ຂປລ
ຂປລ. ໃນວັນທີ 3-6 ກໍລະກົດ 2023, ກອງປະຊຸມປະຊາສໍາພັນການລົງທຶນ ແລະ ພິທີເຊັນບົດບັນທຶກການຮ່ວມມືລົງທຶນ ຢູ່ນິຄົມອຸດສາຫະກໍາອັດສະລິຍະອາຊີ-ໂປຕາສສາກົນ ແຂວງຄໍາມ່ວນ ສປປ ລາວ ໄດ້ຈັດຂຶ້ນຢ່າງຍິ່ງໃຫຍ່ທີ່ນະ ຄອນກວາງໂຈວ ສປ ຈີນ, ເຊິ່ງເປັນເຈົ້າພາບໂດຍ ກະຊວງອຸດສາຫະກໍາ ແລະ ການຄ້າ ແລະ ອໍານາດການປົກຄອງແຂວງຄໍາມ່ວນ ສປປ ລາວ. ກອງປະຊຸມປະຊາສໍາພັນການລົງທຶນຄັ້ງນີ້, ແມ່ນກອງປະຊຸມປະຊາສໍາພັນດຶງດູດການລົງທຶນໃນຂະແໜງອຸດສາຫະກຳຂະໜາດໃຫຍ່ຄັ້ງທໍາອິດ ທີ່ລັດຖະບານລາວ ຈັດຂຶ້ນຢູ່ຕ່າງປະເທດ ເຊິ່ງແຕກຕ່າງຈາກກອງປະຊຸມປະຊາສໍາພັນ ການລົງທຶນກໍ່ສ້າງພື້ນຖານໂຄງລ່າງທີ່ລັດຖະບານລາວ ຈັດຂຶ້ນໃນຄັ້ງກ່ອນ.
ຂປລ.ໃນວັນທີ 3-6 ກໍລະກົດ 2023, ກອງປະຊຸມປະຊາສໍາພັນການລົງທຶນ ແລະ ພິທີເຊັນບົດບັນທຶກການຮ່ວມມືລົງທຶນ ຢູ່ນິຄົມອຸດສາຫະກໍາອັດສະລິຍະອາຊີ-ໂປຕາສສາກົນ ແຂວງຄໍາມ່ວນ ສປປ ລາວ ໄດ້ຈັດຂຶ້ນຢ່າງຍິ່ງໃຫຍ່ທີ່ນະ ຄອນກວາງໂຈວ ສປ ຈີນ, ເຊິ່ງເປັນເຈົ້າພາບໂດຍ ກະຊວງອຸດສາຫະກໍາ ແລະ ການຄ້າ ແລະ ອໍານາດການປົກຄອງແຂວງຄໍາມ່ວນ ສປປ ລາວ. ກອງປະຊຸມປະຊາສໍາພັນການລົງທຶນຄັ້ງນີ້, ແມ່ນກອງປະຊຸມປະຊາສໍາພັນດຶງດູດການລົງທຶນໃນຂະແໜງອຸດສາຫະກຳຂະໜາດໃຫຍ່ຄັ້ງທໍາອິດ ທີ່ລັດຖະບານລາວ ຈັດຂຶ້ນຢູ່ຕ່າງປະເທດ ເຊິ່ງແຕກຕ່າງຈາກກອງປະຊຸມປະຊາສໍາພັນ ການລົງທຶນກໍ່ສ້າງພື້ນຖານໂຄງລ່າງທີ່ລັດຖະບານລາວ ຈັດຂຶ້ນໃນຄັ້ງກ່ອນ. ກອງປະຊຸມໄດ້ແບ່ງອອກເປັນ 3 ວາລະຄື: ວາລະປະຊຸມເຈລະຈາລະດັບສູງລະຫວ່າງລັດຖະບານ ແລະ ວິສາຫະກິດ, ວາລະປຶກສາຫາລືປະຊາສຳພັນການລົງທຶນຂອງບໍລິສັດ ແລະ ວາລະພິທີເຊັນບົດບັນທຶກການຮ່ວມມືລົງທຶນ ໂດຍລັດຖະບານ ໄດ້ຖືເອົານິຄົມອຸດສາຫະກໍາອັດສະລິຍະອາຊີ-ໂປຕາສສາກົນ ເປັນເຂດພັດທະນາລະດັບສູງໃໝ່.
ບັນດາຜູ້ເຂົ້າຮ່ວມໃນງານປະກອບມີຫລາຍ 100 ບໍລິສັດ, ນັກລົງທຶນ ແລະ ອົງກອນການເງິນຕ່າງໆທີ່ມີຊື່ສຽງໃນ ສປຈີນ ເຂົ້າຮ່ວມ ເຊິ່ງໄດ້ສະແດງໃຫ້ທົ່ວໂລກເຫັນເຖິງທ່າແຮງການພັດທະນາຂອງ ສປປ ລາວ. ການຈັດກອງປະຊຸມໃນຄັ້ງນີ້ ໄດ້ຮັບຜົນສຳເລັດຢ່າງມີປະສິດທິພາບ ແລະ ມີປະສິດທິຜົນສູງ, ໄດ້ສໍາເລັດການລົງນາມຈໍານວນ 10 ໂຄງການ, ລວມຍອດມູນຄ່າການລົງທຶນ 835 ລ້ານໂດລາ ຫລື ທຽບເທົ່າ 15.100 ຕື້ກີບ. ໃນນັ້ນ, ລວມມີບັນດາໂຄງການທີ່ກ່ຽວຂ້ອງກັບຕ່ອງໂສ້ອຸດສາຫະກຳເຊັ່ນ: ໂຄງການຄລໍ-ອັນຄາໄລ (chlor-alkali), ໂຄງການປຸງແຕ່ງໂບຣມິນ, ໂຄງການແບດເຕີຣີກະແສວາເນດຽມ/ສັງກະສີ-ໂບຣມິນ Vanadium/zinc-bromine ແລະໂຄງການອຸດສາຫະກໍາທີ່ພົ້ນເດັ່ນ ເຊັ່ນ: ວິທະຍາສາດຊີວະພາບວິທະຍາ ແລະ ການຜະລິດອັດສະລິຍະ ເຊິ່ງຄາດວ່າເມື່ອບັນດາໂຄງການທັງໝົດສຳເລັດ ລວມຍອດມູນຄ່າຜົນຜະລິດຂອງໂຄງການຈະສູງເກີນ 2 ຕື້ໂດລາ ຫລື ທຽບເທົ່າ 36.200 ຕື້ກີບ. ໂດຍອີງຕາມທິດຊີ້ນໍາຂອງພັກ, ລັດຖະບານ ແລະ ສະພາແຫ່ງຊາດກ່ຽວກັບການຮັກສາສະ ຖຽນລະພາບຂອງເສດຖະກິດ, ດຶງດູດການລົງທຶນຈາກຕ່າງປະເທດ, ສ້າງລາຍຮັບເງິນຕາຕ່າງປະເທດ, ທົດແທນການນຳເຂົ້າ, ນີ້ເປັນການຈັດຕັ້ງປະຕິບັດແລະເປັນອີກບາດກ້າວໜຶ່ງ ແຫ່ງການພັດທະນາເສດຖະກິດຂອງປະເທດລາວ.
ການແກ້ໄຂຄວາມຫຍຸ້ງຍາກດ້ານເສດຖະກິດ, ເປີດປະຕູສູ່ພາຍນອກແລະການພັດທະນາແມ່ນເປົ້າໝາຍສຳຄັນ.
ເພື່ອແນໃສ່ແກ້ໄຂບັນຫາ ການພັດທະນາເສດຖະກິດຂອງປະເທດລາວໃນປັດຈຸບັນ ຢ່າງມີປະສິດທິຜົນ ເຊັ່ນ: ໄພເງິນເຟີ້, ເງິນກີບອ່ອນຄ່າ ແລະ ຄັງສຳຮອງເງິນຕາຕ່າງປະເທດບໍ່ພຽງພໍ. ໃນກອງປະຊຸມ, ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ, ທ່ານ ວັນໄຊ ພອງສະຫວັນ ເຈົ້າແຂວງແຂວງຄໍາມ່ວນ, ທ່ານGuo Baichun ປະທານບໍລິສັດອາຊີ-ໂປຕາສສາກົນຈໍາກັດ, ພ້ອມດ້ວຍກຸ່ມຜູ້ບໍລິຫານລະດັບສູງໄດ້ລົງເລິກປຶກສາຫາລືກ່ຽວກັບການລົງທຶນ ແລະ ການພັດທະນາເສດຖະກິດ ໂດຍສະເພາະແມ່ນການພັດທະນາອຸດສາຫະກໍາຢູ່ປະເທດລາວ.
ທ່ານ Guo Baichun ກ່າວວ່າ: ຄວາມຫຍຸ້ງຍາກດ້ານເສດຖະກິດທີ່ ສປປ ລາວ ກຳລັງຜະເຊີນໜ້າໃນປັດຈຸບັນເປັນພຽງຊົ່ວຄາວເທົ່ານັ້ນ, ການພັດທະນາເປັນວິທີທາງແກ້ໄຂທີ່ດີທີ່ສຸດ, ພຽງແຕ່ຕ້ອງຮັກສານະໂຍບາຍເປີດປະຕູສູ່ພາຍນອກຢ່າງມີສະຖຽນລະພາບ, ຂໍ້ໄດ້ປຽບຂອງປະເທດລາວຈະດຶງດູດການລົງທຶນນັບມື້ນັບຫລາຍຂຶ້ນ, ທຸກບັນຫາສາມາດແກ້ໄຂໄດ້ ແລະ ບໍລິສັດອາຊີ-ໂປຕາສສາກົນ ມີຄວາມຍິນດີເປັນຢ່າງສູງໃນການຮ່ວມມືຊ່ວຍເຫລືອ. ປະເທດລາວ ມີທ່າໄດ້ປຽບຂອງຊັບພະຍາກອນທຳມະຊາດ, ພະລັງງານໄຟຟ້າ, ແຮງງານ ແລະ ຕະຫລາດໂດຍລັດຖະບານລາວ ຖືເອົານິຄົມອຸດສາຫະກໍາອັດສະລິຍະອາຊີ-ໂປຕາສສາກົນ ເປັນເວທີ ໃນການປະຊາສໍາພັນດຶງດູດການລົງທຶນຕ່າງປະເທດ ເຊິ່ງໄດ້ຮັບຄວາມສົນໃຈຢ່າງຫລວງຫລາຍ ຈາກບັນດານັກທຸລະກິດຈີນ, ນັກລົງທຶນຈີນ ແລະ ອົງກອນການເງິນ. ຂ້າພະເຈົ້າສະເໜີໃຫ້ລັດຖະບານລາວ ຖືເອົາກາລະໂອກາດນີ້ ເພື່ອຊຸກຍູ້ໃຫ້ນັກລົງທຶນຈີນໄປລົງທຶນຢູ່ປະເທດລາວ, ນຳໃຊ້ທ່າໄດ້ປຽບຂອງລາວ ເພື່ອເຊື່ອມໂຍງກັບຕະຫລາດໂລກ ແລະ ຊຸກຍູ້ການພັດທະນາເສດຖະກິດຂອງລາວ ໃຫ້ມີຄວາມເຂັ້ມ ແຂງແລະໝັ້ນຄົງ. ປັດຈຸບັນ, ບັນດາວິສາຫະກິດຈີນຫລາຍແຫ່ງມີຄວາມເຕັມໃຈຮ່ວມມືລົງທຶນໃນຂົງເຂດອຸດສາຫະກຳອະໂປຕາສ ຂອງນິຄົມອຸດສາຫະກໍາອັດສະລິຍະອາຊີ-ໂປຕາສສາກົນ ເຊິ່ງເປັນການຜະລິດທົດແທນການນໍາເຂົ້າ ແລະ ສ້າງລາຍຮັບເງິນຕາຕ່າງປະເທດໂດຍການສົ່ງອອກ, ເປັນການເພີ່ມຄັງສຳຮອງເງິນຕາຕ່າງປະເທດສ້າງລາຍຮັບໃຫ້ປະຊາຊົນ, ແກ້ໄຂບັນຫາທີ່ຜະເຊີນໃນປັດຈຸບັນ ເພື່ອການພັດທະນາໃນອະນາຄົດຂອງ ສປປ ລາວ.
ທ່ານ ມະໄລທອງ ກົມມະສິດ ແລະ ທ່ານ ວັນໄຊ ພອງສະຫວັນ ເຫັນດີຕໍ່ກັບຂໍ້ສະເໜີຂອງ ທ່ານ Guo Baichun. ທ່ານມະໄລທອງກົມມະສິດກ່າວວ່າ: ເພື່ອແກ້ໄຂຄວາມຫຍຸ້ງຍາກດ້ານເສດຖະກິດໃນປັດຈຸບັນ ຢູ່ປະເທດລາວ, ຕ້ອງພັດທະນາເສດຖະກິດ ແລະ ເຮັດໃຫ້ເສດຖະກິດມີການແຂ່ງຂັນໄດ້. ຂ້າພະເຈົ້າສະໜັບສະໜູນແນວຄວາມຄິດທີ່ວ່າ: “ບໍ່ມີກະສິກຳບໍ່ມີສະຖຽນລະພາບ, ບໍ່ມີອຸດສາຫະກຳບໍ່ມີຄວາມເຂັ້ມແຂງ, ບໍ່ມີການຄ້າບໍ່ມີຄວາມຮັ່ງມີ”, ຈຶ່ງຈຳເປັນຕ້ອງຊຸກຍູ້ອຸດສາຫະກຳໃຫ້ເປັນເສົາຫລັກສຳຄັນໃນການພັດທະນາ, ສົ່ງເສີມການຜະລິດອຸດສາຫະກໍາປຸງແຕ່ງທົດແທນການນໍາເຂົ້າ ແລະ ສ້າງລາຍຮັບເງິນຕາຕ່າງປະເທດ ໂດຍການສົ່ງອອກ. ລັດຖະບານລາວ ຈະສ້າງສະພາບແວດລ້ອມການລົງທຶນໃຫ້ຢ່າງເປີດກວ້າງ ແລະ ຮອບດ້ານ ເພື່ອດຶງດູດວິສາຫະກິດຈາກຕ່າງປະເທດ ເຂົ້າມາລົງທຶນຢູ່ລາວ ໃຫ້ຫລາຍຂຶ້ນ ແລະ ສະໜັບສະໜູນໃຫ້ການພັດທະນາວິສາຫະກິດຂອງພວກເຂົາມີຄວາມເຂັ້ມແຂງ, ຄຽງຄູ່ກັບການພັດທະ ນາເສດຖະກິດລາວ ໃຫ້ມີຄວາມເຂັ້ມແຂງ.
ຕີລາຄາຕໍ່ກັບນະໂຍບາຍສົ່ງເສີມການລົງທຶນເພື່ອເພີ່ມທະວີຄວາມໄວ້ເນື້ອເຊື່ອໃຈຂອງການລົງທຶນຕ່າງປະເທດ.
ເພື່ອໃຫ້ນັກລົງທຶນມີຄວາມເຂົ້າໃຈປະເທດລາວຫລາຍຂຶ້ນ, ທ່ານ ມະໄລທອງ ກົມມະສິດ, ທ່ານ ວັນໄຊ ພອງສະຫວັນ ແລະ ບໍລິສັດອາຊີ-ໂປຕາສສາກົນ ໄດ້ເຊື້ອເຊີນບັນດາບໍລິສັດລົງທຶນຂອງຈີນ ແລະ ອົງກອນການເງິນສາ ກົນເຂົ້າຮ່ວມກອງປະຊຸມພົບປະສົນທະນາໃນຄັ້ງນີ້ ໂດຍປິ່ນອ້ອມການເລັ່ງຊຸກຍູ້ການກໍ່ສ້າງໂຄງການ, ເລັ່ງປັບຕົວເຂົ້າກັບການພັດທະນາຂອງລາວ, ສະໜອງນະໂຍບາຍສະໜັບສະໜູນ ແລະ ແນວທາງຕ່າງໆ, ສຶກສາຄົ້ນຄ້ວາຄວາມຕ້ອງການຂອງວິສາຫະກິດທີ່ຈະເຂົ້າມາລົງທຶນໃນນິຄົມອຸດສາຫະກໍາ, ໃຫ້ຄໍາຕອບລະອຽດກ່ຽວກັບບັນຫາສໍາຄັນຕ່າງໆດ້ານແນວ ທາງນະໂຍບາຍ, ທ່າໄດ້ປຽບຂອງຊັບພະຍາກອນທຳມະຊາດ, ການພັດທະນາອຸດສາຫະກໍາ ແລະ ບັນຫາທີ່ສົນໃຈຕ່າງໆ. ກອງປະຊຸມໄດ້ຮັບການຕີລາຄາສູງຈາກບັນດາແຂກເຂົ້າຮ່ວມ ແລະ ໄດ້ເພີ່ມທະວີຄວາມໄວ້ເນື້ອເຊື່ອໃຈໃຫ້ແກ່ບັນດາວິສາຫະກິດຈີນເພື່ອເຂົ້າມາລົງທຶນຢູ່ສປປລາວ.
ທ່ານ ມະໄລທອງ ກົມມະສິດ ກ່າວໃນກອງປະຊຸມວ່າ: ເຖິງວ່າປັດຈຸບັນ ເສດຖະກິດໂລກຈະຕົກຢູ່ໃນສະພາບຖົດຖອຍກໍຕາມ, ແຕ່ອັດຕາການເຕີບໂຕເສດຖະກິດຂອງສປປລາວຍັງຢູ່ 4,8%. ພາຍໃຕ້ຂໍ້ລິເລີ່ມ “ໜຶ່ງແລວທາງໜຶ່ງເສັ້ນທາງ” ແລະ ຂອບການຮ່ວມມື “ແມ່ນ້ຳລ້ານຊ້າງ-ແມ່ນ້ຳຂອງ", ການນໍາຂອງສອງປະເທດ ເອົາໃຈໃສ່ຢ່າງຕັ້ງໜ້າຮ່ວມກັນປັບປຸງກົນໄກການຮ່ວມມືຢ່າງຮອບດ້ານ, ສະໜັບສະໜູນນັກລົງທຶນຈີນເຂົ້າມາລົງທຶນໃນຂົງເຂດຕ່າງໆເປັນ ຕົ້ນ ບໍ່ແຮ່, ອຸດສາຫະກໍາ, ກະສິກໍາ, ການທ່ອງທ່ຽວ, ການຂົນສົ່ງ ແລະ ອື່ນໆ; ຫວັງວ່າໂດຍຜ່ານເວທີນິຄົມອຸດສາຫະກໍາອັດສະລິຍະອາຊີ-ໂປຕາສສາກົນນີ້, ຈະສາມາດດຶງດູດນັກລົງທຶນໄດ້ຫລາຍຂຶ້ນ.
ທ່ານ ວັນໄຊ ພອງສະຫວັນ ໄດ້ແນະນໍາກ່ຽວກັບທ່າແຮງຂອງແຂວງຄໍາມ່ວນ ໂດຍມີ 3 ທ່າແຮງຫລັກຄື: ພະລັງງານ-ບໍ່ແຮ່, ກະສິກໍາ-ປ່າໄມ້ ແລະ ການບໍລິການ-ທ່ອງທ່ຽວ. ທ່ານໄດ້ກ່າວວ່າ: ບໍລິສັດອາຊີ-ໂປຕາສສາກົນ ເປັນບໍ ລິສັດ ທີ່ມີການພັດທະນາຢ່າງວ່ອງໄວ ແລະ ມີຄຸນນະພາບ ເຊິ່ງກວມເອົາອັດຕາສ່ວນການລົງທຶນຕ່າງປະເທດຫລາຍທີ່ສຸດ ຢູ່ແຂວງຄຳມ່ວນ, ເຂດນິຄົມອຸດສາຫະກຳອາຊີ-ໂປຕາສສາກົນ ມີແນວໂນ້ມການພັດທະນາຢ່າງກວ້າງໄກ, ແຂວງຄຳມ່ວນຍິນດີຕ້ອນຮັບບັນດາວິສາຫະກິດຈີນເຂົ້າມາລົງທຶນ ແລະ ຍິນດີໃຫ້ການສະໜັບສະໜູນອຳນວຍຄວາມສະດວກຢ່າງເຕັມສ່ວນ.
ຮູບແບບຂອງນິຄົມອຸດສາຫະກຳຊ່ວຍດຶງດູດການລົງທຶນໄດ້ຢ່າງຊັດເຈນ ແລະ ເຊື່ອມໂຍງລະບົບຕ່ອງໂສ້ອຸດສາຫະກຳໂລກ.
ໃນເວລາ 17:00 ໂມງຂອງວັນດຽວກັນ, ກອງປະຊຸມປະຊາສໍາພັນການລົງທຶນ ແລະ ພິທີເຊັນບົດບັນທຶກການຮ່ວມມືລົງທຶນຢູ່ນິຄົມອຸດສາຫະກໍາອັດສະລິຍະອາຊີ-ໂປຕາສສາກົນ ໄດ້ໄຂຂຶ້ນຢ່າງເປັນທາງການ ໂດຍມີ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ, ທ່ານ ວັນໄຊ ພອງສະຫວັນ ເຈົ້າແຂວງແຂວງຄໍາມ່ວນ, ທ່ານ ໄຊຊະນະ ສິດທິພອນ ຮອງປະທານຄະນະກໍາມະການຮ່ວມມືລາວ-ຈີນ, ທ່ານ ສົມຈິດ ອິນທະມິດ ທີ່ປຶກສາສະພາການຄ້າ ແລະ ອຸດສາຫະກໍາແຫ່ງຊາດລາວ, ທ່ານ Guo Baichun ປະທານບໍລິສັດອາຊີ-ໂປຕາສສາກົນ ຈໍາກັດ, ທ່ານ Chen Jing ຮອງເຈົ້ານະຄອນຮ່ວຍຮວາ ສປ ຈີນ, ທ່ານ Wang Xiaokang ປະທານສະມາຄົມອຸດສາຫະກໍາປະຢັດພະລັງງານ ແລະ ການຜະລິດສະອາດ ສປ ຈີນ ແລະ ທ່ານ Wang Xiaofeng ປະທານສະມາຄົມເກືອອະນົງຄະທາດ ສປ ຈີນ, ມີ ບັນດາການນໍາຂັ້ນສູນກາງ, ການນໍາແຂວງຄໍາມ່ວນ, ທ່ານ ຂວັນໃຈ ອ່ຽມສຸດທິ ທີ່ປຶກສາສະ ຖານທູດແຫ່ງ ສປປ ລາວ ປະຈໍາ ສປ ຈີນ, ທ່ານ ນາງ ວັນເພັງ ໄຊສົມພູ ກົງສຸນໃຫຍ່ແຫ່ງ ສປປ ລາວ ປະຈຳກວາງໂຈວ ສປ ຈີນ, ຄະນະບໍລິຫານຂອງອາຊີ-ໂປຕາສສາກົນ, ມີບັນດາວິສາຫະກິດທີ່ຈະເຂົ້າປະຈໍານິຄົມ, ວິສາຫະກິດທີ່ມີເຈດຈໍານົງລົງທຶນ, ອົງກອນລົງທຶນ, ອົງກອນການເງິນຫລາຍປະເທດ ແລະ ຜູ້ຊ່ຽວຊານຕ່າງໆລວມທັງໝົດ 300 ກວ່າຄົນ ເຂົ້າຮ່ວມງານຍິ່ງໃຫຍ່ຄັ້ງນີ້.
ໃນໄລຍະເລີ່ມຕົ້ນພິທິ, ອາຊີ-ໂປຕາສສາກົນ ໄດ້ຈັດສະແດງໃຫ້ເຫັນກ່ຽວກັບ ການວາງແຜນນິຄົມອຸດສາຫະກໍາອັດສະລິຍະ, ສະພາບການກໍ່ສ້າງ ແລະ ດໍາເນີນກິດຈະການ, ຮູບພາບການວາງແຜນນິຄົມອຸດສາຫະກໍາທີ່ສວຍງາມ ແລະທັນສະໄໝ, ການກໍ່ສ້າງໂຄງການທີ່ກໍາລັງຄຶກຄື້ນ, ສະພາບການຜະລິດທີ່ບໍ່ມີເວລາວ່າງແຕ່ເປັນລະບຽບ, ສາຍການຜະ ລິດທີ່ມີມາດຕະຖານວິຊາສະເພາະ, ຊຸດປະກອບນິຄົມອຸດສາຫະກໍາທີ່ສົມບູນແບບ ແລະ ຮູບພາບອື່ນໆ ໄດ້ສະແດງໃຫ້ເຫັນແນວໂນ້ມການພັດທະນາອັນເຂັ້ມແຂງຂອງນິຄົມອຸດສາຫະກໍາທີ່ເລີ່ມຈາກສູນ, ຈາກນ້ອຍຫາໃຫຍ່ ແລະ ຈາກໃຫຍ່ຫາເຂັ້ມແຂງ.
ໃນພິທິລົງນາມ, ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າໄດ້ເຊື້ອເຊີນໄປຍັງບັນດານັກທຸລະກິດແລະນັກລົງທຶນສປຈີນ. ທ່ານກ່າວວ່າ: ປະເທດລາວແລະປະເທດຈີນເປັນປະເທດເພື່ອນບ້ານທີ່ມີສາຍພູ ແລະ ສາຍນໍ້າຕິດຈອດກັນ, ປັດຈຸບັນ ສປ ຈີນ ໄດ້ກາຍເປັນປະເທດທີ່ລົງທຶນໃຫຍ່ທີ່ສຸດຂອງລາວ, ທັງສອງຝ່າຍມີທ່າແຮງພັດທະນາອຸດສາຫະກໍາ ແລະ ກະສິກໍາທັນສະໄໝ ໂດຍບົນພື້ນຖານຫລັກການຮ່ວມປະດິດສ້າງ, ຮ່ວມແບ່ງປັນ ແລະ ຮ່ວມຜົນປະໂຫຍດ. ອຸດສາຫະກໍາແຮ່ທາດ ແລະ ເຄມີຖືກກໍານົດເປັນ 1 ໃນ 8 ອຸດສາຫະກໍາບູລິມະສິດໃນແຜນພັດທະນາອຸດສາຫະກໍາປຸງແຕ່ງປີ 2021-2025 ຂອງ ສປປ ລາວ, ແຂວງຄໍາມ່ວນ ຖືກກໍານົດເປັນ 1 ໃນ 5 ຈຸດສູນກາງພັດທະນາເສດຖະກິດຂອງປະເທດ, ເຊິ່ງທັງໝົດນີ້ ລ້ວນແຕ່ເປັນການສະໜັບສະໜູນທີ່ແຂງແກ່ນ ໃນການກໍ່ສ້າງນິຄົມອຸດສາຫະກໍາໝູນວຽນອັດສະລິຍະອາຊີ-ໂປຕາສສາກົນ. ລັດຖະບານລາວ ຈະໃຫ້ການສະໜັບສະໜູນຢ່າງເຕັມສ່ວນຕໍ່ການພັດທະນານິຄົມອຸດສາຫະກໍາ, ຫວັງຢ່າງຍິ່ງວ່າພາຍໃຕ້ການເຂົ້າຮ່ວມກໍ່ສ້າງຂອງທຸກຝ່າຍ, ນິຄົມອຸດສາຫະກໍາຈະກາຍເປັນໜຶ່ງໃນຕົວແບບທີ່ດີ ໃນການພັດທະນາອຸດສາຫະກໍາປຸງແຕ່ງແຮ່ທາດແບບຄົບວົງຈອນ, ປະກອບສ່ວນເຂົ້າສ້າງລາຍຮັບແກ່ງົບປະມານແຫ່ງຊາດ, ພັດທະນາທ້ອງຖິ່ນ ແລະ ສ້າງຊື່ສຽງໃຫ້ແກ່ອຸດສາຫະກໍາບໍ່ແຮ່ລາວ.
ທ່ານ ວັນໄຊ ພອງສະຫວັນ ໄດ້ຕີລາຄາສູງຕໍ່ຄວາມສໍາຄັນ ຂອງນິຄົມອຸດສາຫະກໍາໝູນວຽນອັດສະລິຍະອາຊີ-ໂປຕາສສາກົນ ໂດຍທ່ານໄດ້ກ່າວວ່າ: ນິຄົມອຸດສາຫະກໍາດັ່ງກ່າວ ເປັນການພັດທະນາຊັບພະຍາກອນແບບນະວັດຕະກໍາໃໝ່, ຈະຊ່ວຍທ້ອງຖິ່ນສ້າງລະບົບອຸດສາຫະກໍາທີ່ສົມບູນ ເຊິ່ງມີບົດບາດສໍາຄັນທີ່ສຸດຕໍ່ການພັດທະນາເສດຖະກິດຂອງແຂວງຄໍາມ່ວນ ກໍຄື ຂອງ ສປປ ລາວ. ແຂວງຄໍາມ່ວນ ຈະອີງໃສ່ 3 ທ່າແຮງ ໂດຍຖືເອົານິຄົມອຸດສາຫະກໍາໝູນວຽນອັດສະລິຍະອາຊີ-ໂປຕາສສາກົນ ເປັນໃຈກາງພັດທະນາ, ປັບປຸງການເຊື່ອມໂຍງບັນດາວິສາຫະກິດຈີນທີ່ມີຄຸນນະພາບ, ບົນພື້ນຖານການເຄົາລົບຂໍ້ກໍານົດກົດໝາຍ ແລະ ລະບຽບການຂອງລາວ, ຊຸກຍູ້ການລົງທຶນທີ່ອໍານວຍຄວາມສະດວກ, ວ່ອງໄວ, ໂປ່ງໄສ ແລະ ຍຸຕິທໍາ, ສ້າງສະພາບແວດລ້ອມການລົງທຶນທີ່ປອດໄພແລະເຊື່ອໝັ້ນໄດ້, ຍິນດີຕ້ອນຮັບບັນດາວິສາຫະກິດລົງທຶນເຂົ້າມາຮ່ວມກັນພັດທະນາແລະເສີມຂະຫຍາຍຕະຫຼາດຢູ່ແຂວງຄໍາມ່ວນ, ສືບຕໍ່ສ້າງຕ່ອງໂສ້ອຸດສາຫະກໍາຂະໜາດໃຫຍ່ແລະເຂັ້ມແຂງ, ສ້າງຕົວແບບການຮ່ວມມືເສດຖະກິດລາວ-ຈີນ, ບັນລຸຮູບແບບໃໝ່ຂອງການພັດທະນາແບບຫລາຍຝ່າຍ ແລະ ຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ.
ທ່ານ Ma Yingjun ອໍານວຍການບໍລິສັດອາຊີ-ໂປຕາສສາກົນ ຈໍາກັດ ໄດ້ກ່າວວ່າ: ອາຊີ-ໂປຕາສສາກົນ ໄດ້ກາຍເປັນວິສາຫະກິດຝຸ່ນໂປຕາສລະດັບສາກົນ ທີ່ມີຊັບພະຍາກອນເກືອໂປຕາສຫລາຍທີ່ສຸດໃນອາຊີ, ມີຂະໜາດໃຫຍ່ທີ່ສຸດໃນອາຊີອາຄະເນ ແລະ ມີການຜະລິດທີ່ໄວທີ່ສຸດໃນໂລກ ເຊິ່ງເບື້ອງຫລັງຂອງຄວາມສໍາເລັດ “ຄວາມໄວຂອງອາຊີ-ໂປຕາສ” ແລະ “ຕໍານານຂອງລາວ” ແມ່ນມາຈາກການສະໜັບສະໜູນ ແລະ ການຊີ້ນໍາຢ່າງໃກ້ຊິດຂອງລັດຖະບານລາວ. ໃນນາມເປັນໂຄງການສັນຍາລັກຂອງການຮ່ວມມືລະຫວ່າງພາກລັດ ແລະ ວິສາຫະກິດຈີນ, ນິຄົມອຸດສາຫະກໍາໄດ້ລວມເອົາການກໍ່ສ້າງຫັນເປັນອຸດສາຫະກໍາ, ຫັນເປັນຕົວເມືອງ ແລະ ຫັນກະສິກໍາເປັນທັນສະໄໝ, ພ້ອມທັງຊຸກຍູ້ຂະແໜງ ການບໍລິການເລັ່ງການພັດທະນາ, ຄຽງຄູ່ກັບການເພີ່ມທະວີຢ່າງແຮງຄວາມອາດສາມາດ ພັດທະນາຕົນເອງແບບຍືນຍົງຂອງບັນດາວິສາຫະກິດ, ຊຸກຍູ້ ສປປ ລາວ ໃນການປະກອບສ້າງອຸດສາຫະກໍາທົດແທນການນໍາເຂົ້າ ແລະ ການສົ່ງອອກເພື່ອສ້າງລາຍຮັບເງິນຕາຕ່າງປະເທດ, ຢູ່ໃນດິນແດນທີ່ອຸດົມສົມບູນ ສໍາລັບການລົງທຶນທີ່ມີການພັດທະນາຢ່າງວ່ອງໄວຂອງລາວນີ້, ພວກຂ້າພະເຈົ້າມີຄວາມໝັ້ນໃຈໃນການເພີ່ມທະວີ ປະກອບສ່ວນເຂົ້າໃນການຮ່ວມມື ລາວ-ຈີນ.
ທ່ານ Tong Yongheng ຮອງອໍານວຍການບໍລິສັດອາຊີ-ໂປຕາສສາກົນ ແລະ ຜູ້ຮັບຜິດຊອບຖານການຜະ ລິດຝຸ່ນໂປຕາສຢູ່ລາວ ໄດ້ແນະນໍາສະພາບການພັດທະນາໃນນິຄົມອຸດສາຫະກໍາ ວ່າ: ນິຄົມອຸດສາຫະກໍາໝູນວຽນອັດສະລິຍະອາຊີ-ໂປຕາສສາກົນ ໄດ້ດຳເນີນຢູ່ແຂວງຄໍາມ່ວນ ສປປ ລາວ, ອີງໃສ່ທ່າແຮງທີ່ເປັນເອກະລັກດ້ານຊັບພະຍາກອນ, ພະລັງງານ, ຕະຫລາດ, ຕົ້ນທຶນ ແລະ ອື່ນໆ, ເປີດກວ້າງເຕົ້າໂຮມບັນດາວິສາຫະກິດຊັ້ນນໍາຈາກທົ່ວໂລກ ເຂົ້າມາປະຈໍານິ ຄົມ, ຮູບແບບການພັດທະນາເປັນກຸ່ມອຸດສາຫະກໍາ ຈະສົ່ງຜົນສະທ້ອນທາງການຮ່ວມມືອຸດສາຫະກໍາທີ່ເຂັ້ມແຂງ. ນິຄົມອຸດສາຫະກໍາແບ່ງເປັນ 3 ພາກສ່ວນໃຫຍ່ຄື: ເຂດອຸດສາຫະກໍາຝຸ່ນໂປຕາສ, ເຂດອຸດສາຫະກໍາອະໂປຕາສ ແລະ ເຂດຕົວເມືອງອາຊີ-ໂປຕາສ, ເຊິ່ງກວມເນື້ອທີ່ດິນທັງໝົດ 2.000 ເຮັກຕາ, ຄາດຄະເນການລົງທຶນທັງໝົດຈະບັນລຸເຖິງ 4,31 ຕື້ໂດລາ. ປັດຈຸບັນ, ຍັງຢູ່ໃນໄລຍະສົ່ງເສີມ ແລະ ດຶງດູດການລົງທຶນ, ຄາດຄະເນໃນທ້າຍປີ 2026 ຈະສໍາເລັດວຽກງານກໍ່ສ້າງໂຄງການໄລຍະກາງ, ເຊິ່ງລວມມີການກໍ່ສ້າງເຂດອຸດສາຫະກໍາເຄມີເກືອ ທີ່ຕິດພັນກັບຂະໜາດໂຄງການຝຸ່ນໂປຕາສ 5 ລ້ານໂຕນ; ທ້າຍປີ 2028 ຈະສໍາເລັດວຽກງານກໍ່ສ້າງໂຄງການທັງໝົດ. ໃນອະນາຄົດ, ຈະສືບຕໍ່ດຶງດູດນັກລົງ ທຶນ, ເພີ່ມທະວີການໝູນໃຊ້ຊັບພະຍາກອນແບບໝູນວຽນຂອງ ອຸດສາຫະກໍາຕົ້ນນໍ້າ ແລະ ປາຍນໍ້າ, ສ້າງລະບົບນິເວດຕ່ອງໂສ້ອຸດສາຫະກໍາຢ່າງຮອບດ້ານ, ຮ່ວມກັນກັບລັດຖະບານລາວ ເພື່ອຊຸກຍູ້ການພັດທະນາການຫັນອຸດສາຫະກໍາທັນສະໄໝ, ການຫັນກະສິກໍາທັນສະໄໝ ແລະ ການຫັນເປັນຕົວເມືອງ.
ທ່ານ Cao Lixiang ປະທານບໍລິສັດເຫິງກວງຮຸ້ນສ່ວນ ຈໍາກັດ ໄດ້ຕາງໜ້າບັນດາວິສາຫະກິດທີ່ເຊັນບົດບັນ ທຶກການຮ່ວມມືລົງທຶນຄັ້ງນີ້ ປະກອບຄໍາເຫັນວ່າ: ໂຄງການຄລໍ-ອັນຄາໄລ (chlor-alkali) ໃນນິຄົມອຸດສາຫະກໍາໝູນ ວຽນອັດສະລິຍະອາຊີ-ໂປຕາສສາກົນ ເປັນໂຄງການລົງທຶນຕ່າງປະເທດແຫ່ງທໍາອິດຂອງບໍລິສັດ, ປັດຈຸບັນ ການກໍ່ສ້າງໂຄງການຄລໍ-ອັນຄາໄລເນື້ອເຫຍື່ອໄອອອນ (ion membrane chlor-alkali) ຂະໜາດ 30.000 ໂຕນ/ປີໄລຍະທີ 1 ກໍາລັງເລັ່ງຄວາມຄືບໜ້າ ແລະ ຈະສໍາເລັດໃນທ້າຍເດືອນ 9 ປີນີ້. ໃນອະນາຄົດ, ບໍລິສັດຈະຕັ້ງຖານການຜະລິດຢູ່ລາວ, ດ້ານໜຶ່ງແມ່ນຖືເອົາຕ່ອງໂສ້ອຸດສາຫະກໍາໃນນິຄົມເປັນພື້ນຖານ, ກໍ່ສ້າງໂຄງການທີ່ມີທ່າແຮງ ເຊັ່ນ: ໂຊດຽມ, ແມັກນີຊຽມ, ຊູນຟູຣິກ, ຄລໍຣິນ ແລະ ອຸດສາຫະກໍາເຄມີອື່ນໆ. ອີກດ້ານໜຶ່ງແມ່ນກໍາແໜ້ນກາລະໂອກາດແຫ່ງປະຫວັດສາດ, ກໍ່ສ້າງໂຄງການປຸ໋ຍເຄມີ ແລະ ຢາປາບສັດຕູພືດຈໍານວນໜຶ່ງ, ຊຸກຍູ້ການພັດທະນາກະສິກໍາໄປສູ່ອຸດສາຫະກໍາຂອງລາວ, ຮັບພາລະໜ້າທີ່ຄວາມຮັບຜິດຊອບດ້ານສັງຄົມ. ພາຍໃຕ້ຂໍ້ລິເລີີ່ມ “ໜຶ່ງແລວໜຶ່ງເສັ້ນທາງ” ອີງໃສ່ຂໍ້ໄດ້ປຽບດ້ານຊັບພະ ຍາກອນທໍາມະຊາດທີ່ອຸດົມສົມບູນ ແລະ ສະພາບແວດລ້ອມການລົງທຶນທີ່ດີຂອງປະເທດລາວ, ເພິ່ງພາອາໄສເວທີນິຄົມອຸດສາຫະກໍາໝູນວຽນອັດສະລິຍະອາຊີ-ໂປຕາສສາກົນ ເພື່ອບັນລຸຕ່າງຝ່າຍຕ່າງໄດ້ຮັບຜົນປະໂຫຍດລະຫວ່າງຍຸດທະສາດການພັດທະນາຢູ່ຕ່າງປະເທດຂອງບໍລິສັດ ແລະ ການພັດທະນາເສດຖະກິດ ແລະ ສັງຄົມຂອງ ສປປ ລາວ.
ໂຄງການທີ່ເຊັນບົດບັນທຶກການຮ່ວມມືລົງທຶນຄັ້ງນີ້, ມີແນວໂນ້ມອຸດສາຫະກໍາທີ່ຊັດເຈນ ເຊິ່ງລວມມີໂຄງການອຸດສາຫະກໍາທັນສະໄໝ ທີ່ເປັນອຸດສາຫະກໍາຕົ້ນນໍ້າ ແລະ ປາຍນໍ້າ ເປັນຕົ້ນ ໂຄງການໂບຣມິນ (Bromine), ໂຊດຽມຄລໍເຣດ, ຄລໍ-ອັນຄາໄລ, ອາຊິດນິຕຣິກ, ເກືອອຸດສາຫະກໍາ, ແຄນຊຽມຄາໄບ/PVC ແລະ ອື່ນໆ, ພ້ອມທັງໂຄງການກະສິກໍາທັນສະໄໝ ເປັນຕົ້ນ ໂຄງການປູກເຂົ້າ ແລະ ອື່ນໆ, ໂຄງການທີ່ກ່ຽວຂ້ອງກັບການພັດທະນາໝູນໃຊ້ຊັບພະຍາກອນແລະ ການຜະລິດອັດສະລິຍະ. ການເຊັນບົດບັນທຶກການຮ່ວມມືລົງທຶນຢ່າງເປັນທາງການ ທີ່ຕິດພັນຂອງວິສາຫະກິດເປັນຄວາມສໍາເລັດບາດກ້າວໜຶ່ງຂອງຕ່ອງໂສ້ອຸດສາຫະກໍາ ແລະ ເປັນກໍາລັງແຮງໃໝ່ ໃຫ້ແກ່ການສ້າງ ສປປ ລາວ ເປັນບ່ອນຮອງຮັບການຍົກຍ້າຍຕ່ອງໂສ້ອຸດສາຫະກໍາຈາກທົ່ວໂລກ.
ພາຍໃຕ້ການເອົາໃຈໃສ່ຊີ້ນຳ-ນຳພາຢ່າງຕັ້ງໜ້າຂອງພັກ ແລະ ລັດຖະບານລາວໃນການສ້າງສະພາບແວດລ້ອມການລົງທຶນທີ່ປອດໄພ ແລະ ເຊື່ອໝັ້ນໄດ້ ໂດຍຖືຮູບແບບນິຄົມອຸດສາຫະກໍາທີ່ຕາງໜ້າໂດຍ ນິຄົມອຸດສາຫະກໍາໝູນ ວຽນອັດສະລິຍະອາຊີ-ໂປຕາສສາກົນ ຈະກາຍເປັນເຂດພັດທະນາລະດັບສູງໃໝ່ ທີ່ຊຸກຍູ້ການພັດທະນາອຸດສາຫະກໍາຂອງລາວ. ໃນນາມເປັນເວທີພົ້ນເດັ່ນຂອງການລວບລວມຊັບພະຍາກອນຊັ້ນນໍາ, ພາຍໃຕ້ການຮ່ວມຊຸກຍູ້ລະຫວ່າງລັດຖະບານລາວ ແລະ ອາຊີ-ໂປຕາສສາກົນ, ນິຄົມອຸດສາຫະກໍາຈະສືບຕໍ່ດຶງດູດການລົງທຶນ, ເສີມຂະຫຍາຍຂະໜາດ, ຖືເອົາວິສາຫະກິດທີ່ດີເປັນເຄື່ອງຈັກໃນການພັດທະນາ, ນໍາໃຊ້ການປະຊາສໍາພັນການລົງທຶນທີ່ຊັດເຈນຂອງຕ່ອງໂສ້ອຸດສາຫະກໍາເພື່ອສົ່ງເສີມໃຫ້ ສປປ ລາວ ພັດທະນາເສດຖະກິດຢ່າງມີຄຸນນະພາບສູງ.
KPL
