ຂປລ. ກອງປະຊຸມທາບທາມຮ່າງກົດໝາຍ ວ່າດ້ວຍອົງການໄອຍະການປະຊາຊົນ ສະບັບປັບປຸງ ຈັດຂຶ້ນໃນລະຫວ່າງວັນທີ 15-16 ພຶດສະພາ 2024 ທີ່ແຂວງວຽງຈັນ ພາຍໃຕ້ການເປັນປະທານຂອງ ທ່ານ ນາງ​ ພອນເພັດ ອຸ່ນແກ້ວ​ ຮອງຫົວໜ້າອົງການ ໄອຍະການປະຊາຊົນສູງສຸດ, ມີບັນດາທ່ານຜູ້ຕາງໜ້າຈາກ ອົງການໄອຍະການປະຊາຊົນພາກກາງ, ສານປະຊາຊົນພາກກາງ, ຜູ້ຕາງໜ້າຈາກ ສະພາປະຊາຊົນທ້ອງຖິ່ນ ແລະ ພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້, ເປັນການຈັດຕັ້ງຜັນຂະຫຍາຍມະຕິ ຂອງຄະນະບໍລິຫານງານສູນກາງພັກ ວ່າດ້ວຍການຍົກສູງ ປະສິດທິພາບໃນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ສະບັບເລກທີ 037/ຄບສພ, ລົງວັນທີ 18 ມິຖຸນາ 2018, ມະຕິສະບັບເລກທີ 112/ກມສພ ວ່າດ້ວຍການຍົກສູງຄຸນນະພາບ ການດໍາເນີນຄະດີຕາມຂະບວນຍຸຕິທໍາ ແລະ ມະຕິຂອງກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາຜົນປະເມີນ ການຈັດຕັ້ງປະຕິບັດກົດໝາຍຂົງເຂດຍຸຕິທໍາ 4 ສະບັບ ສະບັບເລກທີ 98/ສພຊ, ລົງວັນທີ 18 ກໍລະກົດ 2023. ດັ່ງນັ້ນ ອົງການໄອຍະການປະຊາຊົນສູງສຸດ ຈຶ່ງໄດ້ສ້າງ ແຜນການຄົ້ນຄວ້າ ແລະ ປັບປຸງກົດໝາຍວ່າດ້ວຍອົງການ ໄອຍະການປະຊາຊົນ ສະບັບເລກທີ 244/ສຝຄ, ລົງວັນທີ 8 ທັນວາ 2023 ແລະ ອອກຂໍ້ຕົກລົງ ຂອງຫົວໜ້າອົງການ ໄອຍະການ ປະຊາຊົນສູງສຸດ ວ່າດ້ວຍການແຕ່ງຕັ້ງຄະນະຮັບຜິດຊອບ ປັບປຸງກົດໝາຍວ່າດ້ວຍອົງການໄອຍະການປະຊາຊົນ ສະບັບເລກທີ 1075/ອອປສ, ລົງວັນທີ 19 ທັນວາ 2023. ຊຶ່ງມີແຜນຈະເອົາຮ່າງກົດໝາຍສະບັບດັ່ງກ່າວ ເຂົ້າພິຈາລະນາ ແລະ ຮັບຮອງໃນກອງປະຊຸມ ສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໃນທ້າຍປີ 2024 ນີ້.

ໂອກາດນີ້, ຜູ້ແທນກອງປະຊຸມ ໄດ້ພ້ອມກັນເອົາໃຈໃສ່ຄົ້ນຄວ້າ, ປະກອບຄຳເຫັນ ແລະ ປຶກສາຫາລືກັນ ຢ່າງກວ້າງຂວາງ ແລະ ກົງໄປກົງມາ ຢ່າງມີປະສິດທິຜົນ ໂດຍໄດ້ຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ, ບັນຫາທີ່ບໍ່ສອດຄ່ອງ, ເປັນຊ່ອງວ່າງ, ມີຜົນກະທົບ ຫລື ບໍ່ສາມາດຈັດຕັ້ງປະຕິບັດໄດ້, ບັນດາປະເດັນເຈາະຈີ້ມ ເຊັ່ນ: ລະບົບການຈັດຕັ້ງຂອງອົງການ ໄອຍະການປະຊາຊົນ; ພາລະບົດບາດໃນການຕິດຕາມກວດກາ ການປະຕິບັດກົດໝາຍ (ການຕິດຕາມກວດກາທົ່ວໄປ), ກໍານົດການສັ່ງຟ້ອງຜູ້ຖືກຫາຂຶ້ນສານ, ການຕິດຕາມ ກວດກາການດໍາເນີນຄະດີແພ່ງ, ການຕິດຕາມກວດກາ ການດຳເນີນຄະດີປົກຄອງ ແລະ ບັນຫາອື່ນໆ. ບັນດາຄໍາຄິດຄໍາເຫັນດັ່ງກ່າວ ໄດ້ມີຄວາມສໍາຄັນ ແລະ ເປັນປະໂຫຍດຢ່າງຍິ່ງ ໃຫ້ແກ່ການປັບປຸງຮ່າງກົດໝາຍດັ່ງກ່າວ ເຮັດໃຫ້ມີຄວາມຄົບຖ້ວນ, ສົມບູນ ແລະ ຮອບດ້ານຂຶ້ນກວ່າເກົ່າ, ສອດຄ່ອງກັບສະພາບຕົວຈິງ ຂອງການຂະຫຍາຍຕົວ ທາງດ້ານເສດຖະກິດ-ສັງຄົມ, ເປັນເຄື່ອງມືອັນສໍາຄັນ ໃນການປົກຄອງລັດ-ຄຸ້ມຄອງສັງຄົມ ໃຫ້ເປັນລະບົບກົມກຽວ, ລວມສູນຖືກຕ້ອງຍຸຕິທຳ, ເປັນເອກະພາບ ແລະ ມີປະສິດທິຜົນ ເຮັດໃຫ້ສັງຄົມມີຄວາມເປັນ ລະບຽບຮຽບຮ້ອຍ ແລະ ສີວິໄລ ຢ່າງບໍ່ຢຸດຢັ້ງ.

ຂ່າວ: ຈະເລີນສິນ

KPL