ຂປລ. ໃນວັນທີ 11 ພະຈິກ 2024 ນີ້, ບໍລິສັດ ລາວໂທລະຄົມມະນາຄົມ ມະຫາຊົນ ຈັດພິທີສະ​ເຫລີມສະຫລອງ​ວັນ​ສ້າງ​ຕັ້ງ ແຫ່ງການເຕີບໃຫຍ່ຂະຫຍາຍຕົວ ແລະ ພັດທະນາ ຂອງບໍລິສັດ ຄົບ ຮອບ 28 ປີ (11/11/1996-11/11/2024)​ ໂດຍມີທ່ານ ບໍ່ວຽງຄຳ ວົງດາລາ ລັດຖະມົນຕີ ກະຊວງເຕັກໂນ​ໂລຊີ ແລະ ການສື່ສານ, ມີບັນດາຮອງລັດຖະມົນຕີ, ບັນດາຫົວໜ້າກົມ, ຮອງກົມ, ຕາງໜ້າຜູ້ຖືຮຸ້ນຝ່າຍຕ່າງປະເທດ, ຄະນະພັກ, ຄະນະອຳນວຍການ, ພ້ອມດ້ວຍພະນັກງານ ລາວ​ໂທລະ​ຄົມ ເຂົ້າຮ່ວມ.

ໂອກາດດັ່ງກ່າວ, ທ່ານ ສຸພົນ ຈັນທະວີໄຊ ຜູ້ອຳນວຍການໃຫຍ່  ບໍລິສັດ ລາວໂທລະຄົມມະນາ ຄົມມະຫາຊົນ ​ໄດ້ກ່າວວ່າ: ໃນ​ໄລ​ຍະ 28 ປີຜ່ານມາກຸ່ມບໍລິສັດ ລາວໂທລະຄົມມະນາຄົມ ມະຫາຊົນ  ໄດ້ສຸ່ມໃສ່ ພັດທະນາ ແລະ ຂະຫຍາຍພື້ນທີ່ໃຫ້ບໍລິການ ໃຫ້ຄວບຄຸມທົ່ວປະເທດ, ປັດຈຸບັນ ລາວ ໂທລະຄົມ ໄດ້ໃຫ້ບໍລິການດ້ານໂທລະຄົມມະນາຄົມ ແບບຄົບວົງຈອນ ເຊັ່ນ: ບໍລິການ Mobile Broadband ຜ່ານລະບົບທີ່ທັນສະໄຫມ 4G, 4.5G ແລະ 5G, ບໍລິການໂຣມມິ້ງລະຫວ່າງປະເທດ ແລະ ເປັນບໍລິສັດທຳອິດໃນ ສປປ ລາວ ໃຫ້ບໍລິການ ໂຣມມິ້ງ ໃນບັນດາປະເທດກຸ່ມອາຊຽນ ໄດ້ໃນແພັກເກັດລາຄາດຽວ. ນອກນີ້, ຍັງມີບໍລິການ Fixed Broadband  ແລະ ບໍລິການກະເປົາເງິນ​ເອເລັກໂຕຣນິກ M-Money X. ພ້ອມກັນນີ້, ເພື່ອຫັນເປັນທັນສະໄໝ ໃນຍຸກດີຈິຕອນ ກຸ່ມບໍລິສັດ ລາວໂທລະຄົມ ໄດ້ມີການຈັດຕັ້ງປະຕິບັດ ຫລາຍໂຄງການເຊັ່ນ AI, IoT, Big Data, Cloud, Cyber Security, Block Chain, ການພັດທະນາ Platform M-Money X, ແອັບ M Services, HR Platform ແລະ ອື່ນໆ.

ນອກຈາກນີ້, ລາວ ໂທລະຄົມ ຍັງໄດ້ສ້າງສູນຕິດຕາມ ແລະ ແກ້ໄຂ ທີ່ໄດ້ຮັບຮອງມາດຕະຖານສາກົນ ISO ເພື່ອມາກວດສອບ ຄຸນນະພາບຂອງເຄືອຂ່າຍແບບ 24/7 ແລະ ຍັງມີສູນ ບໍລິການທົ່ວປະເທດ ທີ່ຈະໃຫ້ການບໍລິການແກ່ລູກຄ້າ ເພື່ອໃຫ້ເຂົ້າເຖິງຜະລິດຕະພັນ ແລະ ການບໍລິການຂອງບໍລິສັດ ໄດ້ຢ່າງສະດວກສະບາຍ. ໄປຄຽງຄູ່ກັບການ ດໍາເນີນທຸລະກິດ ຍັງໄດ້ປັບປຸງລະບຽບ, ນະໂຍບາຍສະ ຫວັດດີການສັງຄົມຕ່າງໆ ​ໃຫ້​ສູງຂຶ້ນເພື່ອຍົກສູງລະດັບ ຊີວິດການເປັນຢູ່ໃຫ້ພະນັກງານ, ກຳມະກອນໃຫ້ດີຂຶ້ນເລື້ອຍໆ.

ຕະຫລອດໄລຍະເວລາ 28 ປີຜ່ານມາ, ການດຳເນີນທຸລະກິດຂອງ ບໍລິສັດ ລາວໂທລະຄົມມະ ນາຄົມມະຫາຊົນ ໄດ້ສ້າງຄວາມເຊື່ອໝັ້ນໃຫ້ຜູ້ຊົມໃຊ້ ແລະ ໄດ້ຮັບຄວາມໄວ້ເນື້ອເຊື່ອໃຈ ຈາກພັກ-ລັດ ຖະບານ ສະແດງອອກການໄດ້ຮັບການຍ້ອງຍໍ ແລະ ລາງວັນຕ່າງໆ ເຊັ່ນ: ຫລຽນໄຊແຮງງານຊັ້ນ I, ລາງວັນ “ຜູ້ປະກອບການອາຊຽນດີເດັ່ນຄັ້ງທີ 9 ປະຈໍາປີ 2024 (9th ASEAN Entrepreneur Award 2024)” ໃນເວທີ The 25th World Knowledge Forum 2024 ທີ່ ເມືອງອິນຊອນ ປະເທດ ສ ເກົາຫລີ, ລາງວັນ The Stevie Awards for Technology Excellence ປີ 2024 ຢ່າງເປັນທາງການທີ່ເມືອງ ນີວຢອກ ສະຫະລັດອາເມລິກາ ແລະ ລາງວັນຜູ້ພັດທະນາການ ໃຫ້ບໍລິການໂຄງສ້າງພື້ນຖານ ໂທລະຄົມດີເດັ່ນ ໃນອາຊຽນປະຈຳປີ 2024 (ASEAN Business Awards 2024) ໃນໄລຍະກອງປະຊຸມ ASEAN Summits and Related Summits ຄັ້ງທີ 44 ເເລະ 45 ທີ່ນະຄອນຫລວງວຽງຈັນ ສປປ ລາວ ແລະ ໃບຍ້ອງຍໍຂັ້ນລັດຖະບານ ໃຫ້ພະນັກງານທີ່ມີຜົນງານດີເດັ່ນ ໃນການປະກອບສ່ວນ​ ທາງ​ດ້ານການ​ດຳ​ເນີນ​ທຸລະ​ກິດ​ຂອງ ລາວ​ໂທລະ​ຄົມ ໃຫ້​ມີ​ການ​ເຕີບ​ໃຫຍ່​ຂະຫຍາຍຕົວ ​ເປັນ​ກ້າວໆ​ມາ ແລະ ລາງວັນອື່ນໆ.

ບໍລິສັດ ລາວ​ໂທລະ​ຄົມມະນາຄົມ ມະຫາຊົນ​ ໄດ້​ຮັບ​ການ​ສ້າງ​ຕັ້ງ​ຂຶ້ນ ຢ່າງ​ເປັນ​ທາງ​ການໃນ​ວັນ​ທີ 11 ພະຈິກ 1996 ເຊິ່ງເປັນ​ການ​ລວມ​ເອົາ ບໍລິສັດ ໂທລະ​ຄົມມະນາຄົມ​ລາວ ​ແລະ ບໍລິສັດ ຊິນ​ນາ​ວັດຕຣ​າ ​ເທ​ເລຄອມ​ຈໍາກັດ ເປັນບໍລິສັດຮ່ວມທຶນ ໂດຍ​ລັດຖະບານ​ລາວ ຖື​ຮຸ້ນ 51% ​ແລະ ບໍລິສັດ ​ເຊັນ​ນິງຕັນ ອິນ​ເວດສະເມັນ ສິງກະ​ໂປ ຖື​ຮຸ້ນ 49%.

ໂອກາດນີ້, ທ່ານ ບໍ່ວຽງຄຳ ວົງດາລາ ໄດ້ຍ້ອງຍໍຊົມເຊີຍຜົນງານ ໃນໄລຍະຜ່ານມາ ທີ່ ລາວ ​ໂທລະ​ຄົມ ຍາດ​ມາ​ໄດ້ ​ແລະ  ສາມາດຕອບສະໜອງ ຄວາມຮຽກຕ້ອງການຂອງ​ສັງຄົມ, ການ​ພັດທະນາ​ພື້ນຖານ​ ໂຄງ​ລ່າງ​ດ້ານ​ໂທລະ​ຄົມ ​ກໍ່ໄດ້​ຮັບ​ການ​ພັດທະນາ ຢ່າງຕໍ່ເນື່ອງໃນແຕ່ລະປີ ໃນຂອບເຂດທົ່ວປະເທດ, ພ້ອມທັງເນັ້ນໃຫ້ລາວ ໂທລະຄົມ ​ກຽມພ້ອມ​ຮອບດ້ານ​​​​ ໃນ​ການພັດທະ​ນາ​ຕົນ​ເອງ​ຢ່າງ​ບໍ່​ຢຸດ​ຢັ້ງ​ ​ເພື່ອ​ໃຫ້​ກາຍ​ເປັນເບີ​ໜຶ່ງ ​ໃນ​ຜູ້​ໃຫ້​ບໍລິການ ​ດ້ານໂທລະຄົມມະນາຄົມ ແລະ ​ສື່ສານ ​ຄົບ​ວົງ​ຈອນ​ໃນ ​ສປປ ລາວ; ​ໃນການ​ຈັດຕັ້ງປະຕິບັດແນວທາງ ແຜນພັດທະນາ ຕາມນະໂຍບາຍຫັນເປັນ ທັນສະໄໝ ໃນຍຸກດີຈິຕອນ ລາວໂທລະຄົມ ຕ້ອງໄດ້ສຸມໃສ່ການພັດທະນາ ຄຸນ​ນະພາ​ບການ​ບໍລິການ​ ​ແລະ ການ ພັດທະນາ​ບຸກຄະລາ​ກອນ ​​ໂດຍ​ສະ​ເພາະ ແມ່ນ​ວິຊາ​ການ​ຕ້ອງ​ມີ​ຄວາມ​ຮູ້​, ຄວາມ​ສາມາດ, ​ສ້າງ​ໃຫ້​ໄດ້​ຖັນ​ແຖວ​ພະ ນັກງານ​ທີ່​ເປັນ​ຊ່ຽວຊານ ແລະ ​ມື​ອາຊີບ ທີ່​ແທ້​ຈິງ ເພື່ອ​ຕອບ​ສະໜອງ​​ໄດ້ກັບ ​ຄວາມ​ຮຽກຮ້ອງ​ຕ້ອງການ ​ຂອງ​ເຕັກ​ໂນ​ໂລ​ຊີ ທີ່​ມີ​ການ​ພັດທະນາ ​ແລະ ​ຂະຫຍາຍຕົວ​ໄວ ໃນ​ແຕ່ລະ​ໄລຍະ. ສະນັ້ນ, ມັນ​ຮຽກ ຮ້ອງ​ໃຫ້​ຄະນະ​ພັກ, ຄະນະອໍານວຍການ, ຜູ້ບໍລິຫານ ແລະ ພະນັກງານ ລາວໂທລະ​ຄົມ​ ທຸກ​ທົ່ວ​ໜ້າ​ຈົ່ງ​ເຊີດ​ຊູ​ສະຕິ ​ແລະ ​ເພີ່​ມທະວີບົດບາດ ໜ້າ​ທີ່ຄວາມ​ຮັບຜິດຊອບ​ຂອງ​ຕົນ​ ໃຫ້​ສູງ​ກ່ວາ​ເກົ່າ ​ເພື່ອ​ເຮັດ​ໃຫ້​ ລາວໂທລະ​ຄົມ ກ້າວ​ໄປ​ຂ້າງ​ໜ້າ ​ແລະ ສາມາດ​ຕອບ​ສະໜອງ​ໄດ້ຕາມ​ຄວາມ ​ຮຽກຮ້ອງ​ຕ້ອງການ​ ໃນຍຸກເສດຖະກິດ 4.0 ແລະ ເພື່ອ​ການ​ພັດທະນາປະ​ເທດ​ຊາດ ໃຫ້ສາມາດ​ເຊື່ອມ​ໂຍງ​ກັບ​ພາກ​ພື້ນ ​ແລະ ສາກົນ​ໄດ້.

KPL