ຂປລ
ແຫລ່ງທ່ອງທ່ຽວທຳມະຊາດນໍ້າຕົກຕາດສຽງລື ເມືອງບົວລະພາ ແຂວງຄຳມ່ວນ ໄດ້ຮັບການສຳປະທານແລະພັດທະນາໂດຍກຸ່ມ ບໍລິສັດ ສາຍພູຫລວງ ໃນເນື້ອທ່ີ 33 ເຮັກຕາ, ໃນມູນຄ່າການລົງທຶນທັງໝົດ 12 ລ້ານກວ່າໂດລາສະຫະລັດ ແລະ ມີໄລຍະການສຳປະທານ 40 ປີ ເຊິ່ງເປັນຮູບການລົງທຶນພາຍໃນ100%.
*ແຫລ່ງທ່ອງທ່ຽວທຳມະຊາດນໍ້າຕົກຕາດສຽງລື ເມືອງບົວລະພາ ແຂວງຄຳມ່ວນ ໄດ້ຮັບການສຳປະທານແລະພັດທະນາໂດຍກຸ່ມ ບໍລິສັດ ສາຍພູຫລວງ ໃນເນື້ອທ່ີ 33 ເຮັກຕາ,ໃນມູນຄ່າການລົງທຶນທັງໝົດ12ລ້ານກວ່າໂດລາສະຫະລັດ ແລະ ມີໄລຍະການສຳປະທານ 40ປີ ເຊິ່ງເປັນຮູບການລົງທຶນພາຍໃນ100%.ໂດຍໄດ້ເຊັນບົດບັນທຶກຄວາມເຂົ້າໃຈ(MOU)ວ່າດ້ວຍການສຶກສາ-ສຳຫລວດ ແລະ ພັດ ະນາໃນປີ 2018 ທາງບໍລິສັດ ກໍ່ໄດ້ດຳເນີນການສຶກສາ-ສຳຫລວດຄວາມເປັນໄປໄດ້ບັນດາໜ້າວຽກຕ່າງໆໂດຍໄດ້ແບ່ງເປັນແຕ່ລະເຂດໃນການພັດທະນາແລະແຕ່ລະໄລຍະປະກອບມີ:ໄລຍະການປຸກສ້າງສະຖານທີ່ຮອງຮັບ ແລະ ສູນບໍລິການ,ກ່ໍສ້າງສູນຂ້ໍມູນດ້ານການທ່ອງທ່ຽວ,ການຕິດຕັ້ງອຸປະກອນ ແລະ ສິ່ງອຳນວຍຄວາມສະດວກໃນການທ່ອງທ່ຽວ, ໄລຍະການດຳເນີນການບໍລິການແລະການດຳເນີນກິດຈະການອື່ນໆ ທີ່ຕິດພັນກັບການພັດທະນາສະຖານທີ່ທ່ອງທ່ຽວ ແບບອະນຸລັກທຳມະຊາດໃນເຂດນໍ້າຕົກຕາດສຽງລື ແລະ ໄດ້ນຳສະເໜີຂໍອະນຸມັດຈາກບັນດາອົງການລັດທ່ີກ່ຽວຂ້ອງເພື່ອດຳເນີນກິດຈະການ. ເນື່ອງຈາກໄລຍະ 2 ປີຜ່ານມາ ແມ່ນໄດ້ປະສົບບັນຫາການລະບາດຂອງພະຍາດໂຄວິດ 19 ເຮັດໃຫ້ທາງບໍລິສັດບໍ່ສາມາດດໍາເນີນກິດຈະການໄດ້.
ປັດຈຸບັນທາງບໍລິສັດ ແມ່ນກໍາລັງຂຸ້ນຂ່ຽວໃນການດໍາເນີນກິດຈະການປັບປຸງກໍ່ສ້າງພື້ນຖານໂຄງລ່າງ ເພື່ອຮອງຮັບໃຫ້ແກ່ການທ່ອງທ່ຽວໂດຍສະເພາະແມ່ນການກໍ່ສ້າງເສັ້ນທາງເຂົ້າສູ່ແຫລ່ງທ່ອງທ່ຽວຕາດສຽງລື, ການຈັດສັນພື້ນທີ່ເພື່ອສ້າງຈຸດບໍລິການ ແລະ ພື້ນຖານໂຄງລ່າງດ້ານກິດຈະກໍາອື່ນໆ ທ່ີຕິດພັນກັບການບໍລິການ-ການ ທ່ອງທ່ຽວ.ທ່ານ ອຳພອນ ບຸນຍາລາດ ປະທານກຸ່ມບໍລິສັດ ສາຍພູຫລວງ ໄດ້ລາຍງານຄວາມຄືບໜ້າໃນການ ພັດທະນາແຫລ່ງທ່ອງທ່ຽວດັ່ງ ກ່າວໃຫ້ຮູ້ວ່າ:ປັດຈຸບັນແມ່ນກຳລັງ ກໍ່ສ້າງພື້ນຖານໂຄງລ່າງທີ່ມີຄວາມ ຈຳເປັນເພື່ອຕອບສະໜອງກັບເປົ້າໝາຍທີ່ການນໍາຂັ້ນແຂວງໄດ້ກຳນົດໃຫ້ມີການເປີດແຫລ່ງທ່ອງທ່ຽວໃໝ່ຈຳນວນ 2 ແຫລ່ງເພື່ອຕ້ອນຮັບການເປີດປີທ່ອງທ່ຽວລາວ 2024 ເຊິ່ງປະກອບມີຂຸນກອງແລງເມືອງຫີນບູນ ແລະ ຕາດສຽງລື ເມືອງ ບົວລະພາ. ໃນນີ້,ແມ່ນເລ່ັງໃສ່ປັບປຸງເສັ້ນທາງເຂົ້າຫາຈຸດບໍລິການ ໃຫ້ຄວາມສະດວກ ແລະ ກ່ໍສ້າງເສ້ັນທາງຍ່າງເຂົ້າຫາຕາດ, ການກໍ່ສ້າງຮ້ານອາຫານ, ຫ້ອງນໍ້າສະອາດ, ກໍ່ສ້າງຂົວອູ່ແລະສິ່ງອຳນວຍຄວາມສະດວກອື່ນໆ ເຊິ່ງຄາດວ່າຈະໃຫ້ສຳເລັດ ພ້ອມທັງເປີດໃຫ້ບໍລິການແກ່ນັກທ່ອງທ່ຽວໃນລະຫວ່າງ ເດືອນພຶດສະພາຫາເດືອນ ມິຖຸນາ 2024 ເພາະເປັນຊ່ວງທີ່ມີນໍ້າ ຫລາຍເຮັດໃຫ້ນໍ້າຕົກຕາດມີຄວາມສວຍງາມທີ່ສຸດ.
ທ່ານ ອຳພອນ ບຸນຍາລາດ ໄດ້ໃຫ້ລາຍລະອຽດຕື່ມວ່າ: ສຳລັບການເປີດໃຫ້ບໍລິການໃນຊ່ວງທຳອິດແມ່ນຈະເນັ້ນໃຫ້ການບໍລິການທາງດ້ານຮ້ານອາຫານ, ຫ້ອງນໍ້າ ແລະ ຍ່າງຂົວອູ່, ຍ່າງຊົມນໍ້າຕົກຕາດ, ມີທັງຕົ້ນໄມ້ໃຫຍ່ຫລາຍຊະນິດແລະສັດປ່າຈຳນວນໜຶ່ງທີ່ຍັງຄົງຄວາມອຸດົມສົມບູນຂອງທຳມະຊາດໃນບໍລິເວນດັ່ງກ່າວ.ພິເສດຖ້າຢາກຈະມານອນພັກຜ່ອນກໍ່ຈະມີເຕັ້ນໃຫ້ບໍລິການໃຫ້ນັກທ່ອງທ່ຽວ ໄດ້ນອນພັກຄືນສຳພັດກັບບັນຍາກາດທີ່ສົດຊື່ນ, ສູດອາກາດສົດ, ເບິ່ງແສງຕາເວັນຂຶ້ນຫວ່າງກາງພູຜາ ໃນຍາມເຊົ້າຟັງສຽງນົກ ແລະ ສັດປ່າຫລາຍຊະນິດທີ່ມີສຽງຮ້ອງປະສົມປະສານກັບສຽງນໍ້າຕົກຕາດຢ່າງໜ້າອອນຊອນ ແລະ ແຜນການໃນຕໍ່ໜ້າຈະໄດ້ກໍ່ສ້າງເຮືອນພັກ, ຣີສອດ, ມີກິດຈະກຳຂີ່ສາຍສະລິງ, ຈຸດຖ່າຍຮູບຕາໜ່າງໃຍແມງມຸນໜ້ານໍ້າຕົກ ແລະ ສິ່ງອຳນວຍຄວາມສະດວກຕ່າງໆເພື່ອໄວ້ຄອຍບໍລິການນັກທ່ອງທ່ຽວ.
KPL
