ຂປລ. ບໍລິສັດທາງລົດໄຟລາວ-ຈີນ ຈຳກັດ ຮ່ວມກັບ ກອງສິລະປະແຫ່ງຊາດລາວ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຈັດພິທີຕ້ອນຮັບຂະບວນນັກທ່ອງ​ທ່ຽວ​ ຈາກ​ເມືອງ​ກຸ້ຍ​ຢາງ ແຂວງກຸ້ຍໂຈ່ວ ສປ ຈີນ ຈຳນວນ 240 ຄົນ ໃນວັນ​ທີ 9 ພຶດສະພາ​ 2024 ໂດຍຈັດໃຫ້ມີຫລາຍກິດຈະກຳ ສະແດງສິລິປະດົນຕີພຶ້ນເມືອງລາວ, ຮ້ອງເພງລາວ, ຮ້ອງເພງຈີນ ແລະ ຟ້ອນ ຢູ່ເທິງລົດໄຟຂະບວນລ້ານຊ້າງ  ເຊິ່ງໄດ້ສ້າງຄວາມຕື່ນຕາຕື່ນໃຈ ແລະ ສ້າງຄວາມເບີກບານມ່ວນຊື່ນ ໃຫ້ແກ່ນັກທ່ອງທ່ຽວ.

ທ່ານ ຄົມ ດວງຈັນທາ ຫົວໜ້າກົມໂຄສະນາການທ່ອງທ່ຽວ ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ ໄດ້ກ່າວວ່າ: ການຈັດກິດຈະກຳຕ້ອນຮັບນັກທ່ອງທ່ຽວ ເມືອງ​ກຸ້ຍ​ຢາງ ທີ່ເດີນທາງມາຮອດ ນະຄອນຫລວງວຽງຈັນ ໃນຄັ້ງນີ້ ແມ່ນມີຄວາມ ສຳຄັນຫລາຍ ເນື່ອງຈາກວ່າຂະບວນດັ່ງກ່າວ, ມີຈຳນວນນັກທ່ອງທ່ຽວຫລາຍສົມຄວນ, ທັງເປັນໂຄສະນາເຜີຍແຜ່ ວັດທະນະທຳ, ຮີດຄອງປະເພນີລາວ ແລະ ສົ່ງເສີມການທ່ອງທ່ຽວ ແນ ໃສ່ເປີດໂອກາດໃຫ້ນັກທ່ອງທ່ຽວຈີນ ໄດ້ສຳຜັດກັບວັດທະນະທຳ, ສະຖານທີ່ທ່ອງທ່ຽວ ທາງປະຫວັດຊາດ, ທຳມະຊາດຂອງລາວ  ແລະ ສຳພັດກັບບັນດາກິດຈຳກິດຕ່າງໆ ທີ່ກຽມຕ້ອນຮັບນັກທ່ອງ. ໃນປັດຈຸບັນ, ສປປ ລາວ ມີຫລາຍຊ່ອງທາງ ທີ່ນັກທ່ອງທ່ຽວຈີນ ຈະເດີນທາງມາທ່ອງທ່ຽວ ຢູ່ ສປປ ລາວ ແລະ ມີຫລາຍທາງເລືອກ ເຮັດໃຫ້ການເດີນທາງໄປມາ ສະດວກສະບາຍຫລາຍຂຶ້ນກວ່າເກົ່າ ໂດຍສະເພາະທາງລົດ, ທາງລົດໄຟ ແລະ ທາງອາກາດ, ທັງໄດ້ມີການເປີດບໍລິການຖ້ຽວບິນໂດຍກົງ ວຽງຈັນ-ຮົງກົງ ໃນຕົ້ນປີ 2024 ທີ່ຜ່ານມາ ແລະ ໃນຕໍ່ໜ້າອັນໃກ້ໆນີ້ ກໍາລັງກະກຽມເປີດໃຫ້ບໍລິການ ຖ້ຽວບິນ ປາກເຊ-ກວາງໂຈ-ປາກເຊ ແນໃສ່ໂຄສະນາດຶງດູດນັກທ່ອງທ່ຽວ ເດີນທາງໄປທ່ຽວບັນດາແຂວງພາກໃຕ້ຂອງລາວ.

ບໍລິສັດ ທາງລົດໄຟລາວ-ຈີນ ໃນ​ຖານະ​ເປັນ​ໂຄງການ​ສັນຍາລັກແຫ່ງ ສາຍພົວພັນມິດຕະພາບສອງຊາດ​ລາວ-ຈີນ ແລະ ໄດ້​ໃຫ້ການ​ສະໜັບສະໜູນ​ຢ່າງເຂັ້ມແຂງ ໃນການກໍ່ສ້າງຄູ່ຮ່ວມຊາຕາກຳລາວ-ຈີນ,  ນັບ​ແຕ່​ທ້າຍ​ປີ​ 2023 ເປັນຕົ້ນມາ, ບໍລິສັດ​ທາງ​ລົດ​ໄຟ​ລາວ-ຈີນ​ ຈໍາກັດ ໄດ້ຮ່ວມກັບ​ກະຊວງ​ຖະ​ແຫລງຂ່າວ, ວັດທະນະທຳ ​ແລະ​ ທ່ອງ​ທ່ຽວ​ ​​ຈັດ​ກອງ​ປະຊຸມ​ກ່ຽວ​ກັບ​ການ​ຊຸກຍູ້ການພັດທະນາ​ ການທ່ອງທ່ຽວຂອງ​ລາວ ຕິດພັນກັບທາງ​ລົດ​ໄຟ​ລາວ-ຈີນ​ ໂດຍຜ່ານການນຳໃຊ້ມາດ​ຕະ​ການຕ່າງໆເຊັ່ນ: ​ເພີ່ມຖ້ຽວລົດໄຟ ແລະ ນຳໃຊ້ລົດໄຟສອງຂະບວນຕໍ່ໃສ່ກັນ, ອຳນວຍຄວາມສະດວກ ໃນການຈອງ​ປີ້​ໃຫ້ກຸ່ມ​ນັກ​ທ່ອງ​ທ່ຽວ​, ພັດທະນາ APP ​ຊື້ປີ້​ອອນ​ລາຍ​ ແລະ ເພີ່ມຊ່ອງທາງການຊຳລະທີ່ຫລາກຫລາຍ ເພື່ອອຳນວຍຄວາມສະດວກ ໃຫ້ແກ່ນັກທ່ອງທ່ຽວ​, ເພີ່ມ​ການບໍລິການ​ສະ​ໜອງ​ອາ​ຫານ​ ແລະ​ ເຄື່ອງ​ດື່ມ​ໃນ​ລົດ​ໄຟ ລວມເຖິງນຳໃຊ້ມາດຕະການ​ ຫລຸດ​ເວລາຜ່ານດ່ານໃຫ້​ຜູ້​ໂດຍສານ​ສາກົນ, ​ເພີ່ມຈຸດຈອດ​ສະຖານີ ແລະ ມາດຕະການອື່ນໆ​​ ເພື່ອພັດທະນາຄຸນ​ນະພາ​ບການ​ບໍລິການ​ ຂອງ​ລົດ​ໄຟ​. ປັດຈຸບັນ, ຈຳນວນ​ນັກ​ທ່ອງ​ທ່ຽວ​ ທີ່​ເຂົ້າ​ມາ​ລາວ​ຜ່ານ​ທາງ​ລົດ​ໄຟ​ລາວ-ຈີນ​ ແມ່ນນັບ​ມື້​ນັບ​ເພີ່ມ​ຂຶ້ນ, ​ໄດ້​ປະກອບສ່ວນ​ສຳຄັນ​ ເຂົ້າ​ໃນ​ການ​ພັດທະນາ​ການ ທ່ອງທ່ຽວ​​ໃນ​ປີ​ທ່ອງ​ທ່ຽວ​ລາວ 2024.

ຂ່າວ: ກິດຕາ

KPL