮັບໂດຍ ສະຫາຍ ກົງ ເຈີ້ງ ເລຂາພັກ, ເຈົ້າຄອງນະຄອນຊຽງໄຮ້.
ໃນໂອກາດນີ້, ສະຫາຍ ກົງ ເຈີ້ງ ເລຂາພັກ, ເຈົ້າຄອງນະຄອນຊຽງໄຮ້ ໄດ້ສະແດງຄວາມຍິນດີຕ້ອນຮັບອັນອົບອຸ່ນມາຍັງ ສະຫາຍ ນາຍົກລັດຖະມົນຕີ ສອນໄຊ ສີພັນດອນ ພ້ອມດ້ວຍພັນລະຍາ ແລະ ຄະນະຜູ້ແທນລາວ ທີ່ເດີນທາງມາຢ້ຽມຢາມນະຄອນຊຽງໄຮ້ ໃນຄັ້ງນີ້ ໂດຍສະຫາຍ ນາ ຍົກລັດຖະມົນຕີ ສອນໄຊ ສີພັນດອນ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບດັ່ງກ່າວ ແລະ ສະແດງຄວາມຊົມເຊີຍ ຕໍ່ຜົນສໍາເລັດການຈັດງານວາງສະແດງສິນຄ້ານໍາເຂົ້າສາກົນ ສປ ຈີນ ຄັ້ງທີ 7 ທີ່ຈັດຂຶ້ນຢູ່ນະຄອນຊຽງໄຮ້ ແລະ ຫາກໍອັດລົງໃນວັນທີ 10 ພະຈິກ 2024 ນີ້.
ພ້ອມກັນນີ້, ສອງຝ່າຍ ໄດ້ຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອ, ການພົວ ພັນຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ກໍຄື ການພົວພັນຮ່ວມມືລະຫວ່າງ ສປປ ລາວ ກັບ ນະຄອນຊຽງໄຮ້ ທີ່ໄດ້ຮັບການເສີມ ຂະຫຍາຍຢ່າງບໍ່ຢຸດຢັ້ງ, ການແລກປ່ຽນການຢ້ຽມຢາມ ແລະ ການພົບປະຂອງຄະນະຜູ້ແທນຂັ້ນສູງຂອງສອງຝ່າຍ ໄດ້ດໍາເນີນໄປຢ່າງເປັນປົກກະຕິ ແລະ ເພີ່ມຂຶ້ນ. ໃນໂອກາດດັ່ງກ່າວ,ສອງຝ່າຍ ຍັງໄດ້ປຶກສາຫາລືແລກປ່ຽນຄໍາຄິດເຫັນ ເພື່ອສືບຕໍ່ເສີມຂະຫຍາຍການພົວພັນຮ່ວມມືຂອງສອງປະເທດ ກໍຄື ລະຫວ່າງ ສປປ ລາວ ກັບ ນະຄອນຊຽງໄຮ້ ໃນຕໍ່ໜ້າ ໂດຍສະເພາະແມ່ນການຊຸກຍູ້ການພົວພັນຮ່ວມມືທີ່ສອງຝ່າຍມີທ່າແຮງບົ່ມຊ້ອນ ໂດຍນໍາໃຊ້ເສັ້ນທາງລົດໄຟລາວ-ຈີນ ແລະ ສາຍການບິນຕົງ ວຽງຈັນ-ຊຽງໄຮ້-ວຽງຈັນ ເພື່ອຊຸກຍູ້ການໄປມາຫາສູ່ ການເຊື່ອມໂຍງເຊື່ອມຈອດກັນ ໃນຫລາຍຮູບແບບ ແລະ ຫລາຍຊ່ອງທາງກວ່າເກົ່າ, ລວມເຖິງການຮ່ວມ ມືທາງດ້ານເສດຖະກິດ, ການຄ້າ, ການລົງທຶນ, ການທ່ອງທ່ຽວ, ການພັດທະນາຊັບພະຍາກອນມະນຸດ ແລະ ອື່ນໆ. ໃນນີ້, ສອງຝ່າຍຍິນດີ ທີ່ຈະພ້ອມກັນສະໜັບສະໜູນ ແລະ ຊຸກຍູ້ ການດໍາເນີນງານໂຄງການພັດທະນາບຶງທາດຫລວງ ຂອງບໍລິສັດ ຊຽງໄຮ້ ວ້ານເຟິງ ເພື່ອນໍາເອົາໝາກຜົນຕົວຈິງ ມາສູ່ປະຊາຊົນສອງຊາດລາວ-ຈີນ ນັບມື້ນັບຫລາຍຂຶ້ນກວ່າເກົ່າ. ນອກນີ້, ສອງຝ່າຍຍັງໄດ້ແຈ້ງກ່ຽວກັບ ສະພາບການພັດທະນາ ເສດຖະກິດ-ສັງຄົມ ທີ່ພົ້ນເດັ່ນພາຍໃນຂອງຕົນໃຫ້ກັນຊາບ.
ໃນໂອກາດຢ້ຽມຢາມເຮັດວຽກຢູ່ນະຄອນຊຽງໄຮ້ ຄັ້ງນີ້, ສະຫາຍ ສອນໄຊ ສີພັນດອນ ນາ ຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍພັນະຍາ ແລະ ຄະນະ ຍັງໄດ້ໄປຢ້ຽມຢາມທັດສະນະສືກສາຢູ່ ສະຖານທີ່ຈັດກອງປະຊຸມໃຫຍ່ຄັ້ງປະຖົມມະລຶກ ຂອງພັກກອມມູນິດຈີນ, ພິພິທະພັນແຜນຜັງເມືອງ ຂອງນະຄອນຊຽງໄຮ້, ສະມາຄົມຊື້ຂາຍແລກປ່ຽນຄໍາ ແລະ ບໍລິສັດຜະລິດຍົນ COMAC ອີກດ້ວຍ.
KPL
