ຂປລ. ໂດຍປະຕິບັດຕາມແຜນການຮ່ວມມືປະຈໍາປີ ລະຫວ່າງ ຄະນະພົວພັນຕ່າງປະເທດສູນກາງພັກ ປປ ລາວ ແລະ ຄະນະພົວພັນຕ່າງປະເທດ ສູນກາງພັກກອມມູນິດຈີນ, ສະຫາຍ ທອງສະຫວັນ ພົມວິຫານ ກໍາມະການສູນກາງພັກ, ຫົວໜ້າຄະນະພົວພັນ ຕ່າງປະເທດສູນກາງພັກ ປປ ລາວ ໄດ້ນໍາພາຄະນະ ເດີນທາງໄປຢ້ຽມຢາມ ແລະ ເຮັດວຽກ ຢູ່ນະຄອນຫລວງປັກກິ່ງ, ສປ ຈີນ ແຕ່ວັນທີ 11-13 ພະຈິກ 2024 ເພື່ອຮ່ວມກັບຝ່າຍຈີນ ປຶກສາຫາລື-ແລກປ່ຽນຄໍາຄິດເຫັນກ່ຽວກັບທິດທາງການພົວພັນຮ່ວມມື ລະຫວ່າງ ສອງພັກ, ສອງລັດ ແລະ 2 ຄະນະພົວພັນຕ່າງປະເທດສູນກາງພັກ ລາວ-ຈີນ ໃນຕໍ່ໜ້າ.

ໃນໄລຍະຢ້ຽມຢາມ, ສະຫາຍ ທອງສະຫວັນ ພົມວິຫານ ໄດ້ເຂົ້າຢ້ຽມຂໍ່ານັບ ການນໍາຂັ້ນສູງ ຂອງ ພັກກອມມູນິດຈີນ ແລະ ໄດ້ພົບປະເຮັດວຽກກັບ ການນໍາຄະນະພົວພັນ ຕ່າງປະເທດສູນກາງພັກກອມມູນິດຈີນ, ໃນການພົບປະ ຝ່າຍລາວ ໄດ້ຕີລາຄາສູງ ຕໍ່ການນໍາຂັ້ນສູງ ພັກກອມມູນິດຈີນ ທີ່ໄດ້ໃຫ້ກຽດຕ້ອນຮັບ ຄະນະຜູ້ແທນ ຄະນະພົວພັນຕ່າງປະເທດສູນກາງພັກ ປປ ລາວ; ນໍາເອົາຄວາມຢ້ຽມຢາມຖາມຂ່າວ ຈາກການນໍາຂັ້ນສູງຂອງລາວ ມາຍັງການນໍາຂັ້ນສູງຂອງ ພັກ-ລັດຈີນ ແລະ ສະແດງຄວາມຊົມເຊີຍ ຕໍ່ບັນດາຜົນສໍາເລັດອັນໃຫຍ່ຫລວງ ຮອບດ້ານ ທີ່ປະຊາຊົນຈີນອ້າຍນ້ອງ ຍາດໄດ້ໃນຕະ ຫລອດໄລຍະຜ່ານມາ ໃນການສ້າງສາ ປະເທດສັງຄົມນິຍົມ ທີ່ມີສີສັນພິເສດຂອງຈີນ ພາຍໃຕ້ການນໍາພາອັນຖືກຕ້ອງ ຂອງ ພັກກອມມູນິດຈີນ ທີ່ຖືສະຫາຍເລຂາທິການໃຫຍ່ ສີ ຈິ້ນຜິງ ເປັນແກນກາງ. ພ້ອມ​ນີ້,  ສະຫາຍ ທອງສະຫວັນ ຍັງໄດ້ແຈ້ງໃຫ້ຊາບ ກ່ຽວກັບສະພາບການພົ້ນເດັ່ນພາຍໃນ ສປປ ລາວ ແລະ ສະພາບລວມ ການພົວພັນຮ່ວມມືສອງຝ່າຍ ກໍຄື ການຈັດຕັ້ງປະຕິບັດແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ  ສະບັບໃໝ່ ໃນໄລຍະຜ່ານມາ.

ຝ່າຍຈີນ ໄດ້ຕີລາຄາສູງຕໍ່ການນໍາພາອັນໜັກແໜ້ນ ຂອງ ພັກ ປປ ລາວ ທີ່ໄດ້ນໍາພາປະຊາຊົນລາວບັນດາເຜົ່າ ຍາດໄດ້ ຜົນສຳເລັດໃນການປົກປັກຮັກສາ ແລະ ສ້າງສາພັດທະນາປະເທດຊາດ ຕະ ຫລອດໄລຍະຜ່ານມາ ໂດຍສະເພາະແມ່ນ ການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XI ໄລຍະທ້າຍສະໄໝ ຂອງພັກ ປປ ລາວ, ຊົມເຊີຍຜົນສໍາເລັດ ຂອງການດໍາເນີນກອງປະຊຸມຄົບຄະນະ ເທື່ອທີ 9 ສະໄໝທີ XI ຂອງພັກ ປປ ລາວ ແລະ ການເປັນປະທານກອງປະຊຸມສຸດຍອດອາຊຽນ ຄັ້ງທີ 44 ແລະ 45 ຂອງ ສປປ ລາວ; ຕີລາຄາສູງ ຕໍ່ການພົວພັນຮ່ວມມື ສອງພັກ, ສອງລັດ ແລະ ປະຊາຊົນສອງຊາດ ຈີນ-ລາວ ທີ່ພວມຢູ່ໃນໄລຍະດີທີ່ສຸດ ໃນປະຫວັດສາດ ການພົວພັນຂອງສອງຝ່າຍ, ເຊື່ອໝັ້ນວ່າ ພາຍໃຕ້ການນໍາພາຊີ້ນໍາ ຂອງການນໍາສູງສຸດ ສອງພັກ, ສອງລັດ ຈີນ-ລາວ, ການພົວພັນຮ່ວມມືສອງຝ່າຍ ກໍຄື ການສ້າງຄູ່ຮ່ວມຊາຕາກໍາ ຈີນ-ລາວ ຈະສືບຕໍ່ໄດ້ຮັບການເສີມຂະຫຍາຍຢ່າງຮອບດ້ານ ແລະ ນໍາເອົາຜົນປະໂຫຍດຕົວຈິງ ມາສູ່ ປະຊາຊົນສອງຊາດ ນັບມື້ນັບຫລາຍຂຶ້ນກວ່າເກົ່າ, ພ້ອມທັງສະແດງຄວາມຊົມເຊີຍ ຕໍ່ການປະສານສົມທົບ ແລະ ໄປມາຫາສູ່ກັນ ລະຫວ່າງ 2 ຄະນະພົວພັນຕ່າງປະເທດສູນກາງພັກ ຈີນ-ລາວ ເຊິ່ງເປັນການປະກອບສ່ວນສຳຄັນ ເຂົ້າໃນການເພີ່ມພູນຄູນສ້າງ ສາຍພົວພັນມິດຕະພາບອັນເປັນມູນເຊື້ອ ຈີນ-ລາວ ກໍຄື ການຈັດຕັ້ງປະຕິບັດແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກໍາ ຈີນ-ລາວ ໃຫ້ນັບມື້ມີປະສິດທິຜົນສູງ, ຄຸນນະພາບສູງ ແລະ ລະດັບສູງກວ່າເກົ່າ.

ສຳລັບ ຂອບການພົວພັນຮ່ວມມື ລະຫວ່າງ ສອງຄະນະພົວພັນຕ່າງປະເທດສູນກາງພັກ, ສອງຝ່າຍ ໄດ້ຮ່ວມກັນຕີລາຄາຄືນ ສະພາບລວມການພົວພັນຮ່ວມມື ລະຫວ່າງ ສອງພັກ, ສອງ ຄະນະພົວ ພັນຕ່າງປະເທດສູນກາງພັກ ລາວ-ຈີນ ໃນປີ 2024, ປຶກສາຫາລື ແລະ ເຫັນດີເປັນເອກະພາບກັນຫລາຍບັນຫາ ກ່ຽວກັບ ທິດທາງການຮ່ວມມືສອງຝ່າຍ ໃນຕໍ່ໜ້າ ໂດຍສະເພາະແມ່ນ ທິດທາງໃນການຮ່ວມກັນຕິດຕາມຊຸກຍູ້ ການຈັດຕັ້ງປະຕິບັດ ແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ແລະ ບັນດາແຜນການຮ່ວມມື ສອງພັກ ລາວ-ຈີນ ໃນປີ 2025 ກໍຄື ໃນຕໍ່ໜ້າ. ນອກຈາກການພົວພັນສອງຝ່າຍແລ້ວ ຍັງໄດ້ມີການແລກປ່ຽນສະພາບການພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈ.

ໃນໄລຍະຢູ່ຢ້ຽມຢາມ, ສະຫາຍ ທອງສະຫວັນ ພົມວິຫານ ພ້ອມດ້ວຍຄະນະ ຍັງໄດ້ເຂົ້າຮ່ວມກອງປະຊຸມແລກປ່ຽນຄໍາຄິດເຫັນກັບ ຄະນະກໍາມະການຄຸ້ມຄອງຊັບສິນຂອງລັດ ສປ ຈີນ, ບັນດາວິສາ ຫະກິດຈີນ ທີ່ລົງທຶນຢູ່ ສປປ ລາວ ແລະ ໄດ້ທັດສະນະສຶກສາ ຖອດຖອນບົດຮຽນ ການກໍ່ສ້າງຮາກຖານພັກ ຢູ່ໃນນະຄອນຫລວງປັກກິ່ງ. ໃນໂອກາດດັ່ງກ່າວ, ສະຫາຍ ສົມພອນ ສີຈະເລີນ ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສປ ຈີນ ກໍໄດ້ຕິດຕາມຄະນະ ແລະ ຮ່ວມເຄື່ອນໄຫວນໍາ ຢ່າງມີຜົນສໍາເລັດ.

ຂ່າວ-ພາບ: ຄຕພ

KPL