ຂປລ. ກອງປະຊຸມເປີດກວ້າງ ເພື່ອທາບທາມຮ່າງຂໍ້ຕົກລົງເຈົ້າຄອງນະຄອນຫລວງວຽງຈັນ ວ່າດ້ວຍກອງທຶນຄຸ້ມຄອງໄພພິບັດ ນະຄອນຫລວງວຽງຈັນ(ນວ) ຈັດຂຶ້ນວັນທີ 14 ພຶດສະພາ 2024​ ໂດຍເປັນປະທານຂອງ ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫລວງວຽງຈັນ, ປະທານຄະນະກຳມະການຄຸ້ມຄອງໄພພິບັດ ນວ, ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.    ທ່ານ ພູວົງ ວົງຄຳຊາວ ໄດ້ໃຫ້ຮູ້ວ່າ: ວຽກງານຄຸ້ມຄອງໄພພິບັດ ແມ່ນໜ້າທີ່ຂອງພົນລະເມືອງລາວທຸກຄົນໃນສັງຄົມ ຕ້ອງມີພັນທະໃນການຈໍາກັດ ແລະ ສະກັດກັ້ນໄພພິບັດດ້ວຍການຕິດຕາມ, ລາຍງານສະພາບຄວາມສ່ຽງໄພພິບັດ ແລະ ມີສ່ວນຮ່ວມໃນການກຽມພ້ອມຕອບໂຕ້, ຫລຸດຜ່ອນຄວາມເສຍຫາຍ ລວມທັງໃຫ້ການຊ່ວຍເຫລືອບັນເທົາທຸກ ແລະ ການຟື້ນຟູຫລັງໄພພິບັດ ພ້ອມທັງປະກອບ ສ່ວນເຂົ້າໃນກອງທຶນຄຸ້ມຄອງໄພພິບັດໃຫ້ຫລາຍຂຶ້ນ. ໄລຍະຜ່ານມາ ເຫດການໄພພິບັດທີ່ເກີດຂຶ້ນຢູ່ ນວ             ສ່ວນຫລາຍມີສາເຫດເກີດຈາກຝົນຕົກໜັກເຮັດໃຫ້ນໍ້າຖ້ວມຂັງ, ນໍ້າໄຫລຊຸ, ດິນເຊາະເຈື່ອນ, ລົມພະຍຸພັດ, ໄຟໄໝ້ເຮືອນ, ໄຟໄໝ້ປ່າ ແລະ ອື່ນໆ ອັນໄດ້ສ້າງຜົນກະທົບ ແລະ ຜົນເສຍຫາຍຕໍ່ກັບຊີວິດ, ຊັບສິນຂອງລັດ ແລະ ຂອງປະຊາຊົນບັນດາເຜົ່າໃນ ນວ.  ຄຽງຄູ່ກັນນີ້, ການແກ້ໄຂສຸກເສີນໄລຍະຜ່ານມາ ແມ່ນຍັງມີຄວາມຫຍຸ້ງຍາກສັບສົນ ເນື່ອງຈາກບໍ່ທັນມີກອງທຶນຄຸ້ມຄອງໄພພິບັດ ເຂົ້າໃນການຈັດຕັ້ງປະຕິບັດວຽກງານດັ່ງກ່າວຢ່າງເປັນລະບົບ ເພື່ອຈັດຕັ້ງຜັນຂະຫຍາຍບັນດາກົດໝາຍ, ນິຕິກໍາລຸ່ມກົດ  ໝາຍ ເປັນຕົ້ນ ກົດໝາຍສະບັບເລກທີ 71/ສພຊ ວ່າດ້ວຍການຄຸ້ມຄອງໄພພິບັດ, ດໍາລັດສະບັບເລກທີ 631/ລບ ວ່າດ້ວຍກອງທຶນຄຸ້ມຄອງໄພພິບັດ, ເຈົ້າຄອງ ນວ ຈຶ່ງໄດ້ອອກຂໍ້ຕົກລົງແຕ່ງຕັ້ງຄະນະຮັບຜິດ ຊອບຮ່າງເນື້ອໃນສ້າງຕັ້ງກອງທຶນຄຸ້ມຄອງໄພພິບັດ ນວ.  ມາຮອດປັດຈຸບັນ, ຮ່າງຂໍ້ຕົກລົງດັ່ງກ່າວ, ແມ່ນໄດ້ສໍາເລັດໂດຍພື້ນຖານ ເຊິ່ງປະກອບມີ  8 ໝວດ, 29 ມາດຕາ. ດັ່ງນັ້ນ, ເພື່ອເຮັດໃຫ້ຮ່າງຂໍ້ຕົກລົງສະບັບນີ້ ມີເນື້ອໃນຄົບຖ້ວນສົມບູນ ສອດຄ່ອງຕາມລະບຽບກົດໝາຍ ຈຶ່ງຮຽກຮ້ອງມາຍັງຜູ້ເຂົ້າຮ່ວມ ຈົ່ງພ້ອມກັນປະກອບຄຳຄິດເຫັນແລກປ່ຽນ ເຂົ້າໃນເນື້ອໃນຂອງຮ່າງຂໍ້ຕົກລົງໃຫ້ເລີກເຊິ່ງ.      ຖ້າຮ່າງຂໍ້ຕົກລົງສະບັບນີ້, ໄດ້ຖືກຮັບຮອງ ແລະ ປະກາດໃຊ້ຢ່າງເປັນທາງການ ຈະເຮັດໃຫ້ການຄຸ້ມຄອງລັດ, ຄຸ້ມຄອງສັງຄົມ ໄປຕາມລະບົບກົດໝາຍ ທັງຈະກາຍເປັນເຄື່ອງມືທີ່ສຳຄັນ ໃຫ້ແກ່ນະ ຄອນຫລວງວຽງຈັນ ໃນການຈັດຕັ້ງປະຕິບັດວຽກງານປ້ອງກັນ ແລະ ຄຸ້ມຄອງໄພພິບັດ, ຮັບປະກັນ ໃຫ້ມີງົບປະມານໃນການປ້ອງກັນ ແລະ ການຫລຸດຜ່ອນຄວາມສ່ຽງຈາກໄພພິບັດ ການປະຕິບັດການສຸກເສີນ ເພື່ອສາມາດຊອກຄົ້ນ, ຄົ້ນຫາ ແລະ ກູ້ໄພເອົາຊີວິດ ແລະ ຊັບສິນຂອງລັດ ແລະ ຂອງປະ ຊາຊົນທັນເວລາ, ສາມາດສະໜອງການຊ່ວຍເຫລືອບັນເທົາທຸກແກ່ຜູ້ປະສົບໄພພິບັດ ເຊັ່ນ: ການຊ່ວຍ ເຫລືອສຸກເສີນ ດ້ານທີ່ຢູ່ອາໄສຊົ່ວຄາວ, ອາຫານ, ນໍ້າດື່ມ, ນໍ້າໃຊ້, ການບໍລິການແພດສຸກເສີນ​, ເຄື່ອງນຸ່ງຫົ່ມ, ການສ້າງຕັ້ງສູນບັນຊາການສຸກເສີນບ່ອນເກີດໄພພິບັດ ແລະ ອື່ນໆ.

ແຫລ່ງຂ່າວ: ໜັງສືພິມວຽງຈັນໃໝ່

KPL