ຂປລ
ຂປລ. ແຫລ່ງຂ່າວຈາກ ແຂວງຜົ້ງສາລີ ໃຫ້ຮູ້ວ່າ: ພິທີມອບ-ຮັບສັນຍາເງິນກູ້ ນະໂຍບາຍສິນເຊື່ອ ເພື່ອກະຈາຍແຫລ່ງທຶນສູ່ທ້ອງຖິ່ນ ລະຫວ່າງ ສາຂາທະນາຄານແຫ່ງ ສປປ ລາວ ພາກເໜືອແຂວງອຸດົມໄຊ ແລະ ທະນາຄານພັດທະນາລາວ ຈໍາກັດ ສາຂາ ແຂວງຜົ້ງສາລີ
ຂປລ. ແຫລ່ງຂ່າວຈາກ ແຂວງຜົ້ງສາລີ ໃຫ້ຮູ້ວ່າ: ພິທີມອບ-ຮັບສັນຍາເງິນກູ້ ນະໂຍບາຍສິນເຊື່ອ ເພື່ອກະຈາຍແຫລ່ງທຶນສູ່ທ້ອງຖິ່ນ ລະຫວ່າງ ສາຂາທະນາຄານແຫ່ງ ສປປ ລາວ ພາກເໜືອແຂວງອຸດົມໄຊ ແລະ ທະນາຄານພັດທະນາລາວ ຈໍາກັດ ສາຂາ ແຂວງຜົ້ງສາລີ ຈັດຂຶ້ນໃນວັນທີ 26 ມີນາ 2024 ພາຍໃຕ້ເປັນປະທານຂອງ ທ່ານ ຄໍາເຫລັກ ແສນທະພູມ ຮອງຫົວໜ້າພະແນກອຸດສາຫະກຳ ແລະ ການຄ້າແຂວງຜົ້ງສາລີ, ມີຄະນະຮັບຜິດຊອບຈັດຕັ້ງປະຕິບັດນະໂຍບາຍສິນເຊື່ອເພື່ອກະຈາຍແຫລ່ງທຶນສູ່ທ້ອງຖິ່ນ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນພິທີ ທ່ານ ແອ ສ້ອຍສຸວັນ ຕາງໜ້າສາຂາທະນາຄານແຫ່ງ ສປປ ລາວ ພາກເໜືອ ແຂວງອຸດົມໄຊ ໄດ້ໃຫ້ຮູ້ວ່າ: ພາຍຫລັງໄດ້ຮັບສຳນວນເງິນກູ້ ຂອງຫົວໜ່ວຍທຸລະກິດທີ່ສະເໜີຂໍແຫລ່ງທຶນນະໂຍບາຍສິນເຊື່ອ ເພື່ອກະຈາຍແຫລ່ງທຶນສູ່ທ້ອງຖິ່ນ ຜ່ານທະນາຄານການພັດທະນາລາວ ຈຳກັດ ຈຳນວນ 1 ຫົວໜ່ວຍ ຊື່ວິສາຫະກິດສ່ວນບຸກຄົນ ສຸກຈະເລີນ ຟາມລ້ຽງໄກ່ຄົບວົງຈອນ, ທີ່ໃນວົງເງິນ 2,5 ຕື້ກີບ ເຊິ່ງເປົ້າໝາຍນໍາໃຊ້ເງິນກູ້ທຶນໝູນວຽນຊື້ໄກ່ພັນໄຂ່ ແລະ ຫົວອາຫານ, ອັດຕາດອກເບ້ຍ 6%/ປີ, ໄລຍະເວລາກູ້ຢືມ 5 ປີ ຍົກເວັ້ນຄ່າທໍານຽມ ໂດຍທະນາຄານໄດ້ມີການປະເມີນຄວາມສ່ຽງສິນເຊື່ອ, ປະກອບເອກະສານຕາມລະບຽບຂອງທະນາຄານ ແລະ ໄດ້ຮັບການອະນຸມັດຈາກສໍານັກງານໃຫຍ່ຂອງທະນາຄານພັດທະນາລາວຈຳກັດ.
ພ້ອມນີ້, ທ່ານ ສົມວິໄຊ ຫລວງໄຊສຸກ ຜູ້ຕາງໜ້າຈາກພະແນກຄຸ້ມຄອງການເງິນ ໄດ້ຜ່ານສັນຍາເງິນກູ້ລະຫວ່າງສາຂາທະນາຄານແຫ່ງ ສປປ ລາວ ພາກເໜືອ ແຂວງອຸດົມໄຊ ແລະ ທະນາຄານພັດທະນາລາວ ຈຳກັດ. ຈາກນັ້ນ, ຕາງໜ້າທັງສອງຝ່າຍກໍໄດ້ຮ່ວມເຊັນສັນຍາ ແລະ ມອບຮັບຢ່າງເປັນທາງການ.
ຂ່າວ-ພາບ: ສິນນະກອນ ໂນລະສິນ
KPL