ຂປລ. ກອງປະຊຸມເຜີຍແຜ່ຂໍ້ຕົກລົງ ແລະ ມອບໝາຍໜ້າທີ່ການກະກຽມ ແລະ ຈັດຕັ້ງສະເຫລີມສະຫລອງ 3 ວັນປະຫວັດສາດຂອງຊາດ ຈັດຂຶ້ນໃນວັນທີ 13 ພະຈິກ 2024 ໂດຍການເປັນປະທານ ຂອງທ່ານ ພົນໂທ ທອງລອຍ ສິລິວົງ ຮອງລັດຖະມົນຕີກະຊວງປ້ອງກັນປະເທດ ຫົວໜ້າກົມໃຫຍ່ການເມືອງກອງທັບ ທັງເປັນຄະນະຊີ້ນໍາລະດັບຊາດ ໃນການຈັດຕັ້ງສະເຫລີມສະຫລອງ 3 ວັນປະຫວັດສາດ ພ້ອມດ້ວຍຜູ້ຕາງໜ້າບັນດາ ກົມກອງອ້ອມຂ້າງກະຊວງ ແລະ ອະນຸກໍາມະການທີ່ກ່ຽວຂ້ອງເຂົ້າຮ່ວມ.

ທ່ານ ພົນຈັດຕະວາ ເດືອນສະຫວັນ ສາຍພິມຄໍາປະທຸມ ຫົວໜ້າຫ້ອງວ່າການ ກະຊວງປ້ອງກັນປະເທດ ໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະຊີ້ນໍາ, ອະນຸກໍາມະການຮັບຜິດຊອບ ແລະ ຜ່ານແຜນການກະກຽມຈັດຕັ້ງສະສະເຫລີມສະຫລອງ 3 ວັນປະຫວັດສາດ ຄືວັນສ້າງຕັ້ງພັກປະຊາຊົນ ປະຕິວັດລາວຄົບຮອບ 70 ປີ, ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 50 ປີ ແລະ ວັນຄ້າຍວັນເກີດ ປະທານໄກສອນ ພົມວິຫານ ຄົບຮອບ 105 ປີ ໃນປີ 2025.  ຈຸດປະສົງ ກໍເພື່ອຫວນຄືນມູນເຊື້ອອັນສະຫງ່າງາມ ແຫ່ງການກໍ່ຕັ້ງ ແລະ ການເຕີບໃຫຍ່ຂະຫຍາຍຕົວ ຂອງພັກປະຊາຊົນປະຕິວັດລາວ ໃນໄລຍະ 70 ປີ ທີ່ເຕັມໄປດ້ວຍສິ່ງທ້າທາຍ ທົດ ສອບລະອິດລະອ້ຽວຂ້ຽວຂາດທີ່ສຸດ, ແຕ່ພັກໄດ້ຮັບການປັບປຸງ ແລະ ຫລໍ່ຫລອມ ໃຫ້ເປັນພັກກຳອຳນາດ ທີ່ມີທາດແທ້ຂອງຊົນຊັ້ນກຳມະກອນ, ມີມູນເຊື້ອອັນສະຫງ່າລາສີ ທັງເປັນການທົບທວນມູນເຊື້ອ 50 ປີ ແຫ່ງການປະຕິວັດຊາດ ປະຊາທິປະໄຕ ກ້າວໄປສູ່ການສະຖາປະນາ ສປປ ລາວ ຢ່າງສະຫງ່າຜ່າເຜີຍ ແລະ ມີຜົນສໍາເລັດໃຫຍ່ຫລວງຫລາຍດ້ານ ໃນພາລະກິດປົກປັກຮັກສາ ແລະ ພັດທະນາປະເທດຊາດ ພ້ອມທັງຈົດຈໍາລໍ້າລຶກຜົນງານ ຄຸນງາມຄວາມດີ ແລະ ສະແດງຄວາມກະຕັນຍູຮູ້ບຸນຄຸນ ປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກ ຂອງປະຊາຊົນລາວບັນດາເຜົ່າ; ເພື່ອສຶກສາອົບຮົມ ພະນັກງານ-ສະມາຊິກພັກ, ທະຫານ-ຕຳຫລວດ ຕະຫລອດຮອດປະຊາຊົນບັນດາເຜົ່າ ນັບທັງສະມາຊິກພັກຢູ່ຊົນນະບົດ ໃຫ້ຮັບຮູ້ເຂົ້າໃຈທາດແທ້ຂອງພັກ ທີ່ເປັນຕົວແທນຂອງຊົນຊັ້ນກຳມະກອນ, ເຊື່ອມຊຶມເລິກເຊິ່ງທາດແທ້, ມູນເຊື້ອອັນດີງາມຂອງພັກ, ເຫັນແຈ້ງຜົນງານອັນໃຫຍ່ຫລວງ ໃນການບໍລິຫານລັດ, ຮໍ່າຮຽນຄຸນສົມບັດສິນທໍາປະຕິວັດ ຂອງປະທານ ໄກສອນ ພົມວິຫານ ເພື່ອພ້ອມກັນຕັ້ງໜ້າຄົ້ນຄວ້າ, ສຶກສາ ແລະ ເຮັດຕາມແບບຢ່າງຂອງເພິ່ນ ແນໃສ່ຕ້ານການໂຄສະນາບິດເບືອນ ຂອງພວກຄົນບໍ່ດີ; ເພີ່ມທະວີຄວາມເປັນແບບຢ່າງນຳໜ້າ, ຍົກສູງຄວາມຮັບຜິດຊອບການເມືອງ, ເສີມຂະຫຍາຍມານະຈິດປະຕິວັດ, ຕັດສິນໃຈບຸກບືນສູ້ຊົນ ເຮັດຫລ້ອນໜ້າທີ່ວຽກງານທີ່ພັກ ແລະ ລັດມອບໝາຍໃຫ້; ເພື່ອປຸກລະດົມຢ່າງແຂງແຮງຂະບວນການທົ່ວພັກ, ທົ່ວລັດ, ທົ່ວກອງທັບ ແລະ ທົ່ວປວງຊົນລາວທັງຊາດ ໃນການບຸກບືນສູ້ຊົນຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ 5 ປີແຫ່ງຊາດ ຄັ້ງທີ IX ແລະ ສອງວາລະແຫ່ງຊາດ ຕິດພັນກັບການສ້າງຜົນງານ ຂໍ່ານັບຮັບຕ້ອນບັນດາ ວັນບຸນໃຫຍ່ທີ່ສໍາຄັນຂອງພັກ, ຂອງຊາດ ໃນປີ 2025 ຢ່າງເປັນຂະບວນຟົດຟື້ນ ແຂງແຮງ ແລະ ເບີກບານມ່ວນຊື່ນ.

ໂອກາດນີ້, ທ່ານ ພົນໂທ ທອງລອຍ ສິລິວົງ ໄດ້ເນັ້ນໃຫ້ຄະນະຮັບຜິດຊອບຊີ້ນໍາລວມ ເອົາໃຈໃສ່ ເປັນເຈົ້າການຊີ້ນໍາ ແລະ ສົມທົບກັບບັນດາອົງການ, ກົມກອງ ແລະ ທຸກພາກສ່ວນທີ່ກ່ຽວຂ້ອງ ພ້ອມກັນເຊື່ອມຊຶມຈຸດປະສົງ-ຄາດໝາຍ ເນື້ອໃນແຜນການດັ່ງກ່າວ, ຍົກສູງຄວາມຮັບຜິດຊອບ ການເມືອງຂອງຕົນ ໃນການຈັດຕັ້ງປະຕິບັດ ແຜນການວຽກງານ ເພື່ອເຮັດໃຫ້ການສະເຫລີມສະຫລອງ 3 ວັນປະຫວັດສາດ ມີເນື້ອໃນເລິກເຊິ່ງ, ມີບັນຍາກາດຟົດຟື້ນ ແລະ ມີຜົນສໍາເລັດອັນຈົບງາມ.

KPL