ຂປລ
ຂປລ. ແຫລ່ງຂ່າວຈາກ ແຂວງໄຊສົມບູນ ໃຫ້ຮູ້ວ່າ: ສະພາແຫ່ງຊາດ ຈັດຝຶກອົບຮົມສ້າງຄວາມເຂັ້ມແຂງ ໃຫ້ສະມາຊິກສະພາປະຊາຊົນແຂວງ ແລະ ພະນັກງານ ຂອງສະພາປະຊາຊົນ ແຂວງໄຊສົມບູນ ໃນທ້າຍອາທິດຜ່ານມາ
ຂປລ. ແຫລ່ງຂ່າວຈາກ ແຂວງໄຊສົມບູນ ໃຫ້ຮູ້ວ່າ: ສະພາແຫ່ງຊາດ ຈັດຝຶກອົບຮົມສ້າງຄວາມເຂັ້ມແຂງ ໃຫ້ສະມາຊິກສະພາປະຊາຊົນແຂວງ ແລະ ພະນັກງານ ຂອງສະພາປະຊາຊົນ ແຂວງໄຊສົມບູນ ໃນທ້າຍອາທິດຜ່ານມາ ທີ່ເມືອງລ້ອງຊານ ແຂວງໄຊສົມບູນ ໂດຍການເປັນປະທານຂອງທ່ານ ຄໍາພູທອນ ວົງພະຈັນ ຮອງປະທານສະພາປະຊາຊົນ ແຂວງໄຊສົມບູນ, ທ່ານ ຄໍາສິງ ໄຊສົມແພງ ຮອງປະທານກຳມະທິການ ວຽກງານສະພາປະຊາຊົນ ສະພາແຫ່ງຊາດ ພ້ອມດ້ວຍວິທະຍາກອນ ຈາກສະພາແຫ່ງຊາດ ແລະ ສໍາມະນາກອນ ຈາກສະພາປະຊາຊົນແຂວງ ເຂົ້າຮ່ວມ. ທ່ານ ຄໍາພູທອນ ວົງພະຈັນ ໄດ້ເນັ້ນໃຫ້ສໍາມະນາກອນ ຈົ່ງພ້ອມກັນເອົາໃຈໃສ່ຮັບຟັງການບັນຍາຍເອກະສານ ພ້ອມທັງສຸມໃສ່ການຄົ້ນຄວ້າປະກອບຄໍາຄິດຄໍາເຫັນ ເພື່ອໃຫ້ຕົນເອງມີຄວາມເຂົ້າໃຈຈະແຈ້ງ ຕໍ່ແຕ່ລະເນື້ອໃນເອກະສານ ແລະ ສາມາດນໍາໄປໝູນໃຊ້ເຂົ້າໃນວຽກງານ ໃຫ້ເກີດປະໂຫຍດສູງສຸດ. ການຝຶກອົບຮົມໃນຄັ້ງນີ້ ສໍາມະນາກອນຈະໄດ້ຮຽນຮູ້ກ່ຽວກັບຄວາມໝາຍ, ຄວາມສໍາຄັນຂອງການປະກອບຄໍາຄິດຄໍາເຫັນ ແລະ ການຊັກຖາມ ໃນກອງປະຊຸມສະພາ, ບັນຫາກ່ຽວກັບການສົນທະນາ, ທັກສະ ແລະ ພຶດຕິກຳຕົວຈິງໃນການສົນທະນາ, ການແລກປ່ຽນປະສົບການຂອງຜູ້ແທນສະພາ ກ່ຽວກັບການລົງໃກ້ຊິດຕິດແທດ ກັບຜູ້ມີສິດເລືອກຕັ້ງ, ທັກສະການຕົກລົງງົບປະມານແຫ່ງລັດ ແລະ ທັກສະໃນການຕິດຕາມກວດກາງົບປະມານແຫ່ງລັດ. ພ້ອມກັນນີ້, ນັກວິທະຍາກອນ ແລະ ສໍາມະນາກອນ ຍັງໄດ້ພ້ອມກັນປະກອບຄໍາຄິດຄໍາເຫັນແລກປ່ຽນບົດຮຽນເຊິ່ງກັນ ແລະ ກັນ ເພື່ອຮັບປະກັນໃຫ້ສໍາມະນາກອນ ມີຄວາມເຂົ້າໃຈຢ່າງເລິກເຊິ່ງ ເປັນຕົ້ນ ເຂົ້າໃຈຕໍ່ພາລະບົດບາດຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ເປັນເຈົ້າການຈັດຕັ້ງປະຕິບັດ ພາລະບົດບາດຂອງຕົນ ຕາມທີ່ໄດ້ກຳນົດໄວ້ໃນກົດໝາຍ ແລະ ນິຕິກຳທີ່ກ່ຽວຂ້ອງ ກໍຄືການເປັນອົງການຕົວແທນແຫ່ງສິດ ແລະ ຜົນປະໂຫຍດ ຂອງປະຊາຊົນລາວບັນດາເຜົ່າ ໃຫ້ມີຄຸນນະພາບ ແລະ ປະສິດທິຜົນສູງຂຶ້ນ.
ຂ່າວ: ພາພອນ ນະວົງໄຊ
KPL
