ຂປລ
ອີງຕາມບົດລາຍງານ ທ່າອ່ຽງການພັດທະນາອາຊີ ສະບັບຫຼ້າສຸດ ທີ່ທະນາຄານພັດທະນາອາຊີ (ADB) ເຜີຍແຜ່ໃນວັນທີ 23 ກັນຍາ 2026 ໃຫ້ຮູ້ວ່າ: ການຂະຫຍາຍຕົວທາງເສດຖະກິດຂອງ ສປປ ລາວ ຄາດວ່າຈະຢູ່ໃນລະດັບ 4% ໃນປີ 2026 ກ່ອນຈະປັບຕົວດີຂຶ້ນເປັນ 4,5% ໃນປີ 2027, ເຖິງວ່າສະຖຽນລະພາບດ້ານເສດຖະກິດມະຫາພາກຈະດີຂຶ້ນ ສປປ ລາວ ຍັງຄົງມີຄວາມບອບບາງ ຕໍ່ແຮງກະທົບຈາກພາຍນອກ ແລະ ຄວາມສ່ຽງທີ່ກ່ຽວພັນກັບສະພາບດິນຟ້າອາກາດ.
ອັດຕາເງິນເຟີ້ທີ່ຫຼຸດລົງ ແລະ ສະຖຽນລະພາບຂອງອັດຕາແລກປ່ຽນ ໄດ້ຊ່ວຍເສີມສ້າງຄວາມເຊື່ອໝັ້ນ. ແນວໃດກໍຕາມ, ການຂະຫຍາຍຕົວທາງເສດຖະກິດ ຄາດວ່າຈະຊ້າລົງໃນປີ 2026 ເນື່ອງຈາກລາຄານ້ຳມັນເຊື້ອໄຟໃນຕະຫຼາດໂລກ ແລະ ຕົ້ນທຶນການນຳເຂົ້າທີ່ສູງຂຶ້ນ, ຄວາມຕ້ອງການຈາກຕ່າງປະເທດທີ່ອ່ອນຕົວລົງ, ຂອບເຂດການດຳເນີນນະໂຍບາຍການເງິນ ແລະ ເງິນຕາທີ່ຈຳກັດ. ນອກຈາກນີ້, ຄວາມສ່ຽງທີ່ກ່ຽວພັນກັບສະພາບດິນຟ້າອາກາດ ອາດສົ່ງຜົນກະທົບເພີ່ມເຕີມຕໍ່ການຜະລິດໄຟຟ້າພະລັງນ້ຳ ແລະ ການຜະລິດກະສິກຳໃນປີ 2027.
ທ່ານ ນາງ ແຊນນີ ແຄມເບວ (Shanny Campbell) ຜູ້ຕາງໜ້າຫ້ອງການທະນາຄານພັດທະນາອາຊີ ປະຈຳ ສປປ ລາວ ໄດ້ກ່າວວ່າ: ສປປ ລາວ ມີຄວາມຄືບໜ້າທີ່ສຳຄັນໃນການຟື້ນຟູສະຖຽນລະພາບດ້ານເສດຖະກິດມະຫາພາກ ໂດຍອັດຕາເງິນເຟີ້ທີ່ຜ່ອນຄາຍລົງ ແລະ ອັດຕາແລກປ່ຽນທີ່ມີສະຖຽນລະພາບຫຼາຍຂຶ້ນ ໄດ້ຊ່ວຍຊຸກຍູ້ກິດຈະກຳທາງເສດຖະກິດ, ພ້ອມນີ້ການຮັກສານະໂຍບາຍເສດຖະກິດມະຫາພາກທີ່ຮັດກຸມ ຄຽງຄູ່ກັບການປັບປຸງການອຳນວຍຄວາມສະດວກດ້ານການຄ້າ, ການຫັນການສົ່ງອອກໃຫ້ມີຄວາມຫຼາກຫຼາຍ ແລະ ການເຊື່ອມສານຄວາມທົນທານຕໍ່ສະພາບດິນຟ້າອາກາດເຂົ້າໃນການວາງແຜນພັດທະນາ ຈະເປັນປັດໄຈສຳຄັນໃນການຮັກສາການຟື້ນຕົວທີ່ທົ່ວເຖິງ ແລະ ທົນທານ.
ຂະແໜງບໍລິການ ຍັງສືບຕໍ່ຊຸກຍູ້ການຂະຫຍາຍຕົວທາງເສດຖະກິດ ໂດຍຈຳນວນນັກທ່ອງທ່ຽວສາກົນບັນລຸ 2,6 ລ້ານຄົນ ໃນເຄິ່ງປີທຳອິດຂອງປີ 2026, ເພີ່ມຂຶ້ນ 9,9% ເມື່ອທຽບໃສ່ໄລຍະດຽວກັນຂອງປີຜ່ານມາ. ຂະແໜງອຸດສາຫະກຳ ຄາດວ່າຈະຍັງເປັນແຮງຂັບເຄື່ອນສຳຄັນຂອງການຂະຫຍາຍຕົວ ໂດຍໄດ້ຮັບແຮງໜູນຈາກການລົງທຶນໃນພະລັງງານທົດແທນ, ຂະແໜງກໍ່ສ້າງ, ຂະແໜງບໍ່ແຮ່ ແລະ ການສົ່ງອອກໄຟຟ້າ, ໃນຂະນະທີ່ຂະແໜງກະສິກຳ ຄາດວ່າຈະປະກອບສ່ວນໃນລະດັບຈຳກັດ. ຢ່າງໃດກໍຕາມ, ຂະແໜງອຸດສາຫະກຳ ແລະ ຂະແໜງກະສິກຳ ຕ່າງກໍມີຄວາມສ່ຽງເພີ່ມຂຶ້ນ ຈາກຜົນກະທົບດ້ານດິນຟ້າອາກາດ, ລວມທັງໄພນ້ຳຖ້ວມ, ໄພແຫ້ງແລ້ງ ແລະ ຝົນຕົກບໍ່ສະໝ່ຳສະເໝີ. ສ່ວນອັດຕາເງິນເຟີ້ສະເລ່ຍຄາດວ່າຈະຢູ່ໃນລະດັບ 8,0% ໃນປີ 2026 ກ່ອນຈະຫຼຸດລົງມາເປັນ 6,5% ໃນປີ 2027.
ໃນບົດລາຍງານລະບຸວ່າ: ຄວາມສ່ຽງຕໍ່ເສດຖະກິດປະກອບມີ ລາຄາໃນຕະຫຼາດໂລກທີ່ສູງຂຶ້ນ, ລາຍຮັບຈາກການທ່ອງທ່ຽວທີ່ອ່ອນຕົວລົງ ແລະ ແຮງກົດດັນຈາກການຊຳລະໜີ້ສິນທີ່ຍັງສືບຕໍ່ ຊຶ່ງອາດສ້າງແຮງກົດດັນຕໍ່ການຂະຫຍາຍຕົວ; ແຮງກະທົບຈາກສະພາບດິນຟ້າອາກາດ, ລວມທັງໄພນ້ຳຖ້ວມ, ໄພແຫ້ງແລ້ງ ແລະ ຝົນຕົກບໍ່ສະໝ່ຳສະເໝີ ອາດສົ່ງຜົນກະທົບຕໍ່ການຜະລິດໄຟຟ້າພະລັງນ້ຳ, ການຜະລິດກະສິກຳ, ການສົ່ງອອກ ແລະ ລາຍຮັບເປັນເງິນຕາຕ່າງປະເທດ.
ຂໍ້ມູນ: ເອດີບີ
KPL
