ຂປລ
ບັນດາ 10 ປະເທດສະມາຊິກອາຊຽນມີຮີດຄອງປະເພນີ ແລະວິຖີການດໍາລົງຊີວິດຄ້າຍຄືກັນສະຫນິດແຫນ້ນແຕ່ບູຮານນາການ.
*ບັນດາ 10 ປະເທດສະມາຊິກອາຊຽນມີຮີດຄອງປະເພນີ ແລະວິຖີການດໍາລົງຊີວິດຄ້າຍຄືກັນສະຫນິດແຫນ້ນແຕ່ບູຮານນາການ. ສະນັ້ນ, ບໍ່ວ່າຈະເປັນການຈັດງານບຸນ, ການນຸ່ງຖື, ການກິນຢູ່ ແລະ ເທສະການສໍາຄັນມັກຈະແດງອອກຄ້າຍກັນ.
ອີງຕາມການລາຍງານຂອງອີງຕາມການລາຍງານຂອງ ASEAN Main Portal ໃນຫົວຂໍ້: “ມື້ພັກລັດຖະການຂອງປະເທດສະມາຊິກອາຊຽນ ປີ 2024” ພົບວ່າ: ໃນປີ 2024 ປະເທດອິນໂດເນເຊຍຄືປະເທດທີ່ມີມື້ພັກລັດຖະການສູງທີ່ສຸດໃນພູມມີພາກດ້ວຍຈຳນວນ 27 ວັນ, ໃນຂະນະທີ່ ສປປ ລາວ ແມ່ນມີມື້ພັກລັດຖະການພຽງແຕ່ 9 ວັນເທົ່ານັ້ນ ເຊິ່ງໜ້ອຍທີ່ສຸດໃນອາຊຽນ.
ໃນນັ້ນ 10 ອັນດັບມີດັ່ງນີ້: 1. ປະເທດອິນໂດເນເຊຍ 27 ວັນ, 2. ປະເທດກຳປູເຈຍ 22 ວັນ, 3. ປະເທດມຽນມາ 19 ວັນ, ປະເທດຟິລິບປິນ 18 ວັນ, 5. ປະເທດໄທ 18 ວັນ, 6. ປະເທດບຣູໄນ 16 ວັນ, 7. ປະເທດມາເລເຊຍ 16 ວັນ, 8. ປະເທດຫວຽດນາມ 15 ວັນ, 9. ປະເທດສິງກະໂປ 11 ວັນ ແລະ 10. ປະເທດລາວ 9 ວັນ. ໂດຍສະເພາະປະເທດອິນໂດເນເຊຍໂດຍຂໍ້ມູນດັ່ງກ່າວ, ສະແດງໃຫ້ເຫັນເຖິງຄວາມຫລາກຫລາຍ ຂອງວັດທະນະທຳ ແລະ ສາສະໜາຂອງປະເທດ ເຊິ່ງໄດ້ມີບຸນປະເພນີ ແລະ ວັນສຳຄັນຕ່າງໆ ໃຫ້ສະເຫລີມສະຫລອງ. ໃນຂະນະດຽວກັນ, ວັນພັກລັດຖະການທີ່ໜ້ອຍກວ່າຂອງປະເທດລາວເຮົາ ກໍໄດ້ສະແດງໃຫ້ເຫັນເຖິງການກຳນົດ, ຈັດສັນວັນພັກໃຫ້ສອດຄ່ອງກັບສະພາບສັງຄົມ, ເສດຖະກິດ ແລະ ວັດທະນະທຳ ທີ່ແຕກຕ່າງກັນຂອງບັນດາປະເທດສະມາຊິກອາຊຽນ.
ແຕ່ເຖິງແນວໃດກໍດີ ປະເທດທີ່ມີວັນພັກຫລາຍກວ່າຊາດອື່ນໆ ຊໍ້າພັດມີຕົວເລກການຂະຫຍາຍຕົວເສດຖະກິດຂ້ອນຂ້າງດີ ແລະ ມີການຈັບຈ່າຍໃຊ້ດີເຮັດໃຫ້ເສດຖະກິດມີການຂັບເຄື່ອນໄດ້ໄວ ໂດຍສະເພາະພາກອຸດສາຫະກໍາທ່ອງທ່ຽວ. ສະເພາະ ສປປ ລາວ, ໄທ, ຫວຽດນາມ, ກໍາປູເຈຍເຫັນວ່າການພັກໄລຍະປີໃໝ່ຂອງເຂົາເຈົ້າຈະໃຊ້ເວລາແກ່ຍາວກວ່າວັນພັກອື່ນໆ ເຊິ່ງໄລຍະນັ້ນ ເສດຖະກິດທ່ອງທ່ຽວມີການເໜັງຕີງດີທີ່ສຸດ.
ໂດຍ:ເກີດຂວັນໃຈ ມາລີຈັນສີ.
KPL
