*ຈົບໄປຢ່າງສວຍງາມ ແລະ ໜ້າປະທັບກັບງານ Round festival 2024 ທີ່ຈັດຂຶ້ນໃນອາທິດຜ່ານມາ ທີ່ ຫໍປະຊຸມແຫ່ງຊາດບອກໄດ້ເລີຍວ່າມ່ວນ ແລະ ຕື່ນເຕັ້ນໄປກັບທຸກໆການສະແດງຈາກນັກຮ້ອງທີ່ມີຊື່ສຽງຂອງ ບັນດາປະເທດອາຊຽນ ແລະ ສ ເກົາຫລີ ທີ່ໄດ້ຜັດປ່ຽນກັນຂຶ້ນຖ່າຍທອດເອກະລັດວັດທະນະທໍາຮຽງສຽງຮ້ອງເຊຍ ຈາກແຟນເພງດັງສະນັ່ນຫ້ອງໂດຍສະເພາະແມ່ນການສະແດງສຸດທ້າຍຂອງແບມແບມ ສະມາຊິກວົງກ໋ອດເຊ ເວັ້ນ ຈາກປະເທດ ສ. ເກົາຫລີ ທີ່ມາພ້ອມກັບລີລາທ່າເຕັ້ນທີ່ອ່ອນຊ້ອຍແຕ່ເຂັ້ມແຂງເຂົ້າກັບຈັງຫວະສຽງດົນຕີໄດ້ຢ່າງ ລົງໂຕໂດຍ ແບມ ແບມໄດ້ກ່າວພາຍຫລັງຈົບການສະແດງວ່າຕົນເອງຮູ້ສຶກດີໃຈຫລາຍທີ່ເຂົ້າຮ່ວມສະແດງ ແລະ ໄດ້ພົບປະແຟນເພງຊາວລາວ ຫລື ອາກາເຊຄືຊື່ ເອີ້ນແຟນຄັບຂອງວົງກ໋ອດເຊເວັ້ນ ເພາະໄດ້ສັນຍາວ່າ ຈະມາ ພົບແຟນແພງຊາວລາວ ແຕ່ຍັງບໍ່ໄດ້ມີໂອກາດ ສະນັ້ນ, ຄັ້ງນີ້ ໄດ້ມາເປັນເທື່ອທໍາອິດ ຮູ້ສຶກອົບອຸ່ນທີ່ມີແຟນເພງ ໄປຮັບທີ່ ສະໜາມບິນ ແລະ ມາຊົມການສະແດງຢ່າງຫລວງຫລາຍ ຕົນເອງສັນຍາວ່າ ຈະຜະລິດຜົນງານທີ່ດີ ແລະ ມີຄຸນນະພາບອອກມາໃຫ້ແຟນເພງໄດ້ຮັບຟັງພ້ອມດຽວກັນ ແບມ ແບມ ຍັງກ່າວຕື່ມວ່າ ອາຫານລາວ ແຊບຫລາຍໂດຍສະເພາະແມ່ນຕໍາຫລວງພະບາງ ແລະ ແໜມເນືອງ ແມ່ນຖືກໃຈຫລາຍຕົນເອງຫວັງວ່າຈະໄດ້ກັບມາພົບກັບ ແຟນໆອີກເທື່ອໜຶ່ງ.

ສໍາລັບງານມະໂຫລານນີ້ ຈັດຂຶ້ນເພື່ອເປັນການສະແດງຄວາມຮູ້ບຸນຄຸນຕໍ່ວິໄສທັດຮ່ວມກັນ ໃນການເຊື່ອມໂຍງຂອງອາຊຽນ, ພ້ອມທັງສະເຫລີມສະຫລອງ 35 ປີ ແຫ່ງວັນສ້າງຕັ້ງການພົວພັນຄູ່ເຈລະຈາອາຊຽນ - ສ. ເກົາຫລີ ລະດັບຍຸດທະສາດຮອບດ້ານ, ສະນັ້ນ, ການສະແດງນີ້ ຖືເປັນສ່ວນໜຶ່ງຂອງງານວາງສະແດງວັດທະນະທໍາອາຊຽນຄັ້ງທີ 7 ເພື່ອໃຫ້ສັງຄົມໄດ້ເຫັນຄວາມສວຍງາມທີ່ເປັນເອກະລັກສະເພາະຂອງແຕ່ລະວັດທະນະທຳ, ຊຸກຍູ້ຄວາມເຂົ້າໃຈເລິກເຊິ່ງ, ເປັນເອກະພາບ ແລະ ການຮ່ວມມື, ເພີ່ມທະວີການແລກປ່ຽນດ້ານເຕັກນິກ ແລະ ວັດທະນະທຳລະຫວ່າງບັນດານັກສິລະປິນໃນທົ່ວພາກພື້ນ.

ໂດຍ: ມາລິດາ

KPL