ຂປລ
ປະຊາຊົນລາວມີມູນເຊື້ອດຸໝັ່ນຂະຫຍັນໝັ່ນພຽນໃນການປູກຝັງ-ລ້ຽງສັດ ເພື່ອສ້າງເສດຖະກິດຄອບຄົວໃຫ້ກຸ້ມຢູ່ກຸ້ມກິນຕາມແນວທາງນະໂຍບາຍ ພັກ - ລັດ ທີ່ຍາມໃດກໍໄດ້ ເອົາໃຈໃສ່ຊຸກຍູ້ສົ່ງເສີມເພື່ອຍົກລະດັບຊີວິດການເປັນຢູ່ຂອງປະຊາຊົນໃຫ້ຫລຸດພ້ົນຈາກຄວາມທຸກຍາກເທື່ອລະກ້າວ.
*ປະຊາຊົນລາວມີມູນເຊື້ອດຸໝັ່ນຂະຫຍັນໝັ່ນພຽນໃນການປູກຝັງ-ລ້ຽງສັດ ເພື່ອສ້າງເສດຖະກິດຄອບຄົວໃຫ້ກຸ້ມຢູ່ກຸ້ມກິນຕາມແນວທາງນະໂຍບາຍ ພັກ - ລັດ ທີ່ຍາມໃດກໍໄດ້ ເອົາໃຈໃສ່ຊຸກຍູ້ສົ່ງເສີມເພື່ອຍົກລະດັບຊີວິດການເປັນຢູ່ຂອງປະຊາຊົນໃຫ້ຫລຸດພ້ົນຈາກຄວາມທຸກຍາກເທື່ອລະກ້າວ.
ເມື່ອເວົ້າເຖິງການຜະລິດເຖິງຈະຕິດພັນກັບປະຊາຊົນມາຍາວນານ ແຕ່ເມື່ອກ່ອນການຜະລິດແບບປະຖົມປະຖານຍັງບໍ່ມີວິທະຍາສາດ. ແຕ່ມາດຽວນີ້ການຜະລິດກະສິກໍາປູກຝັງ-ລ້ຽງສັດ ມີການນໍາໃຊ້ເຕັກນິກວິຊາການຫລາຍຂຶ້ນ ຈຶ່ງເຮັດໃຫ້ຜົນຜະລິດຂອງປະຊາຊົນ ໄດ້ຮັບໝາກຜົນດີສ້າງລາຍຮັບເຂົ້າຄອບຄົວຫລາຍລ້ານກີບຕໍ່ປີເໝືອນດັ່ງຄອບຄົວຂອງ ນາງ ພົມມາ ແສງສຸລິຍາ ອາຍຸ 31 ປີ ຢູ່ບ້ານດົງ ວຽງກຸ່ມບ້ານທ້ຽວ ເມືອງວຽງພູຄາ ແຂວງຫລວງນ້ຳທາ.ນາງ ພົມມາ ແສງສຸລິຍາ ໃຫ້ຮູ້ເວ້ົາວ່າ: ໃນໄລຍະຜ່ານມາຄອບຄົວເຮັດນາພຽງຢ່າງດຽວ ພໍແຕ່ກຸ້ມຢູ່ ກຸ່ມກິນ, ລາຍຮັບຍັງຕ່ຳ, ມາຮອດປີ 2014 ໄດ້ມີແນວຄິດລິເລີ່ມເຮັດການກະເສດປູກຝັງ-ລ້ຽງສັດ ເປັນຕົ້ນແມ່ນການປູກໝາກແຕງ, ໝາກເຂືອ, ໝາກເຜັດ, ສາລີຫວານ, ນໍ້າເຕ້ົາ, ໝາກອຶ, ຜັກຫອມ ແລະ ອ່ືນໆ ຂາຍເປັນອາຊີບເຊິ່ງມີເນື້ອທີ່ການປູກພືດໝູນວຽນ 3.000 ຕາແມັດ. ສໍາລັບການລ້ຽງສັດກໍມີປະເພດງົວ, ໝູ, ສັກປີກ, ມີໜອງປາ 1 ໜອງ ເມ່ືອຮອດຍາມເກັບຜົນຜະລິດ ກ່ໍຈະມີແມ່ຄ້າມາຊື້ຢູ່ກັບສ່ວນ, ບາງທີ່ກໍໄປສົ່ງໃຫ້ພໍ່ຄ້າແມ່ຄ້າຢູ່ຕະຫລາດ ໃນແຕ່ລະມື້ ເຊິ່ງລາຄາຈະບໍ່ຄົງທີ່ຂຶ້ນຢູ່ກັບບາງໄລຍະຖ້າເປັນຍາມຝົນຈະມີລາຄາສູງ ເນື່ອງຈາກວ່າຜັກປູກຍາກຫລາຍໃນຍາມນີ້.
ແນວໃດກໍ່ດີ ຜ່ານການເຮັດອາຊີບປູກຝັງ-ລ້ຽງສັດຂາຍເປັນສິນຄ້າ ເຮັດໃຫ້ຊີວິດຄອບຄົວດີຂຶ້ນກວ່າເກົ່າ, ຊີວິດການເປັນຢູ່ໄດ້ຮັບການປັບປຸງຮອບດ້ານ ເສດຖະກິດຂອງຄອບຄົວມີບາດກ້າວຂະຫຍາຍຕົວຢ່າງຕໍ່ເນືອງ ໂດຍສະເລ່ຍແລ້ວໃນໜຶ່ງປີສາມາດສ້າງລາຍຮັບຈາກການປູກຝັງ ແລະ ລ້ຽງສັດປະມານ 370 ລ້ານກີບ.ນາງ ພົມມາ ເວົ້າເສີມວ່າ: ພາຍຫລັງທີ່ຫັນມາຍຶດອາຊີບປູກຝັງ-ລ້ຽງສັດ ຄອບຄົວມີການປ່ຽນແປງຫລາຍດ້ານເສດຖະກິດຄື: ມີລົດ ຫຸ່ນໃຫຍ່ 1 ຄັນ, ລົດໄຖ 1 ຄັນ, ລົດ ຈັກ 2, ມີດິນ 4 ຕອນ (ເນື້ອທີ 5 ເຮັກຕາ), ເຮືອນ 1 ຫລັງ , ດິນປູກ ຢາງພາລາ 2 ເຮັກຕາ ໃນນັ້ນປູກຕົ້ນຢາງພາລາແລ້ວ 1.000 ຕົ້ນ. ໃນຊຸມປີຕໍ່ໜ້າໄດ້ວາງຄາດໝາຍສູ້ຊົນເສດຖະກິດຄອບຄົວໃຫ້ຫລາຍຂຶ້ນກວ່າເກົ່າຄື: ຂະຫຍາຍເນື້ອທີ່ປູກພືດຜັກຖະກຸນຖົວ, ຕົ້ນໄມ້ໃຫ້ໝາກ, ລ້ຽງສັດ , ຂະຫຍາຍຕົ້ນຢາງພາລາເພີ່ມເປັນ 1.500 ຕົ້ນ ບໍ່ພຽງທໍ່ນີ້ຈະພາຍາຍາມປັບປຸງຖອດຖອນບົດຮຽນນໍາຜູ້ອື່ນໄປເລື້ອຍໆ, ຈະສືບຕໍ່ໃນການບົວລະບັດປົກປັກຮັກສາເຄ່ືອງປູກຝັງ ແລະ ນຳໃຊ້ເຕັກນິກວິທະຍາສາດເຂົ້າໃນການປູກ, ການລ້ຽງທີ່ມີຢູ່ໃນປັດຈຸບັນເພື່ອໃຫ້ຄອບຄົວມີການພັດທະນາດີຂຶ້ນເລື້ອຍໆ.
ໂດຍ: ມາລີດາ
KPL