ຂປລ. ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຈັດເຜີຍແຜ່ເອກະສານກ່ຽວກັບການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງອົງຄະນະພັກກະຊວງ ແລະ ວຽກງານປ້ອງກັນພາຍໃນ ກ່ອນກອງປະຊຸມໃຫຍ່ 3 ຂັ້ນຂອງອົງຄະນະພັກ ກະຊວງ ໃນວັນທີ 25 ເມສາ 2024 ໂດຍການເປັນປະທານຂອງ ສະຫາຍ ວັນສີ ກົວມົວ ກຳມະການສຳຮອງສູນກາງພັກ, ຮອງເລຂາຄະນະພັກ, ຮອງລັດຖະມົນຕີກະຊວງ ຖວທ, ມີຄະນະບໍລິຫານງານພັກກະຊວງ, ເລຂາ, ຮອງເລຂາ, ກຳມະການຄະນະພັກ ຮາກຖານ, ກຳມະການຄະນະໜ່ວຍພັກ, ບັນດາຫົວໜ້າກົມ, ຮອງກົມ ອ້ອມຂ້າງ ກະຊວງ ຖວທ ເຂົ້າຮ່ວມ.

ເພື່ອເຮັດໃຫ້ການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ໃນສະໄໝກອງປະຊຸມໃຫຍ່ ຄັ້ງທີ VI ອົງຄະນະພັກກະຊວງ ຖວທ ສຳເລັດຕາມຈຸດປະສົງລະດັບຄາດໝາຍທີ່ວາງໄວ້, ຄະນະພັກກະຊວງ ໄດ້ອອກມະຕິຕົກລົງຫລາຍສະບັບ ເປັນຕົ້ນ ມະຕິວ່າດ້ວຍການ ກະກຽມກອງປະຊຸມໃຫຍ່ 3 ຂັ້ນໃນສະໄໝກອງປະຊຸມໃຫຍ່ ຄັ້ງທີ VI ຂອງອົງຄະນະພັກກະຊວງ ຖວທ, ມະຕິຕົກລົງວ່າດ້ວຍການແຕ່ງຕັ້ງ ຄະນະຮັບຜິດຊອບການດຳເນີນ ກອງປະຊຸມໃຫຍ່ຂອງຄະນະພັກຮາກຖານ ແລະ ຄະນະໜ່ວຍພັກ, ມະຕິຕົກລົງວ່າດ້ວຍ ການແຕ່ງຕັ້ງ ຄະນະຮັບຜິດຊອບ ຊຸກຍູ້ຕິດຕາມກອງປະຊຸມໃຫຍ່ຂອງຄະນະພັກຮາກຖານ ແລະ ຄະນະໜ່ວຍພັກ. ນອກນັ້ນ,  ຍັງໄດ້ອອກບົດແນະນຳຕ່າງໆຕື່ມອີກ.

​ໂອກາດ​ນີ້, ສະຫາຍ ອາລຸນ ບຸນມີໄຊ ກຳມະການປະຈຳພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ ກະຊວງ ຖວທ ໄດ້ຜ່ານມະຕິວ່າດ້ວຍການ ກະກຽມກອງປະຊຸມໃຫຍ່ 3 ຂັ້ນໃນສະໄໝກອງປະຊຸມໃຫຍ່ ຄັ້ງທີ VI ຂອງອົງຄະນະພັກກະຊວງ ຖວທ ໂດຍທ່ານ ໄດ້ຍົກໃຫ້ເຫັນ ຈຸດປະສົງ ລະດັບຄາດໝາຍ, ເນື້ອໃນການກະກຽມດຳເນີນກອງປະຊຸມໃຫຍ່ ເປັນຕົ້ນ ວຽກງານສ້າງຂະບວນການ, ວຽກງານກະກຽມເນື້ອໃນເອກະສານ, ກະກຽມດ້ານບຸກຄະລາກອນ, ການແຕ່ງຕັ້ງຄະນະຮັບຜິດຊອບກະ ກຽມກອງປະຊຸມໃຫຍ່ ແລະ ວຽກງານອື່ນໆປິ່ນອ້ອມ.

ໃນຕອນທ້າຍ, ສະຫາຍ ວັນສີ ກົວມົວ ໄດ້ເນັ້ນໃຫ້ມີຄະນະບໍລິຫານງານພັກກະຊວງ, ເລຂາ, ຮອງເລຂາ, ກຳມະການຄະນະພັກຮາກຖານ, ກຳມະການຄະນະໜ່ວຍພັກ ພາຍໃນກະຊວງ ຖວທ ກໍຄື ແຕ່ລະອະນຸກຳມະການ, ແຕ່ລະພາກສ່ວນ ໃຫ້ເປັນເຈົ້າການປະຕິບັດ ຕາມມະຕິຕົກລົງ, ຄຳສັ່ງ, ຄຳແນະ ນຳ ທີ່ໄດ້ກຳນົດໄວ້ຢ່າງເຄັ່ງຄັດ ກໍຄື ນຳເອົາມະຕິຄຳສັ່ງດັ່ງກ່າວ, ໄປເຜີຍແຜ່ ແລະ ແບ່ງຄວາມຮັບຜິດ ຊອບກັນແຕ່ລະໜ້າວຽກໃຫ້ເປັນອັນລະອຽດ, ພ້ອມທັງກະກຽມເນື້ອໃນໃຫ້ກະທັດຮັດ, ຊັດເຈນ ສອດ ຄ່ອງຕາມແນວທາງ, ນະໂຍບາຍ, ລະບຽບການ ແລະ ກົດໝາຍ ເພື່ອເຮັດແນວໃດ ໃຫ້ການດຳເນີນກອງປະຊຸມໃຫຍ່ 3 ຂັ້ນຂອງອົງຄະນະພັກກະຊວງ ສຳເລັດຕາມເປົ້າໝາຍທີ່ວາງໄວ້ ເຊິ່ງການດຳເນີນກອງປະຊຸມໃຫຍ່ 3 ຂັ້ນໃນສະໄໝກອງປະຊຸມໃຫຍ່ ຄັ້ງທີ VI ອົງຄະນະພັກກະຊວງ ຖວທ ກໍຄື ກອງປະຊຸມໃຫຍ່ຄະນະພັກຮາກຖານ ແລະ ໜ່ວຍພັກ ແມ່ນບັ້ນດໍາເນີນຊີວິດການເມືອງໜຶ່ງ ທີ່ເລິກເຊິ່ງ ແນໃສ່ປັບປຸງປົວແປງອົງການຈັດຕັ້ງພັກ ຢູ່ພາຍໃນກະຊວງໃຫ້ມີຄວາມ ປອດໃສ, ເຂັ້ມແຂງ, ໜັກແໜ້ນ ສາມາດຮັບປະກັນບົດບາດ ເປັນແກນນຳ ໃນລະບົບການເມືອງ, ມີຄວາມສາມາດນຳພາວຽກງານຖະ ແຫລງຂ່າວ, ວັດທະນະທຳ ແລະ ທ່ອງທ່ຽວ ໃຫ້ໄດ້ຕາມຈຸດໝາຍທີ່ວາງໄວ້.

ຂ່າວ: ທະນູທອງ

ພາບ: ຂັນໄຊ

KPL