ຂປລ
ສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ບໍລິສັດສູນລະຫັດສິນຄ້າລາວ ຈຳກັດ (GS1 Laos) ເຊັນບົດບັນທຶກຮ່ວມມືສົ່ງເສີມການນຳໃຊ້ມາດຕະຖານສາກົນຂອງ GS1 ໃນທົ່ວ ສປປ ລາວ ເພື່ອຄວບຄຸມຂະແໜງການຜະລິດ, ຜູ້ຂາຍຍ່ອຍ, ກະສິກຳ, ເສື້ອຜ້າ, ເຕັກໂນໂລຊີສານສົນເທດ ແລະ ການສື່ສານ (ICT), ການຄ້າ ແລະ ໂລຈິສຕິກ ຊຶ່ງພິທີລົງນາມໄດ້ຈັດຂຶ້ນໃນວັນທີ 6 ຕຸລາ 2026 ລະຫວ່າງທ່ານ ພູໄຊ ເທບພະວົງ ເລຂາທິການສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ທ່ານ ຫ້າຍສວຽນ ລ່ຽງ ຜູ້ອຳນວຍການບໍລິສັດສູນລະຫັດສິນຄ້າລາວ ຈຳກັດ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ການເຊັນບົດບັນທຶກການຮ່ວມມືຄັ້ງນີ້, ແນໃສ່ກຳນົດຂອບການຮ່ວມມືແບບຍຸດທະສາດລະຫວ່າງສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ບໍລິສັດ ສູນລະຫັດສິນຄ້າລາວ ຈຳກັດ ເພື່ອສົ່ງເສີມການນຳໃຊ້ມາດຕະຖານ GS1 ໃນບັນດາສະມາຊິກສະພາການຄ້າ ແລະ ອຸດສາຫະກຳແຫ່ງຊາດລາວ ໃນຫຼາຍຂະແໜງການ ເຊັ່ນ: ການຜະລິດ, ຂາຍຍ່ອຍ, ກະສິກຳ, ເສື້ອຜ້າ, ICT, ການຄ້າ ແລະ ໂລຈິສຕິກ ແລະ ອື່ນໆ. ພ້ອມທັງ, ເສີມສ້າງຄວາມສາມາດແຂ່ງຂັນຂອງສິນຄ້າ Made in Laos ຜ່ານການລະບຸສິນຄ້າຕາມມາດຕະຖານສາກົນ; ເພີ່ມທະວີການຕິດຕາມສິນຄ້າ, ຄວາມໂປ່ງໃສ ແລະ ການປະຕິບັດຕາມຂໍ້ກຳນົດການຄ້າສາກົນ ແລະ ຂໍ້ກຳນົດເຄືອຂ່າຍການເຊື່ອມໂຍງດີຈິຕອນ; ສະໜັບສະໜູນສະມາຊິກສະພາການຄ້າ ແລະ ອຸດສາຫະກຳແຫ່ງຊາດລາວ ໃນການເຂົ້າເຖິງຕະຫຼາດໃນພາກພື້ນ ແລະ ຕະຫຼາດໂລກ ໂດຍນຳໃຊ້ບາໂຄດທີ່ສອດຄ່ອງກັບ GS1, ຄວາມປອດໄພດ້ານອາຫານ ແລະ ສິນຄ້າ, ການເຮັດໃຫ້ການຄ້າເປັນດີຈິຕອນ ແລະ ຄວາມຍືນຍົງ ໂດຍນຳໃຊ້ມາດຕະຖານ GS1 ແລະ ຂະຫຍາຍຊ່ອງທາງການຈຳໜ່າຍສິນຄ້າຜ່ານເຄືອຂ່າຍ GS1 ເພື່ອເລັ່ງການສົ່ງອອກ “Made in Laos” ສູ່ຕະຫຼາດສາກົນ.
GS1 ແມ່ນອົງການມາດຕະຖານສາກົນທີ່ເປັນກາງ ແລະ ບໍ່ສະແຫວງຫາກຳໄລ ແລະ ເປັນອົງການທີ່ໄດ້ຮັບອະນຸຍາດໃນການອອກເລກລະຫັດສິນຄ້າສາກົນ (GTIN) ຫຼື ທີ່ເອີ້ນກັນທົ່ວໄປວ່າບາໂຄດ ຊຶ່ງ GS1 ແມ່ນພາສາສາກົນຂອງທຸລະກິດຂອງໂລກ ເປັນພື້ນຖານລວມທີ່ຊ່ວຍໃຫ້ຄູ່ຄ້າທາງທຸລະກິດສາມາດລະບຸ, ບັນທຶກ ແລະ ແລກປ່ຽນຂໍ້ມູນສິນຄ້າທີ່ມີເອກະລັກໄດ້ຢ່າງລຽບງ່າຍ. ປັດຈຸບັນ, ລະບົບມາດຕະຖານດັ່ງກ່າວ, ຖືກນຳໃຊ້ໂດຍຫຼາຍກວ່າ 2 ລ້ານບໍລິສັດ, ໃນຫຼາຍກວ່າ 150 ປະເທດ ແລະ ມີການສະແກນບາໂຄດ GS1 ຫຼາຍກວ່າ 10 ຕື້ຄັ້ງຕໍ່ມື້.
ຂ່າວ: ກິດຕາ; ພາບ: ເກດສະໜາ
KPL
