*3 ໂຄງການກໍ່ສ້າງເສັ້ນທາງລົດໄຟ (ເສັ້ນທາງໄຟລາວ-ຈີນ, ເສັ້ນທາງລົດໄຟ ລາວ-ໄທ ແລະ ເສັ້ນທາງລົດໄຟລາວ-ຫວຽດນາມ) ປ່ຽນປະຫວັດສາດຂອງ ສປປ ລາວ ຈາກປະເທດບໍ່ມີຊາຍແດນຕິດຈອດກັບທະເລກາຍເປັນປະເທດເຊື່ອມໂຍງເຊື່ອມຈອດກັບພາກພື້ນ-ສາກົນ ແລະ ເປັນສູນກາງທາງຜ່ານຂອງອາຊຽນທີ່ໜ້າສົນໃຈຂອງປະຊາຄົມໂລກ. ສປປ ລາວ ມີປະຊາກອນຫລາຍກວ່າ 7 ລ້ານຄົນ, ເສດຖະກິດສ່ວນໃຫຍ່ແມ່ນອາໃສພາກອຸດສາຫະກໍາພະລັງງານ-ບໍ່ແຮ່, ທ່ອງທ່ຽວ, ກະສິກໍາ ແລະ ອື່ນໆເພື່ອຂັບເຄື່ອນການພັດທະນາເສດຖະກິດ-ສັງຄົມ, ການສ້າງວຽກເຮັດງານທໍາ ແລະ ແກ້ໄຂຄວາມທຸກຍາກ ດັ່ງທີ່ຮູ້ນໍາກັນໃນຊຸມປີ 2018- 2019 ຜ່ານມານັ້ນລັດຖະບານໄດ້ລາຍງານວ່າພາກອຸດສາຫະກໍາ ທ່ອງທ່ຽວເປັນໜຶ່ງໃນຍຸດທະສາດສໍາຄັນຂອງປະເທດ ເຊິ່ງສາມາດສ້າງລາຍຮັບເຂົ້າປະເທດເປັນອັນດັບຕ້ົນໆຮອງຈາກຂະແໜງພະລັງງານ-ບໍ່ແຮ່ ໃນນັ້ນມີນັກທ່ອງທ່ຽວຕ່າງປະເທດເຂົ້າມາລາວເກືອບ 5 ລ້ານຄົນ, ສ້າງລາຍຮັບເຂົ້າປະເທດເກືອບ 700 ລ້ານໂດລາສະຫະລັດ.

   ດ້ວຍເຫດນັ້ນພາຍຫລັງ ເສັ້ນທາງລົດໄຟລາວ-ຈີນ ໄດ້ເປີດໃຫ້ບໍລິການໃນທ້າຍປີ 2021 ເຫັນໄດ້ຈະແຈ້ງວ່າມີນັກທ່ອງທ່ຽວເດີນທາງເຂົ້າ-ອອກ ເພີ່ມຂຶ້ນແບບກ້າວກະໂດດ ນອກຈາກນັ້ນການຂົນສົ່ງສິນຄ້າ ແລະ ທຸກລະບົບເສັ້ນທາງຕິດພັນກັບພາກບໍລິການອ່ືນໆກໍຂະຫຍາຍຕົວຢ່າງວ່ອງໄວຍ້ອນວ່າການເດີນທາງ ແລະ ຂົນສິນຄ້າດ້ວຍລົດໄຟນັ້ນມີຄວາມສະດວກສະບາຍກວ່າ, ປະຢັດເງິນກວ່າ, ປະຢັດເວລາກວ່າ, ບັນທຸກໄດ້ຫລາຍກວ່າ ແລະ ມີຄວາມປອດໄພສູງກວ່າ. ເສັ້ນທາງລົດໄຟລາວ-ຈີນ ໄດ້ຮັບການຕີລາຄາ ແລະ ຮັບຮູ້ຈະແຈ້ງວ່າເປັນໂຄງການຕົວແບບດີເດັ່ນທໍາອິດ ໃນການພັດທະນາເສັ້ນທາງລົດໄຟຄວາມໄວປານກາງ-ຄວາມໄວສູງໃນ ສປປ ລາວ ລວມທັງອາຊຽນ ສະນັ້ນການພັດທະນາເສັ້ນທາງລົດໄຟຫວ່າງປະເທດ ໄດ້ສ້າງຄວາມຕື່ນຕົວໃນລະດັບພາກພື້ນ ແລະ ສາກົນເປັນຂະບວນຟົດຟື້ນເຊິ່ງສອດຄ່ອງກັບນະໂຍບາຍຂອງພັກ- ລັດຖະບານລາວ ໃນສົ່ງເສີມການພັດທະນາສີຂຽວລວມທັງອາຊຽນອີກດ້ວຍ.ຫລ້າສຸດໃນວັນທີ 20 ກໍລະກົດ 2024 ນີ້ ລັດຖະບານລາວ-ໄທ ກໍໄດ້ຮ່ວມກັນຈັດພິທີເປີດແລ່ນລົດໄຟຂົນສົ່ງຜູ້ໂດຍສານຂ້າມຊາຍແດນລະຫວ່າງ ລາວ-ໄທ ທີ່ສະຖານີລົດໄພບ້ານ ຄໍາສະຫວາດ ເມືອງໄຊເສດຖາ ນະຄອນຫລວງວຽງຈັນ ໄປເຖິນະຄອນຫລວງບາງກອກຂອງໄທ.

    ທ່ານ ຫີນເພັດ ຫລ້າຄອນວົງ ຮອງຫົວໜ້າກົມທາງລົດໄຟ ກະຊວງໂຍທາທິການ ແລະ ຂົນສົ່ງລາຍງານວ່າ: ພິທີເປີດແລ່ນລົດໄຟຂົນສົ່ງຜູ້ໂດຍສານລາວ-ໄທ ແຕ່ບ້ານຄໍາສະຫວາດ ນະຄອນຫລວງວຽງຈັນ ຫາ ບາງກອກສະຖານີກຸງເທບອະພິວັດ, ເປັນໂຄງການກໍ່ສ້າງເສັ້ນທາງລົດໄຟ ລາວ-ໄທ ທ່ານາແລ້ງ-ຄໍາສະຫວາດ ແມ່ນໄດ້ຮັບການສະໜັບສະໜູນຊ່ວຍເຫລືອທາງດ້ານງົບປະມານໃຫ້ແກ່ ສປປ ລາວ ຈາກ ລັດຖະບານໄທຜ່ານອົງການ NEDA ຊຶ່ງນອນໃນແຜນຍຸດທະສາດການພັດທະນາເສ້ັນທາງລົດໄຟ ເຊ່ືອມຕ່ໍລາວ- ໄທ ຂອງກະຊວງໂຍທາທິການ ແລະ ຂົນສົ່ງ, ທັງເປັນການຊ່ວຍເຫລືອທີ່ມີຄວາມໝາຍຄວາມສຳຄັນ ແລະ ຈະດຶງດູດນັກທ່ອງທ່ຽວເຂົ້າມາທ່ຽວ ສປປ ລາວ ໃຫ້ຫລາຍຂຶ້ນທັງເປັນການພັດທະນາໂຄງລ່າງພື້ນຖານ ຂອງ ສປປ ລາວ, ໂຄງການນີ້ແມ່ນໃຊ້ງົບປະມານທັງໝົດ 1.650.000.000 ບາດ (ສະກຸນເງິນໄທ), ໃນນີ້ເປັນເງິນກູ້ 70% ແລະ ຊວ່ຍເຫລືອ 30 %.

    ລົດໄຟຂົນສົ່ງຜູ້ໂດຍສານ ລາວ-ໄທ ແມ່ນໜຶ່ງໃນບັນດາໂຄງການຮ່ວມມືຂອງສອງລັດຖະບານ ລາວ ແລະ ໄທ ໃນການສ້າງເງື່ອນໄຂອໍານວຍຄວາມສະດວກໃຫ້ແກ່ການສັນຈອນ ໄປ-ມາຫາສູ່ກັນຂອງປະຊາຊົນສອງຊາດ ລາວ-ໄທ ແລະ ການຂົນສົ່ງລະຫວ່າງ ປະເທດເພື່ອສົ່ງເສີມດ້ານການຄ້າ- ການລົງທຶນ ແລະ ທ່ອງທ່ຽວກໍຄືການນໍາໃຊ້ທີ່ຕັ້ງຍຸດທະສາດອັນສໍາຄັນຂອງສອງປະເທດຢູ່ອະນຸພາກພື້ນລຸ່ມແມ່ນໍ້າຂອງ ແລະ ອາຊີຕາເວັນອອກ-ສ່ຽງໃຕ້ໃນການເຊື່ອມໂຍງ-ເຊື່ອມຈອດພື້ນ ຖານໂຄງລ່າງຕາມແລວເສດຖະກິດຕາເວັນອອກ-ຕາເວັນຕົກ, ເໜືອ-ໃຕ້.

    ແຕ່ເຖິງແນວໃດກໍດີ ສປປ ລາວ ແລະ ສສ ຫວຽດນາມ ກໍເຫັນຄວາມສໍາຄັນໃນໂຄງການພັດທະນາເສັ້ນທາງລົດໄຟເຊື່ອມຕໍ່ເຊັ່ນກັນເມື່ອບໍລິສັດ ປີໂຕລຽມເທດດິ້ງ ລາວມະຫາຊົນ, ຕາງຝ່າຍລາວໄດ້ປະກາດວ່າໂຄງການກໍ່ສ້າງທາງລົດໄຟ ລາວ-ຫວຽດນາມ ທີ່ເຊື່ອມຕໍ່ແຕ່ນະຄອນຫລວງວຽງຈັນ ໄປຫາທ່າເຮືອຫວຸ້ງອ່າງແຂວງຮາຕິງ, ສສ ຫວຽດນາມ ພວມດໍາເນີນການສຶກສາສໍາຫລວດ ແລະ ຊອກຫາແຫລ່ງທຶນເພື່ອກ້າວໄປການຈັດຕັ້ງປະຕິບັດ ແລະ ດຳເນີນການກ່ໍສ້າງຢ່າງເປັນທາງການໃນອະນາຄົດ, ຄາດວ່າຖ້າໂຄງການເສັ້ນທາງລົດໄຟລາວ-ຫວຽດນາມ ເກີດຂຶ້ນແທ້ອາດຈະໃຊ້ງົບປະມານລົງທຶນ 4-5 ຕື້ໂດລາ.

    ລາວ-ຫວຽດນາມ ເກີດຂຶ້ນແທ້ອາດຈະໃຊ້ງົບປະມານລົງທຶນ 4-5 ຕື້ໂດລາ.ໂດຍຄາດການໄລຍະທຳອິດໃນການກໍ່ສ້າງແມ່ນຈະເລີ່ມກ່ໍສ້າງໃນສ່ວນ ຂອງຊາຍແດນຫວຽດນາມ ຫາ ເມືອງທ່າແຂກ ແຂວງຄຳມ່ວນ ດ້ວຍໄລຍະທາງ 139.18 ກິໂລແມັດ ເຊິ່ງຄາດວ່າຈະມີການນຳທຶນຈາກສະຖາບັນການເງິນສາກົນມາກໍ່ສ້າງໃນພາກສ່ວນນີ້, ໄລຍະທາງລວມທັງໝົດແຕ່ນະຄອນຫລວງວຽງຈັນ ສປປ ລາວ ໄປຫາທ່າເຮືອຫວຸ້ງອ່າງ ແຂວງຮາຕິງ  ສສ  ຫວຽດນາມ ປະມານ  544 ກິໂລແມັດ. ເສັ້ນທາງລົດໄຟລາວ-ຫວຽດນາມ ດັ່ງກ່າວເປັນສ່ວນໜຶ່ງຂອງໂຄງການ Lao Logistics Link (LLL) ເຊິ່ງບໍລິສັດ ປີໂຕລຽມເທດດິ້ງລາວມະຫາຊົນ ໄດ້ຮັບໄຟຂຽວເປັນຄູ່ຮ່ວມມືກັບລັດຖະບານລາວ ແລະ ຫວຽດນາມ ເພື່ອພັດທະນາ ແລະ ດຳເນີນທຸລະກິດ. ການພັດທະນາໂຄງສ້າງທາງລົງໄຟ ລາວ-ຫວຽດນາມ ແມ່ນໜຶ່ງໃນການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ-ລັດ ໃນການບັນລຸວິໄສທັດຂອງລັດຖະບານລາວ ແລະ ຍຸດທະສາດການພັດທະນາປະເທດຊາດ ວ່າດ້ວຍການຫັນປ່ຽນລາວທີ່ບໍ່ມີຊາຍແດນຕິດກັບທະເລກາຍເປັນປະເທດເຊື່ອມໂຍງ-ເຊື່ອມຈອດທາງບົກແນໃສ່ການ ສ້າງຜົນປະໂຫຍດສູງສຸດທາງດ້ານເສດຖະກິດ-ສັງຄົມ ໃຫ້ແກ່ສອງປະເທດໃນການຈັດຕັ້ງປະຕິບັດໂຄງການ.

ໂດຍ: ເກີດຂວັນໃຈ ມາລີຈັນສີ

KPL