**ຕໍ່ຈາກສະບັບກ່ອນ**

*ໜຶ່ງໃນຄວາມໂດດເດັ່ນຂອງງານນີ້, ນອກຈາກມີຈຳນວນວິສາຫະກິດຈາກທົ່ວທຸກມຸມໂລກເຂົ້າຮ່ວມເພີ່ມຂຶ້ນແລ້ວ, ຜູ້ຕາງໜ້າວົງການການເມືອງການຄ້າ, ນັກວິຊາການ ແລະ ວິສາຫະກິດທີ່ເຂົ້າຮ່ວມກໍເພີ່ມຂຶ້ນເຖິງ 1.500 ທ່ານທີ່ມາຈາກ 100 ກວ່າປະເທດ, ເຂດແຄວ້ນ ແລະ ອົງການຈັດຕັ້ງສາກົນ.ໃນນັ້ນ, ພາຍໃນງານຍັງໄດ້ຈັດກິດຈະກຳ ສົ່ງເສີມການຄ້າ ແລະ ການລົງທຶນເກືອບ 50 ຄັ້ງ, ລວມທັງມີການພົບປະດ້ານການຄ້າ ແລະ ການລົງທຶນ ເພື່ອການຮ່ວມມືກັບ 260 ກວ່າລາຍການ, ຄິດເປັນມູນຄ່າຫລາຍກວ່າ 9,4 ຕື້ໂດລາ. ຜ່ານການຊຸກຍູ້ການ ປະດິດສ້າງໃໝ່ດ້ວຍການເປີດປະຕູ ສູ່ພາຍນອກ, ງານວາງສະແດງສິນຄ້ານຳເຂົ້າສາກົນຈີນຄັ້ງນີ້ໄດ້ສ້າງເວທີການຮ່ວມມືອັນໃໝ່ໃຫ້ແກ່ວິສາຫະກິດທົ່ວໂລກ ເຊິ່ງໄດ້ນຳສະເໜີຜະລິດຕະພັນໃໝ່, ວາງສະແດງເຕັກໂນໂລຊີທີ່ທັນສະໄໝ ແລະ ນຳສະເໜີການບໍລິການປະດິດສ້າງໃໝ່ເປັນຄັ້ງທຳອິດ, ຢູ່ເຂດວາງສະແດງ ທີ່ມີເນື້ອທີ 420.000 ຕາແມັດນັ້ນ, ວິສາຫະກິດຕ່າງໆ ໄດ້ນຳສະເໜີຜະລິດຕະພັນໃໝ່ເຕັກໂນໂລຊີໃໝ່ ແລະ ການບໍລິການໃໝ່ 400 ກວ່າຊະນິດ. ຜົນສຳເລັດນີ້ ໄດ້ສະແດງໃຫ້ເຫັນເຖິງການຊຸກຍູ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ”ຂອງຈີນໄດ້ເປີດກວ້າງການຮ່ວມມືໃນຂົງເຂດເສດຖະກິດ-ການຄ້າ, ການເຊື່ອມໂຍງເຊື່ອມຈອດກັນ ແລະ ອື່ນໆ, ປົກປັກຮັກສາການຄ້າເສລີ. ຊຸກຍູ້ຄວາມສະເໝີພາບ, ຄວາມກ້າວໜ້າ ແລະ ການພັດທະນາແບບຍືນຍົງຢູ່ໃນໂລກເວົ້າລວມ, ກໍຄືບັນດາປະເທດ “ເຂດໂລກໃຕ້” ສາມາດຄົ້ນຫາໂອກາດຫລາຍກວ່າເກົ່າ ແລະ ໄດ້ຮັບການພັດທະນາໃຫຍ່ກວ່າເກົ່າຈາກຕະຫລາດຈີນຢ່າງກ້າວກະໂດດ.

ນັບຕັ້ງແຕ່ງານວາງສະແດງສິນຄ້ານຳເຂົ້າສາກົນຈີນຄັ້ງທຳອິດ ທີ່ຈັດຂຶ້ນໃນປີ 2018 ເປັນຕົ້ນມາ, ງານວາງສະແດງດັ່ງກ່າວໄດ້ເສີມຂະຫຍາຍບົດບາດກາຍເປັນເວທີສາກົນຢ່າງຕໍ່ເນື່ອງໃນດ້ານການຈັດຊື້, ການສົ່ງເສີມການຄ້າ, ການລົງທຶນ, ການແລກປ່ຽນດ້ານວັດທະນະທຳ ແລະ ການຮ່ວມມືດ້ານການເປີດປະຕູສູ່ພາຍນອກ. ນອກນີ້, ຍັງໄດ້ຈັດກິດຈະກຳສົ່ງເສີມການຄ້າ ແລະ ການລົງທຶນເກືອບ 50 ຄັ້ງ, ໃນນັ້ນຢູ່ໃນງານພົບປະການຄ້າ ແລະການລົງທຶນໄດ້ບັນລຸຈຸດປະສົງການຮ່ວມມືລວມ 260 ກວ່າລາຍການ, ຄິດເປັນມູນຄ່າຫລາຍກວ່າ 9,4 ຕື້ໂດລາ.

ການເປີດກວ້າງການເປີດປະຕູສູ່ ພາຍນອກຂອງຈີນ, ບໍ່ພຽງແຕ່ຜູ້ເຂົ້າຮວ່ມໂຄງການໄດ້ຮັບຜົນປະໂຫຍດ, ແຕ່ທົ່ວໂລກກໍໄດ້ຮັບຜົນປະໂຫຍດເຊັ່ນດຽວກັນ. ສິ່ງນີ້ຢັ້ງຢືນຈາກໂຄງການລົດໄຟລາວ-ຈີນ, ເພາະເຈົ້າຂອງໂຄງການແມ່ນລາວ ແລະ ຈີນ, ແຕ່ຜູ້ໄດ້ຮັບຜົນປະໂຫຍດຈາກໂຄງການນີ້ ໃນການຂົນສົ່ງຜູ້ ໂດຍສານເພື່ອການທ່ອງທ່ຽວແລະ ຂົນສົ່ງສິນຄ້າຕ່າງໆແມ່ນບັນດາປະເທດອ້ອມຂ້າງ, ພາກພື້ນ ແລະ ທົ່ວໂລກແມ່ນໄດ້ຊົມໃຊ້ຮວ່ມກັນຢ່າງມີປະສິດທິພາບ, ຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ. ສັງລວມແລ້ວ, ງານວາງສະແດງສິນຄ້ານຳເຂົ້າສາກົນຈີນກາຍເປັນແຮງຍູ້ດັນ ການພັດທະນາ “ໜຶ່ງແລວໜຶ່ງເສັ້ນທາງ” ດ້ວຍການສະໜອງໂອກາດອັນກວ້າງໃຫຍ່ໄພສານ ເພື່ອແບ່ງປັນຕະຫລາດຈີນໃຫ້ແກ່ປະເທດຕ່າງໆໃນໂລກ, ກາຍເປັນງານອັນສຳຄັນຫລາຍທີ່ສຸດ ເພື່ອການເຊື່ອມຕໍ່ກັບຜູ້ວາງສະແດງສິນຄ້າເຂົ້າກັບຕະຫລາດຈີນ ໄດ້ຢ່າງມີປະສິດທິພາບ. ນີ້ກໍໝາຍຄວາມວ່າຈີນ ໄດ້ເປີດກວ້າງການແບ່ງປັນຜົນປະໂຫຍດຈາກການພັດທະນາຂອງຕົນໃຫ້ກັບປະເທດດ້ອຍພັດທະນາໃນທົ່ວໂລກ, ດັ່ງຄຳເວົ້າຂອງຈີນທີ່ວ່າ: “ເມື່ອໂລກພັດທະນາໄດ້ດີແລ້ວ, ຈີນຈຶ່ງຈະພັດທະນາໄດ້ດີ, ເມື່ອຈີນພັດທະນາໄດ້ດີແລ້ວ, ໂລກຈຶ່ງຈະດີຂຶ້ນກວ່າເກົ່າ. ”

ໂດຍ: ດວງຈິດ ສະຫວັດບຸນມີ

KPL