ຂປລ. ພິທີລົງນາມໃນບົດບັນທຶກຄວາມເຂົ້າໃຈ ໂຄງການສ້າງຄວາມເຂັ້ມແຂງ ໃຫ້ແກ່ຂະແໜງນ້ຳປະປາ ສປປ ລາວ (ໂຄງການຮາກຫຍ້າ ໄລຍະທີ 2)  ຈັດຂຶ້ນໃນວັນທີ 14 ພະຈິກ 2023 ຢູ່ນະຄອນຫລວງວຽງຈັນ ໂດຍການຮ່ວມລົງນາມ ລະຫວ່າງ ທ່ານ ຮະຢະໂຕະ ຊິມິຊູ ເຈົ້າເມືອງ ໄຊຕະມະ ປະເທດຍີ່ປຸ່ນ ແລະ ລັດວິສະຫະກິດນ້ຳປະປາ 3 ແຂວງຄື: ນະຄອນຫລວງວຽງຈັນ, ຫລວງພະບາງ ແລະ ແຂວງ ຄຳມ່ວນ.

 ທ່ານ ສົມປອງ ສິດທິວົງ ຫົວໜ້າກົມນ້ຳປະປາ ກະຊວງ ໂຍທາທິການ ອລະ ຂົນສົ່ງ (ຍທຂ)  ໄດ້ກ່າວວ່າ: ໂຄງການຮາກຫຍ້າ ໄລຍະ 2 ເປັນການສືບຕໍ່ຈາກ ໄລຍະທີ I ທີ່ໄດ້ມີການຕີລາຄາ ການປະຕິບັດການສະໜອງນໍ້າປະປາ ໃຫ້ມີສະຖຽນລະພາບ ໂດຍຜ່ານກິດຈະກຳ ໃນການຄຸ້ມຄອງ ແລະ ບໍາລຸງຮັກສາພ້ອມດ້ວຍ ມາດຕະຖານ ແລະ ຄູ່ມື ທີ່ໄດ້ຮັບການປັບປຸງ ເພື່ອຫລຸດການ ຮົ່ວໄຫລຂອງນໍ້າ, ການສ້າງ ຄວາມເຂັ້ມແຂງ ການຄຸ້ມຄອງ ແລະ ບໍາລຸງຮັກສາທໍ່ ແລະ ການປັບປຸງການກໍ່ສ້າງທໍ່ ດ້ວຍມາດຕະຖານ ແລະ ວັດສະດຸທີ່ເໝາະສົມ. ຫ້ອງການນ້ຳປະປາ ເມືອງໄຊຕະມະ ໃຫ້ການສືບຕໍ່ຊ່ວຍເຫລືອ ຂະແໜງນໍ້າປະປາ ກໍຄື ໂຄງການ ສ້າງຄວາມອາດສາມາດ ໃນການດໍາ ເນີນງານ ແລະ ບຳລຸງຮັກສາ ລະບົບສາຍທໍ່ນໍ້າປະປາ ໃຫ້ແກ່ລັດວິສາຫະກິດນໍ້າປະປາ (ໂຄງການຮາກຫຍ້າ) ໄລຍະ 2 ແຕ່ປີ 2024-2027 ໂດຍ ມີເປົ້າໝາຍປະຕິບັດ 4 ໜ້າວຽກຕົ້ນຕໍ ເພື່ອແນໃສ່ໃຫ້ບັນລຸຈຸດປະສົງ ແລະ ຄາດໝາຍຄື: ການເຜີຍແຜ່ ຄູ່ມື ການຕິດຕັ້ງ ຕໍ່ບໍລິການ, ປັບປຸງລະບົບການສ້ອມແປງນໍ້າຮົ່ວໄຫລ່, ປັບປຸງວຽກງານການອ່ານໝໍ້ແທກນໍ້າ, ການປ່ຽນໝໍ້ແທກນໍ້າ ໃນພື້ນທີ່ການ ວາງແຜນ ແລະ ພື້ນທີ່ຕົວແບບ.  ທັງນີ້, ກໍເພື່ອແນໃສ່ຍົກລະດັບຄວາມສາມາດ ການບໍາລຸງຮັກສາສາຍທໍ່ນໍ້າປະປາ ແລະ ລະບົບການ ຄຸ້ມຄອງ ເຊິ່ງເຫັນວ່າ ຈະເປັນປະໂຫຍດ ໃຫ້ແກ່ກົມນໍ້າປະປາ ແລະ ລັດວິສາຫະກິດນໍ້າປະປາ 3 ແຂວງຄື: ນະຄອນຫລວງວຽງຈັນ, ຫລວງພະບາງ, ແຂວງຄຳມ່ວນ ແລະ ແຂວງອື່ນທີ່ເຂົ້າຮ່ວມ, ໃນການຍົກລະດັບຄວາມຮູ້, ຄວາມສາມາດ ດ້ານເຕັກນິກ-ວິຊາການ ຂອງພະນັກງານ ທີ່ກ່ຽວຂ້ອງ ໃຫ້ສາມາດ ປະຕິບັດແຜນດໍາເນີນທຸລະກິດ, ຕິດຕາມ ແລະ ປະເມີນຜົນປະສິດທິພາບ ໃນການດໍາເນີນງານ ຂອງລັດວິສາຫະກິດນໍ້າປະປາ.

ກະຊວງ ໂຍທາທິການ ແລະ ຂົນສົ່ງ, ກົມນໍ້າປະປາ ແລະ ອົງການ JICA ກໍຄື ປະເທດຍີ່ປຸ່ນ ໄດ້ມີສາຍສຳພັນມິດຕະພາບ ແລະ ການຮ່ວມມື ກັນ ມາຕັ້ງແຕ່ດົນນານແລ້ວ, ລັດຖະບານລາວ ກໍຄື ປະຊາຊົນລາວ ໄດ້ຮັບການ ຊ່ວຍເຫລືອຈາກ ລັດຖະບານ ແລະ ປະຊາຊົນ ຍີ່ປຸ່ນ ຢ່າງຕໍ່ເນື່ອງ ແລະ ມີລັກສະນະເພີ່ມທະວີຂຶ້ນ ເລື້ອຍໆ ໃນຫລາຍໆດ້ານ ເປັນຕົ້ນແມ່ນ ການພັດທະນາທາງ ດ້ານເສດ ຖະກິດ-ສັງຄົມ ໂເຍສະເພາະແມ່ນ ການພັດທະນາ ພື້ນຖານໂຄງລ່າງ ຂະແໜງນໍ້າປະປາ ແລະ ສຸຂາພິບານ.

ສໍາລັບໂຄງການຮາກຫຍ້າ ໄລຍະ 1 ທີ່ໄດ້ຈັດຕັ້ງປະຕິບັດເລີ່ມແຕ່ປີ 2011 ໂດຍໄດ້ມີການເຊັນບົດບັນທຶກຄວາມເຂົ້າໃຈ ຮ່ວມກັນ ລະຫວ່າງ ລັດວິສາຫະກິດນໍ້າປະປາ 3 ແຂວງ: ນະຄອນຫຼວງວຽງຈັນ, ຫລວງພະບາງ ແລະ ແຂວງຄຳມ່ວນ ແລະ ປີ 2016 ໄດ້ມີການ ແກ້ໄຂບົດ ບັນທຶກດັ່ງກ່າວ ເຊິ່ງໄດ້ມີການປຶກສາຫາລືກັບ ພາກສ່ວນກ່ຽວຂ້ອງ ໃນໄລຍະຜ່ານມາ ໂຄງການດັ່ງກ່າວ ໄດ້ເລີ່ມຈັດຕັ້ງປະຕິບັດ ວັນທີ 8 ມິຖຸນາ 2018 ຫາ 31 ມີນາ 2023 ແລະ ໄດ້ຂະຫຍາຍອອກໄປເນື່ອງຈາກ ພະຍາດລະບາດໂຄວິດ-19 ແມ່ນໄດ້ສຸມໃສ່ສ້າງ ຄວາມອາດສາມາດ ໃຫ້ແກ່ລັດວິສາຫະກິດນໍ້າປະປາ 3 ແຂວງດັ່ງກ່າວ.

ຂ່າວ: ວຽງສະຫວັນ

ພາບ: ອ່າຍຄຳ

KPL