ຂປລ
ຂປລ. ຄະນະກຳມະການພົວພັນ ຄົນເຊື້ອຊາດລາວຢູ່ຕ່າງປະເທດ, ກະຊວງການຕ່າງປະເທດ ຈະຈັດກອງປະຊຸມພົບປະ ພີ່ນ້ອງເຊື້ອຊາດລາວຢູ່ຕ່າງປະເທດ ຄັ້ງປະຖົມມະລືກ ໃນລະຫວ່າງ ວັນທີ 9-15 ພະຈິກ 2024 ຢູ່ນະຄອນຫລວງວຽງຈັນ
ຂປລ. ຄະນະກຳມະການພົວພັນ ຄົນເຊື້ອຊາດລາວຢູ່ຕ່າງປະເທດ, ກະຊວງການຕ່າງປະເທດ ຈະຈັດກອງປະຊຸມພົບປະ ພີ່ນ້ອງເຊື້ອຊາດລາວຢູ່ຕ່າງປະເທດ ຄັ້ງປະຖົມມະລືກ ໃນລະຫວ່າງ ວັນທີ 9-15 ພະຈິກ 2024 ຢູ່ນະຄອນຫລວງວຽງຈັນ ພາຍໃຕ້ຫົວຂໍ້ “ຮັກບ້ານເກີດ”, ກອງປະຊຸມດັ່ງກ່າວ, ຄາດວ່າ ພີ່ນ້ອງເຊື້ອຊາດຢູ່ຕ່າງປະເທດຈະເດີນທາງມາຮ່ວມ ຈຳນວນ300 ທ່ານ, ລວມທັງພີ່ນ້ອງເຊື້ອຊາດລາວທີ່ດຳລົງຊີວິດ ແລະ ດຳເນີນທຸລະກິດຢູ່ ສປປ ລາວ ແລະ ແຂກຖືກເຊີນ ຈາກພາຍໃນເຂົ້າຮ່ວມທັງໝົດ ປະມານ 500 ທ່ານ ເຊິ່ງຈຸດປະສົງຂອງກອງປະຊຸມພົບປະຄັ້ງນີ້, ແມ່ນເພື່ອເຕົ້າໂຮມພີ່ນ້ອງເຊື້ອຊາດລາວ ຈາກທົ່ວໂລກເປັນຄັ້ງທໍາອິດ ຢູ່ນະຄອນຫລວງວຽງຈັນ; ສ້າງຄວາມເຂົ້າອົກເຂົ້າໃຈຢ່າງເລິກເຊິ່ງ ຂອງພີ່ນ້ອງເຊື້ອຊາດລາວ ຕໍ່ແນວທາງ ນະໂຍບາຍອັນຖືກຕ້ອງຂອງ ພັກ-ລັດຖະ ບານ ສປປ ລາວ; ສ້າງໂອກາດໃຫ້ພີ່ນ້ອງເຊື້ອຊາດລາວ ຢູ່ຕ່າງປະເທດໄດ້ເດີນທາງໄປມາຫາສູ່ກັນ, ຢ້ຽມຢາມບ້ານເກີດເມືອງນອນ; ພົບປະໂອ້ລົມແລກປ່ຽນຄວາມຄິດເຫັນເຊິ່ງກັນ ແລະ ກັນ; ທັງເຫັນສະພາບຄວາມເປັນຈິງໃນການພັດທະນາເສດຖະກິດ-ສັງຄົມຂອງ ສປປ ລາວ ໃນປັດຈຸບັນ. ນອກຈາກນີ້ ຍັງມີການເຄື່ອນໄຫວສ້າງກິດຈະກຳຕ່າງໆຮ່ວມກັນຕື່ມອີກ.
ໃນໂອກາດທີ່ເດີນທາງມາຮ່ວມກອງປະຊຸມໃນຄັ້ງນີ້, ຄະນະພີ່ນ້ອງເຊື້ອຊາດລາວ ຈະໄດ້ໄປຢ້ຽມຊົມສະ ຖານທີ່ສຳຄັນຕ່າງໆ ຢູ່ໃນນະຄອນຫລວງວຽງຈັນ ເຊັ່ນ: ໄປຢ້ຽມຢາມ ເຂດເສດຖະກິດ ກວມລວມໄຊເສດຖາ ແລະ ຢ້ຽມຊົມພິພິທະພັນ ສິລະປະລາວສະໄໝໃໝ່ (ໄມ້ແກະສະຫລັກ), ຢ້ຽມຊົມຫໍພິພິທະພັນ ໄກສອນ ພົມວິຫານ ແລະ ເຂົ້າຮ່ວມງານຣາຕີ ວຽງຈັນ. ນອກຈາກນັ້ນ, ຍັງຈະໄດ້ໄປຢ້ຽມຢາມສວນພຶກສາ ເພື່ອຢ້ຽມຊົມຫ້ອງວາງສະແດງບັນດາເຜົ່າ, ຮ່ວມພິທີບາສີສູ່ຂວັນ ແລະ ຮັບຊົມການສະແດງ ສິນລະປະບັນດາເຜົ່າ; ເຂົ້າຮ່ວມ ພິທີຖວາຍ ຜ້າປ່າສາມັກຄີຢູ່ວັດອົງຕື້ ແລະ ຮ່ວມພິທີແຫ່ຜາສາດເຜິ້ງເຂົ້າສູ່ ກົມມະລຽນພະທາດຫລວງ ລວມທັງຮ່ວມການເຄື່ອນໄຫວກິດຈະກຳອື່ນໆ.
ກອງປະຊຸມພົບປະພີ່ນ້ອງ ເຊື້ອຊາດລາວຄັ້ງປະຖົມມະລືກເທື່ອນີ້ ແມ່ນມີຄວາມໝາຍຄວາມສຳຄັນ ຊຶ່ງຈະເຮັດໃຫ້ພີ່ນ້ອງເຊື້ອຊາດລາວ ຢູ່ຕ່າງປະເທດ ໄດ້ເຂົ້າໃຈຢ່າງຈະແຈ້ງກ່ຽວກັບ ແນວທາງນະໂຍບາຍ ອັນຖືກຕ້ອງຂອງພັກ-ລັດຖະບານ ສປປ ລາວ, ໄດ້ເຫັນເຖິງສະພາບການພັດທະນາ ເສດຖະກິດ-ສັງຄົມຕົວຈິງຂອງ ສປປ ລາວ, ໄດ້ມາພົບປະພີ່ນ້ອງຮ່ວມຊາດ, ຮ່ວມກັນສ້າງກິດຈະກຳຕ່າງໆ, ເຮັດບຸນສິນກິນທານ ແລະ ນໍາເອົາຜົນສຳເລັດ ຂອງກອງປະຊຸມໃນເທື່ອນີ້ ໄປເຜີຍແຜ່ໃຫ້ພີ່ນ້ອງຊາວລາວ ຢູ່ຕ່າງປະເທດໄດ້ຮັບຊາບ ຢ່າງທົ່ວເຖິງກັນຕື່ມອີກ.
KPL
