ຂປລ
ຕາມແຫລ່ງຂ່າວຈາກ ສະຖານທູດ ຍີ່ປຸ່ນ ແລະ ສະຖານທູດ ສ.ເກົາຫລີ ປະຈຳ ຫວຽດນາມ ເປີດເຜີຍວ່າ: ລັດຖະບານ ສອງປະເທດນີ້ ໄດ້ຕົກລົງ ເຫັນດີ ໃຫ້ການຊ່ວຍເຫລືອ ທາງດ້ານສິນຄ້າ, ເຄື່ອງອຸປະກອນສຸກ ເສີນ ໃຫ້ແກ່ ລັດຖະບານ ຫວຽດນາມ ເພື່ອແກ້ໄຂ ຜົນຮ້າຍ ຢ້ອນຫລັງ ຈາກພາຍຸ ຢາກິ(Yagi)
ຂປລ.ວິທະຍຸ ກະຈາຍສຽງ ຫວຽດນາມ, ວັນທີ 12 ກັນຍາ, ຕາມແຫລ່ງຂ່າວຈາກ ສະຖານທູດ ຍີ່ປຸ່ນ ແລະ ສະຖານທູດ ສ.ເກົາຫລີ ປະຈຳ ຫວຽດນາມ ເປີດເຜີຍວ່າ: ລັດຖະບານ ສອງປະເທດນີ້ ໄດ້ຕົກລົງ ເຫັນດີ ໃຫ້ການຊ່ວຍເຫລືອ ທາງດ້ານສິນຄ້າ, ເຄື່ອງອຸປະກອນ ສຸກເສີນ ໃຫ້ແກ່ ລັດຖະບານ ຫວຽດນາມ ເພື່ອແກ້ໄຂ ຜົນຮ້າຍ ຢ້ອນຫລັງ ຈາກພາຍຸ ຢາກິ(Yagi) ກໍ່ຂຶ້ນຢູ່ ບັນດາແຂວງ, ນະຄອນ ພາກເໜືອ. ເຄື່ອງຊ່ວຍເຫລືອສຸກເສີນ ຈະໄດ້ສົ່ງ ຜ່ານອົງການ ຮ່ວມມື ສາກົນ ຍີ່ປຸ່ນ (JICA). ລັດຖະບານ ສ.ເກົາຫລີ ໄດ້ຕົກລົງສະໜອງ ເຄື່ອງຊ່ວຍເຫລືອ ມະນຸດສະທຳ ໃຫ້ແກ່ ສສ ຫວຽດນາມ ລວມມູນຄ່າ 2 ລ້ານໂດລາສະຫະລັດ. ທ່ານ ນາງ Pauline Tamesis ຜູ້ປະສານງານ ອົງການ ສປຊ ປະຈຳ ສສ ຫວຽດນາມ, ບັນດາອົງການຮັບຜິດຊອບ ແຕ່ລະຂົງເຂດ ສະເພາະ ຈະໃຫ້ການຊ່ວຍເຫລືອໃນແຕ່ລະບັນຫາ ລະອຽດ ເຊັ່ນ ກອງທຶນ ເພື່ອເດັກສາກົນ (UNICEF) ຈະຊ່ວຍເຫລືອ ໃນບັນຫາກ່ຽວກັບເດັກ, ອົງການ ສາທາລະນະສຸກ ຈະໃຫ້ການຊ່ວຍເຫລືອ ກ່ຽວກັບ ຢາປິ່ນປົວພະຍາດ.ຂະນະທີ່ ບັນດາອົງການຈັດຕັ້ງ ສາກົນ ໂດຍສະເພາະ ອົງການຮ່ວມມື ສາກົນ ຍີ່ປຸ່ນ (JICA), ອົງການ ອາຫານ ແລະ ການກະເສດ ສປຊ (FAO), ອົງການຮ່ວມມື ພັດທະນາ ເຢຍລະມັນ, ອົງການພັດທະນາ ສາກົນຂອງ ສ.ອາເມລິກາ, ສະຖານທູດ ບັນດາປະເທດ ອັງກິດ, ສະວິດ, ການາດາ, ຍີ່ປຸ່ນ, ອົດສະຕຣາລີ ໄດ້ໃຫ້ ຄຳໝັ້ນສັນຍາ ໃຫ້ການຊ່ວຍເຫລືອ ເຊັ່ນດຽວກັນ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
