ຂປລ
ຂປລ. ໃນໄລຍະ 5 ເດືອນຕົ້ນປີ 2023 ນີ້, ບໍລິສັດທາງລົດໄຟລາວ-ຈີນ ສາມາດດຳເນີນການຂົນສົ່ງສິນຄ້າຜ່ານທາງລົດໄຟ ໄດ້ທັງໝົດ 1.741.590 ໂຕນ. ໃນນີ້, ຂົນສົ່ງສິນຄ້າໄປ ສປ ຈີນ ໄດ້ 1.580.680 ໂຕນ,
ຂປລ. ໃນໄລຍະ 5 ເດືອນຕົ້ນປີ 2023 ນີ້, ບໍລິສັດທາງລົດໄຟລາວ-ຈີນ ສາມາດດຳເນີນການຂົນສົ່ງສິນຄ້າຜ່ານທາງລົດໄຟ ໄດ້ທັງໝົດ 1.741.590 ໂຕນ. ໃນນີ້, ຂົນສົ່ງສິນຄ້າໄປ ສປ ຈີນ ໄດ້ 1.580.680 ໂຕນ, ຂົນສົ່ງສິນຄ້າຈາກຈີນມາລາວ 160.910 ໂຕນ, ເຊິ່ງ ສິນຄ້າສົ່ງອອກປະກອບມີ: ຢາງພາລາ, ແຮ່ເຫລັກ, ແຮ່ສັງກະສີ, ຫີນສົ້ມ, ໝາກໄມ້, ແປ້ງມັນຕົ້ນ, ເຂົ້າບາເລ. ສ່ວນສິນຄ້ານຳເຂົ້າ ມີ: ເຄື່ອງໃຊ້ໄຟຟ້າ, ເຄື່ອງໃຊ້ໃນຄົວເຮືອນ, ເຄື່ອງນຸ່ງຫົ່ມ, ອຸປະກອນລົດຈັກ, ລົດໃຫຍ່ ແລະ ອື່ນໆ.
ທ່ານ ໂອເລ້ ສີພານິດ ຫົວໜ້າໜ່ວຍງານຂົນສົ່ງສິນຄ້າ ໄດ້ໃຫ້ສຳພາດ ຕໍ່ສື່ມວນຊົນ ໃນວັນທີ 5 ມິຖຸນາ 2023 ຜ່ານມານີ້ວ່າ: ນັບແຕ່ເລີ່ມເປີດທາງລົດໄຟລາວ-ຈີນ ເປັນຕົ້ນມາ, ຮອດວັນທີ 5 ມິຖຸນາ 2023, ບໍລິສັດທາງລົດໄຟລາວ-ຈີນ ສາມາດດຳເນີນການຂົນສົ່ງສິນຄ້າໄດ້ທັງໝົດ 4.097.300 ໂຕນ. ໃນນັ້ນ, ຂົນສົ່ງສິນຄ້າຈາກ ສປປ ລາວໄປ ສປ ຈີນໄດ້ປະມານ 3.450.000 ກວ່າໂຕນ, ຂົນສົ່ງສິນຄ້າຈາກຈີນມາລາວ 650.900 ກວ່າໂຕນ, ໃນນັ້ນ, ປະກອບມີຢາງພາລາ, ແຮ່ເຫລັກ, ເຂົ້າ, ຖ່ານ, ແປ້ງມັນຕົ້ນ,ແຮ່ສັງກະສີ, ແຮ່ເຫລັກ, ເຄື່ອງໃຊ້ປະຈໍາວັນ, ເຂົ້າບາເລ,ໝາກໄມ້ ແລະ ອື່ນໆ, ນອກນັ້ນ, ສິນຄ້າທີ່ນຳເຂົ້າຈາກ ສປ ຈີນບາງສ່ວນແມ່ນຍັງສົ່ງອອກໄປຫວຽດນາມ,ໄທ,ກຳປູເຈຍ,ມຽນມາ ແລະ ໝາກໄມ້ບາງຊະນິດແມ່ນຂົນສົ່ງຈາກໄທຜ່ານລາວໄປຈີນໂດຍນຳໃຊ້ທາງລົດໄຟ ລາວ-ຈີນ. ສະເພາະການສົ່ງອອກແປ້ງມັນຕົ້ນ ແມ່ນສາມາດຂົນ ສົ່ງໄດ້ ປະມານ 1.52.084 ໂຕນ, ໃນຂະນະທີ່ປີ 2022 ຜ່ານມາ, ສາມາດຂົນສົ່ງໄດ້ 87.727 ໂຕນ ແລະ ໄລຍະ 5 ເດືອນຕົ້ນປີ 2023, ສາມາດຂົນສົ່ງສິນຄ້າ ໄດ້ທັງໝົດ 1.741.590 ໂຕນ.
ທ່ານ ໂອເລ້ ສີພານິດ ຍັງໃຫ້ຮູ້ອີກວ່າ: ເພື່ອເຮັດໃຫ້ສິນຄ້າປະເພດຕ່າງໆ ທີ່ມາຮອດສະຖານີມີຄວາມປອດໄພ, ທາງສະຖານີ ໄດ້ມີທີມງານກວດສອບ ຕູ້ສິນຄ້າແຕ່ລະປະເພດ ທີ່ມາຮອດສະຖາ ນີ ຜ່ານຂະບວນການ ແລະ ຂັ້ນຕອນ ຕ່າງໆທີ່ທັນສະໄໝ, ວ່ອງໄວ ເພື່ອຮັບປະກັນ ໃຫ້ສິນຄ້າ ມີຄວາມປອດໄພ ແລະ ຮອດຈຸດໝາຍປາຍທາງຢ່າງວ່ອງໄວ, ເຊິ່ງສິນຄ້າ ທີ່ໄດ້ດຳເນີນການຂົນສົ່ງ ສະເລ່ຍ 3 ຖ້ຽວຕໍ່ມື້.
ຂ່າວ: ທະນູທອງ
ພາບ: ເກດສະໜາ
KPL
