ຂປລ
ຂປລ. ແຫລ່ງຂ່າວຈາກ ເມືອງໝື່ນ ແຂວງວຽງຈັນ ໃຫ້ຮູ້ວ່າ: ເມືອງໝື່ນ ຈັດປາຖະກະຖາ 2 ວັນປະຫວັດສາດ ຄື, ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 69 ປີ (22 ມີນາ 1955-22 ມີນາ 2023)
ຂປລ. ແຫລ່ງຂ່າວຈາກ ເມືອງໝື່ນ ແຂວງວຽງຈັນ ໃຫ້ຮູ້ວ່າ: ເມືອງໝື່ນ ຈັດປາຖະກະຖາ 2 ວັນປະຫວັດສາດ ຄື, ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 69 ປີ (22 ມີນາ 1955-22 ມີນາ 2023) ແລະ ວັນນັກຮົບເສຍອົງຄະ ແລະ ວັນເສຍສະຫລະຊິວິດເພື່ອຊາດ ຄົບຮອບ 78 ປີ (21 ມີນາ 1946 ຫາ 21 ມີນາ 2023) ໂດຍການປາຖະກະຖາຂອງ ທ່ານ ພອນເທີດ ສຸຫວັດດີ ກໍາມະການພັກແຂວງ, ເລຂາພັກເມືອງ, ເຈົ້າເມືອງໆໝື່ນ, ມີຄະນະປະຈຳພັກເມືອງ, ຫົວໜ້າຫ້ອງການ ຕະຫລອດຮອດພະນັກງານ-ລັດຖະກອນພາຍໃນເມືອງເຂົ້າຮ່ວມ
ໂອກາດນີ້, ທ່ານ ພອນເທີດ ສຸຫວັດດີ ໄດ້ຍົກໃຫ້ເຫັນ ເຖິງມູນເຊື້ອການກຳເນີດ ແລະ ການຂະຫຍາຍຕົວຂອງພັກ ປະຊາຊົນ ປະຕິວັດລາວ ຕະຫລອດໄລຍະ 69 ປີ ທີ່ຜ່ານມາ ໂດຍສະເພາະແມ່ນການກຳເນີດ, ທາດແທ້ ແລະ ອຸດົມການຂອງພັກ ຜົນງານທີ່ຍາດມາໄດ້ໃນແຕ່ລະໄລຍະ ທັງໄລັຍະປົດປ່ອຍປະເທດຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ. ພ້ອມກັນລະນຶກເຖິງຄຸນງາມຄວາມດີ, ຂະບວນການຕໍ່ສູ້ອັນພິລະອາດຫານ ແລະ ນໍ້າໃຈເສຍສະຫລະອັນສູງສົ່ງ ຂອງບັນດານັກຮົບທີ່ໄດ້ອຸທິດ ເພື່ອປະເທດຊາດ ໃນຂະບວນການຕໍ່ສູ້ປົດປ່ອຍຊາດ ທີ່ມີຫລາຍເຫດການປະຫວັດສາດ ທີ່ປວງຊົນລາວທັງຊາດບໍ່ມີວັນລືມໄດ້.
ການຈັດປາຖະກະຖາຄັ້ງນີ້, ກໍເພື່ອເປັນການໂຄສະນາສຶກສາອົບຮົມ ໃຫ້ສະມາຊິກພັກ, ພະນັກ ງານ-ລັດຖະກອນພາຍໃນເມືອງ ຮັບຮູ້, ເຂົ້າໃຈກ່ຽວກັບພາລະບົດບາດ, ຄວາມໝາຍຄວາມສໍາຄັນ, ການເຕີບໃຫຍ່ຂະຫຍາຍຕົວ, ຜົນສໍາເລັດ ແລະ ຜົນງານທີ່ພົ້ນເດັ່ນ ຂອງພັກປະຊາຊົນປະຕິວັດລາວ ໃນການນຳພາຕະຫລອດໄລຍະຜ່ານມາ, ທັງເປັນການຈາລຶກເຖິງບຸນຄຸນ, ຄຸນງາມຄວາມດີຂອງເຫລົ່ານັກຮົບປະຕິວັດລາວ ແລະ ປະຊາຊົນບັນດາເຜົ່າ ທີ່ເສຍສະຫລະຊີວິດ ເພື່ອພາລະກິດປະຕິວັດ.
ຂ່າວ-ພາບ: ນາງ ວັນນາ
KPL
