ຂປລ
ອົງການ ເພື່ອການຮ່ວມມື ດ້ານເສດຖະກິດ ແລະ ພັດທະນາ(OECD) ໄດ້ເຜີຍແຜ່ ບົດລາຍງານ ສະພາບທ່າອຽງ ການພັດທະນາ ເສດຖະກິດ ສະບັບຫລ້າສຸດ ໂດຍໄດ້ປັບການຄາດຄະເນ ຈັງຫວະການເຕີບໂຕ ຂອງເສດຖະກິດໂລກ ໃນປີ2026 ຈາກ 2,8% ຂຶ້ນເປັນ 2,9%.
ຂປລ.ວິທະຍຸ ໂທລະພາບ ສູນກາງຈີນ,ວັນທີ 23 ກັນຍານີ້, ອົງການ ເພື່ອການຮ່ວມມື ດ້ານເສດຖະກິດ ແລະ ພັດທະນາ(OECD) ໄດ້ເຜີຍແຜ່ ບົດລາຍງານ ສະພາບທ່າອຽງ ການພັດທະນາ ເສດຖະກິດ ສະບັບຫລ້າສຸດ ໂດຍໄດ້ປັບການຄາດຄະເນ ຈັງຫວະການເຕີບໂຕ ຂອງເສດຖະກິດໂລກ ໃນປີ2026 ຈາກ 2,8% ຂຶ້ນເປັນ 2,9%. ບົດລາຍງານລະບຸວ່າ: ເຖິງວ່າໄດ້ຮັບຜົນກະທົບ ຈາກສະຖານະການ ຢູ່ເຂດຕາເວັນອອກກາງ ກໍຕາມ, ແຕ່ເສດຖະກິດຂອງ ຫລາຍປະເທດ ຍັງຄົງສະແດງໃຫ້ເຫັນ ຄວາມເຂັ້ມແຂງ ແລະ ທົນທານ, ມີຄັງສຳຮອງ ນ້ຳມັນເຊື້ອໄຟ ແລະ ການສະໜອງ ພະລັງງານ ເພີ່ມໃໝ່ ຢ່າງພຽງພໍ, ແລະ ມາດຕະການ ສະໜັບສະໜູນ ຂອງບາງປະເທດ ໄດ້ຊ່ວຍຜ່ອນຄາຍ ຜົນກະທົບດັ່ງກ່າວ, ການພັດທະນາ ຢ່າງຄຶກຄື້ນ ຂອງຂົງເຂດ ປັນຍາປະດິດ ໄດ້ຊຸກຍູ້ໃຫ້ການລົງທຶນ ແລະ ການຄ້າຂະຫຍາຍ ຕົວເຊັ່ນກັນ. ບົດລາຍງານດັ່ງກ່າວ ລະບຸຕື່ມວ່າ: ອະນາຄົດ ຂອງເສດຖະກິດໂລກ ຍັງຄົງຂຶ້ນຢູ່ກັບ ການພັດທະນາ ຂອງການປະທະກັນ ຢູ່ເຂດຕາເວັນອອກກາງ, ລາຄາພະລັງງານ ເພີ່ມຂຶ້ນອີກຄັ້ງ, ນະໂຍບາຍດ້ານຕ່າງໆເຊັ່ນ: ພາສີ ແລະ ການຄວບຄຸມ ການສົ່ງອອກເປັນຕົ້ນ ໄດ້ເພີ່ມຄວາມບໍ່ແນ່ນອນ ຫລາຍຂຶ້ນ. ຄາດວ່າ ແຮງກົດດັນ ຈາກໄຟເງິນເຟີ້ໄລຍະສັ້ນ ຈະເພີ່ມຂຶ້ນ ແລະ ຈະຜ່ອນຄາຍລົງ ເທື່ອລະກ້າວ ໃນປີ2027./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
