ຂປລ
ສະຖານທີ່ທ່ອງທ່ຽວທຳມະຊາດຂຸນນໍ້າກອງແລງ ເປັນສະຖານທີ່ທ່ອງທ່ຽວໜຶ່ງ ທີ່ໄດ້ຮັບການພັດທະນາເປັນສະຖານທີ່ທ່ອງທ່ຽວຄົບວົງຈອນລະດັບສາກົນ, ໂດຍມີຫລາກຫລາຍກິດຈະກໍາໄວ້ບໍລິການໃຫ້ແກ່ນັກທ່ອງທ່ຽວທັງພາຍໃນ ແລະ ຕ່າງປະເທດທີ່ມີຄວາມສົນໃຈມັກຮັກດ້ານການທ່ອງທ່ຽວທຳມະຊາດ.
*ສະຖານທີ່ທ່ອງທ່ຽວທຳມະຊາດຂຸນນໍ້າກອງແລງ ເປັນສະຖານທີ່ທ່ອງທ່ຽວໜຶ່ງ ທີ່ໄດ້ຮັບການພັດທະນາເປັນສະຖານທີ່ທ່ອງທ່ຽວຄົບວົງຈອນລະດັບສາກົນ, ໂດຍມີຫລາກຫລາຍກິດຈະກໍາໄວ້ບໍລິການໃຫ້ແກ່ນັກທ່ອງທ່ຽວທັງພາຍໃນ ແລະ ຕ່າງປະເທດທີ່ມີຄວາມສົນໃຈມັກຮັກດ້ານການທ່ອງທ່ຽວທຳມະຊາດ.ສະຖານທີ່ດັ່ງກ່າວ, ຕັ້ງຢູ່ບ້ານ ນາຄື ເມືອງຫີນບູນ ແຂວງຄໍາມ່ວນ ຫ່າງຈາກເສັ້ນທາງເລກທີ 13 ໃຕ້ ປະມານ 18 ກິໂລແມັດ, ຫ່າງຈາກ ເມືອງທ່າແຂກ 38 ກິໂລແມັດ. ຂຸນນໍ້າກອງແລງ ເປັນບ່ອນກໍາເນີດຂອງນໍ້າກອງແລງ ຊຶ່ງເປັນສາຂາຂອງນໍ້າຄອນແກ້ວ, ເປັນວັງນໍ້າຂຽວມໍລະກົດ, ມີຄວາມກວ້າງປະມານ 70-80 ແມັດມົນທົນ, ເລິກປະມານ 25 ແມັດ, ລັກສະນະຂອງຂຸນກອງແລງແມ່ນເປັນຮູບໜ່ວຍມົນ ຄືກັບກອກສູບຢາ, ທາງພື້ນລຸ່ມນໍ້າມີທາງນໍ້າຢູ່ 1 ທາງ, ມີຄວາມຍາວປະມານ 22 ແມັດ (ສະເພາະບ່ອນທີ່ສາມາດເຂົ້າໄດ້) ອ້ອມຮອບວັງນໍ້າດັ່ງກ່າວແມ່ນເຕັມໄປດ້ວຍຕົ້ນຂະມ້າ.
ຂຸນນໍ້າກອງແລງແມ່ນ ເອີ້ນຕາມຕຳນານວ່າ: ເມື່ອຮອດເວລາຍາມແລງຂອງທຸກວັນສິນໃນສະໄໝກ່ອນຈະໄດ້ຍິນສຽງດັງຕຶງ... ຄືກັບສຽງກອງແລງທີ່ຄູບາຕີຢູ່ວັດ, ຕາມຄວາມເຊື່ອໃນເມື່ອກ່ອນຄິດວ່າ ແມ່ນຄົນບັງບົດເປັນຜູ້ຕີ ແລະ ຢູ່ບໍລິເວັນຂຸນນໍ້າກອງແລງນີ້ແມ່ນຫ້າມຫາປາ.ອີງຕາມນິທານພື້ນບ້ານກ່ຽວກັບຂຸນກອງແລງໄດ້ເລົ່າວ່າ: ກ່ອນໜ້ານີ້ຫລາຍຮ້ອຍປີຜ່ານມາທີ່ວັດ ບ້ານນາຄື ມີພະອາຈານອົງໜຶ່ງຊື່ວ່າ: ຍາຄູປາກບ້ຽວ ແລະ ຈົວນ້ອຍ ທັງສອງອົງໄດ້ມາອາບນໍ້າຢູ່ໃນຂຸນ ນ້ຳແຫ່ງນີ້, ເມື່ອອາບນໍ້າແລ້ວກໍ່ນັ່ງງອຍງ່າໄມ້ສູບຢາ ພໍດີກອກຢາກ່ໍຫລຸດມືຕົກລົງນໍ້າ, ຍາຄູກໍ່ຄິດເສຍ ດາຍກອກຢານັ້ນ ຈຶ່ງໄດ້ແຕ່ງໃຫ້ຈົວນ້ອຍໄປເອົາຫລອດໄໝນຳຊາວບ້ານໄດ້ 7 ຫລອດມາແລ້ວຍາຄູກໍ່ຈັບສົ້ນໜຶ່ງມຸດລົງໄປໃນພື້ນນໍ້າ ເພື່ອຊອກຫາກອກຢາ, ສ່ວນຈົວນ້ອຍຢູ່ເທິງຖ້າຕໍ່ສົ້ນໄໝໃສ່ຫລອດອື່ນຈົນໝົດ 7 ຫລອດ ພໍດີຍາຄູກໍ່ເຖິງພື້ນນໍ້າ, ຢູ່ຈຸດໃຈກາງຂອງຂຸນນ້ຳນັ້ນຍາຄູໄດ້ພົບທໍ່ແກ້ວໃຫຍ່ອັນໜຶ່ງເປັນສີມໍລະກົດໃສງາມແຕ່ມີນໍ້າຢູ່ທາງໃນໃຫຍ່ເທົ່າກັບກອງດຶກ (ກອງເພນ) ຫລື ກອງແລງທີ່ຄູບາໃຊ້ຕີຢູ່ວັດ ກໍ່ເລີຍຮ້ອງຂຸນນ້ຳແຫ່ງນີ້ວ່າ “ຂຸນນໍ້າກອງແລງ” ຈົນມາຮອດປັດຈຸບັນ.
ປັດຈຸບັນສະຖານທີ່ດັ່ງກ່າວ, ໄດ້ຖືກພັດທະນາໂດຍ ບໍລິສັດກຣີນເວີ ຈໍາກັດຜູ້ດຽວ ໃນເນື້ອທີ່ປະມານ 67 ເຮັກຕາ ພາຍຫລັງທີ່ພັດທະນາແລ້ວ ຂຸນກອງແລງໄດ້ກາຍເປັນສະຖານທີ່ທ່ອງທ່ຽວແບບຄົບວົງຈອນລະດັບສາກົນ. ປະກອບມີຫລາກຫລາຍກິດຈະກໍາໄວ້ຄອຍບໍລິການແກ່ນັກທ່ອງທ່ຽວທັງພາຍໃນ ແລະ ຕ່າງປະເທດ ເຊັ່ນ: ສະຖານທີ່ຕາກ ອາກາດ, ກິດຈະກຳປີນຜາ, ລ່ອງ ເຮືອ, ຂີ່ສະລິງ, ຂົວອູ່, ເສັ້ນທາງ ອອບໂຣດ, ຍ່າງປ່າ ແລະ ອື່ນໆ.ຢ່າງໃດກໍຕາມໜັງສືພີມປະເທດລາວ ໂດຍສະເພາະຄໍລຳທ່ອງທ່ຽວເມືອງລາວ ຂໍຝາກເຖິງນັກທ່ອງທ່ຽວທັງຫລາຍທັງພາຍໃນ ແລະ ຕ່າງປະເທດທີ່ມາທ່ອງທ່ຽວສະຖານທີ່ດັ່ງກ່າວ ເອົາໃຈໃສ່ຮັກສາຄວາມສະອາດເປັນສຳຄັນ, ໂດຍບໍ່ຖິ້ມຂີ້ເຫຍື້ອຊະຊາຍ ແລະ ຕ້ອງຖິ້ມໃສ່ຈຸດທີ່ຈັດສັນໄວ້ ເພື່ອເຮັດໃຫ້ສະຖານທ່ອງທ່ຽວມີຄວາມສະອາດສວຍງາມ, ທັງເປັນການຮັກສາສິ່ງແວດລ້ອມໃຫ້ຍືນຍົງຕະຫລອດໄປດ້ວຍຄວາມປາດຖະໜາດີຈາກຄໍລຳທ່ອງທ່ຽວເມືອງລາວ ກໍຄືບໍລິສັດເບຍລາວ ເບຍຂອງຄົນລາວ ຄົນທີ່ຈິງໃຈ.
ບົດໂດຍ: ມະນີລັດ
ພາບ: ແດງສະຫວັດ ແສນພານິດ
KPL
