ຂປລ. ກອງປະຊຸມພົບປະພີ່ນ້ອງຄົນເຊື້ອຊາດລາວ ຄັ້ງທີ 1 ພາຍໃຕ້ຄຳຂວັນ “ຮັກບ້ານເກີດ” ໄດ້ອັດລົງດ້ວຍຜົນສຳເລັດອັນຈົບງາມ ໃນຕອນບ່າຍວັນທີ 12 ພະຈິກ 2024 ໂດຍການເປັນປະທານຂອງ ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ,  ທັງເປັນປະທານ ຄະນະກຳມະການ ພົວພັນຄົນເຊື້ອຊາດລາວຢູ່ຕ່າງປະເທດ ພ້ອມດ້ວຍພາກສ່ວນກ່ຽວ ຂ້ອງເຂົ້າຮ່ວມ.

ໂອກາດນີ້, ທ່ານ ຈັນເພັງ ສຸດທິວົງ ຮອງປະທານສູນກາງແນວລາວສ້າງຊາດ ໄດ້ສະຫລຸບລາຍງານກ່ຽວ​ກັບ ກອງປະຊຸມພົບປະພີ່ນ້ອງເຊື້ອຊາດລາວ ​ເຊິ່ງ​ໄດ້ດໍາເນີນໄປດ້ວຍບັນຍາກາດ ອັນອົບອຸ່ນຟົດຟື້ນ, ມີຄວາມເບີກບານມ່ວນຊື່ນ, ມີຄວາມສາມັກຄີຮັກແພງ ແລະ ມີເນື້ອໃນອຸດົມສົມບູນ ພາຍຫລັງທີ່ພີ່ນ້ອງເຊື້ອຊາດລາວ ໄດ້ຈາກກັນໄປເປັນເວລາດົນນານ, ແລ້ວກັບມາພົບພໍ້ກັນໃນກອງປະຊຸມຄັ້ງປະ ຫວັດສາດນີ້. ໃນວາລະກອງປະຊຸມ ໄດ້ຮັບຟັງການສັງລວມນະໂຍບາຍ ແລະ ນິຕິກຳທີ່ຈະອຳນວຍຄວາມສະດວກ ໃຫ້ແກ່ຄົນເຊື້ອຊາດລາວຢູ່ຕ່າງປະເທດ  ແນໃສ່ສ້າງເງື່ອນໄຂທີ່ສະດວກ ໃຫ້ພີ່ນ້ອງຊາວລາວຢູ່ຕ່າງປະເທດ ໄດ້ອວ່າຍໜ້າ ມາຫາປະເທດຊາດ ອັນເປັນບ້ານເກີດເມືອງນອນຂອງຕົນ ເພື່ອປະ ກອບສ່ວນດ້ານເຫື່ອແຮງ, ສະຕິປັນຍາ, ທຶນຮອນເຂົ້າໃນພາລະກິດ ສ້າງສາພັດທະນາປະເທດຊາດ; ຮັບຟັງການລາຍງານການຈັດຕັ້ງປະຕິບັດ ແຜນພັດທະນາ ເສດຖະກິດສັງຄົມ 5 ປີ ຄັ້ງທີ 9 ເຊິ່ງເປັນແຜນພັດທະນາ ເສດຖະກິດສັງຄົມ ໄລຍະທ້າຍສະໄໝ ທີ່ລັດຖະບານ ພວມຈັດຕັ້ງປະຕິບັດໃນປັດຈຸບັນ ແລະ ຮ່າງແຜນພັດທະນາ ເສດຖະກິດສັງຄົມ 5 ປີ ຄັ້ງທີ 10 ຈະມີບົດບາດສໍາຄັນຢ່າງຍິ່ງ ໃນການສືບຕໍ່ຈັດຕັ້ງປະຕິບັດວິໄສທັດ ການພັດທະນາຂອງລັດຖະບານ ຮອດປີ 2030

ພ້ອມນີ້, ຍັງໄດ້ສະເໜີ ໃຫ້ຄະນະພົວພັນຄົນເຊື້ອຊາດລາວຢູ່ຕ່າງປະເທດ ຄົ້ນຄວ້າໃຫ້ວັດລາວ ຢູ່ແຕ່ລະປະເທດ ໂດຍມີການປະສານກັບ ສະຖານເອກອັກຄະລັດຖະທູດລາວ ໃນປະເທດນັ້ນໆ ສ້າງເງື່ອນໄຂອຳນວຍຄວາມສະດວກ ໃນວຽກງານສະໜອງພະສົງລາວ ໃຫ້ວັດລາວຢູ່ຕ່າງປະເທດ ຖືກຕ້ອງຕາມກົດໝາຍ ຂອງແຕ່ລະປະເທດ; ສະໜີໃຫ້ພີ່ນ້ອງເຊື້ອຊາດລາວຮຸ່ນຄົນຕ່າງໆ, ນັກວິທະຍາສາດ, ນັກ ຮຽນຮູ້ ປັນຍາຊົນ, ນັກກິລາ, ນັກທຸລະກິດ ແລະ ອາຊີບອື່ນໆ ຄົ້ນຄວ້າເບິ່ງວ່າ ພາຍໃຕ້ຄໍາຂວັນ “ຮັກບ້ານເກີດ” ຕົນເອງຈະສາມາດປະກອບສ່ວນແນວໃດ ໃນການສ້າງສາພັດທະນາປະເທດລາວ; ຄະນະພົວພັນຄົນເຊື້ອຊາດລາວ ຢູ່ຕ່າງປະເທດ ທີ່ມີໜ້າທີ່ຮັບຜິດຊອບວຽກງານ ຄົນເຊື້ອຊາດລາວຢູ່ຕ່າງປະ ເທດ ສືບຕໍ່ປັບປຸງບັນດານິຕິກຳລະດັບຕ່າງໆ ທີ່ມີແລ້ວຕໍ່ພີ່ນ້ອງຄົນເຊື້ອຊາດລາວ ໃຫ້ສົມບູນຂຶ້ນກວ່າເກົ່າ ແລະ ສ້າງໃໝ່ຕາມຄວາມຈຳເປັນ ແນໃສ່ສ້າງຄວາມສະດວກ ໃຫ້ພີ່ນ້ອງລາວຢູ່ຕ່າງປະເທດ ໃນການປະກອບສ່ວນ ສ້າງສາພັດທະນາປະເທດຊາດ; ສູນກາງແນວລາວສ້າງຊາດ ສົມທົບກັບສະຖານເອກອັກ ຄະລັດຖະທູດລາວ ແລະ ກໍາມະການສູນກາງແນວລາວສ້າງຊາດ ຢູ່ຕ່າງປະເທດ ຂະຫຍາຍຈໍານວນທີ່ປຶກສາ ແລະ ຄູ່ຮ່ວມງານຂອງສູນກາງແນວລາວ ສ້າງຊາດຢູ່ຕ່າງປະເທດ ໃຫ້ກວ້າງຂວາງອອກຢູ່ໃນແຕ່ລະປະເທດ.

ຂ່າວ: ກິດຕາ

ພາບ: ອ່າຍຄຳ

KPL