ຂປລ.ວິທະຍຸ ກະຈາຍສຽງ ແຫ່ງຊາດ ຫວຽດນາມ, ເວທີປາໄສ ອະນາຄົດ ອາຊຽນ 2024 ດ້ວຍຫົວຂໍ້ວ່າ “ສ້າງປະຊາຄົມ ອາຊຽນ ພັດທະນາໄວ, ຍືນຍົງ, ຖືປະຊາຊົນ ເປັນໃຈກາງ” ຈະຖືກຈັດຂຶ້ນ ໃນວັນທີ 23 ເມສາ, ຢູ່ຮ່າໂນ້ຍ, ດ້ວຍການເຂົ້າຮ່ວມ ຂອງບັນດາການນຳ ລັດຖະບານ, ບັນດານັກວາງ ນະໂຍບາຍ, ບັນດາ ນັກຊ່ຽວຊານ, ນັກຮຽນຮູ້ ແລະ ຜູ້ຕາງໜ້າຂອງປະຊາຄົມ ວິສາຫະກິດ ມາຈາກ ບັນດາປະເທດ ສະມາຊິກ ອາຊຽນ ພ້ອມກັບ ບັນດາຄູ່ຮ່ວມມື ແລະ ເພື່ອນມິດສາກົນ. ນີ້ແມ່ນ ຂໍ້ລິເລີ່ມ ໂດຍ ທ່ານ ຟ້າມມິງຈິງ, ນາຍົກລັດຖະມົນຕີ ຫວຽດນາມ ສະເໜີ ທີ່ກອງປະຊຸມ ສຸດຍອດ ອາຊຽນ ຄັ້ງທີ 43 ຢູ່ ອິນໂດເນເຊຍ (ເດືອນ ກັນຍາ 2023). ເຫດການນີ້ ເພື່ອແນໃສ່ ສ້າງພື້ນຖານ ຫລາຍຝ່າຍ, ຫລາຍຂັ້ນ ແລະ ຫລາຍສົ້ນ ເພື່ອຊຸກຍູ້ ບັນດາການປຶກສາ ຫາລື ເລິກເຊິ່ງ, ກ້ວາງຂວາງ ແລະ ຮອບດ້ານ ກ່ຽວກັບ ບັນດາ ບັນຫາ ສຳຄັນ ສຳລັບ ອະນາຄົດ ແລະ ການພັດທະນາຂອງ ອາຊຽນ. ສຳລັບ ເວທີປາໄສ ຄັ້ງນີ້ ຈະມີຫລາຍແນວ ຄວາມຄິດໃໝ່, ມີລັກສະນະ ປະດິດ ຄິດສ້າງສູງ, ມີລັກສະນະປ່ຽນແປງ ໃໝ່ ເພື່ອສາມາດ ປະກອບສ່ວນ ເຂົ້າໃນວິວັດ ການແລກປ່ຽນ, ປຶກສາຫາລື ໃນຂອບເຂດ ອາຊຽນ, ກໍ່ຄື ອາຊຽນ ແລະ ບັນດາປະເທດ ຄູ່ຮ່ວມມື ຢ່າງເປັນທາງການ. ດ້ວຍເວທີປາໄສ ມີລັກສະນະ ເປີດຄືເວທີປາໄສ ອະນາຄົດ ອາຊຽນ, ດ້ວຍເປົ້າໝາຍ ຈະແຈ້ງ ແມ່ນມຸ່ງໄປເຖິງ ອະນາຄົດ ແລະ ຈະມີບັນດາ ແນວຄວາມຄິດໃໝ່ ເພື່ອໃຫ້ ອາຊຽນ ສາມາດ ສ້າງອະນາຄົດ ຂອງຕົນ ໃນໄລຍະຈະມາເຖິງ ຢ່າງມີປະສິດທິຜົນທີ່ສຸດ ເປັນຮູບປະທຳ, ຕອບສະໜອງ ຜົນປະໂຫຍດ ຂອງແຕ່ລະປະເທດ ສະມາຊິກ ອາຊຽນ ກໍ່ຄື ປະຊາຊົນ ອາຊຽນ./.

(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ

KPL