ຂປລ
ເມື່ອບໍ່ດົນມານີ້, ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ/LNCCI) ຈັດກອງປະຊຸມປຶກສາຫາລືສາມຝ່າຍ ຄັ້ງທີ 1 ກ່ຽວກັບການພັດທະນາບົດແນະນຳແຫ່ງຊາດ ວ່າດ້ວຍການດຳເນີນທຸລະກິດຢ່າງມີຄວາມຮັບຜິດຊອບ (Responsible Business Conduct-RBC) ໃນ ສປປ ລາວ ເພື່ອເປີດເວທີໃຫ້ຜູ້ຕາງໜ້າຈາກພາກລັດ, ອົງກອນຕາງໜ້າຜູ້ອອກແຮງງານ, ຜູ້ໃຊ້ແຮງງານ, ສະມາຄົມທຸລະກິດ, ວິສາຫະກິດ, ອົງການແຮງງານສາກົນ (ILO) ແລະ ພາກສ່ວນກ່ຽວຂ້ອງ ໄດ້ຮ່ວມແລກປ່ຽນຄຳເຫັນ ເພື່ອເສີມສ້າງຄວາມເຂົ້າໃຈຮ່ວມກັນກ່ຽວກັບ RBC.
ໃນກອງປະຊຸມ, ຜູ້ເຂົ້າຮ່ວມໄດ້ປຶກສາຫາລືກ່ຽວກັບສະພາບຕົວຈິງ, ຄວາມຕ້ອງການ ແລະ ຂໍ້ຈຳກັດຂອງວິສາຫະກິດລາວ ໂດຍສະເພາະຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (MSMEs) ເພື່ອໃຫ້ບົດແນະນຳທີ່ຈະພັດທະນາຂຶ້ນ ມີຄວາມເຂົ້າໃຈງ່າຍ, ນຳໃຊ້ໄດ້ຈິງ ແລະ ເໝາະສົມກັບວິສາຫະກິດທຸກຂະໜາດ. ພ້ອມນີ້, ຍັງໄດ້ທົບທວນ ແລະ ປຶກສາຫາລືຮ່າງອົງປະກອບ ແລະ ຂອບເຂດໜ້າທີ່ຂອງກຸ່ມ “ຜູ້ຕາງໜ້າ RBC” ຫຼື RBC Champions. ກຸ່ມດັ່ງກ່າວ ຖືກສະເໜີໃຫ້ເປັນກົນໄກສຳລັບການປຶກສາຫາລື, ການຮ່ວມພັດທະນາ, ການທົບທວນ ແລະ ການຮ່ວມກຳນົດທິດທາງຂອງບົດແນະນຳ.
ໂອກາດນີ້, ທ່ານ ໄຊບັນດິດ ຣາຊະພົນ ຮອງປະທານສະພາການຄ້າ ແລະ ອຸດສາຫະກຳ ແຫ່ງຊາດລາວ ໄດ້ເນັ້ນເຖິງຄວາມພ້ອມຂອງ ສຄອຊ ໃນການສະໜັບສະໜູນ ແລະ ເປັນຫຼັກໃນການປະສານງານໂຄງການລິເລີ່ມນີ້. ສຄອຊ ພ້ອມທີ່ຈະເປັນຫຼັກໃນການຈັດຕັ້ງປະຕິບັດໂຄງການລິເລີ່ມນີ້ ໃນຖານະອົງກອນຕາງໜ້າຜູ້ໃຊ້ແຮງງານ, ແຕ່ການພັດທະນາ RBC ບໍ່ສາມາດເຮັດໂດຍຝ່າຍໃດຝ່າຍໜຶ່ງ ພວກເຮົາຕ້ອງການຄຳເຫັນ ແລະ ການແລກປ່ຽນປະສົບການຈາກພາກລັດ, ສູນກາງສະຫະພັນກຳມະບານລາວ, ສະມາຄົມທຸລະກິດ ແລະ ວິສາຫະກິດ.
ພ້ອມກັນນີ້, ທ່ານ ວິບູນ ສິດທິມໍລະດາ ຄະນະບໍລິຫານງານ ສຄອຊ ກໍໄດ້ເນັ້ນເຖິງຄວາມສຳຄັນທາງຍຸດທະສາດຂອງ RBC ຕໍ່ການກະກຽມຄວາມພ້ອມຂອງວິສາຫະກິດລາວ ໃນໄລຍະການປ່ຽນຜ່ານຂອງປະເທດ. ໃນຂະນະທີ່ ສປປ ລາວ ກຳລັງກະກຽມກ້າວພົ້ນຈາກສະຖານະປະເທດດ້ອຍພັດທະນາ (LDC), ການດຳເນີນທຸລະກິດຢ່າງມີຄວາມຮັບຜິດຊອບຈະມີຄວາມຈຳເປັນຢ່າງຍິ່ງຕໍ່ການຮັກສາໂອກາດໃນການເຂົ້າເຖິງຕະຫຼາດ ແລະ ການເສີມສ້າງຂີດຄວາມສາມາດໃນການແຂ່ງຂັນຂອງວິສາຫະກິດລາວ, ແຜນວຽກງານທີ່ມີຄຸນຄ່າ ແລະ ເປັນທຳ (DWCP) ສະບັບໃໝ່ ເປັນເວທີສຳຄັນໃນການຊ່ວຍໃຫ້ພາກທຸລະກິດກະກຽມຄວາມພ້ອມ ສຳລັບການປ່ຽນຜ່ານດັ່ງກ່າວ.
ຂໍ້ມູນ-ພາບ: ສຄອຊ
KPL
