ຂປລ.ວິທະຍຸ ກະຈາຍສຽງ ຫວຽດນາມ, ຜູ້ສະໝັກຮັບ ເລືອກຕັ້ງ ພັກສາທາລະນະ, ອະດີດ ປະທານາທິບໍດີ ອາເມລິກາ ທ່ານ ໂດນັນ ທຣຳ(Donald Trump) ໄດ້ຮັບໄຊຊະນະ ໃນການເລືອກຕັ້ງ ສ.ອາເມລິກາ 2024 ແລະ ຈະກາຍເປັນ ປະທານາທິບໍດີ ຄົນທີ 47 ຂອງ ສ.ອາເມລິກາ. ໝາກຜົນນີ້ ອາດຈະສ້າງການປ່ຽນແປງ ອັນໃໝ່ ຢ່າງໃຫຍ່ຫລວງຢູ່ ສ.ອາເມລິກາ ແລະ ໃນທົ່ວໂລກ. ສຳລັບ ໄຊຊະນະ ຂອງທ່ານ Donald Trump ໂດຍບັນດາ ສຳນັກຂ່າວໃຫຍ່ ເກືອບທັງໝົດ ຂອງ ສ.ອາເມລິກາ ແລະ ໂລກ ປະກາດ ໃນເວລາ2 ໂມງ 30ນາທີ ໃນວັນທີ 6 ພະຈິກນີ້, ຕາມເວລາທ້ອງຖິ່ນ ຢູ່ພາກຕາເວັນອອກ ຂອງ ສ.ອາເມລິກາ, ພາຍຫລັງ ທີ່ທ່ານ Donald Trump ຍາດໄດ້ ໄຊຊະນະຢູ່ລັດ Pennsylvania, ຜ່ານນັ້ນຍາດໄດ້ບັດ ຂອງຜູ້ຕາງໜ້າ ຜູ້ມີສິດເລືອກຕັ້ງ ຫລາຍກ່ວາ 270 ບັດ, ເອົາໄຊຊະນະ ຕໍ່ຄູ່ແຂ່ງ ພັກປະຊາທິປະໄຕ ແມ່ນ ທ່ານ ນາງ ຄາມາລາ ຮາຣິສ(Kamala Harris) ເພື່ອກັບຄືນສູ່ ທຳນຽບຂາວພາຍຫລັງ 4 ປີ.ຂະນະທີ່ ໝາກຜົນຂອງການນັບບັດ ຢູ່ບັນດາລັດ ໃນການເລືອກຕັ້ງ ປະທານາທິບໍດີ ອາເມລິກາປີນີ້ ໂດຍບັນດາສຳນັກຂ່າວໃຫຍ່ຂອງ ອາເມລິກາ ແລະ ໂລກຄື: AP, CNN, Fox News ປະກາດ ກົງກັບເວລາ ບັນດາສະຖານທີ່ ປ່ອນບັດ ປິດປະຕູ. ນີ້ຍັງບໍ່ແມ່ນໝາກຜົນທາງການ ສຸດທ້າຍ ແຕ່ໄດ້ຮັບຖືວ່າ ມີຄວາມໄວ້ເນື້ອເຊື່ອໃຈ ຢູ່ລະດັບສູງ ແລະ ຍາກທີ່ຈະມີຄວາມຜິດ ເມື່ອທຽບໃສ່ກັບ ໝາກຜົນສຸດທ້າຍ ຂອງການເລືອກຕັ້ງ. ຕາມນັ້ນແລ້ວ, ຕົວເລກ ໂດຍສຳນັກຂ່າວສານ ອາເມລິກາ AP ເຊິ່ງໄດ້ຮັບຖືວ່າ ມາດຕະການ ໃນບັນດາບັ້ນຫາສຽງເລືອກຕັ້ງ ປະທານາທາທິບໍດີ ອາເມລິກາ ສະແດງ ໃຫ້ເຫັນວ່າ ທ່ານ Donald Trump ຍາດໄດ້ບັດສະໜັບ ສະໜູນ ຂອງຜູ້ຕາງໜ້າ ຜູ້ມີສິດເລືອກ ຕັ້ງຫລາຍກ່ວາ 230 ບັດ ເພື່ອຍາດໄດ້ ໄຊຊະນະ ໃນການເລືອກຕັ້ງ ປະທານາທິບໍດີ ຄັ້ງນີ້.ໃນຕົວຈິງແລ້ວ, ໝາກຜົນຂອງການປ່ອນ ບັດກ່ອນກຳນົດຢູ່ ບັນດາລັດ ພາກທິດຕາເວັນອອກ ແລະ ພາກກາງຂອງ ສ.ອາເມລິກາ ໄດ້ຢັ້ງຢືນທ່າດີ ຂອງ ທ່ານ Trump ຕໍ່ທ່ານ ນາງ Harris, ໃນຂະນະທີ່ ທ່ານ Donald Trump ຍາດໄດ້ໄຊຊະນະ ຢູ່ບັນດາລັດຄື: Dakota ເໜືອ, Dakotaໃຕ້, Louisiana, Wyoming, Texas, Ohio.ສິ່ງທີ່ເປັນໜ້າສົນໃຈ, ທ່ານ Donald Trump ຍາດໄດ້ໄຊຊະນະໂດຍໄວຢູ່ລັດ Florida ໃນນັ້ນຍັງມີເຂດ Miami-Dade ເຊິ່ງແມ່ນເຂດທີ່ມີປະຊາຊົນ ຫລາຍທີ່ສຸດຂອງລັດ Florida, ເຊິ່ງແມ່ນສະຖານທີ່ທີ່ຜູ້ສະໝັກເລືອກຕັ້ງ ຂອງພັກສາທາລະນະ ຍາດໄດ້ໄຊຊະນະ ໃນຄັ້ງຫລ້າາສຸດ ແມ່ນແຕ່ປີ 1988 ແລະ ກໍ່ແມ່ນສະຖານທີ່ ທ່ານ Donald Trump ຫລຸດ 7 ຄະແນນ ຕໍ່ທ່ານ ໂຈ ໄບເດນ(Joe Biden) ໃນປີ 2020. ບັນດາການໄຈ້ແຍກ ກ່ອນນັ້ນ ຖືວ່າ ລັດ Florida ອາດຈະແມ່ນຕົວລັບ ໃນການເລືອກຕັ້ງ ປີນີ້ ແລະ ພັກປະຊາທິປະໄຕ ກໍ່ສຸມແຫລ່ງກຳລັງ ຂົນຂວາຍ ປະຊາຊົນຢູ່ລັດ ນີ້, ແຕ່ໝາກຜົນ ຂອງການປ່ອນບັດ ສະແດງໃຫ້ເຫັນວ່າ ທ່ານ Donald Trump ຍາດໄດ້ໄຊຊະນະ ຕໍ່ທ່ານນາງ Kamala Harris ດ້ວຍການລືບຄະແນນ ຢ່າງຂາດຂັ້ນ.ຖັດຈາກນັ້ນ, ທ່ານ Donald Trump ກໍ່ຍາດໄດ້ໄຊຊະນະຢູ່ ບັນດາລັດ ເກືອບທັງໝົດ ທີ່ໄດ້ໃຫ້ຂໍ້ສັງເກດວ່າ ທ່ານມີທ່າດີ ກ່ອນການເລືອກຕັ້ງ, ໃນນັ້ນ ມີລັດສຳຄັນແມ່ນ Texas, ເຊິ່ງແມ່ນລັດນຳບັດ ຂອງຜູ້ຕາງໜ້າ ຜູ້ມີສິດເລືອກຕັ້ງ 40 ບັດ ມາໃຫ້ ທ່ານ Donald Trump. ໃນຂະນະນັ້ນ, ທ່ານ Kamala Harris ຍາດໄດ້ໄຊຊະນະສຳຄັນ ຢູ່ລັດ California, ລັດ New York ແລະ ຍາດໄດ້ໄຊຊະນະ ໂດຍໄວ ຢູ່ບັນດາລັດຄື: Colorado, New Jersey, Delaware, Massachusetts, Maryland ຊຶ່ງໄດ້ຮັບຖືວ່າ ແມ່ນສະຖານທີ່ ທີ່ພັກປະຊາທິປະໄຕ ໄດ້ຮັບການສະໜັບ ສະໜູນ ຈາກປະຊາຊົນ ມາແຕ່ດົນນານ.ສຳລັບ 7 ລັດ ທີ່ໄດ້ຮັບ ການຕີລາຄາ ຈະກໍ່ຜົນກະທົບ ຢ່າງໃຫຍ່ຫລວງ ຕໍ່ການເລືອກຕັ້ງ, ພິເສດແມ່ນ Pennsylvania, Wisconsin ແລະ Michigan, ການແຂ່ງຂັນກັນ ລະຫວ່າງ 2 ຜູ້ສະໝັກ ເລືອກຕັ້ງ ດຳເນີນ ຢ່າງດູເດືອດ ຄືການຄາດຄະເນ. ໃນ 7 ລັດນີ້, Carolina ເໜືອ (ມີ 16 ບັດຜູ້ຕາງໜ້າຜູ້ມີສິດເລືອກຕັ້ງ) ເຊິ່ງແມ່ນລັດທຳອິດໄດ້ຢັ້ງຢືນ ໄຊຊະນະ ຂອງທ່ານ Donald Trump. ການເລືອກຕັ້ງ ປະທານາທາບໍດີ ອາເມລິກາປີນີ້ ອັດລົງດ້ວຍການໂຕ້ຖ້ຽງກັນ ຫລາຍຢ່າງ ແລະ ຍາກທີ່ ຈະຄາດຄະເນລ່ວງໜ້າ ໄດ້ທີ່ສຸດ ຢູ່ ສ.ອາເມລິກາ ໃນຫລາຍທົດສະວັດ ຜ່ານມາ ເຊິ່ງສະແດງໃຫ້ເຫັນເລື່ອງ ພັກປະຊາທິປະໄຕ ປ່ຽນແປງ ຜູ້ສະໝັກ ເລືອກຕັ້ງແບບບັງເອີນ ກ່ອນເວລາ ເລືອກຕັ້ງ ພຽງແຕ່ 5 ເດືອນເທົ່ານັ້ນ, ເມື່ອທ່ານ ປະທານາທາບໍດີ Joe Biden ຕັດສິນໃຈ ຖອນຕົວ ເມື່ອທ້າຍເດືອນມິຖຸນາ ເພື່ອໃຫ້ ທ່ານນາງ Kamala Harris ອອກສະໝັກເລືອກຕັ້ງ. ເຖິງຢ່າງໃດກໍຕາມ, ໂດຍບໍ່ຫົວຊາຕໍ່ ການປະຕິບັດ ບັ້ນຫາສຽງເລືອກຕັ້ງ ປະທານາທາບໍດີ ໄລຍະສັ້ນ ທີ່ສຸດໃນປະຫວັດສາດ (ກ່ວາ 5 ເດືອນ), ທ່ານນາງ Kamala Harris ຍັງພ້ອມກັບ ທ່ານ Donald Trump ສ້າງການແຂ່ງຂັນເລືອກຕັ້ງ ປະທານາທາບໍດີ ດ້ວຍການໃຊ້ເງິນທຶນຫລາຍ, ໃນຂະນະທີ່ສອງຝ່າຍ ໄດ້ຈ່າຍເງິນ ເປັນຈຳນວນ ເກືອບ 16 ຕື້ ໂດລາສະຫະລັດ ໃຫ້ແກ່ ບັ້ນຫາສຽງ ເລືອກຕັ້ງ, ລື່ນກາຍຕົວເລກ 15,1 ຕື້ ໂດລາສະຫະລັດໃນປີ 2020. ວົງການ ນັກສັງເກດການ ໃຫ້ຂໍ້ສັງເກດວ່າ ທ່ານ Donald Trump ມີການແຂ່ງຂັນ ຢ່າງວຸດວິດ ເມື່ອທຽບໃສ່ກັບ ທ່ານ ນາງ Kamala Harris ໃນຊຸມເດືອນສຸດທ້າຍ ຂອງບັ້ນຫາສຽງເລືອກຕັ້ງ, ຊ້ຳບໍ່ໜຳ ໃນບາງຈຸດເວລາ, ທ່ານນາງ Kamala Harris ໄດ້ລື່ນກາຍ, ແຕ່ໃນຈຸດເວລາ ສຸດທ້າຍ, ທ່ານ Donald Trump ໄດ້ຮັບຖືວ່າ ມີກຳລັງ ຢ່າງເຂັ້ມແຂງກ່ວາ, ພ້ອມກັບ ມີພື້ນຖານຜູ້ມີສິດເລືອກຕັ້ງ ທີ່ໝັ້ນແກ່ນກ່ວາ ຢູ່ລັດຕ່າງໆ. ທ່ານ ສາດສະດາຈານ Larry Sabato ຂອງມະຫາວິທະຍາໄລ Virginia ຖືວ່າ ເຖິງວ່າ ໝາກຜົນ ເປັນແນວໃດກໍຕາມ, ບັນດາຄວາມແຕກແຫງເຊິ່ງການເລືອກຕັ້ງນີ້ ສ້າງຕັ້ງຂຶ້ນ ເມື່ອພັກປະຊາທິປະໄຕ ແລະ ພັກສາທາລະນະ ສົ່ງສານແບບຫົວ ຮຸນແຮງອອກມາ ຈະເຮັດໃຫ້ ສ.ອາເມລິກາ ສືບຕໍ່ຖືກແບ່ງແຍກກັນ ໃນໄລຍະຈະມາເຖິງ.ໝາກຜົນຂອງການເລືອກຕັ້ງ ປະທານາທາບໍດີ ອາເມລິກາ ປີນີ້ ກໍ່ຜົນກະທົບ ຢ່າງໃຫຍ່ຫລວງ ຕໍ່ໂລກ, ໃນຂະນະທີ່ ທຸກຂົງເຂດ, ນັບແຕ່ ການພົວພັນ ເສດຖະກິດ - ການຄ້າ - ເຕັກໂນໂລຢີ ລະຫວ່າງ ສ.ອາເມລິກາ ແລະ ສປ ຈີນ ຕະຫລອດຮອດ ແງ່ຫວັງ ການແກ້ໄຂ ການປະທະກັນ ຢູ່ອູແກຣນ ແລະ ພາກພື້ນຕາເວັນອອກກາງ. ການພົວພັນ ລະຫວ່າງ ສ.ອາເມລິກາ ແລະ ບັນດາປະເທດ ພັນທະມິດໃນສະຫະພາບ ເອີຣົບ (EU) ຫລື ອົງການ ສົນທິສັນຍາ ອັດລັງຕິກເໜືອ (NATO) ກໍ່ຄາດຄະເນວ່າ ມີການຜັນປ່ຽນ./.

KPL