ຂປລ. ຕາມການໃຫ້ສໍາພາດຂອງ ທ່ານ ສຸວັນ ໄຊຍະມັງດາລາ ຫົວໜ້າຫ້ອງການກະສິກໍາ-ປ່າໄມ້ ເມືອງໄຊພູທອງ ​ໃນວັນທີ 11 ພະຈິກ 2024 ນີ້ວ່າ: ຜ່ານການຈັດຕັ້ງປະຕິບັດ ເນື້ອທີ່ນາລວມທັງໝົດໄດ້ 14.125 ເຮັກຕາ, ເທົ່າກັບ 100%, ແນວປູກທັງໝົດ 847,53 ໂຕນ, ນາຍອດ 582 ເຮັກຕາ, ນາດໍາ 11.350 ເຮັກຕາ, ນາຫວ່ານ 2.194 ກວ່າເຮັກຕາ. ມາຮອດປັດຈຸບັນ, ສາມາດເກັບກ່ຽວເຂົ້ານາປີ ໄດ້ພຽງ 60% ເທົ່າກັບ 8.475 ເຮັກຕາ, ຄາດຄະເນສະມັດຕະພາບ 4,5 ໂຕນ/ເຮັກ ຕາ, ຜົນຜະລິດຜະລິດ 64.380 ກວ່າໂຕນ, ຈະມີເຂົ້າແຮໄວ້ຂາຍ 45.489 ໂຕນ.

​ໄປ​ຄຽງ​ຄູ່​ກັບເກັບ​ກ່ຽວ​ມ້ຽມມັດ​ເຂົ້ານາ​ປີ, ກະສິກອນ​ພາຍ​ໃນ​ເມືອງ ຍັງເກັບກູ້ຜົນຜະລິດລະດູຝົນສໍາເລັດ 100%. ​ໃນ​ນັ້ນ, ເກັບກູ້ຖົ່ວດິນ  59 ເຮັກຕາ, ຜົນຜະລິດ 106,2 ໂຕນ, ສາລີ 56 ເຮັກຕາ ຜົນຜະລິດໄດ້ 336 ໂຕນ, ໝາກເຜັດ 45 ເຮັກຕາ, ຜົນຜະລິດ 67,5 ໂຕນ, ໝາກໂມ 2 ເຮັກຕາ ຜົນຜະລິດໄດ້ 30 ໂຕນ.

ພ້ອມດຽວກັນນີ້, ກະສິກອນເມືອງໄຊພູທອງ ໄດ້ຫ້າງຫາກະກຽມໃສ່ການປູກພືດລະດູແລ້ງ ໂດຍປະຕິບັດຕາມຂໍ້ຕົກລົງຂອງ ທ່ານເຈົ້າເມືອງໄຊພູທອງ ແລະ ທິດຊີ້ນໍາຂອງພະແນກ ກະສິກໍາ-ປ່າ ໄມ້ແຂວງວາງອອກ ເພື່ອໃຫ້ໄດ້ຕາມແຜນ ເມືອງໄຊພູທອງ ມີຈຸດສຸມເພື່ອວາງແຜນການຜະລິດລະ ດູແລ້ງໃນບ່ອນທີ່ມີເງື່ອນໄຂ ນອກຊົນລະປະທານ ແລະ ໃນຊົນລະປະທານ ​ໂດຍ​ໄດ້ກໍານົດເອົາເຂດ ການຜະລິດໂຄງການຊົນລະປະທານ ບ້ານຄັນທ່າຈານ-ດອນຖໍາເງິນ ແລະ ບ້ານມ່ວງໄຂ່ ແມ່ນໄດ້ເລັ່ງໃສ່ການປູກພືດ ​ແລະ ບ້ານໂພນທັນ ແມ່ນເລັ່ງໃສ່ການປູກເຂົ້າ. ​ແຜນການຢູ່ໃນ ຊົນລະປະທານແມ່ນ 651,39 ເຮັກຕາ. ໃນນັ້ນ, ນາແຊງ 200 ເຮັກຕາ, ພືດ 451,39 ເຮັກຕາ ​ແລະ ນອກຊົນລະປະທານແຜນປູກພືດ 823,61 ເຮັກຕາ ລວມທັງນອກ-ທັງໃນແມ່ນ 1.275 ເຮນັກຕາ.

ນອກຈາກນັ້ນ, ເມືອງໄຊພູທອງ ໄດ້ເອົາໃຈໃສ່ຊຸກຍູ້ສົ່ງເສີມ ການຜະລິດທົດແທນ ການນໍາເຂົ້າໂດຍສະເພາະແມ່ນ ໄດ້ເລັ່ງໃສ່ການປູກພືດ ທີ່ເຮົາສາມາດຜະລິດ ພາຍໃນເມືອງໄດ້ ເປັນຕົ້ນ ປູກຖົ່ວ ດິນ, ສາລີ, ໝາກເຜັດ ແລະ ພືດອື່ນໆ. ຈາກນັ້ນ, ຍັງໄດ້ຊຸກຍູ້ພໍ່ແມ່ ປະຊາຊົນລຽງສັດແບບຟາມ, ເປັນກຸ່ມ ເພື່ອກ້າວໄປເຖິງກະສິກອນ ເດັ່ນກວ່າໝູ່ແມ່ນການລຽງໝູ 263 ຄອບຄົວ, ມີໝູ 570 ໂຕ, ລຽງເປັນຟາມມີ 2 ຟາມ, ມີໝູ 7,159 ໂຕ ແລະ ກຸ່ມລຽງໝູ 5 ກຸ່ມ ມີ 63 ຄອບຄົວ.

ຂ່າວ-ພາບ: ພັນທະມິດ ວົງສຸທິ

KPL