ຂປລ
ຂປລ. ພິທີເຊັນບົດບັນທຶກຄວາມເຂົ້າໃຈ ວ່າດ້ວຍການຮ່ວມມືເພື່ອສຶກສາ, ອອກແບບ ແລະ ພັດທະນາລະບົບທັນສະໄໝ ນໍາໃຊ້ເຂົ້າໃນການບໍລິຫານວຽກງານ ຫ້ອງວ່າການສຳນັກງານນາຍົກລັດຖະມົນຕີ ແລະ ວຽກລັດຖະບານ ລະຫວ່າງ ຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ແລະ ບໍລິສັດ ເອໄອດີຊີ ເທັກ ຈໍາກັດຜູ້ດຽວ ໄດ້ຈັດຂຶ້ນໃນວັນທີ 24 ຕຸລາ 2024 ຜ່ານມາ
ຂປລ. ພິທີເຊັນບົດບັນທຶກຄວາມເຂົ້າໃຈ ວ່າດ້ວຍການຮ່ວມມືເພື່ອສຶກສາ, ອອກແບບ ແລະ ພັດທະນາລະບົບທັນສະໄໝ ນໍາໃຊ້ເຂົ້າໃນການບໍລິຫານວຽກງານ ຫ້ອງວ່າການສຳນັກງານນາຍົກລັດຖະມົນຕີ ແລະ ວຽກລັດຖະບານ ລະຫວ່າງ ຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ແລະ ບໍລິສັດ ເອໄອດີຊີ ເທັກ ຈໍາກັດຜູ້ດຽວ ໄດ້ຈັດຂຶ້ນໃນວັນທີ 24 ຕຸລາ 2024 ຜ່ານມາ ຕາງໜ້າເຊັນບົດບັນທຶນໂດຍ ທ່ານ ສົມກຽດ ພະສີ ຮອງລັດຖະມົນຕີ, ຮອງຫົວໜ້າ ຫສນຍ ແລະ ທ່ານ ພຶດສະພາ ພູມມະສັກ ປະທານບໍລິສັດ ເອໄອດີຊີ ເທັກ ຈຳກັດຜູ້ດຽວ ໂດຍມີ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມເປັນສັກຂີພິຍານ.
ການເຊັນບົດບັນທຶກຄວາມເຂົ້າໃຈຄັ້ງນີ້, ເພື່ອຕອບສະໜອງຄວາມຮຽກຮ້ອງຕ້ອງການ ຂອງວຽກງານ ແລະ ຈັດຕັ້ງປະຕິບັດ ນະໂຍບາຍຂອງລັດຖະບານ ກ່ຽວກັບການຫັນເປັນດີຈິຕອນ ໂດຍສະເພາະ ການເພີ່ມປະສິດທິພາບ ແລະ ປະສິດທິຜົນ ໃນການບໍລິຫານວຽກງານຂອງ ຫສນຍ ໃຫ້ສູງຂຶ້ນຕາມທິດຫັນເປັນທັນສະໄໝ, ມີຄວາມວ່ອງໄວ, ທັນສະພາບການ, ປອດໄພ, ໂປ່ງໃສ, ກວດສອບໄດ້ ແລະ ສອດຄ່ອງກັບສະພາບ ການພັດທະນາປັດຈຸບັນ.
ຫສນຍ ຈະໄດ້ຮ່ວມກັ ບບໍລິສັດ ເອໄອດີຊີ ເທັກ ຈໍາກັດຜູ້ດຽວ ເພື່ອສຶກສາ, ສຳຫລວດ, ອອກແບບ Software ທີ່ທັນສະໄໝ ເຂົ້າໃນການຈັດຕັ້ງປະຕິບັດ ວຽກງານຂອງຕົນ ເປັນຕົ້ນ ການຄຸ້ມຄອງ ແລະ ຕິດຕາມ ການຈໍລະຈອນເອກະສານ; ການອະນຸມັດເອກະສານແບບອອນລາຍ; ການເກັບມ້ຽນເອກະສານແບບລວມສູນ; ກໍານົດຕົວຊີ້ວັດຕອບກັບ ເອກະສານເພື່ອຕິດຕາມ ແລະ ປະເມີນແບບທັນທີ; ລະບົບແຈ້ງເຕືອນຜູ້ໃຊ້; ການນໍາຂໍ້ມູນທີ່ໄດ້ຈາກເອກະສານມາວິເຄາະ ແລະ ສະແດງຜົນ; ການຈັດການດ້ານຄວາມປອດໄພຂອງລະບົບ; ການສ້າງຖານຂໍ້ມູນຂອງ ຫສນຍ ທີ່ຕິດພັນກັບວຽກງານອົງການປົກ ຄອງທ້ອງຖິ່ນ; ລະບົບໂປຣແກມຄຸ້ມຄອງ ພະນັກງານ-ລັດຖະກອນ, ຄຸ້ມຄອງຊັບສິນຂອງລັດພາຍໃນ ຫສນຍ ແລະ ອື່ນໆ.
ຂ່າວ-ພາບ: ກົມປະຊາສຳພັນ ຫສນຍ
KPL
