ຂປລ. ​ໃນລະຫວ່າງວັນທີ 5-14 ພຶດສະພາ 2024, ທ່ານ ຄໍາມ່ວນ ຊົມສີຫາປັນຍາ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ພ້ອມຄະນະ ໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດໂຄງການເຊົ່າ ແລະ ສໍາປະທານທີ່ດິນຂອງບັນດາ ໂຄງການພັດທະນາແຮ່ທາດ ແລະ ເຂື່ອນໄຟຟ້າ ຢູ່ແຂວງອັດຕະປື, ແຂວງເຊກອງ ແລະ ແຂວງບໍລິຄໍາໄຊ. ທັງນີ້ ກໍເພື່ອຊອກໃຫ້ເຫັນດ້ານດີ ທີ່ຄວນເສີມຂະຫຍາຍ, ດ້ານອ່ອນຂໍ້ຄົງຄ້າງ ທີ່ຈະຕ້ອງຊອກວິທີແກ້ໄຂ ໃນການຈັດຕັ້ງປະຕິບັດໂຄງການ; ເພື່ອຮູ້ເຖິງຜົນປະໂຫຍດທີ່ລັດຖະບານ ຈະໄດ້ຮັບຈາກການເຊົ່າ ແລະ ສຳປະທານທີ່ດິນ ຈາກການຂຸດຄົ້ນແຮ່ທາດ ແລະ ໂຄງການພັດທະນາເຂື່ອນໄຟຟ້າ, ທັງເປັນຂໍ້ມູນພື້ນຖານໃນການສ້າງ ແລະ ປັບປຸງກົດໝາຍວ່າດ້ວຍແຮ່ທາດ ແລະ ກົດໝາຍວ່າດ້ວຍໄຟຟ້າ ທີ່ຈະນຳເຂົ້າພິຈາລະນາໃນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ (ສພຊ) ຊຸດທີ IX, ເປັນຂໍ້ມູນພື້ນຖານ ແລະ ບ່ອນອີງໃນການສັງລວມລາຍງານຕໍ່ ກອງປະຊຸມສະພາແຫ່ງຊາດ, ຄະນະປະຈຳສະພາແຫ່ງຊາດ ຄົ້ນຄວ້າພິຈາລະນາ.

ການລົງເຄື່ອນໄຫວຄັ້ງນີ້, ໄດ້ຈັດກອງປະຊຸມຮ່ວມກັບ ສະພາປະຊາຊົນແຂວງອັດຕະປື, ເຊກອງ ແລະ ບໍລິຄໍາໄຊ ແລະ ພະແນກການທີ່ກ່ຽວຂ້ອງຂອງແຂວງ ຄື: ແຜນການ ແລະ ການລົງທຶນ, ຊັບພະຍາກອນທໍາມະຊາດ ແລະ ສິ່ງແວດລ້ອມ, ພະລັງງານ ແລະ ບໍ່ແຮ່, ກະສິກຳ ແລະ ປ່າໄມ້, ອຸດສາຫະກຳ ແລະ ການຄ້າ, ແລະ ການເງິນ ເພື່ອຮັບຟັງການລາຍງານກ່ຽວກັບ ການຈັດຕັ້ງປະຕິບັດໂຄງການເຊົ່າ ແລະ ສໍາປະທານທີ່ດິນ ຂອງບັນດາໂຄງການພັດທະນາແຮ່ທາດ ແລະ ເຂື່ອນໄຟຟ້າ, ສະພາບການຈັດຕັ້ງປະຕິບັດການລົງ ທຶນດ້ານພະລັງງານ ແລະ ແຮ່ທາດ; ການຫັນປ່ຽນທີ່ດິນປ່າໄມ້, ການຟື້ນຟູປ່າ ແລະ ປູກປ່າທົດແທນຄືນພື້ນທີ່ປ່າໄມ້ທາງທໍາມະຊາດ ແລະ ການຂຶ້ນທະບຽນອອກໃບຕາດິນ; ຜົນກະທົບຕໍ່ສິ່ງແວດລ້ອມ, ທໍາມະຊາດ ແລະ ສັງຄົມ; ການຟື້ນຟູຊີວິດການເປັນຢູ່, ການຊົດເຊີຍຜົນກະທົບໃຫ້ແກ່ປະຊາຊົນ; ການສົ່ງອອກແຮ່ທາດ ລວມທັງການເກັບລາຍຮັບຄ່າເຊົ່າ ແລະ ສໍາປະທານຈາກໂຄງການພັດທະນາ ດ້ານພະລັງງານ ແລະ ບໍ່ແຮ່ ໃນຮູບແບບປົກກະຕິ ແລະ ແບບທົດລອງ ແລະ ວຽກງານອື່ນໆ ຕາມທີ່ໄດ້ກຳນົດໄວ້ໃນມະຕິ ຂອງສະພາແຫ່ງຊາດ ສະບັບເລກທີ 95/ສພຊ, ລົງວັນທີ 18 ກໍລະກົດ 2023 ເພື່ອຊອກໃຫ້ເຫັນດ້ານດີ ທີ່ຄວນເສີມຂະຫຍາຍ ແລະ ດ້ານອ່ອນຂໍ້ຄົງຄ້າງ ທີ່ຕ້ອງໄດ້ຊອກຫາວິທີແກ້ໄຂ ແນໃສ່ເຮັດໃຫ້ການ ຈັດຕັ້ງປະຕິບັດວຽກງານດັ່ງກ່າວ ມີປະສິດທິພາບ ແລະ ປະສິດທິຜົນດີຂຶ້ນ.

​

ໂອກາດ​ນີ້, ທ່ານ ຄໍາມ່ວນ ຊົມສີຫາປັນຍາ ໄດ້ມີຄໍາເຫັນຊີ້ນໍາໃຫ້ພາກສ່ວນກ່ຽວຂ້ອງ ສືບຕໍ່ຈັດຕັ້ງປະຕິບັດວຽກງານ ທີ່ຢູ່ໃນຄວາມຮັບຜິດຊອບຂອງຕົນ ໃຫ້ເຂັ້ມງວດຂຶ້ນຕື່ມ ເປັນຕົ້ນ ໃຫ້ຮີບຮ້ອນປະເມີນຜົນ ການຈັດຕັ້ງປະຕິບັດໂຄງການທົດລອງຂຸດຄົ້ນແຮ່ທາດ ທີ່ກໍາລັງຈັດຕັ້ງປະຕິບັດຢູ່ພາຍໃນແຂວງ ໃຫ້ມີປະສິດທິພາບ, ປະສິດທິຜົນ, ພ້ອມທັງມີມາດຕະການຢ່າງເຂັ້ມງວດ ຕໍ່ໂຄງການທີ່ບໍ່ມີປະສິດທິ ພາບ, ສົ່ງຜົນກະທົບຕໍ່ສິ່ງແວດ ລ້ອມສັງຄົມ ແລະ ທຳມະຊາດ ຄວນໂຈະ ຫລື ຢຸດເຊົາກິດຈະການ, ໂຄງການໃດ ທີ່ມີປະສິດທິຜົນ ຄວນໃຫ້ສືບຕໍ່ຈັດຕັ້ງປະຕິບັດ ໃຫ້ຖືກຕ້ອງຕາມກົດໝາຍ ໂດຍຫັນເຂົ້າສູ່ການດຳເນີນໂຄງການ ໃນຮູບແບບປົກກະຕິ; ການຄົ້ນຄວ້າອະນຸມັດ ໂຄງການຂຸດຄົ້ນແຮ່ທາດ ໃນຕໍ່ໜ້າ ຕ້ອງໃຫ້ສອດຄ່ອງກັບຍຸດທະສາດ ການພັດທະນາ ແຮ່ທາດທີ່ໄດ້ຮັບ ຮອງໃນກອງປະຊຸມ ສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ IX ແລະ ແຈ້ງການຂອງຄະນະເລຂາທິການ ສະພາແຫ່ງຊາດ ກ່ຽວກັບການພິຈາລະນາ ການອະນຸມັດໂຄງ ການຂຸດຄົ້ນແຮ່ທາດ ສະບັບເລກທີ 647/ຄລສ, ລົງວັນທີ 27 ທັນວາ 2023; ເອົາໃຈໃສ່ຄຸ້ມຄອງ, ຕິດຕາມກວດກາບັນດາໂຄງການຊອກຄົ້ນ, ສໍາຫລວດ ແລະ ຂຸດຄົ້ນແຮ່ທາດ ໃຫ້ມີປະສິດທິພາບ, ປະສິດທິຜົນ, ຍືນຍົງ, ປະຢັດ, ນໍາເອົາຜົນປະໂຫຍດມາສູ່ປະເທດຊາດ ແລະ ບໍ່ສົ່ງຜົນກະທົບ ຕໍ່ສິ່ງແວດລ້ອມ ສັງຄົມ ແລະ ທໍາມະຊາດ ເກີນກວ່າມາດຕະຖານກຳນົດໄວ້; ເອົາໃຈໃສ່ຄົ້ນຄວ້າ, ປັບປຸງນະໂຍບາຍ ແລະ ນິຕິກຳ ກ່ຽວກັບການສົ່ງເສີມ ວຽກງານການຟື້ນຟູ ແລະ ປູກໄມ້ທົດແທນ ໂດຍການມີສ່ວນຮ່ວມລະຫວ່າງພາກລັດ, ຜູ້ປະກອບການ ແລະ ປະຊາຊົນ ໃຫ້ມີຄວາມຊັດເຈນ ແລະ ຮັດກຸມ; ສ້າງແຜນຟື້ນຟູປ່າ, ປູກໄມ້ທົດແທນ ແລະ ປົກປັກຮັກສາໃນແຕ່ລະຂົງເຂດ ເພື່ອໃຫ້ສອດຄ່ອງກັບແຜນ ແມ່ບົດຈັດສັນທີ່ດິນແຫ່ງຊາດ ທີ່ກຳນົດໃຫ້ມີເນື້ອທີ່ປ່າປົກຫຸ້ມກວມ 70%; ສຸມໃສ່ຕິດຕາມ, ກວດກາ ແລະ ສັງລວມການປະຕິບັດພັນທະຕ່າງໆ ກ່ຽວກັບວຽກງານຟື້ນຟູປ່າໄມ້ ແລະ ປູກໄມ້ທົດແທນ ຕາມສັນຍາສຳປະທານ, ກົດໝາຍ, ມະຕິສະພາແຫ່ງຊາດ ແລະ ນິຕິກຳອື່ນທີ່ກ່ຽວຂ້ອງ ຂອງບັນດາໂຄງການກໍ່ສ້າງເຂື່ອນໄຟຟ້າ, ບໍ່ແຮ່, ໂຄງລ່າງພື້ນຖານ ທີ່ໄດ້ຮັບອະນຸຍາດຈາກລັດຖະບານ ແລະ ຊຸກຍູ້ສົ່ງເສີ່ມການຜະລິດ, ຫລຸດຜ່ອນການນໍາເຂົ້າພາຍໃນ ທີ່ເປັນບຸລິມະສິດ ແລະ ທ່າແຮງຂອງແຂວງ; ໃຫ້ຮີບຮ້ອນເອົາໃຈໃສ່ກວດກາ, ສຳຫລວດ, ວັດແທກ, ຂຶ້ນທະບຽນອອກໃບຕາດິນຂອງລັດ ໃຫ້ແກ່ໂຄງການເຊົ່າ ແລະ ສໍາປະທານ ເພື່ອເປັນບ່ອນອີງໃຫ້ແກ່ ການເກັບຄ່າເຊົ່າສຳປະທານ ທີ່ດິນຕາມກົດໝາຍ ແລະ ເອົາໃຈໃສ່ເກັບກຳຂໍ້ມູນ ເພື່ອຂຶ້ນທະບຽນອອກໃບຕາດິນ ແລະ ການຈັດສັນທີ່ດິນ ໃຫ້ສຳເລັດ ແລະ ບັນລຸຕາມແຜນການທີ່ວາງໄວ້ ເພື່ອຮັບປະກັນໃຫ້ຊີວິດການ ເປັນຢູ່ຂອງປະຊາຊົນ ໄດ້ຮັບການປັບປຸງ ດີຂຶ້ນກວ່າເກົ່າ, ພ້ອມທັງຮັບປະກັນບໍ່ໃຫ້ມີ ບັນຫາການຮ້ອງຟ້ອງ ຂໍຄວາມເປັນທໍາໃນອະນະຄົດ; ສືບຕໍ່ຜັນຂະຫຍາຍແຜນແມ່ບົດ ຈັດສັນທີ່ດິນແຫ່ງຊາດ ແລະ ແຜນຈັດສັນທີ່ດິນຂອງແຂວງ, ຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມຂັ້ນແຂວງ ໂດຍຕິດພັນກັບ ການຊຸກຍູ້ຢ່າງແຂງແຮງ ໃນການຈັດຕັ້ງຜັນຂະຫຍາຍ ກົດໝາຍວ່າດ້ວຍທີ່ດິນ ໃຫ້ເຂົ້າສູ່ຊີວິດຕົວຈິງຂອງສັງ ຄົມໃຫ້ທົ່ວເຖິງ ແລະ ມີຜົນສັກສິດ; ສືບຕໍ່ຕິດ ຕາມຢ່າງໃກ້ຊິດບັນຫາຜົນກະທົບ ຕໍ່ສິ່ງແວດລ້ອມສັງຄົມ ແລະ ທໍາມະຊາດ ທີ່ອາດຈະເກີດຂຶ້ນ ຈາກໂຄງການພັດທະນາຕ່າງໆ ເປັນຕົ້ນ ໂຄງການພັດທະນາໄຟຟ້າ, ໂຄງການຂຸດຄົ້ນແຮ່ທາດ (ແບບທົດລອງ), ໂຄງການພັດທະນາພື້ນຖານໂຄງລ່າງອື່ນໆ.

ຂ່າວ:  ສຸດສາຄອນ ໄຊທະມາດ

KPL