ຂປລ. ວິທະຍຸກະຈາຍສຽງແຫ່ງຊາດລາວ ຈັດຝຶກອົບຮົມສ້າງຄວາມເຂັ້ມແຂງ ໃຫ້ສື່ມວນຊົນພາຍໃຕ້ຫົວຂໍ້: ການລາຍງານຂ່າວບັນຫາສີຂຽວ ພາຍໃຕ້ໂຄງການສ້າງຄວາມເຂັ້ມແຂງ ໃຫ້ແກ່ ສື່ມວນຊົນ ໂດຍການມີສ່ວນຮ່ວມຂອງອົງການຈັດຕັ້ງມະຫາຊົນ ແລະ ອົງການຈັດຕັ້ງທາງສັງຄົມ ເພື່ອການພັດທະ ນາບັນຫາສີຂຽວ ໃນລະຫວ່າງວັນທີ 11-15 ພະຈິກ 2024 ​ໂດຍ​ມີ ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ), ມີທ່ານ ນາງ ບົວຄໍາ ດວງປັນຍາ ຫົວໜ້າໂຄງການແກມຊິວ ອົງການແຄຣ ນານາຊາດ ປະຈໍາ ສປປ ລາວ, ມີວິທະຍາກອນ ແລະ ສື່ມວນຊົນທັງສູນກາງ-ແຂວງ ເຂົ້າຮ່ວມ.

ການຝຶກອົບຮົມໃນຄັ້ງນີ້, ສຳມະນາກອນໄດ້ຮຽນຮູ້ກ່ຽວກັບ ການຄຸ້ມຄອງສື່ມວນຊົນ, ຄວາມປອດໄພໃນການໃຊ້ສື່ສັງຄົມອອນລາຍ ແລະ ການແກ້ໄຂບັນຫາສື່ສັງຄົມອອນລາຍ; ການພັດທະນາສີຂຽວ ແລະ ບັນຫາສິ່ງແວດລ້ອມ ແລະ ນໍາໃຊ້ເອໄອເຂົ້າຊ່ວຍວຽກງານສື່; ບົດບາດ ແລະ ຄວາມສະເໝີ ພາບຍິງ-ຊາຍໃນຍຸກດີຈິຕອນ ແລະ ຈັນຍາບັນນັກຂ່າວ ໃນຍຸກປັດຈຸບັນ; ການຖ່າຍ-ຕັດຕໍ່ວິດີໂອ ແລະ ຮູບພາບຂ່າວໃສ່ສື່ອອນລາຍ. ພ້ອມນັ້ນ, ຍັງໄດ້ເຮັດວຽກຮ່ວມກັນເປັນກຸ່ມ ທັງຮຽນທິດສະດີ ແລະ ປະ ຕິບັດຕົວຈິງ.

ໄລຍະຜ່ານມາ ໂຄງການແກມຊິວ ໄດ້ເຊັນບົດບັນທຶກຄວາມເຂົ້າໃຈ ກັບກະຊວງ ຖວທ ຕາງໜ້າໂດຍກົມສື່ມວນຊົນ ແລະ ອົງການແຄຣ ນານາຊາດ ປະຈຳ ສປປ ລາວ ໂດຍມອບໝາຍ ໃຫ້ສະມາ ຄົມນັກຂ່າວແຫ່ງ ສປປ ລາວ ແລະ ອົງການແຄຣ ນານາຊາດ ປະຈຳ ສປປ ລາວ ເປັນຜູ້ດຳເນີນການປະຕິບັດ ກິດຈະກຳຂອງໂຄງການ ຄື: ສື່ມວນຊົນຂອງລັດ ແລະ ສື່ພາກສັງຄົມ ທີ່ໄດ້ລົງທະບຽນ ຖືກຕ້ອງຕາມກົດໝາຍ ສປປ ລາວ ຈະໄດ້ຮັບການຍົກລະດັບ ທັກສະດ້ານວິຊາຊີບ ລວມທັງການນຳໃຊ້ ເຕັກໂນໂລຊີແບບດີຈິຕອນ ແລະ ສື່ແບບໃໝ່ ເພື່ອເຮັດໃຫ້ປະຊາຊົນ ໄດ້ຮັບຂໍ້ມູນຂ່າວສານ ທີ່ມີຄຸນນະພາບ ໂດຍຜ່ານການລາຍງານ ທີ່ມີຄວາມຮັບຜິດຊອບ ແລະ ເປັນມືອາຊີບກ່ຽວກັບ ການພັດທະນາສີຂຽວ; ບັນດາຜູ້ເຂົ້າຮ່ວມ ຈາກອົງການຈັດຕັ້ງ ທາງສັງຄົມທີ່ເຮັດວຽກ ກ່ຽວກັບການພັດທະນາສີຂຽວ ເຊິ່ງລະບຸຢູ່ໃນກິດຈະກຳ, ຜູ້ນໍາໃຊ້ສື່ສັງຄົມອອນລາຍທົ່ວໄປ, ຜູ້ສ້າງວິດີໂອ ແລະ ຮູບເງົາ ໄດ້ຍົກລະດັບ ຄວາມຮູ້ ແລະ ຄວາມສາມາດຂອງຕົນ ໃນການປະກອບສ່ວນສ້າງນະໂຍບາຍ, ຕິດຕາມ ແລະ ຊຸກຍູ້ວຽກງານການພັດທະນາສີຂຽວ ທີ່ມີຜົນກະທົບຕໍ່ຊຸມຊົນ ລວມທັງການນຳໃຊ້ ເຕັກໂນໂລຊີດີຈິຕອນ ແລະ ສື່ແບບໃໝ່ຢ່າງສ້າງສັນ.

ຂ່າວ-ພາບ: ວັນເພັງ

KPL